Read Ngemba Filibi 2 Bible Online

Filibi 2 - Ngemba bible

Filibi 2

¹Ntsi mbyi ɨzən a mbúm bɨŋ bɨ Kristo ɨ ghɨə nɨ tən, akɔŋnɨ azhi a kə́ ndɛ́tə́ awɨŋ ə. Nɨ dzɨ́nə́ bɨŋ bɨ Azhwi, nkɨ ntsi nɨ ngɨ ɨbɔŋ abɔʼnɨ mɨlɨŋnɨ a nye ŋwɔn nɨ ŋwɔn ə.

²Ma tiʼə nyíʼtə́ awən ngə́ á nɨ ghɨ á nɨdorɨ ɨnə tsi a nɨ́lónɨ́ a ntsǎ a ndzum nchyɛ nɨ táʼ akwaʼtɨ, nkɔ́ŋnə́ a ŋwɔn nɨ ŋwɔn ndəŋndəŋ, nkɨ mbe a nye adzaŋ za nɨ ghɨnɨ ɨnu a nye táʼ ndóm nkə́ nkwáʼtɨ́ ɨnu a nye táʼ ndóm ə.

³A nɨ keʼ ghɨ anu zə tsɛrə a ntɛ́mə́ a mbyi ŋwɔn tsum taŋ á bɔŋ tsɛʼ a mbó bən kə a ndiʼ ɨnye, lá nɨ shíʼtə́ nɨ ɨnye ɨtsən a tɨshe a mbó ŋwɔn nɨ ŋwɔn, nkwáʼtə́ anu mbɨ́ʼ ɨbɛn bə mɔʼɔ a mbyi ntsa awɨŋ ə.

⁴Ndə̌tú a nye ɨnu tsa tsɨ mɨ bɔŋ a ŋwɔn nɨ ŋwɔn, ɨ keʼ bɔŋ tsɛʼ agho ə.

⁵A mbɔm ɨzɨŋ be za Kristo Yeso a tsínɨ́ nɨ zɛrə ghe:

⁶Mbě ɨzhi bé zɨ Ŋwi nkfu tsum, lá wɛrə a sé kwaʼtɨ ngə́ zɨə chi zhwəŋtɨ a mbé ndəŋndəŋ bo Ŋwi ə.

⁷Lá a nkɔŋ zɨ, wɛrə a nyɛ́ʼtɨ́ atsum za a tsínɨ́ nɨ zɛrə, ndɔgɨ mbě ngaŋ afaʼ ə. Wɛrə a bə́ŋ ayi mbe tso ŋwɔn, bɨ jwi ayi tso ŋwɔn mɨsɔŋ a ntsu ə.

⁸Wɛrə a shíʼtɨ́ nɨ ɨnye ɨzhi a ɨshe ntiʼ ndɔgɨ aku a nɨyen azuʼnɨ ngɛn nkuʼ nkfu nɨvwo, nɨvwo ɨni atɨ abaŋnɨ-baŋnɨ ə.

⁹Mbɨ́ʼ a məzen, Ŋwi a tsɔ́ʼ ayi nkɔʼsɨ atɨ́ atú atəntsánɨ́, nga ɨkum wəmbo wa ɨ tsanɨ mɨkum mɨtsum,

¹⁰Ma lan, a nkɔ́ʼsɨ́ ɨkum wa ngə́ Yeso atɨ́, azúm atsum za a tsinɨ nɨ ntsi ntən a fɔməbvurə, atuəshe abɔʼnɨ mbyishe a kwem mɨkwiʼtɨ ɨmyi a tɨshe,

¹¹ɨbɛn bɨtsum fɨgɨ a ntsu bo ɨ soŋ ngə́ Yeso Kristo a nɨ Maʼmbyí, a ngá nɨfáŋ a mbó Ŋwi, zɨ wa a nɨ Tarɨ ə.

¹²Ma lan nə bɨson ɨban ba ma kɔŋnɨ tsɛʼ a nkan, adzaŋ za nɨ kɨ chinə ndzúʼnə́ aghan nkfu tsum mbáʼ ma tsínɨ́ bɨgɨnə lá, anu za a təntɨnɨ tɨtsɔŋnɨ a nɨ ngə́ á nɨ ndzúʼnə́ aghan ngɛn nɨ mbyi mbáʼ ma sa bɨgɨnə bə mbvurɨ ntsi lá. A nɨ ngěn nɨ mbyi ɨ faʼə nɨ nɨbɔgɨ abɔʼnɨ mbɨŋnə a ɨshi ɨmɨgɨ Ŋwi taŋ ɨ dzɨ ɨloŋ ə.

¹³Mbɨ́ʼ ngə́ Ŋwi a faʼə nkfu tsum a nye bən a ngɨə ngə́ á nɨ ndǒ nkɨ chi zuʼnɨ ayi, ɨ kə́ zɔŋnə mɨndóm ɨmyi mə shiʼnɨ ə.

¹⁴A nɨ ngɨ̌ ɨnu ɨtsum tə́ nzhwúʼnə́ kə mbítɨ́ ɨbítɨ,

¹⁵taŋ á nɨ chi be bɨmbuʼ ɨ keʼ nɨ ɨfərɨ wu tse tsi tso ɨbɔ bɨ Ŋwi ba bɨ kɔʼnɨ ntɛm ngə́ tsáŋ, ba bɨ tsínə́ a mu mbyi za ɨ lonɨ nɨ nkobɨ abɔʼnɨ ngaŋ ngɨ mɨbvu ə. Nɨ tsi nɨ ɨ zagɨ ɨ tánə tso mɨndzɔŋ ma mɨ tánə́ a nɨkaŋ,

¹⁶a sóŋ nkən ntsi ntən wa a mbó bo ghe. Be nɨ ghɨ ma lan, muŋ ma ghɨ tsi nɨ anu za ma ghɨnɨ tiʼə ŋuʼənɨ ɨnye ɨzan mbɨ́ʼ awən nɨ zɛrə a Njwi wa Kristo a lo bə yen, mbɨ́ʼ ngə́ a ghɨ diʼ ngə́ adaʼ azə atsum abɔʼnɨ afaʼ azə atsum se adaŋədaŋə tsaə.

¹⁷Aghagɨ a tsɛrə bɨ mɨ zhwitɨ aghan, ɨ chwirɨ alɛm azan tso akáŋ a Ŋwi za bɨ nyɔŋnɨ atú mɨtsuʼnɨ mɨ atú ə. Mɨtsuʼnɨ mɨ atú məmen ma bɨ ghánə́ a mbó Ŋwi be lá abeməntəm aziŋ ə. Be a be lá adzaŋ məwen, ma dórɨ́tə́, bən bɨtsum kɨ ntsi a mu nɨdorɨ məniŋ ə.

¹⁸Ndəŋndəŋ, nɨ kɨ ndzagɨ ntsi nɨ nchyɛ a mu nɨdorɨ, á ma kɨ ntsi a mu nɨdorɨ ɨnən məniŋ ə.

¹⁹Be a be adzaŋ za Maʼmbyí a lɔnə, ma tsiŋə nɨ ntəm ɨghə ɨtsum ngə́ aghagɨ a mɨ keʼ bə sagɨ mbáʼ ma mɨ tsagɨ a Timotyo a mbó bən, taŋ wɛrə a bə́ mbən ngyen nkwatɨ aghan, nkən mbɨ́ʼ awɨŋ chi wɔŋtɨ aghə.

²⁰A nɨ tsɛʼ zɨzɨ wa a zúʼnə́ a mu ɨnye zɨ tso adzaŋ za ma zúʼnə́ a mu ɨnye me nkɨ mbe zɨ wa anu azən a tsinɨ a mu ntəm zɨə.

²¹Bə mɔʼɔ bɨtsum tɛgɨ ɨtú ɨtsa tsɛʼ a nye ɨnu ɨtsa ghe. Ka bo tɛgɨ awa ɨtú ɨtsa a nye anu a Yeso Kristo ghe.

²²Bɨŋ mboŋ nɨ zhi adzaŋ za wɛrə a diʼnə ɨlɨŋ ɨyi a mbó bən, adzaŋ za bɨgɨ zɨ, tso tarɨ bo mɔn, faʼnə a mbúm a sóŋ nkən wu shiʼnɨ ə.

²³Ma lan, ma tsiŋə nɨ ntəm ɨghə ɨtsum ɨ byi tsagɨ ayi a mbó bən mbáʼ be ma ze adzaŋ za ɨnu mɨ be a mbó me ghe.

²⁴Ka ma mə́ŋnə́ aghan a Maʼmbyí ngə́ nkfu mɨ keʼ sagɨ mbáʼ me mboŋ ma mɨ kɨ yen ghantɨ awɨŋ ə.

²⁵Ma kwaʼtɨ ngə́ a mɨ bɔŋ ngə́ á ma tsagɨ a mɨma ɨwɨgɨnə Ebafrɔditusɨ a mbó bɨŋ ə. Wɛrə wa a faʼnə nkɨ ntokɨ bɨgɨ zɨ tso gwe wu shiʼnɨ a sóŋ nkən wu shiʼnɨ ə. Wɛrə a kɨ faʼ tso ntom za nɨ tsagɨnɨ ngə́ á ɨ yen nkwatɨ aghə.

²⁶Wɛrə a lǒ tsɛʼ nɨ ntəm ɨyi ɨtsum a ndzé bən bɨtsum, a kə́ nghágə́ ayi mbɨ́ʼ ngə́ nɨ zúʼ ngə́ wɛrə a ghǒn ghe.

²⁷Tsɛʼ a nkənu a kɨ ghɔn ntiʼ tsɛʼ a ntsu nɨvwo ə. Lá Ŋwi a kó a mɨlɨŋnɨ ɨyi, nkeʼ tsɛʼ ɨyi be, nkɨ mbe ɨghan wəbɔʼ mbaʼtɨ aghan a nye adzə́ŋnɨ za a ghɛnɨ nɨ mbyi ɛ.

²⁸Ma tiʼə ndǒ nɨ ntəm ɨghə ɨtsum a ntsagɨ zɨ a mbó bən, taŋ á nɨ bə nkwiʼ ntsi nɨ nɨdorɨ a ndzé zɨ, á keʼ aghan a mu ntəm me a ngágə́ ghe.

²⁹A nɨ tiʼ nkwarɨ ayi nɨ nɨdorɨ tso mɨma ɨwən a ndzum Maʼmbyí ɛ. A nɨ ndǐʼ mbɔm zɨ shiʼnɨ a mbó ɨdzaŋ ɨbɛn mətsiŋ ɨtsum tso wɛrə,

³⁰mbɨ́ʼ ngə́ wɛrə a fíŋ ntɔŋ ɨyi mbe kfo mbɨ́ʼ atú afaʼ a Kristo, a ngá akwatɨ a mbó me za bɨŋ mboŋ nɨ kɨ chinɨ keʼ ghaə.