Read Ngemba Ɛfɛso 6 Bible Online

Ɛfɛso 6 - Ngemba bible

Ɛfɛso 6

¹Ɨbɔ, nɨ tsi nɨ ndzuʼnɨ bɨta ɨbən tso ɨbɛn ba bɨ nɨŋnɨ mɨntəm ɨma a nye Kristo mbɨ́ʼ ngə́ a kuʼnɨ a mbó bən a ngɨə mə lá.

²Aŋwaʼnɨ a Ŋwi a soŋ ngə́, “Zuʼnɨ a ta ɨgho bo nɨmi ɨgho ghe.” Məzen a nɨ ntsambyi ntɨgə za bɨ kwiʼtɨnɨ akaʼ ɨwu ngə́:[15]

³“taŋ á nɨ tsi ɨ shiʼnɨ, á ntsi mbyi ɨzən atuəshe kɨ sagɨ ə.”

⁴Bɨtarɨ, á nɨ keʼ tiʼtɨ ɨbɔ ɨbən a nye ndóm wa mɨntɔŋ ɨma mɨ lwinɨnə ghe. A nɨ báŋnə́ mərɨsə nkə́ ntɨ́gɨ́tɨ́ ɨbɔ ɨbən nɨ ɨnu tsa ɨbɛn ba bɨ zɔŋnə a Kristo tsinɨ nɨ ngɨə ghe.

⁵Ɨbuʼ, á nɨ ndzúʼnɨ́ bɨtabuʼ ɨbən ba a nɨ bə atuəshe wen lá nɨ nɨbɔgɨ abɔʼnɨ mbɨŋnə, ɨ faʼə nɨ táʼ ntəm tso ngə́ nɨ faʼə be a mbó Kristo ghe.

⁶A nɨ keʼ ngɨə a məzen tsɛʼ mbáʼ bo tɛmnɨ ɨwu ndzě awən mbɨ́ʼ ngə́ nɨ lǒ ngə́ á bo bemtɨ awən; lá á nɨ ngɨ̌ ɨnu ɨtsum tsa Ŋwi a lɔnə nɨ táʼ ntəm, tso ɨbuʼ Kristo ghe.

⁷A nɨ faʼə ɨfaʼ abuʼ ɨwən nɨ ntəm wu saŋnɨnɨ tso ngə́ nɨ faʼə a mbó Maʼmbyí nkeʼ be be tsɛʼ a mbó ŋwɔn mɨsɔŋ a ntsu ə.

⁸A nɨ zhi ngə́ Maʼmbyí a ghɨ tsɔ́ʼ afaʼ a ŋwɔn tsum zə shiʼnɨ za a ghɨnɨ kə o be be abuʼ kə ngáŋ ə.

⁹Bɨtabuʼ, á nɨ ngɨ̌ ndəŋndəŋ ɨnu a nye ɨbuʼ ɨtsən, nkeʼ nɨbɔgɨ a ntəm bo a nɨ́ŋə́ ghe. A nɨ zhi ngə́ bɨŋ bɨ ɨbuʼ ɨtsɨŋ tsi lá a mbó ndəŋndəŋ tafaʼ ɨwən wa a tsinɨ a fɔməbvurə, zɨ wa a kyɛgɨnɨnɨ abyɛn a ŋwɔn tsum tɨ nkobɨ ə.

¹⁰A ndwɨgɨnə, á nɨ tɛm ntɨ́ŋə́ a nye ntsi ɨzən bɨŋ bɨ Maʼmbyí, ntsǎ a ndzum adaʼ azhi za ka a tsi ayi nɨ ɨfɨʼ lá.

¹¹A nɨ wəgɨ ɨdzúm ntso ɨtsum tsa Ŋwi a ghanɨ a mbó bən, taŋ á nɨ chi to a mɨnaŋ tsum wa Dəbɨrɨ a kórɨ́nə́ ghe.

¹²Mbɨ́ʼ ngə́ ka bɨgɨnə ntǒ awɨgɨnə lá ɨbɛn bɨ mɨsɔŋ a ntsu, bɨgɨnə tǒ be ɨzhwi tsɨ tən tsa tsɨ sáʼnə́ a fɔməbvurə mbe tsə abɨgəntəm lá.

¹³Ma lan, tɨtsɔŋnɨ, á nɨ wəgɨ ɨdzúm ntso tsa Ŋwi a ghanɨ a mbó bɨŋ ə! Adzaŋ məwen, a nkfu za ɨ nɨ zɨ ntɔmnɨnɨ ghɨnɨ yen, nɨ ghɨ tɛm ɨ tɨŋə ngə́ twə́ŋ a nkfu za ngaŋ kɨban ɨtsɨŋ tǒnə́ awɨŋ ə. A nkfu za fɨto minə, nɨ mɨ zɛn ngə́ nɨ bvurɨ ntɛm ntɨ́ŋə́ ngə́ twə́ŋ ə.

¹⁴Ma lan, á nɨ kyaŋtɨ ɨnye ɨtsɨŋ ə. A nkənu tsi tso ɨkɔbɨ wa ɨ sɨtɨnɨ atɨŋnɨ azən, á nchinə tsi tso ngobɨ ntso nɨgo,[16]

¹⁵á ngyaŋ ɨnye za nɨ tsinɨ nɨ zɛrə a nchwítɨ́ Nkən wu Shiʼnɨ wu mbɔnɨ tsi tso ngobɨ tsa nɨ wəgɨnə.[17]

¹⁶Nkfu tsum, á nɨ tiʼtɨ abeməntəm azən tso ngobɨ ntso; mbɨ́ʼ ngə́ nɨ zɛrə, nɨ ghɨ byɛ́tɨ́ ɨmugɨ wa ɨ tsinɨ atú mɨkɔŋ mɨtsum ma Wu Ntɔmnɨnɨ a mɨ túmtɨ́nə awən nɨ mɛrə ghe.

¹⁷A nɨ lɔgɨ ɨloŋ tso akáŋə́tú, á nɨgham nɨ Ŋwi tsi tso ɨŋwi mbáʼ za Azhwi a Ŋwi a ghánə́ a mbó bɨŋ ə.

¹⁸A nɨ ngɨə a məzen a mu atsaʼtɨ a Ŋwi, mbítə́ akwatɨ a Ŋwi ə. A nɨ ntsáʼtə́ a Ŋwi nkfu tsum adzaŋ za Azhwi a tsɨŋnɨnə awɨŋ ə. Mbɨ́ʼ a məzen, nɨ lə̌tú ɨtsən, nkə́ nchigɨ ntəm a nye ɨnu ɨtsum; ntsaʼtə a Ŋwi nkfu tsum mbɨ́ʼ ɨbɛn bɨ Ŋwi bɨtsum ə.

¹⁹A nɨ kə́ ntsáʼtə́ a Ŋwi mbɨ́ʼ aghan, taŋ á Ŋwi a gha nkən a mbó me a nkfu za ma tsinɨ nɨ ngamə, taŋ á ma tiʼ soŋ a wɛrə tɨ nɨbɔgɨ, ɨ kɨ kyɛʼ anu za a tsinɨ a nkubə a mu nkən wu shiʼnɨ ə.

²⁰Ma nɨ tamandóm nkən wu shiʼnɨ məwiŋ ə, le buŋ ma tsi be atsáŋ tɨtsɔŋnɨ ə. A nɨ ntsáʼtə́ a Ŋwi mbɨ́ʼ aghan taŋ á ma sǒŋ nkən wu shiʼnɨ məwen adzaŋ za ma tsinɨ nɨ ɨ soŋə, tɨ nɨbɔgɨ lá.

²¹Taichikusɨ, mbɔŋ mɨma ɨwɨgɨnə wa a faʼnə a mbó Maʼmbyí nɨ ntəm ɨyi ɨtsum a mɨ soŋ ɨnu ɨtsum mbɨ́ʼ aghan taŋ á nɨ zhi adzaŋ za ma benə.[18]

²²Nə nɨ anu za a ghɨnɨ ma tyigɨ ayi a mbyɛn bən taŋ á wɛrə a yen ɨ soŋ adzaŋ za ntsi mbyi ɨzɨgɨ benɨ ɨghan, ɨ kɨ wɔŋtɨ awɨŋ ə.

²³A Ŋwi, zɨ wa a nɨ Tarɨ abɔʼnɨ Maʼmbyí Yeso Kristo gha mbɔnɨ, akɔŋnɨ nɨ abeməntəm a mbó ɨbɔmbɨma bɨtsum a ndzum Kristo ghe.

²⁴A abɔŋəntəm a Ŋwi a tsi a mbó ba bɨ kɔŋnɨ a Maʼmbyí Yeso Kristo ɨwɨgɨnə nɨ akɔŋnɨ za a láʼ keʼ miə.