Read Ngemba 1 Korɨnto 14 Bible Online

1 Korɨnto 14 - Ngemba bible

1 Korɨnto 14

¹Nɨ tsi nɨ ɨ tiʼ tǒkɨnə a nchyɛ́ nɨ akɔŋnɨ ə. Nɨ tɛgɨ mɨntəm ɨmən a nye ɨdzúm tsɨ ghanɨ tsɨ azhwi, tɨ́sə́n tɨ́sə́n, azúm zə ghanɨ zə sǒŋ nkən wa ɨ lonɨ a mbó Ŋwi ə.

²Ŋwɔn tsum wa a ghamnɨ mɨgham mɨ ɨtóm ɨtóm a sě ngámə́ lá a mbó ŋwɔn mɨsɔŋ a ntsu wu mɔʼɔ ghe; a ghamə lá a mbó Ŋwi mbɨ́ʼ ngə́ ka ŋwɔn tse a ndzúʼə nkə́ njíɛ ayi anu za a sóŋnə́ ghe. Azhwi a Ŋwi a gha mɨtən wəmbo a ngam nkənu za ɨ tsinɨ a nkubə nɨ mɛrə ghe.

³Lá ŋwɔn wa a sóŋnɨ́ nkən wa ɨ lonɨ a mbó Ŋwi a ghamə lá a mbó ɨbɛn nkwátə́ awa, ngwɔ́ŋtə́ awa nkə́ ndɛ́tɨ́ mɨntəm ɨma ghe.

⁴Ŋwɔn tsum wa a ghamnɨ mɨgham mɨ ɨtóm ɨtóm, a kwátə́ tsɛʼ atuəmbəm azhi ɛ, lá ŋwɔn wa a sóŋnɨ́ nkən wa ɨ lonɨ a mbó Ŋwi, a kwátɨ́ ndáŋwi tsum ə.

⁵A mɨ bɔŋ aghan mbáʼ be bən bɨtsum chi gham mɨgham mɨ ɨtóm ɨtóm; lá a mɨ bɔŋ aghan ɨ ghɛn nɨ mbyi mbáʼ be nɨ chi soŋ nkən wa ɨ lonɨ a mbó Ŋwi ə. Ŋwɔn wa a sóŋnɨ́ nkən wa ɨ lonɨ a mbó Ŋwi a tsa a ŋwɔn wa a ghamnɨ mɨgham mɨ ɨtóm ɨtom ə. A tú tsi nɨ mbe adzaŋ məwen, lá be ngə́ ŋwɔn a mɨ zagɨ tsi ɨwu wa a mɨ fɨʼtɨ anu za ŋwɔn wa a ghamnɨ mɨgham mɨ ɨtóm ɨtóm a sóŋnə́ taŋ á kwatɨ ndáŋwi tsum ə.

⁶Ma lan nə ɨbɔmbɨma ɨban, a mɨ kwatɨ awən a nye ake mbáʼ be ma yen a mbó bən ngǎm mɨgham mɨ ɨtóm ɨtóm le? A mɨ keʼ awən tsɛʼ mɨnyiə kwatə. A mɨ baŋnɨ kwatɨ awən mbáʼ be ma yen nɨ anu zə tse za Ŋwi a kyɛʼnɨ a mbó me kə azhyɛ zə tse kə nkən wu tse wa ɨ lonɨ a mbó Ŋwi kə zə tse anu za be ma diʼ awən nɨ zɛrə ghe.

⁷A bɨgɨnə lɔgɨ ɨdzúm mbǔʼ ɨkom tsa tsɨ se nɨ azhwi tsi tso nɨbaŋə kə aŋantɨ ə, o mɨ zhi ɨkom wa bɨ búʼnə́ lá ɨ nə́ mbáʼ be bɨ tú nɨbaŋə na fɛgɨ ɨ shiʼnɨ kə tú kɨ buʼ aŋantɨ za ɨ shiʼnɨ le?

⁸Be bɨ tú ntaŋ ɨ shiʼnɨ tɔŋ, bɨ mɨ tiʼ tsa lá ɨ nə́ ɨ kyaŋtɨ ɨnye a ntó ntso le?

⁹Ndəŋndəŋ, ŋwɔn wu mɔʼɔ a mɨ tiʼ zuʼ kɨ zhi anu za o sóŋnə́ lá ɨ nə́ mbáʼ be o ngámə́ be mɨgham mɨ ɨtóm ɨtóm le? Mɨgham ɨmo mɨ chwukɨ ayi a mu ɨfɛgɨ adaŋədaŋə ghe!

¹⁰Mɨgham mɨ atuəshe ghaʼ tsɛʼ nkə. Ka táʼ tse a tsi ayi tɨ anu za nɨ sóŋnə́ ghe.

¹¹Lá be ma tú zuʼnə nɨgham na ŋwɔn wu mɔʼɔ a ghamnə, lá be ngə́ ma nɨ ngyɛn-yenɨ wəmbo, wɛrə a kɨ mbe ngyɛn-yenɨ a mbó me ghe.

¹²Tso mbáʼ nɨ nyə́ŋnɨ́nə́ a nchyɛ́ nɨ ɨdzúm tsɨ ghanɨ tsɨ Azhwi lá, nɨ mɨ zagɨ ɨ zhwəŋtɨ a nye mɨndómɨnji mɨtsum ngə́ nɨ faʼə nɨ tsa tsɨ ghɨnə ndáŋwi kwinɨ ɨ kwinə.

¹³Ma lan, ŋwɔn tsum wa a mɨ gham mɨgham mɨ ɨtóm ɨtóm, a tsi nɨ ntsaʼtɨ Ŋwi ngə́ á Ŋwi a gha azúm zə ghanɨ a mbó zɨ a fɨʼtɨ anu za zɨə a soŋnə.

¹⁴Mbɨ́ʼ ngə́ be ma tsaʼtɨ a Ŋwi a nye ndóm məwen muŋ tsɛʼ nkan azhwi azan a tsaʼtə a Ŋwi lá akwaʼtɨ azan a keʼ a mu atsaʼtɨ məzen chyɛ.

¹⁵Ma mɨ tiʼ ghɨ lá ɨ nə́ le? Ma mɨ tsaʼtɨ a Ŋwi nɨ azhwi azan lá ma mɨ kɨ tsaʼtɨ a Ŋwi nɨ akwaʼtɨ azan wəbɔʼ ə; ma mɨ zɔbɨ nkyi a ngúʼsɨ́ Ŋwi nɨ azhwi azan lá ɨ kɨ zɔbɨ nkyi nɨ akwaʼtɨ azan wəbɔʼ ə.

¹⁶Be a tú mə lá be muŋ, be o tɨ ghǎ a mɨya a mbó Ŋwi tsɛʼ a mu azhwi, ɨbɛn ba bɨ tsinɨ ɨwu tɨ adzaŋ azum zə ghanɨ məzen mɨ tiʼ soŋ ngə́, “A be lá” mbɨ́ʼ atsaʼtɨ a ngǎ mɨya azo lá ɨ nə́ le? Ka bo tsi awa nɨ ndóm tse a njí anu za o sóŋnə́ ghe.

¹⁷Be a kwɛ mbe be ngə́ atsaʼtɨ a ngǎ mɨya azo a mbó Ŋwi a bɔŋ tsɛʼ nkan muŋ ka a byi nkwatɨ ayi ɨbɛn bə mɔʼɔ ghe.

¹⁸Ma gha a mɨya a mbó Ŋwi ngə́ ma ghǎm mɨgham mɨ ɨtóm ɨtóm ntsa awən bɨtsum ə.

¹⁹Lá be ma tsi a ndáŋwi a nkfu nguʼsɨ Ŋwi, a bɔŋ ngə́ á ma gham tsɛʼ mbum mɨgham tso mi mɨntə̧̂ mbáʼ bɨ chinɨ zuʼ, taŋ ɨ diʼ ɨbɛn bə mɔʼɔ, ntsa a ngǎm ɨnu a nye nchwuʼ ɨchi a nye mɨgham mɨ ɨtóm ɨtom ə.

²⁰Ɨbɔmbɨma ɨban, á nɨ keʼ tso ɨbɔ bə bɔrɨ be a nye ɨkwaʼtɨ ɨtsɨŋ ə; nɨ bəŋ awən a nye ɨbɔ bə bɔrɨ mbáʼ be a be anu mbɨ́ʼ ɨnu tsɨ tɔmnɨnɨ lá mbe bɨtankaŋ a nye ɨkwaʼtɨ ɨtsɨŋ ə.

²¹Aŋwaʼnɨ a Ŋwi soŋ ngə́: “Maʼmbyí a soŋ ngə́ ma mɨ lɔgɨ ɨbɛn bɨ mɨgham mɨ ɨtóm tsɨ daŋ á bɨ tɨgɨtɨ ɨbɛn ɨbə. Ma mɨ gham a mbó ɨbɛn ɨban nɨ mɨgham mɨ ɨtóm tsɨ daŋ, lá ɨbɛn ɨbə mɨ keʼ aghan zuʼə.”

²²Ma lan, mɨgham mɨ ɨtóm tsɨ daŋ nɨ alɨgɨ a mbó ɨbɛn ba bɨ se nɨŋ mɨntəm ɨma a nye Ŋwi nkeʼ be a mbó ɨbɛn ba bɨ nɨŋnɨ mɨntəm ɨma a nye Ŋwi be, le buŋ ɨsoŋ nkən wa ɨ lonɨ a mbó Ŋwi baŋnɨ mbe alɨgɨ a mbó ɨbɛn ba bɨ nɨŋnɨ mɨntəm ɨma a nye Ŋwi nkeʼ be a mbó ɨbɛn ba bɨ se nɨŋ mɨntəm ɨma a nye Ŋwi ə.

²³Ma lan, be a be ngə́ a nkfu za ndáŋwi ghǒtɨnɨ ŋwɔn tsum a biʼnɨ ngǎm mɨgham mɨ ɨtóm ɨtóm, ɨbɛn bɨ adaŋədaŋə kə bɨtɨnɨŋ ntəm a nye Ŋwi yen nkon, bo mɨ keʼ soŋ ngə́ nɨ nɨ ɨbarə le?

²⁴Lá be ŋwɔn tsum a nchwítɨ́ nkən wa ɨ lonɨ a mbó Ŋwi, ŋwɔn adaŋədaŋə kə tɨnɨŋ ntəm a nye Ŋwi a yen nkon a tɨtərɨ bən muŋ bɨ mɨ ghɨ á ze ɨbvu ɨyi ndzɔŋ anu za a zuʼnə. A mɨ tiʼ kwebtɨ a ngɨ ɨbvu ndzɔ̌ŋ ɨnu tsa a zuʼnɨ,

²⁵ɨkwaʼtɨ ɨchi a nkubə mɨ tiʼ nɔŋ asaŋəsaŋ, á tiʼ kwem mɨkwiʼtɨ ɨmyi a ɨshe nguʼsɨ a Ŋwi, ɨ sóŋə́ ngə́, “Tsɛʼ a nkənu Ŋwi a tsi ɨghan bɨŋ bo ghe!”

²⁶Ma lánə́ sóŋə́ lá ngə́ ke le, a ɨbɔmbɨma ɨban? Be nɨ bomnkɨ a ngúʼsɨ́ Ŋwi, á táʼ ŋwɔn a chwa azɔb a nkyi, á wu mɔʼɔ a chwa anu a ndiʼ anu a Ŋwi, á wu tse a kyɛʼ nkən wa ɨ lonɨ a mbó Ŋwi, á wu mɔʼɔ a gham mɨgham mɨ ɨtóm ɨtóm, á wu mɔʼɔ a tiʼ ngwiʼtɨ fɨʼtɨ anu za mɨgham mɨ ɨtóm ɨtóm miŋ sóŋnə́ ghe. A nɨ ngɨ̌ ɨnu tsɛʼ a nye ndóm wa ɨ mɨ ghɨ á ŋwɔn tsum a nkwi ɨ kwinɨ a nye abeməntəm azhi mu ndáŋwi ə.

²⁷Be ngǎm mɨgham mɨ ɨtóm ɨtóm tsi nɨ nchyɛ ɨwu, á bɨ keʼ tsatɨ ɨbɛn bi bɨbá kə bi bɨtárə́ ghe, nkə́ ngámə́ ɨ mɔ́ʼɔ́ mɔ́ʼɔ́ ghe. A táʼ ŋwɔn wədaŋ a zagɨ ntsi ɨwu wa a fɨʼtɨnɨ anu za bo sóŋnə́ ghe.

²⁸Be ŋwɔn wa a mɨ fɨʼtɨ anu za a sóŋnə́ a tú ɨwu be, á chwubtɨ ntsu ɨyi, ntiʼ ngam tsɛʼ a mbó atuəmbəm azhi abɔʼnɨ Ŋwi ə.

²⁹Ɨbɛn bi bɨbá kə bɨtárə́ ba bɨ kwarɨnɨ nkən a mbó Ŋwi tsi nɨ ngamə ghe, á bə mɔʼɔ tiʼ ndəŋtɨ anu za bo sóŋnə́ ghe.

³⁰Lá be ŋwɔn tse wa a shiʼtɨnɨ ntsi bɨŋ bo a kwarɨ nkən a mbó Ŋwi, wa a ghamnə lá a kyɛntɨ ngamə ghe.

³¹Bən bɨtsum chi chwitɨ nkən Ŋwi ɨ mɔ́ʼɔ́ mɔ́ʼɔ́ taŋ á ŋwɔn tsum a yɛʼ anu ɨwu á ɨ kɨ shintɨ ntəm ɨyi ɛ.

³²A ŋwɔn wa a chwítɨ́nɨ́ nkən Ŋwi a ntsɨ́ŋnə́ azhwi azhi ɛ.

³³Mbɨ́ʼ ngə́ ka Ŋwi a ndǒ ayi ngə́ á bɨgɨnə tsi dzagɨnɨ dzagɨnɨ ə. Wɛrə a lǒ be ngə́ á bɨgɨnə tsi ntsu mɔ́ʼɔ́ nɨ mbɔnɨ ə. Adzaŋ za a tsinɨ a mu ndáŋwi ɨbɛn bɨ Ŋwi ɨtsum,

³⁴á bəngye chwubtɨ mɨntsu ɨma a nkfu za ndáŋwi ɨ ghǒtɨnə. Ka bo tsi awa nɨ ngamə; tso mbáʼ Nyɔngɔŋ bə Yuda a soŋnɨ ngə́ ka bo tsi awa nɨ mbe ɨtú lá.

³⁵Be bo tsi nɨ ntsɔʼ aku anu zə tsɛrə, bo bitɨ bɨlóm ɨba a ntsu ndá ə. A nɨ adɨrətú a mbó mangye a ngamə a mu ngǒtə ndáŋwi ə.

³⁶Nɨ lǒ lá ɨ soŋə ngə́ anu a Ŋwi a bíʼnɨ́ lá a mbó bən le? Kə a nɨ tsɛʼ bən wa mbáʼ nɨ zuʼnə anu a Ŋwi le?

³⁷Be ŋwɔn tse a kwaʼtɨ ngə́ zɨə nɨ nchwítɨ́ mɨnkən mɨ Ŋwi kə ngə́ zɨə tsi nɨ azúm zə ghanɨ zə azhwi, á zhi ngə́ anu za ma ŋwaʼnɨnə lá a nɨ ntɨgə Maʼmbyí ɛ.

³⁸Lá be a tú a məziŋ bem, bɨ keʼ ayi kɨ mbemə.

³⁹Ma lan nə ɨbɔmbɨma, tɛgɨnɨ mɨntəm ɨmən a nchwítɨ́ nkən Ŋwi ə, lá nkeʼ tsuʼnɨ anu a ngam mɨgham mɨ ɨtóm ɨtóm ə.

⁴⁰A nɨ nkyáŋtɨ́ ɨnu ɨtsum tsɛʼ a nye ndómnji wa ɨ kuʼnɨnɨ nkɨ mbɔŋə.