Read Ngemba Galesha 5 Bible Online

Galesha 5 - Ngemba bible

Galesha 5

¹Nchyɛ̌ nɨ atú azɨgɨnə nɨ azúm za bɨgɨnə tsinɨ nɨ zɛrə ghe. Kristo a kyɛtɨnə mɨnkɨ mɨ abuʼ a nye bɨgɨnə ghe! Tɛmnə, nchikɨnə tso ɨbɛn nɨ atú aza, nkeʼ bə nkwiʼ nyɛʼtɨ ɨtumbəm ɨtsən a nye ɨbuʼ ə.

²Zhwiʼtɨnə! Me Baolo, ma soŋ a mbó bən ngə́ be nɨ nyɛʼtɨ ɨtumbəm ɨtsən bɨ tsəŋ ɨlagɨ ɨtsən muŋ, lá be ngə́ Kristo a se nɨ ɨlɨŋ wu tse a mbó bən tsi, kə́ tsɛʼ mɨnyiə ghe.

³A ma kwiʼ nkwantɨ a ŋwɔn wa a mɨ nyɛʼtɨ atuəmbəm azhi ngə́ á bɨ tsəŋ alagɨ azhi ngə́ a mɨ zagɨ zuʼnɨ a Nyɔngɔŋ Mǒse tsum ə.

⁴Bən ba nɨ lɔnɨ ntɛmnə a ɨshi ɨmɨgɨ Ŋwi a ntsǎ a ndzum ndzuʼnɨ Nyɔngɔŋ Mǒse lá, nɨ fɨgɨnɨnə ɨtumbəm ɨtsən a nye Kristo ghe. Nɨ ton awən abɔŋəntəm a Ŋwi ə.

⁵A mbó bɨgɨ, ntsiŋə nɨ ntəm ɨzɨgɨ tsum ɨ nɨ ngə́ Ŋwi a mɨ ghɨ á bɨgɨ tɛmnɨ a ɨshi ɨmɨgɨ zɨə; a nɨ zɛrə za bɨgɨ zhwíʼtɨ́nə́ ntsǎ a ndzum mɨtən mɨ Azhwi a Ŋwi ma mɨ faʼnə ntsǎ a ndzum abeməntəm azɨgɨ ə.

⁶Mbɨ́ʼ ngə́, mbáʼ bɨgɨ tsinɨ a mbúm bɨgɨ bɨ Kristo Yeso lá, ka líʼ a tsi ayi ɨwu mbáʼ be o tsəŋ alagɨ azo kə o koʼ tsəŋə; anu za a tsinɨ nɨ ɨlɨŋ a nɨ ngə́ á nɨ ndǐʼ abeməntəm azən ntsa a ndzum nkɔŋ ŋwɔn nɨ ŋwɔn ə.

⁷Nɨ kɨ chyɛ ngyiŋə aku a nɨyen zə shiʼnɨ ə! A ghɨ́ ɨwa nɨ kyɛntɨ ndzuʼnɨ nkənu le? A tsá lá ɨ nə́ ndɛtɨ mɨntəm ɨmən le?

⁸Məzen a sé Ŋwi ghɨ, mbɨ́ʼ ngə́ a nɨ zɨ wa a tsɔ́ʼnɨ́ awən ngə́ á nɨ yen a mbó zɨə.

⁹Bɨ sóŋə́ ngə́, “A nɨ tsɛʼ mɨnyi mɨ mbɛgə wa a ghɨnɨ ntsə́m abán tsum fugə nkɔʼə ghe.”

¹⁰Lá ma bvurɨ nɨŋ ntəm ɨghan a nye bɨŋ ə. Ntsi mbyi ɨzɨgɨnə a mbúm bɨgɨnə bɨ Maʼmbyí ghɨə ma nɨŋ ntəm ɨghan a nye bən ngə́ nɨ mɨ keʼ anu zədaŋ bə nkwaʼtə. Ŋwɔn wen wa a ghánɨ́ ngɨ́ʼ nɨ bən lan, kə a be ɨwa kə mbe ɨwa muŋ, Ŋwi a mɨ nɨŋ ngɨ́ʼ wə ɨnye ə.

¹¹Lá a mbó me nə ɨbɔmbɨma ɨban, be ma mbvúrə́ ngěn nɨ mbyi ɨ sóŋə́ ngə́ bɨ tsi nɨ ntsəŋ alagɨ, bɨ bɨŋə nkwiʼə ndɨ́gə́ aghan lá ngə́ ke le? A be be ngə́ məzen a lá nkənu muŋ anu za ma sóŋnə́ mbɨ́ʼ adzaŋ za Kristo a kfónɨ́ atɨ abaŋnɨ-baŋnɨ se mbɨŋə ngǎ ngɨ́ʼ zɨ tsɛrə ghe.

¹²Ma lǒ ngə́ á ɨbɛn ba bɨ ghánɨ́ ngɨ́ʼ nɨ bən lá, á bo ghɛn nɨ mbyi ntsɔʼ ɨtumbəm ɨtsa ntiʼ bə sɔŋnə!

¹³A mbó bən nə ɨbɔmbɨma ɨban, Ŋwi tsɔ́ʼ awən lá ngə́ á nɨ tiʼ mbe ɨbɛn nkeʼ ɨbuʼ bə mbe ə. Lá á nɨ keʼ nyɛʼtɨ á nchyɛ nɨ atú azən məziŋ be anu za a mɨ ghɨ á ɨnu tsa mbəmnye lɔnə tiʼə ntsɨŋnə awɨŋ ə. A nɨ baŋnɨ nyɛʼtɨ á akɔŋnɨ a be azúm za a mɨ ghɨ á nɨ faʼə a mbó ŋwɔn nɨ ŋwɔn ə.

¹⁴Mbɨ́ʼ ngə́ bɨ zumtɨ ɨnu ɨtsum a mu Nyɔngɔŋ Mǒse ɨ nɨŋ a mu táʼ ntɨgə wɛnə ngə́: “Kɔŋ a ŋwɔn nɨbarə ɨgho tsɛʼ adzaŋ za o kɔŋnɨ atuəmbəm azo ə.”

¹⁵Lá be nɨ ngɨ̌ ɨnu tso ɨnyam mɨbaʼ, ndɛ́mtə́ nkə́ sɔ́btə́ a ŋwɔn nɨ ŋwɔn muŋ, be nɨ tú ɨtú ɨtsɨŋ lán muŋ, nɨ mɨ nyam tsənkɨ a ŋwɔn nɨ ŋwɔn ə.

¹⁶Anu za ma sóŋnə́ lá a nɨ ngə́: á nɨ nyɛʼtɨ Azhwi a Ŋwi á ntsɨ̌ŋnɨ̌ ntsi mbyi ɨtsən, nɨ mɨ keʼ nkə́ ngɨ̌ ɨnu tsa mbəmnye lɔnə ghe.

¹⁷Mbɨ́ʼ ngə́ anu za mbəmnye ɨtsɨgɨnə lɔnə a se za Azhwi a Ŋwi a lɔnə be, za Azhwi a Ŋwi a lɔnə a keʼ kɨ mbe za mbəmnye ɨtsɨgɨnə lɔnə ghe. Ɨnu tsen tsi bá nɨ ngaŋ kɨban, ndiʼ lá ngə́ o chi koʼ ghɨ anu za o lɔnə ghe.

¹⁸Lá be Azhwi a Ŋwi a ntsɨ́ŋnə́ agho, lá be ngə́ ka o bə ntsi agho nɨ ndzuʼnɨ Nyɔngɔŋ Mǒse ghe.

¹⁹Ɨnu tsa mbəmnye ghɨnə tsɨ tsi tsɛʼ asaŋəsaŋ ə. Tsɨ dǐʼ ɨtumbəm ɨtsa a ngɨ̌ ɨnu ntɔrɨ ɨlɛbɨ, ɨ nɔnkɨnə tso ngvo tɨ adɨrətú,

²⁰ngúʼsɨ́ ɨbɔ bɨ abe nkə́ fuə abú ə. Ɨbɛn bə̌ŋ ngaŋ kɨban ntiʼə ntónə́; nghɨ́ʼnə́, nchyɛ̌ nɨ alwɛntɔ́ŋ nkə́ ndǒ nchyɛ a mbyi ŋwɔn tsum taŋ á bɔŋ tsɛʼ a mbó bo ghe. Bo yɛbtɨ ɨtumbəm ɨtsa nchyɛ̌ atú atú nchi keʼ bemnɨ;

²¹nchyɛ̌ nɨ aghɨʼnɨ, ɨ nǒ mbánə́, nchyɛ̌ a mu nɨdorɨ tə́ nchwátɨ́ ɨnye nkə́ ngɨ̌ ɨbə́ŋ ɨnu tsə mɔʼɔ tso mətsiŋ ə. Ma kwantə awən tɨtsɔŋnɨ tso mbáʼ ma kwɛ́nə nkwantɨ lá ngə́: ɨbɛn ba bɨ ghɨnɨ ɨnu mətsiŋ láʼ keʼ kon a mu Nɨfɔ nɨ Ŋwi ə.

²²Lá Azhwi a Ŋwi a jwiə akɔŋnɨ, nɨdorɨ, mbɔnɨ, nchigə, nchyɛ nɨ ntəm ngɨ ɨbɔŋ, ɨbɔŋ, ɨfaʼə nɨ táʼ ntəm,

²³ɨ shiʼtə nɨ atuəmbəm azo a tɨshe abɔʼnɨ nchwatɨ ɨnye ɨzo ghe. Ka nyɔngɔŋ tse a ton ayi ɨbə́ŋ ɨnu tso mətsiŋ ə.

²⁴Ɨbɛn ba bɨ tsinɨ a mbó Kristo Yeso zhwitɨnə ɨnu tsa mbəmnye lɔnə nkwiʼtɨ ɨnu tsa mbəmnye bɨ́ŋnɨ́nə́ ɨwu nkə́ ndǒ lá.

²⁵Azhwi a Ŋwi a ghanə ntsi mbyi a mbó bɨgɨnə ghe; wɛrə a kɨ ndzagɨ ntsi nɨ ntsɨŋnɨ ntsi mbyi ɨtsɨgɨnə ghe.

²⁶Bɨgɨnə mɨ zagɨ nkeʼ ŋǔʼ ɨnye kə ɨ ghɨnə á ntɔŋ ŋwɔn nɨ ŋwɔn ndwɛ̌ kə nghɨʼnə a ŋwɔn nɨ ŋwɔn ə.