Read Ngemba Ɛfɛso 3 Bible Online

Ɛfɛso 3 - Ngemba bible

Ɛfɛso 3

¹Mbɨ́ʼ a məzen, me Baolo, ma nɨ ngaŋ atsáŋ mbɨ́ʼ ɨfaʼ ɨghan a mbó Kristo Yeso mbɨ́ʼ atú azɨŋ ɨbɛn ba nɨ se bə Yuda be ə.

²Ma kwaʼtɨ ngə́ nɨ zagɨnə ndzuʼ ngə́ Ŋwi, a mu abɔŋəntəm azhi, a ghanə afaʼ zen a mbó me mbɨ́ʼ ɨbɔŋ ɨwɨŋ ə.

³Ŋwi a kyɛ́ʼ ɨkwaʼtɨ ɨchi tsə nkubə, nkɨ ntiʼ ngɨ ma zhi a tsɛrə ghe. Ma fomnə ŋwaʼnɨ nghumtɨ a zɛrə ghe.

⁴Be nɨ kɨ ntɔŋ anu za ma ŋwaʼnɨnɨ, nɨ mɨ yɛʼ a za ma zuʼnɨ nkɨ nji mbɨ́ʼ a za bɨ lwɛʼnɨ mbɨ́ʼ a Kristo ghe.

⁵A bé a mbyi lá bɨ keʼ anu zə lwɛʼnɨ məzen a mbó ŋwɔn mɨsɔŋ ghumtə, lá Ŋwi a kyɛʼ a zɛrə a mbó ntóm Yeso tsə fɛmnɨ bo ntóm Ŋwi tsa tsɨ kɨnɨ fɛm ntsa a ndzum Azhwi azhi ɛ.

⁶Anu za bɨ lwɛ́ʼnɨ́ lá a nɨ ngə́, a ntsǎ a ndzum Nkən wu Shiʼnɨ, ɨbɛn ba bo se bə Yuda be chintɨ bə Yuda a nkwárɨ́ ɨfɔgə Ŋwi ə. Bo tiʼ mbe ɨlam ɨnye táʼ mbəmnye za, nkɨ ntiʼ ntsi a mu akaʼ za Ŋwi a káʼnɨ́, ntsa a ndzum Kristo Yeso ghe.

⁷Ŋwi a ghɨ́ aghan ma be ŋwɔn afaʼ Nkən wu Shiʼnɨ ntsa a ndzum azúm zə ghanɨ mbe abɔŋəntəm azhi za a ghanɨ a mbó me ntsa a ndzum adzaŋ za mɨtən ɨmyi faʼnə ghe.

⁸Ka ma kuʼ aghan ndwɨgɨnɨ ndzum ŋwɔn a tɨtərɨ ɨbɛn bɨ Ŋwi ə. Lá a mu abɔŋəntəm a Ŋwi, wɛrə a ghá abárɨ́ a mbó me a ndɔgɨ Nkən wu Shiʼnɨ ɨ ghɛn nɨ wɛrə a mbó ɨbɛn ba bɨ se bə Yuda be ə. Nkən məwiŋ be lá mbɨ́ʼ afuʼ a tɨmi za a tsinɨ a nye Kristo ghe.

⁹Ŋwi a kɨ́ ngá abárɨ́ a mbó me ngə́ á ma ghɨ ngə́ á ŋwɔn tsum a zɛn adzaŋ za akwaʼtɨ zə nkubə zə Ŋwi a chinɨ ghɨ be anu ə. Ŋwi, zɨ wa a kaʼnɨ ɨdzúm ɨtsum, a lwɛ́ʼ akwaʼtɨ azhi zə nkubə nchwuʼnɨ a lɔ́ʼkwam,

¹⁰taŋ a nkfu tɨtsɔŋnɨ, ntsa a ndzum ndáŋwi, bɨtsen bɨ ndá bɨ Ŋwi ba bɨ sáʼnə́ abɔʼnɨ ɨzhwi tsɨ tən tsa tsɨ sáʼnə́ a fɔməbvurə chi zhi mɨndóm mɨtsum ma zóŋ Ŋwi a tsinɨ nɨ mɛrə ghe.

¹¹Ŋwi a ghɨ́ a məzen ndzɔ̌ŋ akyaŋtɨ azhi za a ghɨnɨ ghɔ́ŋ nɨnkoŋ ə. Wɛrə a ghɨ́ a məzen a fu ntsa a ndzum Kristo Yeso Maʼmbyí ɨwɨgɨnə ghe.

¹²A ntsǎ a ndzum adzaŋ za bɨgɨnə tsinɨ a mbúm bɨgɨnə bɨ Kristo abɔʼnɨ abeməntəm wə ɨnye, bɨgɨnə tiʼ ntsi nɨ mɨtən a ngěn a ɨshi Ŋwi tɨ nɨbɔgɨ ə.

¹³Ma lan, ma buʼ mbó a mbó bən, á mɨntəm ɨmɨŋ keʼ ghɔgɨ mbɨ́ʼ ngə́ ma zě ngɨ́ʼ a nkfu bɨŋ ə. Lá a nɨ taŋ á nɨ səŋ ɨwu ə.

¹⁴Mbɨ́ʼ anu məzen ma kwem mɨkwiʼtɨ ɨman a ɨshi Tarɨ,

¹⁵zɨ wa ngwəgɨ tsum a fɔməbvurə abɔʼnɨ atuəshe kwárɨ́nɨ́ ngótɨ́ mɨkum ɨma wəmbo ə.

¹⁶Ma lɔ́ntə́ a mbó Ŋwi ngə́ á wɛrə a ghɛn a mu nɨfáŋ ɨni na nɨ ghaʼnɨ nga awən nɨ adaʼ ntsa a ndzum Azhwi azhi ngə́ á nɨ ntɨ́ŋə́ a mu azhwi azɨŋ ə.

¹⁷Ma kə́ ntsáʼtə́ a Ŋwi ngə́ á Kristo a vwu njwuʼ ɨzhi a mu mɨntəm ɨmən ntsa a ndzum abeməntəm ə. Ma tsaʼtə a Ŋwi ngə́ á nɨ twəŋ mɨngaŋ ɨmən á mɨ shwi, ntən a mu akɔŋnɨ,

¹⁸taŋ á bən abɔʼnɨ ɨbɛn bɨ Ŋwi bɨtsum chi tsi nɨ adaʼ a ndzúʼə ɨ kɨ zhi adzaŋ za akɔŋnɨ a Kristo a ghaʼnɨ titi ndwitə ɨzhi ɨ keʼ ɨwu be ə.

¹⁹Nɨ chi ghɨ zhi akɔŋnɨ azhi ɨ tiʼ kɨ be tso Ŋwi a nye mɨndóm mɨtsum — le buŋ bɨ chi láʼ keʼ zhi a zɛrə ɨ ghɛn mɛtə.

²⁰A mbó Ŋwi, zɨ wa a faʼnə nɨ mɨtən ma mɨ faʼnə a mu ɨnye bɨgɨnə, a chi faʼ nɨ mɛrə ɨ ghɨ a za a tsanɨ a za bɨgɨnə chinɨ bitɨ kə ɨ kwaʼtɨ,

²¹á nɨfáŋ tsi wəmbo, ndo a mbó ndáŋwi, nkɨ ndo a mbó Kristo Yeso, nkfu tsum, nɨnkoŋ nɨnkoŋ ə. A be lá.