Read Ngemba Galesha 2 Bible Online

Galesha 2 - Ngemba bible

Galesha 2

¹Ɨlom nɨghúm ntsɔb nɨkwa tsanə ma kwiʼ nkɔʼ ngɛn a Yerosalɛm bɨgɨ Banabasɨ, ndzɔŋ nkwiʼtɨ a Tɨ́tósɨ ə.

²Ma ghɛ́n ɨwu lá mbɨ́ʼ ngə́ Ŋwi a kyɛ́ʼ a mbó me ngə́ á ma ghɛn ɨwu ə. A nye ngǒtə zɨ tse za ɨ tsínɨ́ a nkubə bɨgɨ bɨntsagɨnɨ ba bɨ tsínɨ́ ɨwu, ma fɨ́ʼtɨ́ nkən wu shiʼnɨ wa ma sóŋnə́ a mbó ba a se bə Yuda be lá. Ma sá ndǒ ngə́ á ɨfaʼ wa ma fáʼnɨ́ a mbyi kə wu tɨtsɔŋnɨ tsa atú adaŋədaŋə ghe.

³Ŋwɔn aku ɨghan, Tɨ́tósɨ, a báʼtɨ́ mbé be ŋwɔn bə Grikɨ ɨ bénɨ́ lá, bɨ sé ayi nyəm ngə́ á bɨ tsəŋ alagɨ azhi ɛ,

⁴le buŋ bə tse kə́ ndǒ ngə́ muŋ bɨ tsəŋə. Ɨbɛn məbiŋ kə́ ngɨ̌ ɨtsi ngə́ bo kɨ́ nɨ́ŋ mɨntəm ɨma a nye Kristo, ma lan, bo bánkɨ́ nkón a tɨtərɨ ngǒtə ɨzɨgɨ tso bɨchwerɨ, taŋ ɨ tsɔʼ aku mbɨ́ʼ adzaŋ za bɨgɨ tíʼnɨ́ ɨbɛn nɨ atú azɨgɨ a nye nyɔngɔŋ bə Yuda ntsa a ndzum adzaŋ za bɨgɨ tsinɨ a mbúm bɨgɨ bɨ Kristo Yeso ghe. Bo kə́ ndǒ ngɨə ngə́ á bɨgɨ ghɔŋ a nye ɨbuʼ nyɔngɔŋ bə Yuda,

⁵lá a ngɨə ngə́ á bɨgɨ len nkənu za ɨ tsinɨ a mu nkən wu shiʼnɨ a mbó bən tɨ ashwugɨrɨ, bɨgɨ sé a məbárɨ́ a mbó bo gha kə́ tsɛʼ a nye məkum a nkfu ə.

⁶Lá ba bɨ kɨ́nə́ nkɔ́ʼsə́ awa atɨ́ tso bɨntsagɨnɨ lá, sé azhyɛ zə fi zə tsɛrə a mbó me kwiʼtə. Ma sóŋə́ ɨ lan lá mbɨ́ʼ ngə́ ma sá kwebtɨ tse zɛn a nye bo tso bɨntsagɨnɨ; ka Ŋwi a nchɛrə ayi ɨsáʼ ŋwɔn ndzɔ́ŋə́ lá nkyerɨ ɨzhi ɛ.

⁷Lá bo báŋnɨ́ ndzɛ́n ngə́ Ŋwi a ghánə afaʼ a mbó me a sóŋ nkən wu shiʼnɨ a mbó ba a se bə Yuda be, tso mbáʼ wɛrə a ghánə a mbó Bita afaʼ a sóŋ nkən wu shiʼnɨ a mbó bə Yuda lá.

⁸Mbɨ́ʼ ngə́ a ntsǎ a ndzum mɨtən mɨ Ŋwi bɨ ghɨ́ aghan a nye ntom Yeso a mbó ba a se bə Yuda be, tso mbáʼ bɨ ghɨ́nɨ́ a Bita a nye ntom Yeso a mbó bə Yuda lá.

⁹Jemsɨ, Bita abɔʼnɨ Yoane, bo ba bɨ kɨ́nə́ nkɔ́ʼsə́ awa atɨ́ tso ntɛʼ ngǒtə ɨbɛn ba bɨ kɨ́nə́ ndzɔŋə a Kristo lá, bo zɛ́n ngə́ Ŋwi a ghánə afaʼ nɨ líʼ zen a mbó me; ma lan, bo tíʼ ntsaʼtɨ mbó ɨmɨgɨ Banabasɨ, tso alɨgɨ ngə́ bɨgɨ bo bɨtsum bé ngaŋ aku a mɔ́ʼɔ́ ghe. Bɨgɨ bo bémnɨ́ ngə́ Banabasɨ nɨ me mɨ faʼ a mbó ba a se bə Yuda be, á bo faʼ a mbó bə Yuda ghe.

¹⁰Anu atsum za bo lɔ́ntɨ́nɨ́ a mbó bɨgɨ a bé ngə́ á bɨgɨ ngwáʼtə́ a nkwátɨ́ ngaŋ afúm tsa tsɨ tsínɨ́ a tɨtərɨ ɨbɛn ba bɨ nɨ́ŋnɨ́ mɨntəm ɨma a nye Kristo a Yerosalɛm, mbe anu za ma kwɛ́nə́ ndǒ nɨ ntəm ɨghə ɨtsum a ngɨə ghe.

¹¹A nkfu za Bita a yénɨ́ Antyokɨ, ma ghámtɨ́ ayi asaŋəsaŋ, mbɨ́ʼ ngə́ anu za a wɛrə a ghɨ́nɨ́ a lán ngə́ wɛrə a fə.

¹²Bɔŋ á ɨbɛn bə tse ba Jemsɨ a tyígɨ́nɨ́ á bɨ ngyiŋə nkuŋə ɨwu, Bita a kə́ ndzɨ́ə bo bɨ ɨbɔmbɨma, mbe ba a se bə Yuda be ə. Lá a nkfu za ɨbɛn biŋ yenə nkon, wɛrə a shwɛ́ʼtɨ́ ayi, nchi keʼ bə ndzɨ bo bɨ ba a se bə Yuda be, mbɨ́ʼ ngə́ wɛrə a kə́ mbɔ́gɨ́ ɨmɨgɨ mɨ ɨbɛn ba bɨ kɨ́nə́ ndǒ ngə́ á bɨ tsəŋ ɨlagɨ ba a se bə Yuda be ə.

¹³Ɨbɔmbɨma bə mɔʼɔ, mbe bə Yuda kɨ́ mbiʼnɨ ngɨ̌ ɨnu ɨtsi mətsen bo bɨ Bita; tsɛʼ Banabasɨ, bɨ kɨ́ ntamtɨ ayi a kon a mu ngɨnɨ mɨnu ɨtsi ɨtsa ghe.

¹⁴Mbáʼ ma zɛ́nɨ́ ngə́ aku a nɨyen aza a sé tɛmnɨ a ngɨ ɨnu nkənu tsa tsɨ tsinɨ a mu nkən wu shiʼnɨ lá, ma sóŋ a mbó Bita a ɨshi bo bɨtsum ngə́, “O nɨ ŋwɔn bə Yuda, lá o chyɛ̌ tso wa a se ŋwɔn bə Yuda be, nkoʼ tso ŋwɔn bə Yuda be. O kwɛ ntiʼə ndɔ́btɨ́ ɨ nyəm ba a se bə Yuda be ngə́ á bo nchyɛ̌ tso bə Yuda lá ɨ nə́ le?”

¹⁵Tsɛʼ a nkənu, bɨgɨnə nɨ bə Yuda adzaŋ za bɨ jwínɨ́ awɨgɨnə, nkeʼ “Ba a se bə Yuda be bə mɨbvu” be, adzaŋ za bɨ tɔ́ŋnə́ awa lá.

¹⁶Lá bɨgɨnə zhi ngə́ Ŋwi a ghɨə ŋwɔn a tɛmnɨnə a ɨshi ɨmɨgɨ zɨ ntsǎ lá tsɛʼ a ndzum abeməntəm azhi a nye Yeso Kristo, ndáʼ keʼ be be adzaŋ za a ghɨnɨ ɨnu tsa Nyɔngɔŋ a lɔnə ghe. Bɨgɨ kɨ nɨŋ mɨntəm ɨmɨgɨ a nye Kristo Yeso lá taŋ á Ŋwi a ghɨ á bɨgɨ tɛmnɨ a ɨshi ɨmɨgɨ zɨ a ntsǎ a ndzum abeməntəm azɨgɨ a nye Kristo, nkeʼ be be a ntsǎ a ndzum ngɨ̌ ɨnu tsa Nyɔngɔŋ Mǒse a lɔnə ghe. Mbɨ́ʼ ngə́ ka Ŋwi a ngɨə ayi a ŋwɔn tse á ntɛ́mnə́ ayi a ɨshi ɨmɨgɨ zɨ lá a ntsǎ a ndzum ngɨ̌ ɨnu tsa Nyɔngɔŋ Mǒse a lɔnə ghe.

¹⁷Be a be adzaŋ za bɨgɨnə tiʼnə njwə́ŋtə́ a ntɛ́mnə́ a ɨshi ɨmɨgɨ Ŋwi, a ntsǎ a ndzum adzaŋ za bɨgɨnə tsinɨ a mbúm bɨgɨnə bɨ Kristo, bɨgɨnə tiʼ ndzɛn ngə́ bɨgɨnə nɨ ngaŋ ngɨ̌ mɨbvu adzaŋ za ba a se bə Yuda be benɨ lá — məzen a diʼ lá ngə́ Kristo a tsagɨnə awɨgɨnə a mu ɨbvu le? Kə́ kə́!

¹⁸Be ma biʼnɨ mbɨŋə mbémə́ a Nyɔngɔŋ Mǒse wa ma tónɨ́, lá be ngə́ ma diʼ ngə́ ma nɨ ŋwɔn wa a fasɨnə a Nyɔngɔŋ Mǒse ghe.

¹⁹Be a kwɛ mbe ngə́ bɨ ghamə lá anu mbɨ́ʼ a Nyɔngɔŋ Mǒse muŋ ma tsi tso ŋwɔn wa a kfonə, nyɔngɔŋ a keʼ mbɨŋə ntsɨŋnə aghan taŋ á ma chi tiʼ tsinə, ɨ faʼnə a mbó Ŋwi ə. Bɨ zhwitɨnə aghan bɨgɨ Kristo atɨ abaŋnɨ-baŋnɨ azhi

²⁰taŋ á tiʼ mbe ngə́ ka bə mbvurɨ mbe ayi me wa ma tsinɨ ntən, lá a nɨ zɨ Kristo mbáʼ a tsinɨ ntən a mu ɨnye me ghe. Ntsi ntən za ma tsinɨ ɨwu tɨtsɔŋnɨ, ma chyɛ̌ ntsǎ lá a ndzum abeməntəm za ma tsinɨ nɨ zɛrə a nye Mɔn Ŋwi, zɨ wa a kɔ́ŋnɨ́ aghan nga ntsi ntən ɨzhi tso mɨtsuʼnɨ mɨ atú mbɨ́ʼ aghan lá.

²¹Ma tuŋ aghə ɨ nyɛʼ abɔŋəntəm a Ŋwi ə. Lá be Ŋwi a ghɨ ŋwɔn a tɛmnɨ a ɨshi ɨmɨgɨ zɨ ntsa a ndzum Nyɔngɔŋ Mǒse, lá be ngə́ Kristo a kfó atú adaŋədaŋə ghe!