Read Ngemba Galesha 3 Bible Online

Galesha 3 - Ngemba bible

Galesha 3

¹Ɨdzɨŋtɨ bə Galesha! Awən a lɔʼ bɨdzɨŋ le? A ɨshi ɨmɨgɨ bən, bɨ fɨ́ʼtɨ́ ɨ shiʼnɨ mbɨ́ʼ nɨvwo nɨ Yeso Kristo atɨ abaŋnɨ-baŋnɨ ə!

²Soŋnə aghan nɨ táʼ anu wiŋ ə: nɨ kwárɨ́ Azhwi a Ŋwi ntsa lá a ndzum ngɨ̌ za Nyɔngɔŋ Mǒse a lɔnə kə ntsa a ndzum ndzǔʼ nkən wu shiʼnɨ ɨ kɨ nɨŋ mɨntəm ɨmən a nye wɛrə le?

³Nɨ lanɨ ndzɨŋtɨ adzaŋ wen lá ngə́ ke le? Azhwi a Ŋwi a tságɨ́nɨ́ awən a nɨ́ŋ mɨntəm ɨmən a nye Kristo a mbiʼnə ghe. Nɨ tiʼə ndǒ ndwitə nɨ ɨnɨŋ mɨntəm ɨmən a nye mɨtən ɨmən le?

⁴Njingə nɨ tsá a mu ɨnu tsɨ ghaʼnɨ lá atú adaŋədaŋə le? Tsɛʼ a nkənu a sé atú adaŋədaŋə be!

⁵Ŋwi a ghǎ Azhwi a mbó bən nkə́ ngɨ̌ ɨnu tsɨ yerɨnɨ-yerɨnɨ a tɨtərɨ bən lá mbɨ́ʼ ngə́ nɨ ghɨə a za Nyɔngɔŋ Mǒse a lɔnə kə mbɨ́ʼ ngə́ nɨ zǔʼ nkən wu shiʼnɨ nkə́ nɨ́ŋə́ mɨntəm ɨmən ɨwu le?

⁶A nɨ wiʼtɨ Abraʼm ə. Aŋwaʼnɨ a Ŋwi a soŋ mbɨ́ʼ ayi ngə́, “Wɛrə a nɨ́ŋ ntəm ɨyi a nye Ŋwi, mbɨ́ʼ abeməntəm azhi Ŋwi a lɔ́gɨ́ ayi a nye ŋwɔn wa a chínɨ́nə́.”

⁷Nɨ tsi nɨ njiɛ ngə́ ngótɨ́ ɨbɛn ba bo nɨ ɨlə̌ ndá Abraʼm lá ɨbɛn ba bɨ tsinɨ nɨ abeməntəm ə.

⁸Aŋwaʼnɨ a Ŋwi a fóm ndzɛ́n ngə́ Ŋwi a mɨ ghɨ á ba a se bə Yuda be tɛmnɨ a ɨshi ɨmɨgɨ zɨ ntsa a ndzum abeməntəm ə. Ma lan, aŋwaʼnɨ a Ŋwi a chwítɨ́ Nkən wu Shiʼnɨ wa a mbó Abraʼm ngə́: “A ntsǎ a ndzum gho, Ŋwi a mɨ fɔgɨ ngwəgɨ ŋwɔn mɨsɔŋ a ntsu tsum ə.”

⁹Abraʼm a tsí nɨ abeməntəm, Ŋwi a tiʼ fɔgɨ ayi; ma lan, ŋwɔn tsum wa a tsinɨ nɨ abeməntəm, Ŋwi mɨ fɔgɨ ayi tsɛʼ adzaŋ za wɛrə fɔ́gɨ́nɨ́ a Abraʼm lá.

¹⁰Ɨbɛn ba bɨ zɛʼtɨnɨ awa a nye ndzuʼnɨ Nyɔngɔŋ Mǒse, bɨ lɔʼ awa ghe. Mbɨ́ʼ ngə́ aŋwaʼnɨ a Ŋwi a soŋ ngə́, “Ŋwɔn tsum wa a se ndzúʼnɨ́ ɨnu ɨtsum tsa bɨ ŋwaʼnɨnɨ a mu aŋwaʼnɨ a Nyɔngɔŋ Mǒse nkfu tsum, Ŋwi a lɔʼnə ayi ɛ!”

¹¹Tɨtsɔŋnɨ, a lán ngə́ ka Ŋwi a ngɨə ayi á ŋwɔn tsɛrə a ntɛ́mnə́ ayi a ɨshi ɨmɨgɨ zɨ ntsǎ a ndzum Nyɔngɔŋ Mǒse, mbɨ́ʼ ngə́ aŋwaʼnɨ a Ŋwi a soŋ ngə́, “A nɨ tsɛʼ ŋwɔn wa Ŋwi a ghɨnɨ a tɛmnɨ a ɨshi ɨmɨgɨ zɨ ntsa a ndzum abeməntəm wa a ghɨnɨ tsi ntɨŋ ə.”

¹²Lá ka Nyɔngɔŋ Mǒse a tsi ayi nɨ anu zə tsɛrə a ngɨə bo abeməntəm ə. Tso mbáʼ aŋwaʼnɨ a Ŋwi a baŋnɨ soŋ ngə́, “Ŋwɔn wa a ghɨnɨ anu atsum za Nyɔngɔŋ Mǒse a lɔnə, a ghɨ tsi ntən a ntsǎ a ndzum ndzuʼnɨ bɨnyɔngɔŋ ba.”

¹³Kristo a zón atú azɨgɨnə a mbó ndɔʼə za Nyɔngɔŋ Mǒse a yenə nɨ zɛrə mbáʼ bɨ lɔ́ʼnɨ́ ayi mbɨ́ʼ atú azɨgɨnə lá. Mbɨ́ʼ ngə́ aŋwaʼnɨ a Ŋwi a soŋ ngə́, “Ŋwɔn wa a ləŋnɨ a nye atɨ, Ŋwi a lɔʼ ayi ɛ.”

¹⁴Kristo a ghɨ́ a məzen lá taŋ á ɨfɔgə wa Ŋwi a káʼnɨ́ Abraʼm nɨ wɛrə, bɨ chi gha a wɛrə a mbó ba a se bə Yuda be a ntsǎ a ndzum Kristo Yeso, taŋ a ntsǎ a ndzum abeməntəm bɨgɨnə chi kwarɨ Azhwi za Ŋwi a káʼnɨ́ awɨgɨnə nɨ zɛrə lá.

¹⁵Ɨbɔmbɨma ɨban, á ma lɔgɨ alisɨ a nye ɨnu tsa tsɨ fúnə́ nɨ njwi nɨ njwi ɛ: be ɨbɛn bi bɨbá nɨŋ akan, muŋ ŋwɔn nɨ bo wu tse a chi keʼ akan məza saʼnə.

¹⁶Lá á nɨ zhi ngə́ Ŋwi a ghɨ́ ɨkaʼ ɨchi tsa lá a mbó Abraʼm bo ŋwɔn ɨlə̌ ndá ɨyi ɛ. Ka aŋwaʼnɨ a Ŋwi za soŋ ayi ngə́, “Ɨbɛn bɨ ɨlə̌ ndá” ndiʼə lá ngə́ a nɨ bə ghaʼnə; lá a soŋ be ngə́, “Ŋwɔn ɨlə̌ ndá” ndiʼə lá ngə́ a nɨ táʼ ŋwɔn, ŋwɔn məwa a be lá Kristo ghe.

¹⁷Məzen a diʼ lá ngə́ Ŋwi a ghɨ́ akan bo Abraʼm nkɨ nkaʼ a ndé zɛrə ghe. Nyɔngɔŋ Mǒse wa bɨ ghánɨ́ a ndzum ɨlom nkɨ tsi nɨkwa nɨ mɨghúm mi mɨntárə́ a chi keʼ tsənkɨ akan za, ɨ kɨ chíʼtɨ́ akaʼ a Ŋwi ə.

¹⁸Mbɨ́ʼ ngə́ be a be ngə́ azúm zə ghanɨ zə Ŋwi a zɛ́ʼtə́ ayi lá a nye Nyɔngɔŋ Mǒse, lá be ngə́ ka a bə ndzɛʼtɨ ayi a nye akaʼ azhi za. Lá Ŋwi a ghá azúm zə ghanɨ azhi a mbó Abraʼm lá mbɨ́ʼ akaʼ azhi za.

¹⁹Nyɔngɔŋ Mǒse a tíʼ ntsi lá mbɨ́ʼ ake le? Bɨ kwíʼtɨ́ a wɛrə a nye akan za lá taŋ ɨ diʼ azúm za ɨbvu nɨ wɛrə ghe. A kɨ́ ntsi nɨ nchyɛ ɨ kɔʼ kuʼ njwi ngyiŋ ŋwɔn ɨlə̌ ndá Abraʼm, zɨ wa bɨ ghɨ́nɨ́ akaʼ za wəmbo lá. A yén ngá ɨtsendá Ŋwi nga a Nyɔngɔŋ Mǒse, Mǒse a tsi ɨwu ɨ faʼə a tɨtərɨ Ŋwi abɔʼnɨ bɨgɨnə ghe.

²⁰Be a be anu mbɨ́ʼ ɨbɛn bi bɨbá muŋ a lǒ a ŋwɔn wa a mɨ faʼ a tɨtərɨ bo ghe, lá Ŋwi a faʼə tsɛʼ zɨzɨ ə.

²¹Məzen a diʼ lá ngə́ Nyɔngɔŋ Mǒse a kwənkə bo ɨkaʼ Ŋwi le? Kə́ kə́! Mbɨ́ʼ ngə́ be a be ngə́ ŋwɔn mɨsɔŋ a ntsu a kwárɨ́nə a nyɔngɔŋ wa a chi yen nɨ ntsi ntən, muŋ ŋwɔn tsum a chi tɛmnɨ a ɨshi ɨmɨgɨ Ŋwi a ntsǎ a ndzum ndzuʼnɨ wɛrə ghe.

²²Lá aŋwaʼnɨ a Ŋwi a soŋ ngə́ mbyi tsum lǒ ngɨ ɨbvu tsɛʼ nkfu tsum; ma lan, azúm zə ghanɨ za bɨ káʼnɨ́ a zɛʼtɨ ayi a nye abeməntəm a nye Yeso Kristo, bɨ ghá lá a mbó ɨbɛn ba bɨ nɨŋnɨ mɨntəm a nye Kristo ghe.

²³Lá, mbɔŋə abeməntəm a ngyíŋə́, Nyɔngɔŋ Mǒse a fə́n awɨgɨnə tso ngaŋ atsáŋ ɨ kɔʼ kuʼ nkfu za Ŋwi a ghɨnɨ kyɛʼ adzaŋ za bɨgɨnə mɨ nɨŋ mɨntəm ɨmɨgɨnə a nye Kristo Yeso ghe.

²⁴Ma lan, Nyɔngɔŋ Mǒse a kə́ sáʼə awɨgɨnə ɨ kɔʼ kuʼ nkfu za Kristo a yénɨ́ taŋ á bɨgɨnə chi tiʼ tɛmnɨ a ɨshi ɨmɨgɨ Ŋwi a ntsǎ a ndzum abeməntəm ə.

²⁵Tɨtsɔŋnɨ wa abeməntəm a yenə lá, ka Nyɔngɔŋ Mǒse a bə nkwiʼə sáʼə ayi awɨgɨnə ghe.

²⁶Nɨ nɨ ɨbɔ bɨ Ŋwi bɨtsum ba bɨ tsinɨ a mbúm bo bɨ Yeso Kristo ntsa lá a ndzum abeməntəm ə.

²⁷Mbɨ́ʼ ngə́ nɨ kwárɨ́ nkyi, nɨ tíʼ ntsi a mbúm bɨŋ bɨ Kristo, ma lan, a tiʼ ntsi lá tsɛʼ tso ngə́ nɨ wəgɨ ntsi mbyi Kristo zɨmboŋ a nye bən tso ɨtsɛʼ ə.

²⁸Adzaŋ məwen, ka líʼ a tsi ayi ɨwu a tɨtərɨ bə Yuda bo bɨ ba a se bə Yuda be, a tɨtərɨ ɨbuʼ bo bɨ ɨbɛn ba a se ɨbuʼ be, a tɨtərɨ mbáŋnɨ́ bo bɨ bəngye; bən bɨtsum nɨ táʼ azúm mbɨ́ʼ ngə́ nɨ tsi a mbúm bɨŋ bɨ Yeso Kristo ghe.

²⁹Be a be ngə́ nɨ tsi lá a mbó Kristo, muŋ nɨ lá ɨbɛn bɨ ɨlə̌ Abraʼm ə. Nɨ ghɨ kwárɨ́ azúm za Ŋwi a kaʼnə awən nɨ zɛrə ghe.