Read Ngemba 2 Korɨnto 9 Bible Online

2 Korɨnto 9 - Ngemba bible

2 Korɨnto 9

¹Ka a ndǒ ayi ngə́ á ma ŋwaʼnɨ a mbó bən mbɨ́ʼ akwatɨ za nɨ tsagɨnə a mbó ɨbɛn bɨ Ŋwi a Yudiya lá.

²Mbɨ́ʼ ngə́ ma zhi ngə́ nɨ kyaŋtɨ ɨnye ɨtsən a ngá akwatɨ; ma kɨnə nkɨ ntɛrɨ mbɨ́ʼ awən a mbó ɨbɛn a Masedonia ghe. Ma soŋ ngə́, “Ɨbɔmbɨma ba bɨ tsinɨ Akaiya bɨ kɨ kwɛnə nkyaŋtɨ ɨnye ɨtsa a ngá akwatɨ ndɔgɨnɨ alom yirɨ ə.” Mbɛbə ɨzən ɨ ghɨnə ɨnye ɨtsa bə ghaʼnɨ shanə a ngá akwatɨ ə.

³Lá, ma tsagɨ ɨbɔmbɨma ben a mbyi, taŋ á kɨtɛrɨ ɨwɨgɨ mbɨ́ʼ awən a mu anu məzen a keʼ atú adaŋədaŋə be ə. Lá, tso mbáʼ ma sóŋnɨ́ lá, nɨ mɨ kyaŋtɨ akwatɨ azən á tsi abó ə.

⁴Lá, be ɨbɛn bə tse lo a Masedonia ngyen bɨgɨ bo ndzɛn ngə́ nɨ bvurɨ akwatɨ azən tɨ kyaŋtɨ, adɨrətú zə wi a mɨ chwa awɨgɨ, mbɨ́ʼ ngə́ bɨgɨ len mɨntəm ɨmɨgɨ a nye bən be tɨsɨŋə — azɨŋ adɨrətú a mɨ tsa mbó ə!

⁵Ma lan, ma kwáʼtɨ́ ngə́ a nɨ anu ngə́ á ma buʼtɨ mbó a mbó ɨbɔmbɨma ben ngə́ á bɨ tsa mbyi ɨzan ngyen, á nɨ tiʼ nkyaŋtɨ akwatɨ azən á tsi abó adzaŋ za nɨ káʼnɨ́ lá. A mɨ tiʼ tsi abó a nkfu za ma yenɨ, ɨ tiʼ kɨ diʼ ngə́ nɨ gha be mbɨ́ʼ ngə́ nɨ lǒ ngǎ, nkeʼ be be ngə́ bɨ nyəm awɨŋ ə.

⁶Anu za a tsinɨ ɨwu lá a nɨ ngə́: ŋwɔn wa a binə a nɨ́sháŋnɨ́, a kə́ fúʼə a nɨ́sháŋnɨ́ ə; ŋwɔn wa a binə mɨ ghaʼtɨ, a kə́ fúʼə mɨ ghaʼtɨnə ghe.

⁷Ŋwɔn tsum ɨ mɔ́ʼɔ́ mɔ́ʼɔ́ a mɨ zagɨ gha lá adzaŋ za a tsɔʼnɨ a mu ntəm zɨ, nkeʼ njwɛ́rɨ́kə́ kə tso ngə́ bɨ nyəm ayi, mbɨ́ʼ ngə́ Ŋwi a kɔŋ a ŋwɔn wa a ghánə́ nɨ ntəm wu saŋnɨnɨ ə.

⁸Ŋwi a chi gha a mbó bən á ghɛn nɨ mbyi ntsa a za a kuʼnɨnɨ a mbó bən, taŋ á nɨ nchyɛ̌ nɨ atsum za a kuʼnɨnɨ a mbó ɨtumbəm ɨtsən nkfu tsum, ɨ kɨ gha á ghaʼ ntsa adzaŋ za a kuʼnɨnɨ a mbó bən a faʼ afaʼ zə shiʼnɨ atsum ə.

⁹Tso mbáʼ aŋwaʼnɨ a Ŋwi a soŋnɨ ngə́: “A ghǎ tsɛʼ tə́ ndə́ŋtə́ a mbó ɨbɛn ba bɨ boŋnɨ; ka ngɨ ɨbɔŋ ɨzhi ndáʼə ndwitə ayi ɛ.”

¹⁰Ŋwi, zɨ wa a ghánɨ́ ngwəgɨ ɨdzúm abɔʼnɨ mɨdzɨ mə dzɨnɨ, a mɨ kɨ gha ngwəgɨ ɨdzúm tsa nɨ lɔnə, ɨ kɨ ghɨ á tsɨ tom nkwi nga nɨfuʼ nə wi, ndo a mu adzaŋ za nɨ ghánə́ tə́ ndə́ŋtə́ ghe.

¹¹Wɛrə a mɨ ghɨ á nɨ nchyɛ̌ nɨ afuʼ za a kuʼnɨnɨ a ngá tə́ ndə́ŋtə́ nkfu tsum, taŋ á bə ghaʼnɨ gha a mɨya a mbó Ŋwi mbɨ́ʼ ɨdzúm ɨtsən tsə ghanɨ tsa bo kwárɨ́nə́ a mbó bɨgɨ lá.

¹²Mbɨ́ʼ ngə́, afaʼ məzen za nɨ faʼnə lá, ka a ngǎ ayi lá tsɛʼ ɨdzúm tsa ɨbɛn bɨ Ŋwi lɔnə, lá nkə́ ngɨə ngǎ mɨya a mbó Ŋwi kwə́ŋnɨnə tsɛʼ adaŋədaŋə ghe.

¹³Ntsa a ndzum adzaŋ za afaʼ azən məzen a diʼnɨ ngə́ nɨ nɨ ɨbɛn bɨ nkənu, bə ghaʼnɨ mɨ gha nɨfáŋ a mbó Ŋwi mbɨ́ʼ adzaŋ za nɨ zúʼnɨ́nɨ́ nkən wu shiʼnɨ wu Kristo, abɔʼnɨ adzaŋ za nɨ yɛbtɨnɨ ɨdzúm ɨtsən tə́ ndə́ŋtə́ bɨŋ bɨ ɨbɛn bɨ Ŋwi a Yerosalɛm abɔʼnɨ bə mɔʼɔ lá.

¹⁴Ma lan, bo mɨ tsaʼtɨnə a Ŋwi mbɨ́ʼ awən nɨ akɔŋnɨ zə wi, mbɨ́ʼ abɔŋəntəm za a tsinɨ nɨ líʼ za Ŋwi a ghanɨ a mbó bɨŋ ə.

¹⁵A bɨgɨnə gha a mɨya a mbó Ŋwi mbɨ́ʼ azúm zə ghanɨ azhi məzen za ntsu chi keʼ soŋ lá!