Read Ngemba 2 Korɨnto 3 Bible Online

2 Korɨnto 3 - Ngemba bible

2 Korɨnto 3

¹Məzen a diʼ lá ngə́ bɨgɨ bɨŋə nkwíʼə ntɛrə mbɨ́ʼ ɨtumbəm ɨtsɨgɨ le? Kə bɨgɨ lǒ, tso mbáʼ bə mɔʼɔ lɔnə, ɨŋwaʼnɨ tsa tsɨ lonɨ a mbó bən kə ngěn a mbó bən tsa tsɨ fɨʼtɨnɨ ɨnu tsɨ shiʼnɨ mbɨ́ʼ awɨgɨ le?

²Bən, bɨŋ mboŋ, nɨ nɨ aŋwaʼnɨ za a fɨʼtɨnɨ ɨnu tsɨ shiʼnɨ mbɨ́ʼ awɨgɨ, za bɨ ŋwaʼnɨnɨ a mu mɨntəm ɨmɨgɨ, á ŋwɔn tsum a zhi nkɨ ntɔŋə;

³nɨ kə́ ndíʼə ngə́ nɨ lá aŋwaʼnɨ a Kristo za bɨ tságɨ́nɨ́ a tsa a mu mbó bɨgɨ, za ka bɨ ŋwaʼnɨ ayi nɨ nkyi aŋwaʼnɨ, bɨ ŋwaʼnɨ be nɨ azhwi a Ŋwi, zɨ wa a tsinɨ ntən, nkeʼ be be atú táfɛrə ngɔʼ, mbe be atú táfɛrə wa a nɨ mɨntəm mɨ ɨbɛn ə.

⁴Nə nɨ adzaŋ za a ntsǎ a ndzum Kristo bɨgɨ se a Ŋwi a mə́ŋnə́ lá.

⁵Ka a be ayi be ngə́ bɨgɨ tsi nɨ mɨtən atuəmbəm bɨgɨ a ngɨ anu zə tse ghe; mɨtən ɨmɨgɨ a ngɨ anu zə tse lo be a mbó Ŋwi ə.

⁶Ŋwi a ghɨ ngə́ á bɨgɨ be ngótɨ́ ngaŋ afaʼ a mu akan zə fi, nkeʼ be mu nyɔngɔŋ wa bɨ ŋwaʼnɨnɨ a mu aŋwaʼnɨ be, lá mbe be a mu Azhwi; mbɨ́ʼ ngə́ nyɔngɔŋ wa bɨ ŋwaʼnɨnɨ a mu aŋwaʼnɨ a zhwítə́, lá Azhwi a ghanɨ ntsi ntɨŋ ə.

⁷Be a be ngə́ Nyɔngɔŋ wa a yenə nɨ nɨvwo, wa bɨ ŋwáʼnɨ́nɨ́ atú táfɛrə ngɔʼ, a yén nɨ nɨfáŋ a nye ndóm wa bə Izrai kɨ chínɨ́ keʼ tɛgɨ ɨmɨgɨ ɨma a ɨshi Mǒse mbɨ́ʼ nkaʼ wu dzinkɨnɨ məwen, ɨ kə́ mbáʼtə́ mbyɛ́nɨ́ ɨ byɛnɨnɨ lá,

⁸a ghɨ tiʼ be ɨ nə́ mbáʼ afaʼ a mu Azhwi a Ŋwi a ghɨ yen a mu nɨfáŋ nə wi le?

⁹Be afaʼ za a yenə nɨ nɨvwo a tsi nɨ nɨfáŋ, afaʼ za a yenə nɨ ntsi ntən a ghɨ tsi nɨ nɨfáŋ ɨ tsa a məna!

¹⁰Tsɛʼ a nkənu, bɨgɨnə chi soŋ ngə́ za a láʼnɨ́ ntsi nɨ nɨfáŋ ka a bə mbyi ntsi ayi nɨ nɛrə, mbɨ́ʼ nɨfáŋ na nɨ tsanɨ ayi tsɛʼ a nkə.

¹¹Mbɨ́ʼ ngə́ za a yénɨ́ nɨ nɨfáŋ, a kə́ byɛ́nə́ ngěn, za a ghɔŋnɨ nɨnkoŋ a mɨ zagɨ tsi nɨ nɨfáŋ ɨ ghɛn nɨ mbyi ɛ.

¹²Ma lan, mbáʼ bɨgɨnə tsinɨ nɨ abə́ŋ a ntsiŋə nɨ ntəm tsum məzen lá, bɨgɨnə tsi tɨ nɨbɔgɨ,

¹³nkeʼ be tso Mǒse wa a kúbɨ́nɨ́nɨ́ ɨshi ɨyi taŋ á bə Izrai keʼ zɛn adzaŋ za nɨfáŋ na kɨ́nə́ byɛ́nə́ ngěn ghe.

¹⁴Lá bɨ fɨ́ŋ mɨntəm ɨma ghe. Tsɛʼ a nkənu, ɨ kɔʼ kuʼ ɨ sɨŋə, bo tɔŋ nkən wa ɨ tsinɨ a mu akan zə lvuŋ za lá, bo keʼ zuʼ nkɨ nji anu za bo tɔŋnə. A tsi lá tsɛʼ tso ngə́ abagɨ atsɛʼ zə nkwasə a kɨŋ ndzuʼ kɨ zhi ɨza, mbɨ́ʼ ngə́ a nɨ tsɛʼ a ntsǎ a ndzum Kristo mbáʼ bɨ tsɔ́ʼnə́ a zɛrə ghe.

¹⁵Tsɛʼ a nkənu, ɨ kɔʼ kuʼ ɨ sɨŋə, nkfu tsum za bɨ tɔŋnɨ a nyɔngɔŋ Mǒse, a tsi tso ngə́ abagɨ atsɛʼ zə nkwasə a bvurɨ nkɨŋ ndzuʼ kɨ zhi ɨza;

¹⁶lá be ŋwɔn a bəŋ ntəm ɨyi ndzɔŋ a Maʼmbyí, bɨ lwɛʼtɨ abagɨ atsɛʼ zə nkwasə za.

¹⁷Tɨtsɔŋnɨ, a tiʼə ndiʼə ngə́ Maʼmbyí a nɨ Azhwi za, adiʼ atsum za Azhwi a Maʼmbyí a tsinɨ ɨwu, nkɨ tse sě awɨgɨnə mbɨ́ŋə́ nkwiʼə nkórə́ ghe.

¹⁸Mɨshi ɨmɨgɨnə tsi tɨkə bɨ kubɨnɨ lá, bɨgɨnə bɨtsum diʼnə nɨfáŋ nɨ Maʼmbyí, bɨgɨnə kwebtɨnə taŋ ɨ tsinə nɨ nɨfáŋ ɨni ɨ lo a nye táʼ ɨfɨʼ ɨ ghɛn a nye za ɨ tsinɨ a mbyi ɛ. Nɨfáŋ məniŋ lǒ lá a mbó Maʼmbyí, zɨ wa a nɨ Azhwi ə.