Read Ngemba Filibi 1 Bible Online

Filibi 1 - Ngemba bible

Filibi 1

¹Aŋwaʼnɨ zen a lo a mbó me Baolo abɔʼnɨ Timotyo, ngaŋ afaʼ Kristo Yeso ghe. A ghěn a mbó bɨŋ ɨbɛn bɨ Ŋwi bɨtsum a Filibi ba bɨ tsinɨ a mbúm bo bɨ Kristo Yeso, nkwiʼtɨ bɨntsagɨnɨ bɨ ndáŋwi abɔʼnɨ ngaŋ nga akwatɨ ə:

²A Ŋwi Ta ɨwɨgɨnə abɔʼnɨ Maʼmbyí Yeso Kristo gha abɔŋəntəm nɨ mbɔnɨ a mbó bɨŋ ə.

³Ma ghǎ a mɨya a mbó Ŋwi ɨghan mbɨ́ʼ awən nkfu tsum za ma wiʼtɨnɨ awɨŋ ə;

⁴nkfu tsum za ma tsaʼtɨnə a Ŋwi mbɨ́ʼ awən bɨtsum, ma tsaʼtə a Ŋwi nɨ nɨdorɨ

⁵mbɨ́ʼ ndóm wa nɨ kwátɨ́nə́ a sóŋ nkən wu shiʼnɨ nchwuʼnɨ njwi za nɨ nɨ́ŋnɨ́ mɨntəm ɨmən a nye Kristo ɨ kɔʼ kuʼ tɨtsɔŋnɨ ə.

⁶Ma lan, ma zhi ɨ shiʼnɨ ngə́ Ŋwi, zɨ wa a bíʼnɨ́nɨ́ afaʼ zə shiʼnɨ zen a mu ɨnye bən, a mɨ ghěn nɨ mbyi nɨ zɛrə ɨ kɔʼ kuʼ mbáʼ a mɨ lwitɨ a Njwi za Kristo Yeso lo bə yiŋə.

⁷Nɨ tsi a mu ntəm me tsɛʼ nkfu tsum ə! Ma lan, a kuʼnɨ a mbó me a ndzúʼə a mu ɨnye me adzaŋ za ma zúʼnə́ lá mbɨ́ʼ awɨŋ ə. Mbɨ́ʼ ngə́ bən bɨtsum tsi nɨ ɨwɨŋ bagɨ abɔŋəntəm za Ŋwi a ghanɨ a mbó me ghe. Nɨ tsi nɨ zɛrə tɨtsɔŋnɨ wa ma tsinɨ atsáŋ lá abɔʼnɨ nkfu za ma bénɨ́ ŋwɔn nɨ atú azan a ngyemnkɨ nkən wu shiʼnɨ ɨ kɨ bi a wɛrə á ɨ təntɨ ɨ shiʼnɨ lá.

⁸Ŋwi a nɨ atɛmə-ndzě ɨghan ngə́ ma sóŋə́ lá nkənu mbáʼ be ma soŋ ngə́ akɔŋnɨ za ma tsinɨ nɨ zɛrə a nye bən bɨtsum a lǒ lá a mu ntəm Kristo Yeso zɨmboŋ ə.

⁹Ma tsaʼtə a Ŋwi ngə́ á akɔŋnɨ azən a nye ŋwɔn nɨ ŋwɔn a nkwi ɨ kwinɨ, nkwiʼtɨ azhyɛ azən mbɨ́ʼ a Ŋwi abɔʼnɨ ndentɨ ɨ tsɔʼ a zə shiʼnɨ,

¹⁰taŋ á nɨ chi tsɔʼ a za a bɔŋnɨ ntsa atsum ə. Nɨ ghɨ tíʼ tsi tɨ afənu zə tsɛrə, ɨ kɨ tsi tɨ ɨfərɨ a njwi za Kristo a lo bə yen lá.

¹¹Ntsi mbyi ɨtsɨŋ mɨ lon nɨ ngótɨ́ ngɨnɨ mɨnu mə shiʼnɨ mbáʼ mɨ lonə tsɛʼ a mbó Yeso Kristo, a ngá nɨfáŋ abɔʼnɨ mbontə a mbó Ŋwi ə.

¹²Ɨbɔmbɨma ɨban, ma lǒ ngə́ á nɨ zhi ngə́ ɨnu tsa tsɨ funə a nye me kwatɨ tsɛʼ ɨ shiʼnɨ a ntíntɨ́ nkən wu shiʼnɨ á ɨ ngěn nɨ mbyi ɛ.

¹³Ma lan, bɨntsiŋ ntɔ́ʼ bɨtsum abɔʼnɨ abvuʼ a ɨbɛn za a tsinɨ ɨghan, bɨ zhi ngə́ ma tsi atsáŋ lá mbɨ́ʼ ngə́ ma nɨ ŋwɔn afaʼ Kristo ghe.

¹⁴Nchyɛ̌ ɨzan məzen atsáŋ ɨ ghɨ ɨbɔmbɨma a nɨghaʼ zɛʼtɨ awa a nye Maʼmbyí ngɛn nɨ mbyi, adzaŋ məwen bo chyɛ̌ nɨ mɨntəm mə fankɨnɨ ngɛn nɨ mbyi nkfu tsum a sóŋ nɨgham nɨ Ŋwi tɨ nɨbɔgɨ ə.

¹⁵Tsɛʼ a nkənu, bə tse sǒŋ anu a Kristo mbɨ́ʼ ngə́ bo ghɨʼnə nkə́ máŋnə́, lá bə mɔʼɔ soŋənə nɨ ntəm wu shiʼnɨ ə.

¹⁶Məbiŋ faʼə lanə lá a mu akɔŋnɨ mbɨ́ʼ ngə́ bo zhi ngə́ Ŋwi a gha aghan nɨ afaʼ a ndiʼə ngə́ nkən wu shiʼnɨ nɨ anu za a kuʼnɨnɨ ə.

¹⁷Bə mɔʼɔ ba se nchwítə́ anu mbɨ́ʼ a Kristo nɨ nkənu, lá bo ghɨə mə lan lá a ntɛ́mə́ a mbyi ŋwɔn tsum taŋ á bɔŋ tsɛʼ a mbó bo; bo kwaʼtɨ ngə́ bo mɨ kwiʼtɨ ngɨ́ʼ a nye me a nye nkfu zen za ma tsinɨ a ndá atsáŋ lá.

¹⁸Ka a be ayi ɨsáʼ ə! Ma dorɨtɨ mbɨ́ʼ a zɛrə mbɨ́ʼ ngə́ bo sóŋə́ anu mbɨ́ʼ Kristo a nye mɨndóm mɨtsum, kə anu za a tíntɨ́nə́ awa a ngɨ məzen a be zə tɨbɔŋ kə zə kuʼnɨnɨ ə. Ma mɨ kɨ bvurɨ ghěn nɨ mbyi ɨ dorɨtɨnə,

¹⁹mbɨ́ʼ ngə́ ma zhi ngə́ a ntsǎ a ndzum atsaʼtɨ a Ŋwi azən abɔʼnɨ akwatɨ za a lonə a mbó Azhwi a Yeso Kristo, bɨ ghɨ fɨgɨ aghan atsáŋ wiŋ ə.

²⁰Za ma lánɨ́nə́ ndǒ abɔʼnɨ ntsiŋə nɨ ntəm ɨghə ɨtsum a nɨ ngə́ ma láʼ kaʼ dɨrɨ atú mbɨ́ʼ afaʼ azan, lá mbe be ngə́ nkfu tsum, tɨ́sə́n tɨ́sə́n tɨtsɔŋnɨ, ma ghɨ lón nɨ nkotɨ mbáŋnɨ́ ə. Adzaŋ məwen, nɨ atuəmbəm azə atsum, ma mɨ yen nɨ nkɔʼsə atɨ́ a mbó Kristo kə ma tsi ntən kə nkfoə.

²¹Mbɨ́ʼ ngə́ a mbó me a ntsí ntən a nɨ ɨ faʼə a mbó Kristo, a nkfó a be ɨbɔŋ ə.

²²Lá be a be ngə́ a ngěn nɨ mbyi a nchyɛ́ atú ntən ma chi faʼ afaʼ za abi a fúnə́ ɨwu, muŋ ma mɨ kaʼ zhi ɨ shiʼnɨ a za ma mɨ zarə.

²³Tɨtərɨ a dzɨ aghə. Ma lánə́ ndǒ nɨ ntəm ɨghə ɨtsum a nyɛʼtɨ ntsi mbyi zen ɨ tsi bɨgɨ Kristo ghe, mbáʼ a lá za a bɔŋnɨ ngɛn nɨ mbyi ɛ;

²⁴lá mbɨ́ʼ atú azən, za a dɨtɨnɨ ngɛn nɨ mbyi a nɨ ngə́ á ma tsi atú ntɨŋ ə.

²⁵Ma zhi a məzen tsɛʼ ɨ shiʼnɨ, ma lan, ma zhi ngə́ ma mɨ chyɛ. Ma mɨ ghɛn nɨ mbyi ɨ tsinə bɨgɨnə bɨtsum, taŋ á abeməntəm za nɨ tsinɨ nɨ zɛrə a nkwi ɨ kwinɨ, á nɨdorɨ ɨnɨŋ nkə́ nghaʼ ɨ ghaʼnɨ mbɨ́ʼ abeməntəm azɨŋ ə.

²⁶Adzaŋ məwen, a nkfu za ma bənɨ mbə nkwiʼ ntsi ɨbɨgɨnə, nɨ mɨ tsi nɨ ɨshwúrɨ́ a ŋúʼ ɨnye mbɨ́ʼ aghan a nye ntsi mbyi ɨzən a mbúm bɨŋ bɨ Kristo Yeso ghe.

²⁷Tɨtsɔŋnɨ, anu za a dɨtɨnɨ a nɨ ngə́ á ntsi mbyi ɨzɨŋ tsi ndzɔ̌ŋ adzaŋ za nkən wu shiʼnɨ wu Kristo lɔnə ghe. Adzaŋ məwen, kə ma chi yen ze awən kə ngáŋ, muŋ ma mɨ zuʼ ngə́ nɨ tɛm ntɨŋə ngə́ twə́ŋ a mu táʼ anu za nɨ lɔnə, nkɨ mbe ngə́ nɨ táʼ anu za nɨ lɔnə, nɨ tókə́ a mbúm mbɨ́ʼ abeməntəm za ɨbɛn ba bɨ nɨŋnɨ mɨntəm ɨma a nye nkən wu shiʼnɨ tsinɨ nɨ zɛrə ghe.

²⁸A nɨ keʼ mbɔ́gɨ́ ngaŋ kɨban ɨtsɨŋ ə; nkotɨ mbáŋnɨ́ nkfu tsum, məzen a mɨ tiʼ diʼ a mbó bo ngə́ bo ghɨ sám, á nɨ ghɨ sə́ŋ, mbɨ́ʼ ngə́ a nɨ Ŋwi, zɨ wa a ghánə́ ayanguʼ ə.

²⁹Mbɨ́ʼ ngə́ Ŋwi a ghanə abárɨ́ a mbó bən ngə́ á nɨ faʼ a mbó Kristo, nkeʼ be tsɛʼ a nɨ́ŋ ntəm wə ɨnye, lá nkɨ mbe a ndzé ngɨ́ʼ mbɨ́ʼ ayi ɛ.

³⁰Tɨtsɔŋnɨ bɨgɨnə chi tiʼ bosɨ a ntókə́ mbɨ́ʼ atú a nkən wu shiʼnɨ ə. A nɨ ndəŋndəŋ fɨlam fa nɨ zɛ́nɨ́ ma tokɨnə a mbyi, adzaŋ za nɨ zúʼnə́, ma bvurə nkə́ ntókə́ mbɨ́ʼ atú a nkən wu shiʼnɨ məwa ə.