Read Ngemba Ɛfɛso 4 Bible Online

Ɛfɛso 4 - Ngemba bible

Ɛfɛso 4

¹Me wa ma nɨ ngaŋ atsáŋ mbɨ́ʼ ngə́ ma faʼə a mbó Maʼmbyí, ma tiʼə mbúʼtɨ́ mbó a mbó bən ngə́ á ntsi mbyi ɨzɨŋ tsi a nye ɨfɨʼ za ɨ diʼnɨ ngə́ nɨ lá ɨbɛn ba Ŋwi a tsɔʼnə.

²A nɨ shíʼtə́ nɨ ɨtumbəm ɨtsən a tɨshe nkfu tsum, mbɔnɨ nkɨ ntsi nɨ nchigə ghe. A nɨ ndiʼə akɔŋnɨ azən a nye adzaŋ za nɨ chigɨnɨ ntəm bən nɨ bɨŋ ə.[6]

³A nɨ ngɨə atsum a ndé nchyɛ a mbúm za a ghánə́ Azhwi ntsǎ a ndzum mbɔnɨ za ɨ kórɨ́nə́ awən nɨ tiʼ táʼ ghe.

⁴A tsi táʼ mbəmnye, a kɨ ntsi táʼ Azhwi, tsɛʼ adzaŋ za a tsinɨ táʼ ntsiŋə nɨ ntəm tsum za Ŋwi a tsɔ́ʼnɨ́ awən mbɨ́ʼ a zɛrə lá.

⁵A tsi tsɛʼ táʼ Maʼmbyí, táʼ abeməntəm abɔʼnɨ táʼ nkwarɨ nkyi ɛ.

⁶A tsi táʼ Ŋwi, mbe Ta bɨ ŋwɔn tsum, zɨ wa a tsinɨ atú ŋwɔn tsum, ntsǎ a ndzum ŋwɔn tsum ɨ faʼə, nkɨ ntsi a mu atsum ə.

⁷Lá Kristo a díʼ abɔŋəntəm azhi a mbó ŋwɔn nɨ bɨgɨnə tsum, ɨfaŋə za azúm zə ghanɨ məzen a faŋnɨ, a diʼ adzaŋ za wɛrə a ghánə́ abó ə.

⁸Aŋwaʼnɨ a Ŋwi a soŋ ngə́,[7] “A nkfu za wɛrə a kɔ́ʼnɨ́ ngɛ́n adiʼ za a kɔʼnɨ ngɛn ntsa ɨtsum, a ghɛ́n nɨ bə ghaʼnɨ ba wɛrə a lɔ́gɨ́nɨ́ awa tso ngaŋ atsáŋ; nkɨ nga ɨdzúm tsɨ ghanɨ a mbó ɨbɛn ə.”

⁹A sóŋə́ ngə́, “A kɔ́ʼ ngɛn atɨ́” a diʼ lá ngə́ ke le? A diʼ lá ngə́ a ntsambyi a shíʼ ngyen a ndwitɨ mbyishe.

¹⁰Lá be ngə́ ŋwɔn wa a shíʼnɨ́ ngyén atuəshe a nɨ ndəŋndəŋ ŋwɔn wa a kɔ́ʼnɨ́ ngɛ́n atɨ́ ntsa fəŋ fɔməbvurə, ntiʼ ntsi ɨdiʼ ɨtsum a mu mbyi-mbyi tsum ə.

¹¹A bé wɛrə wa a “ghánɨ́ ɨdzúm tsɨ ghanɨ”; ɨdzúm tsə ghanɨ mətsiŋ be lá ngə́ a tsɔ́ʼ a bə tse ngə́ á bɨ be ntóm Yeso, á bə tse be ntóm Ŋwi, á bə tse be bɨfangɨrɨshi, á bə tse be bɨbasɨto bo bɨ bɨdiʼ bɨ aŋwaʼnɨ ə.

¹²Wɛrə a ghɨ́ a məzen lá taŋ ɨ kyaŋtɨ ɨbɛn bɨ Ŋwi a faʼ ɨfaʼ Kristo, taŋ ɨ kyaŋtɨ mbəmnye Kristo za ɨ kɔʼ ntɛm ə.

¹³Ma lan, bɨgɨnə bɨtsum ghɨ tíʼ yen bomnkɨ ɨ tsi a mbúm, ɨ be táʼ azúm a nye abeməntəm abɔʼnɨ adzaŋ za bɨgɨnə zhinɨ a Mɔn Ŋwi ə; bɨgɨnə ghɨ tíʼ be nchíkɨ́ ɨbɛn tso Kristo, ɨ kɨ be tso zɨ a nye mɨndóm mɨtsum,

¹⁴taŋ á bɨgɨnə keʼ bə mbvurɨ mbe tso ɨbɔ bə bɔrɨ ba bɨ bémnɨ́ ɨnu ɨtsum tsa bɨ diʼnə awa nɨ tsɛrə tə ntɔ́ʼnə́ lá. A ntám za ngaŋ ɨchwenu diʼnə keʼ shwuŋ awən nkwebtɨ ɨdiʼ nɨ bən tso kɨfɛrɨ ə. Ngaŋ ndiʼ ɨchwenu mətsiŋ tíntɨ́ ɨbɛn bɨ vwonə atám nɨ atú nɨ nkob za bo báʼnə́ ghe.

¹⁵A baŋnɨ mbe be nɨ ɨsoŋ nkənu a mu azhwi akɔŋnɨ, mbáʼ bɨgɨnə mɨ zagɨ kwi a nye mɨndóm mɨtsum ɨ kɔʼ kuʼ a nye ɨfɨʼ Kristo, zɨ wa a nɨ atú lá.

¹⁶Tso mbáʼ wɛrə a nɨ atú lá, Kristo a ghɨ̌ ɨlam ɨnye tsa ɨtsum bosɨnə adiʼ ziə mɔ́ʼɔ́, mɨkyebɨnɨ ma mɨ tsinɨ a mu mbəmnye za mɨ tiʼə nchíntɨ́ mbəmnye tsum táʼ adiʼ ə. Be a be ngə́ alam a ɨnye atsum a faʼə afaʼ azhi adzaŋ za a benɨ faʼ, mbəmnye tsum mɨ kwi ɨ tən, ɨ tsa a ndzum akɔŋnɨ ə.[8]

¹⁷Nɨ ɨkum Maʼmbyí, ma tiʼə nkwantə awɨŋ ə: njimbɨʼ nɨ bvurə ngěn nɨ mbyi nchyɛ̌ tso ba a se bə Yuda be, mbáʼ ɨkwaʼtɨ ɨtsa nɨ tsɛʼ ɨnu adaŋədaŋə,

¹⁸mɨntəm ɨma kɨ ntsi a mu ndzumnɨ lá. Ka bo kɨ ntsi awa a mu ntsi mbyi za Ŋwi a ghánə́ mbɨ́ʼ ngə́ bo tsi a mu tɨzhi be tɨ́sə́n nkə́ ntɨ́ŋə́ atú ə.

¹⁹Ka bo bə mbvurɨ ntsi awa nɨ adɨrətú tsɛʼ mɨnya; bo nyɛʼtɨ ɨtumbəm ɨtsa tsɨ ghɨnɨ mɨbvu, adzaŋ məwen, bo ghɨ̌ mbúŋ ɨtɨshwe ɨnu ɨtsum tsɛʼ tɨ a njwɛ́rɨ́kə́ ghe.

²⁰A sé anu za nɨ yɛ́ʼnɨ́ mbɨ́ʼ a Kristo be ə!

²¹Tsɛʼ a nkənu, nɨ zúʼ anu mbɨ́ʼ ayi ɛ. Tso ɨbɛn ba bɨ nɨŋnɨ mɨntəm ɨma a nye Kristo, bɨ díʼ awən nɨ nkənu za ɨ tsinɨ a nye Yeso ghe.

²²Ma lan, á nɨ nyɛʼ ɨlvuŋ ngɨnɨ mɨnu ɨtsən, mbáʼ tsɨ kɨ́nə́ ngɨə nɨ tsinə adzaŋ za nɨ kɨ́nə́ nchyɛ̌ lá. Ɨlvuŋ ɨnu ɨtsən tsa tsɨ kɨ́nə́ ndǒ tsɛʼ ɨnu ntámtɨ tsa tsɨ kɨ́nə́ ntsənkə awən lá.

²³Nɨ tsi nɨ ngɨ mɨntəm ɨmən abɔʼnɨ ɨtú ɨtsən á tsɨ zagɨ mbe tsɨ fi tsɛʼ ɨtsum ɨtsum,

²⁴ɨ kɨ be ɨbɛn bə fi ba bɨ káʼnɨ́ awa a nye ɨfi Ŋwi ə. Ɨbɛn bə fi məben, bɨ zě awa lá a nye ntsi mbyi ɨza za ɨ tɛmnɨnɨ nkɨ fɛmə.

²⁵Ma lan, á ɨchwenu keʼ ɨwu bə mbe ə! Ŋwɔn nɨ ŋwɔn a tsi nɨ ɨ zagɨ soŋ nkənu a mbó wu mɔʼɔ mbɨ́ʼ ngə́ bɨgɨnə bɨtsum lá ɨlam ɨnye táʼ mbəmnye za a nɨ Kristo lá.[9]

²⁶O lwi ntɔŋ, koʼ nyɛʼtɨ á alwɛntɔŋ azo a tintɨ agho ntsagɨ a ngɨ ɨbvu ə. Koʼ nyɛʼtɨ á nɨnyom a tsó nkwatɨ alwɛntɔŋ azo ə.

²⁷A nɨ keʼ gha abárɨ́ a mbó Dəbɨrɨ ə.

²⁸A mɨzɛrə kyɛntɨ ndzě ntiʼ mbiʼnɨ ɨ faʼə, taŋ ɨ dzɨ a mu andyiʼnɨ aza, ɨ chi kɨ kwatɨ ɨfúm ə.

²⁹A nɨgham nɨ tɨbɔŋ keʼ a ntsu bən a fúə, á be tsɛʼ nɨgham na nɨ kwátɨ́nə́, abə́ŋ za a ghɨnə ŋwɔn a kwinə, nkwátə́ a fɨ́gɨ́ anu za a bɔŋnɨ, taŋ anu za nɨ sóŋnə́ á ghɨ ɨbɔŋ a mbó ɨbɛn ba bɨ zuʼnɨ awɨŋ ə.

³⁰Njimbɨʼ nɨ ghɨ Gharɨ Ŋwi wu Fɛmnɨ a tsi nɨ adzə́ŋnɨ; mbɨ́ʼ ngə́ Azhwi zə Fɛmnɨ a nɨ alɨgɨ a Ŋwi a nye bən a ndiʼə ngə́ nɨ nɨ ɨbɛn ɨbyi, mbe mɨntɨ mə bɛʼnɨ ngə́ Njwi ghɨ yen za Ŋwi a ghɨnɨ loŋ awɨŋ ə.

³¹A nɨ nyɛʼ ɨnu tsa tsɨ tɔ́bɨ́nɨ́ mɨntəm mɨ ɨbɛn, mɨlwi abɔʼnɨ alwɛntɔŋ, ɨŋwankə a nchyɛ́ nɨ azúm kə anu abɔʼnɨ nɨgham nɨ ntsənkɨ ɨkum ŋwɔn wu shiʼnɨ nkwiʼtɨ awiʼtɨ a kɨban atsum ə.

³²A nɨ báŋnə́ ngɨ̌ ɨbɔŋ bən nɨ bən, nchyɛ̌ nɨ abɔnəntəm, ndɨ́gɨ́nə́ mɨbvu mɨ ŋwɔn nɨ ŋwɔn, tso mbáʼ Ŋwi, a ndzum Kristo a lɨgɨnɨnə mɨbvu ɨmən lá.