Read Ngemba 2 Korɨnto 12 Bible Online

2 Korɨnto 12 - Ngemba bible

2 Korɨnto 12

¹Ma tsi nɨ ntɛrə ghe, ntɛrə məzen mɨ keʼ anu zə tsɛrə kwatɨ ɨ kwatɨnɨ lá, ma mɨ tɛrə. Tɨtsɔŋnɨ ma mɨ tiʼ gham mbɨ́ʼ ndzɛm nəzhwɨgɨnɨ abɔʼnɨ ɨnu tsɨ kyɛʼnɨ tsa Maʼmbyí a díʼnɨ́ a mbó me ghe.

²Ma zhi a ŋwɔn tse wa a zɔŋnə a Kristo ghe. A nɨ ɨlom nɨghúm ntsɔb nɨkwa mbáʼ bɨ yánɨ́ ayi nkɔʼ ngɛn nɨ zɨ a fɔməbvurə atú atəntsánɨ́ ə (Ma sa zhi ngə́ anu məzen a lánɨ́ fú tsɛʼ a nkənu, kə ngə́ wɛrə a zɛ́n be ndzɛm nəzhwɨgɨnɨ ə — a zhi tsɛʼ Ŋwi njiɛ).

³A ma kwatɨ ngə́ ma zhi ngə́ ŋwɔn məwen bɨ yá ayi nkɔʼ ngɛn nɨ zɨ a Baradiso ghe. A ma bə soŋ ngə́ ka ma zhi aghan ngə́ a ghɛ́n ɨwu lá nɨ mbəmnye kə a mu azhwi, a nɨ tsɛʼ Ŋwi mbáʼ a zhinɨ anu za a fúnə́.

⁴Ɨwu a zúʼ ɨnu tsa ntsu chinɨ keʼ soŋə, ɨnu tsa ŋwɔn mɨsɔŋ a ntsu a se tsi nɨ ngamə mbɨ́ʼ a tsɛrə ghe.

⁵Ma lan, ma mɨ tɛrɨ mbɨ́ʼ a ŋwɔn məwiŋ ə — lá ma mɨ kaʼ tɛrɨ mbɨ́ʼ atuəmbəm azan, ma mɨ tɛrə tsɛʼ mbɨ́ʼ ɨnu tsa tsɨ diʼnə adzaŋ za ma ghɔgɨnɨ mbe.

⁶Lá be ma kwɛ ndǒ be ntɛrə, ntɛrə ɨzə mɨ keʼ ghɨ á ma bəŋ abərɨ mbɨ́ʼ ngə́ ma sóŋə́ lá nkənu ə. Lá ma mɨ kaʼ tɛrɨ, mbɨ́ʼ ngə́ ka ma ndǒ aghan ngə́ á ŋwɔn tse a ndyíŋə́ aghan a mu ntəm zɨ á ma faŋ ntsa ɨfaʼ wa ma faʼnə abɔʼnɨ ɨnu tsa ma sóŋnə́ ghe.

⁷A ngɨə ngə́ á ma kaʼ ŋuʼ ɨnye mbɨ́ʼ ɨnu tsə ghaʼnɨ tsa bɨ kyɛ́ʼnɨ́ a mbó me, bɨ nɨ́ŋ nɨghɔ na nɨ kɨ́nə́ ndzáŋə́ be tɨ́sə́n a nye me, mbáʼ nɨ faʼnə tso ntom Satan a shwóm me ɨ kɨ ghɨ á ma kaʼ ɨnye ɨzan ŋuʼə.

⁸Ma ghɨ́ atsaʼtɨ a Ŋwi a mbó Maʼmbyí nkfu tsi tárə́ mbɨ́ʼ a məzen, ndɔ́ntə́ ngə́ á wɛrə a fɨgɨ ndzáŋə́ zen a ɨnye me ghe.

⁹Lá achwɨgə azhi a bé ngə́, “Abɔŋəntəm azan a nɨ atsum za o lɔnə, mbɨ́ʼ ngə́ mɨtən ɨmə gháʼə ntsǎ mbó lá a nkfu za o bɔrɨnə.” Nɨdorɨ tiʼ ntsi a nye me be tɨ́sə́n, a ŋuʼ ɨnye mbɨ́ʼ adzaŋ za ma bɔrɨkɨnɨ, taŋ ɨ zuʼ a mu ɨnye me mɨtən mɨ Kristo ma mɨ kɨ́nkɨ́nɨ́ aghə.

¹⁰A kuʼnɨ ayi a mbó me ngə́ ma bɔrɨ, bɨ zɔmnə aghan, ndzě ngɨ́ʼ, ndɨgə abɔʼnɨ ngɨ́ʼ mbɨ́ʼ atú a Kristo ghe. Mbɨ́ʼ ngə́ a nkfu za ma bɔrɨnɨ lá, ma tiʼ mbə ntsi be nɨ adaʼ ə.

¹¹Ma ghɨ̌ mɨnu tso abərɨ ə — lá a ghɨ bən ngə́ á ma ngɨə mə lə. A nɨ bən ba nɨ tsinɨ nɨ ndiʼə ngə́ nɨ bémtə́ aghə. Mbɨ́ʼ ngə́ be a kwɛ mbe ngə́ ka ma be aghan azúm zə tsɛrə, ka ma tsi aghan a shwúrɨ́ “ntóm Yeso” ɨtsən tsa nɨ kwaʼtɨnɨ ngə́ tsɨ nɨ tsə wi lá, a nye ndóm wu tsɛrə ghe.

¹²Ɨnu tsə yerɨnɨ-yerɨnɨ tsə ghaʼnɨ abɔʼnɨ ɨnu tsə tsanɨnɨ tsə ghaʼnɨ, tsa tsɨ diʼnə ngə́ ma nɨ ntom Yeso, bɨ ghɨ́ a tsɛrə a tɨtərɨ bən lá nɨ nchigə ghe.

¹³Anu a tɨbɔŋ za bɨ ghɨ́nɨ́ a nye bən za bɨ sé ghɨ a nye ndáŋwi tsɨ mɔʼɔ, ntsa ngə́ ma sá ghá ngɨ́ʼ nɨ bən ngə́ á nɨ gha akwatɨ a nkáb a bé zɨŋə le? Be a be ngə́ ma ghɨ́ lá ɨbvu muŋ ma buʼ mbó, á nɨ lɨgɨnɨ afənu azə!

¹⁴A mɨ be nkfu tsi tárə́ mbáʼ ma kyaŋtɨnɨ ɨnye ɨzan ɨ yen ghantɨ awɨŋ ə — lá, ma mɨ kaʼ akwatɨ zə tse a mbó bən bitə. Ma lǒ lá awɨŋ ə, ka ma ndǒ aghə be nkáb ɨzɨŋ ə. Mbɨ́ʼ ngə́ ka ɨbɔ tsi awa nɨ nga a mbó bɨtarɨ, a baŋnɨ ntsi bɨtarɨ ntsi nɨ nga a mbó ɨbɔ ə.

¹⁵Ma mɨ dorɨ tsɛʼ nkan a ntsəŋ azúm atsum za ma tsinɨ nɨ zɛrə, ɨ zɔŋ kwiʼtɨ atuəmbəm azan wəbɔʼ, taŋ ɨ kwatɨ awɨŋ ə. Be ma kɔŋ awən be tɨ́sə́n adzaŋ wen, nɨ mɨ keʼ kɨ nkɔŋ aghan ndəŋndəŋ le?

¹⁶Nɨ zhi ɨ shiʼnɨ ngə́ ma sá awən nɨ abyɛʼ zhiʼə. Lá ŋwɔn tse a mɨ soŋ ngə́ ma lɔ́gɨ́ a zóŋ ɨzɛrə nkɨ mbentɨ awən nɨ ɨchwenu ə.

¹⁷Ɨ nə́? Ma bá lá a zóŋ ɨzɛrə a ndyíbtɨ́ ɨ dzɨ awən a ntsǎ a ndzum ntóm tsa ma tságɨ́nɨ́ a mbó bən lá le?

¹⁸Ma búʼ mbó a mbó Tɨ́tósɨ, ngə́ á yen a mbó bən nkɨ ndzɔŋ ntsagɨ a mɨma wu mɔʼɔ wa bo zɨə. Nɨ chi soŋ ngə́ Tɨ́tósɨ a bá lá a zóŋ ɨzɛrə a ndyíbtɨ́ ɨ dzɨ awən le? Bɨgɨ zɨ se ghɨ mɨnu lá nɨ táʼ azhwi le? Bɨgɨ zɨ se ngyenə lá aku a mɔ́ʼɔ́ le?

¹⁹A ghagə tsɛrə, a nye nkfu ziŋ tsum, nɨ kwaʼtə ngə́, bɨgɨ zhwə́ŋtə́ lá a nkɨnkɨ ɨtumbəm ɨtsɨgɨ a ɨshi bɨŋ ə. Ngáŋ! Bɨgɨ ghamə lá tsɛʼ adzaŋ za Kristo a mɨ lǒ ngə́ á bɨgɨ gham a ɨshi ɨmɨgɨ Ŋwi ə. Ɨbɔmbɨma ɨbɨgɨ ba bɨgɨ kɔŋnɨ tsɛʼ nkan, anu atsum za bɨgɨ ghɨnə, bɨgɨ ghɨə a zɛrə lá a nkwátɨ́ bɨŋ ə.

²⁰Ma bɔ́gə́ ngə́ nyom wa ma mɨ yen a ndzé bən, nɨ mɨ tsi chwa a nye ndóm wa ma lɔnə ghe. A bagɨ bən, a ghagə tsɛrə nɨ mɨ kɨ ze aghan á ma tsi chwa ghe. Ma bɔ́gə́ ngə́, nyom wa ma yenɨ, azɔŋ, aghɨʼnɨ, alwɛntɔŋ, ɨkarɨ, nɨgham nɨ ntsənkɨ ɨkum ŋwɔn wu shiʼnɨ, fɨnkərɨ, kɨtɛrɨ abɔʼnɨ ndum mɨ tsi a tɨtərɨ bɨŋ ə.

²¹Ma bɔ́gə́ ngə́ nyom wa ma mɨ kwiʼ yen a ndzé bən, Ŋwi ɨghan a mɨ nɨŋ adɨrətú a ɨnye me a ɨshi bən, ma mɨ kɨ bugɨ mbɨ́ʼ a bə ghaʼnɨ ba bɨ ghɨ́nɨ́ mɨbvu a mbyi, mbvurɨ tɨ bəŋ mɨntəm ɨma ɨ fɨgɨ a nye ɨnu ntɔrɨ ɨlɛbɨ tsa bo ghɨnə tso ndyiŋ mangye ɨ ghɨʼnɨ abɔʼnɨ mɨbvu mɨ nɔŋə nɨ mangye kə mə nɔŋə nɨ mbáŋnɨ́ abɔʼnɨ ɨnyaʼnɨ ɨnu tsə mɔʼɔ tsa tsɨ yenə nɨ adɨrətú a nye ŋwɔn ə.