Read Ngemba 1 Korɨnto 5 Bible Online

1 Korɨnto 5 - Ngemba bible

1 Korɨnto 5

¹Bɨ lanɨnə soŋ ngə́ anu a ntɔrɨ ɨlɛbɨ a tsi a tɨtərɨ bən, abə́ŋ za ka a tsi ayi tɨtərɨ bɨtɨbeməŋwi ə. Bɨ soŋ a mbó me ngə́ ŋwɔn a nɔŋə nɨ fúgɨ́ nɨmi ɨyi ɛ!

²Adzaŋ məwen, nɨ bvurə ŋǔʼ ɨnye lá mbɨ́ʼ ake le? Nɨ se mbáŋnə́ maʼə be nɨvwo ɨ mbémə́ le? A nɨ tum abə́ŋ a ŋwɔn məzen nɨ fɨnyáʼ a tɨtərɨ bɨŋ ə.

³Ma baʼtɨ ntsi ɨ tsinɨ nəghagɨ a nye mbəmnye lá, ma tsi bɨgɨnə a mu azhwi ə. Tsɛʼ tso ngə́ bɨgɨnə tsi, ma saʼnə ɨsáʼ ŋwɔn wa a ghɨnɨ abə́ŋ anu məzen lá nɨ ɨkum Maʼmbyí Yeso ghe. Be nɨ ghɨ mbomnkɨ, ma kɨ ntsi bɨgɨnə a mu azhwi, ntsa a ndzum mɨtən mɨ Maʼmbyí Yeso ɨwɨgɨnə ma mɨ tsinɨ a tɨtərɨ bɨgɨnə

⁵nɨ tsi nɨ ntintɨ abə́ŋ a ŋwɔn məzen ɨ gha a mbó Satan á tsənkɨ, taŋ a ghɨ mbe a Njwi Nɨsáʼ nɨ Maʼmbyí, bɨ chi loŋ azhwi azhi ɛ.

⁶Ka a kuʼnɨ ayi a mbó bən a ntɛrə ghe! Nɨ se zhi ngə́ mɨnyi mɨ mbɛgə a ghɨə ntsə́m abán za bɨ tɔbɨnɨ ɨ fugə nkɔ́ʼə le?

⁷Nɨ tsi nɨ ɨ zagɨ fɨ́gɨ́ mbɛgə zɨ ndvuŋ za ɨ tsinɨ nɨ ɨbvu lá, taŋ á bən bɨtsum bə fɛm wədiʼ ə. Nɨ mɨ tiʼ tsi tsɛʼ tso ntsə́m abán za bɨ tɔbɨnɨ zɨ fi, adzaŋ za ma kwɛnɨ nji ngə́ nɨ be lá. Mbɨ́ʼ ngə́ bɨ kyaŋtɨnə Nɨdorɨ nɨ Tsa-yɛʼnɨ ɨnɨgɨnə, tɨtsɔŋnɨ wa bɨ ghanə a Kristo, zɨ wa a nɨ mɔn mbyindzɨ Tsa-yɛʼnɨ ɨwɨgɨnə wa a nɨ mɨtsuʼnɨ mɨ atú lá.

⁸A bɨgɨnə tiʼ ndorɨkɨ Nɨdorɨ nɨ Tsa-yɛʼnɨ ɨnɨgɨnə nɨ abán za ka a tsi ayi nɨ mbɛgə zɨ ndvuŋ za ɨ tsinɨ nɨ ɨbvu abɔʼnɨ abɨgəntəm lá. Lá á bɨgɨnə dorɨkɨ nɨ abán za a se nɨ mbɛgə tsi, abán za a nɨ zə nɨfɛm nkɨ mbe zə nkənu lá.

⁹Ma kwántɨ́ awən a mu aŋwaʼnɨ za ma ŋwáʼnɨ́nɨ́ a mbó bən ngə́ á nɨ keʼ ngyenə bɨŋ bɨ ngaŋ ntɔrɨ ɨlɛbɨ ə.

¹⁰Ma sá sóŋ lá bɨtɨbeməŋwi ba a nɨ ngaŋ ntɔrɨ ɨlɛbɨ, bəmiɛnɨngám kə mɨzɛrə kə ɨbɛn ba bɨ ghúʼsɨ́nɨ́ ɨbɔ bɨ abe. A mbaʼtɨ məben, nɨ mɨ tsi nɨ ɨ fuə a mu mbyi wen tsɛʼ funə.

¹¹Ma kə́ sóŋə́ lá ngə́ á nɨ keʼ tsi nɨ anu a ngɨə bɨŋ bɨ ŋwɔn wa a soŋnɨ ngə́ zɨə nɨŋ ntəm ɨyi a nye Kristo lá ngɨ̌ ɨnu ntɔrɨ ɨlɛbɨ kə mbe amiɛnɨngám kə ngúʼsɨ́ ɨbɔ bɨ abe, kə ɨ sǒŋ ɨnu tɨbɔŋ atú bə mɔʼɔ kə ɨ nǒ mbánə́ kə ndzě ghe. Koʼ byi nyam shiʼtɨ ntsi a ndzɨə bɨŋ abə́ŋ a ŋwɔn məziŋ ə.

¹²Mbɨ́ʼ ngə́ ma kwɛ ntsi lá nɨ ake ɨ kon a ɨ sáʼ ngaŋ abyɛn le? Be ma tsi lá nɨ ɨ sáʼ ɨbɛn ba bɨ tsinɨ a mu ndáŋwi le?

¹³Ŋwi a sáʼə a bə abyɛn ə. Adzaŋ za aŋwaʼnɨ a Ŋwi a soŋnɨ ngə́, “Kə́ntɨ́nə a ngaŋ abɨgəntəm a tɨtərɨ bɨŋ ə.”