Read Ngemba 2 Korɨnto 4 Bible Online

2 Korɨnto 4 - Ngemba bible

2 Korɨnto 4

¹Ma lan, mbáʼ a nɨ mbɨ́ʼ a mɨlɨŋnɨ Ŋwi mbáʼ bɨgɨ faʼnə afaʼ məzen lá, ka bɨgɨ ntsɛ́gɨ́nə́ awɨgɨ ɨnye ə.

²Bɨgɨ tintɨnɨ ɨnu tsa ɨbɛn lwɛʼnə ntɛgɨ a ngɔbə, ɨnu tsa tsɨ yenə nɨ adɨrətú lá; ka bɨgɨ ngɨə awɨgɨ ɨnu ɨbankɨ kə ntwɛ́ntɨ́ nɨgham nɨ Ŋwi; lá a mu nkənu tsum za bɨgɨ ghamnə asaŋəsaŋ, bɨgɨ fɨʼtɨ ɨtumbəm ɨtsɨgɨ a ɨshi Ŋwi a nye ndóm wa ŋwɔn tsum a mɨ zhi ngə́ mɨntəm ɨmɨgɨ fɛmə.

³Be a be ngə́ bɨ lwɛʼ nkən wu shiʼnɨ wa bɨgɨ sóŋnə́, muŋ bɨ lwɛʼ a wɛrə lá a mbó ɨbɛn ba bɨ byékɨ́nə́ ghe.

⁴A nye ɨza nkfu ŋwi atuəshe a nɨŋ ɨfɨgɨ a nye mɨntəm mɨ bɨtɨnɨŋ ntəm a nye Kristo, taŋ ɨ kubɨnɨ awa a ndzé nkaʼ nkən wu shiʼnɨ wu nɨfáŋ nɨ Kristo, zɨ wa a nɨ afi a Ŋwi lá.

⁵Nə nɨ anu za ka bɨgɨ sóŋə́ awɨgɨ lá anu mbɨ́ʼ ɨtumbəm ɨtsɨgɨ; bɨgɨ sóŋə́ lá anu mbɨ́ʼ a Yeso Kristo, zɨ wa nɨ Maʼmbyí, bɨgɨ kɨ ntiʼ mbe ngaŋ afaʼ ɨtsən mbɨ́ʼ atú a Yeso ghe.

⁶A nɨ Ŋwi, zɨ wa a sóŋnɨ́ ngə́, “A nkaʼ fu a mu ndzumnɨ mbaŋə,” a nɨ ndəŋndəŋ Ŋwi, zɨ wa a ghɨnɨ nkaʼ ɨyi baŋ a mu mɨntəm ɨmɨgɨnə, a ngɨə á bɨgɨnə zhi nɨfáŋ nɨ Ŋwi na nɨ tánə́ ndǒ a nye Yeso Kristo lá.

⁷Lá bɨgɨ wa bɨ tsinɨ nɨ azúm atɨŋndvuŋ məziŋ be lá tso bənto bɨ ɨshe ba bɨ nɨ ɨdzúm nkfúndvuŋ, taŋ ɨ diʼ ngə́ mɨtən ma mɨ kɔʼnɨ ntsɨrɨ mɨtən mɨtsum tsi be a mbó Ŋwi, nkeʼ be a mbó bɨgɨ be.

⁸Bɨ diʼ ngɨ́ʼ a mbó bɨgɨ a nye ndómnji tsum lá bɨgɨ keʼ bɛʼkɨ; ɨtú ɨtsɨgɨ jwáʼ lá bɨgɨ keʼ ɨnye kyentɨ;

⁹ndɨ́gə́ awɨgɨ lá Ŋwi a keʼ awɨgɨ lɨgɨnɨ, mbúʼə awɨgɨ ɨ máʼə a ɨshe, lá nkeʼ awɨgɨ tsənkɨ;

¹⁰mbyɛ́ʼə a mu ɨnye ɨtsɨgɨ nɨvwo nɨ Yeso nkfu tsum taŋ á bɨ ndzě ntsi mbyi Yeso a nye mbəmnye ɨtsɨgɨ ə.

¹¹A mu ntsi mbyi ɨzɨgɨ tsum, bɨgɨ chyɛ̌ a ntsu nɨvwo nkfu tsum mbɨ́ʼ atú a Yeso, taŋ á bɨ chi zɛn ntsi mbyi ɨzhi a nye mbəmnye ɨtsɨgɨ tsen tsa tsɨ kfókɨ́nə́ lá.

¹²Ma lan, bɨgɨ byɛ̌ʼ nɨvwo tsɛʼ nkfu tsum a mu ɨnye ɨtsɨgɨ, lá ntsi mbyi baŋnɨ ntsi a mbó bɨŋ ə.

¹³Aŋwaʼnɨ a Ŋwi a soŋ ngə́, “Ma ghám mbɨ́ʼ ngə́ ma nɨ́ŋ ntəm ɨghan a nye Ŋwi ə.” A mu ndəŋndəŋ azhwi zə abeməntəm, bɨgɨ kə́ ngámə́ mbɨ́ʼ ngə́ bɨgɨ nɨŋ mɨntəm ɨmɨgɨ a nye Ŋwi ə.

¹⁴Njiɛ ngə́ Ŋwi, zɨ wa a zhwémnɨ́nɨ́ a Maʼmbyí Yeso, a ghɨ zhwémnɨ́ awɨgɨ bɨ Yeso, ɨ tiʼ lɔgɨ awɨgɨ abɔʼnɨ bən ɨ yen nɨ bɨgɨnə a ɨshi zɨə.

¹⁵Zen atsum a tsi lá mbɨ́ʼ atú azən, taŋ á be ngə́, tsɛʼ tso mbáʼ abɔŋəntəm a Ŋwi a lamnɨnə ngěn a mbó ɨbɛn bə ghaʼnɨ lá, a mɨ ghɨ á ɨbɛn bə ghaʼnɨ ngǎ mɨya ngěn nɨ mbyi; a ngá nɨfáŋ a mbó Ŋwi ə.

¹⁶Ma lan, ka bɨgɨ ntsɛ́gɨ́nə́ awɨgɨ ɨnye ə. Ntsi mbyi mbəmnye ɨtsɨgɨ báʼtə́ ndékə́ ngěn lá, ntsi mbyi azhwi ɨtsɨgɨ baŋnə nkwiə nɨ njwi nɨ njwi ə.

¹⁷Mbɨ́ʼ ngə́ mɨngɨ́ʼ wen wa bɨgɨ zɛ́nə́ a nye məkum a nkfu wen, a kyáŋtə́ awɨgɨ a nkwárɨ́ nɨfáŋ nə wi nə nɨnkoŋ na nɨ tsanɨ ngɨ́ʼ za tsum ə.

¹⁸Mbɨ́ʼ ngə́ ka bɨgɨnə ntɛgə awɨgɨnə ɨtú ɨtsɨgɨnə be a nye ɨdzúm tsa ɨmɨgɨ zɛ́nə́, lá ntɛ́gɨ́ ɨtú be a nye tsa ɨmɨgɨ sě ndzě; mbɨ́ʼ ngə́ ɨdzúm tsa bɨ zɛ́nə́ chyɛ̌ tsɛʼ a nye məkum a nkfu, lá tsa ka bɨ ndzě ayi, tsɨ nɨ tsə nɨnkoŋ ə.