Read Ngemba 1 Korɨnto 13 Bible Online

1 Korɨnto 13 - Ngemba bible

1 Korɨnto 13

¹Be a be ngə́ ma chi gham mɨgham mɨ ŋwɔn mɨsɔŋ a ntsu kə ɨ kwiʼtɨ a nə bɨtsen bɨ ndá bɨ Ŋwi, lá nkaʼ nɨ akɔŋnɨ tsi muŋ ma tsi lá tsɛʼ tso nkəm za ɨ ghamnə kə tso ɨbabtɨ ɨbagɨ ɨtɨŋə tsa bɨ búʼnə́ ghe.

²Be a be ngə́ ma tsi nɨ mɨtən mɨ fɨʼtɨ mɨnkən ma mɨ lonɨ a mbó Ŋwi; be a be ngə́ ma tsi nɨ azhyɛ atsum ɨ kɨ zuʼ kɨ zhi ɨnu ɨtsum tsa ŋwɔn mɨsɔŋ a ntsu a chinɨ keʼ zhi; be a be ngə́ ma tsi nɨ abeməntəm atsum za ma chinɨ gham á mbám ɨ tsɔʼnɨ nkwebtɨ adiʼ — lá be ma tú nɨ akɔŋnɨ tsi muŋ ka ma be aghan azúm zə tsɛrə ghe.

³Be a be ngə́ ma chi gha atsum za ma tsinɨ nɨ zɛrə, be a be ngə́ ma chi nyɛʼtɨ ɨnye ɨzan á bɨ tɔn, lá be ma tú nɨ akɔŋnɨ tsi muŋ ma mɨ kaʼ azúm zə tsɛrə səŋə.

⁴Akɔŋnɨ a nɨ nchyɛ nɨ nchigə abɔʼnɨ ntəm ngɨ ɨbɔŋ ə; akɔŋnɨ a sě ngɨ́ə á ɨbɛn nchyɛ̌ nɨ aghɨʼnɨ, nkeʼ nkə́ ngɨ́ə a ɨbɛn ŋǔʼ ɨnye;

⁵ka akɔŋnɨ a ngɨə ayi á ɨbɛn nchyɛ̌ nɨ atságɨ́ kə á ɨbɛn nkɔ́ʼɔ́nɨ́ ɨnye ə. Ka akɔŋnɨ a ngɨə ayi á ɨbɛn njígə́ ngə́ á anu a bí a nye aza; ka a kə́ ngɨə ayi á ɨbɛn ngyáŋnə́ ndwɛ awa ntɔŋ, nkeʼ nkə́ ngɨə á ɨbɛn ndě ɨbvu a ntəm bo ghe.

⁶Ka akɔŋnɨ a ngɨə ayi á ɨbɛn ndórə́ nɨ ɨnu tsa ka tsɨ kuʼnɨ awa, lá mbaŋnə ndórə́ be nɨ ɨnu tsa tsɨ kuʼnɨnɨ ə.

⁷Akɔŋnɨ a ghɨə ɨbɛn chigɨnɨ ntəm a nye ɨnu ɨtsum ə. Akɔŋnɨ a ghɨə ɨbɛn nɨŋənɨ mɨntəm ɨma a nye ɨnu ɨtsum, nchyɛ̌ nɨ ntsiŋə nɨ ntəm ɨtsum a nye ɨnu ɨtsum nkə́ nkorɨ ntəm a nye ɨnu ɨtsum ə.

⁸Ka akɔŋnɨ a ndáʼə ndwitə ayi ɛ. Ɨsoŋ mɨnkən ma mɨ lonɨ a mbó Ŋwi ghɨ kyɛ́ntə́; azúm zə ghanɨ zə ngam mɨgham mɨ ɨtóm ɨtóm ghɨ miə; azhyɛ a chyɛ, lá a ghɨ lwitə.

⁹Mbɨ́ʼ ngə́ ɨdzúm tsɨ ghanɨ tsɨ azhyɛ abɔʼnɨ mɨnkən ma mɨ lonɨ a mbó Ŋwi tsi tsɛʼ akum ə;

¹⁰lá za a kɔʼnɨ ntɛm ngə́ tsáŋ a ghɨ ngyén, muŋ za a tsinɨ tsɛʼ akum a mɨ byékə́.

¹¹Ma bé mánkɨ́ə lá, ngámə́ tso mánkɨ́ə, nkwaʼtɨ ɨnu tso mánkɨ́ə nkə́ sháŋtɨ́ ɨnu tso mánkɨ́ə; a nkfu za ma tíʼnɨ́ tankaŋ lá ma nyɛ́ʼ ɨnu ɨghobə ghe.

¹²Anu za bɨgɨnə zɛ́nə́ tɨtsɔŋnɨ a tsi lá tso nɨnɨŋənɨŋə wu mbvurɨnɨ a mu malum ə; lá nkfu ghɨ nkuʼ bɨgɨnə bɨ Ŋwi mɨ lenɨnə ghe. Anu za ma zhinɨ tɨtsɔŋnɨ a tɛm a nkómə ghe; nkfu ghɨ kuʼ á kɔʼ nduŋə, ndon tso mbáʼ Ŋwi a zhinɨ aghan ɨ mɛtɨ lá.

¹³Adzaŋ za a benɨ lá, tsenə tsi tárə́ tsi ɨwu ə: abeməntəm, ntsiŋə nɨ ntəm ɨtsum abɔʼnɨ akɔŋnɨ ə; lá za a kɔʼnɨ nɔŋ atú tsɛrə ɨtsum a nɨ akɔŋnɨ ə.