Read Ngemba Kolose 3 Bible Online

Kolose 3 - Ngemba bible

Kolose 3

¹Ŋwi a zhwemnɨnə awən bɨŋ bɨ Kristo a mbó nɨvwo ə. Ma lan, á nɨ tɛgɨ mɨntəm ɨmən a nye ɨdzúm tsa tsɨ tsinɨ a fɔməbvurə, adiʼ wa Kristo a shiʼtɨnɨ ntsi atú abərɨ azhi a bagɨ abó a Ŋwi zə maʼə lá.

²A nɨ len ɨkwaʼtɨ ɨtsən a nye ɨnu tsa tsɨ tsinɨ a fɔməbvurə, nkeʼ be a nye ɨnu tsa tsɨ tsinɨ atuəshe wen be.

³Mbɨ́ʼ ngə́ nɨ kfokɨnə, bɨ lwɛʼ ntsi mbyi ɨzɨgɨnə a mbúm bɨgɨnə bɨ Kristo a ɨshi ɨmɨgɨ Ŋwi ə.

⁴Ngótɨ́ ntsi mbyi ɨzɨŋ lá Kristo ghe. Wɛrə a ghɨ fú a ɨshe, muŋ nɨ mɨ kɨ fu a ɨshe bɨŋ bɨ wɛrə, ɨ kɨ tsi a mu nɨfáŋ ɨni ɛ!

⁵Nɨ mɨ tiʼ zagɨ zhwitɨ ɨnu atuəshe zen tsa mbəmnye ɨtsɨŋ lɔnə, tso ɨnu ntɔrɨ ɨlɛbɨ, nɨshwe, nkfǒ a mbó nji mangye kə a mbó nji mbáŋnɨ́, ntɛgɨ ntəm a ngɨ ɨnu tsɨ tɔmnɨnɨ abɔʼnɨ mbe amiɛnɨngám ə. Mbɨ́ʼ ngə́ a mbé amiɛnɨngám a nɨ ndóm wu mɔʼɔ a nguʼsɨ mɔn abe ə.

⁶Mbɨ́ʼ ɨbə́ŋ ɨnu tso mətsen, alwɛntɔŋ a Ŋwi a mɨ shiʼ atú ɨbɛn ba ka bo ndzúʼnə́ awa ayi lá[2].

⁷A nkfu tse, bɨŋ mboŋ, nɨ kə́ ndǒ nkə́ ngɨ̌ ɨbə́ŋ ɨnu tso mətsen, a nkfu za ntsi mbyi ɨzən lónɨ́ nɨ tsɛrə lá.

⁸Lá tɨtsɔŋnɨ nɨ mɨ zagɨ nyɛʼ ɨnu mətsiŋ ɨtsum tso: alwɛntɔŋ, mɨlwi wa a faʼkɨnɨ abɔʼnɨ abɨgəntəm ə. A nɨgham nɨ ntsənkɨ ɨkum ŋwɔn wu shiʼnɨ ɨwu kə ɨtɨshwe mɨgham láʼ nkeʼ a ntsu bən fuə.

⁹A nɨ keʼ nchwě ɨnu a mbó ŋwɔn nɨ ŋwɔn, mbɨ́ʼ ngə́ nɨ tsɔʼnə mbəmnye zɨ ndvuŋ za abɔʼnɨ ngɨnɨ mɨnu ɨmyi tso bɨ tsɔʼtɨ ɨtsɛʼ

¹⁰ntiʼ ngwəgɨ mbəmnye zɨ fi za. Nə nɨ mbəmnye zɨ fi za Ŋwi, zɨ wa a káʼnɨ́ a zɛrə, a kwébtɨ́nɨ́ nkfu tsum á ɨ tiʼ zɨ fi a nye afi azhi, taŋ ɨ ghɨ á nɨ tsi nɨ azhyɛ mbɨ́ʼ ayi a nɨ́lónɨ́ ə.

¹¹Adzaŋ məwen, ka líʼ a be ayi ɨwu a tɨtərɨ ba a se bə Yuda be abɔʼnɨ bə Yuda, a tɨtərɨ ba bɨ tsəŋnɨ ɨlagɨ ɨtsa abɔʼnɨ ba bɨ se ɨlagɨ ɨtsa tsəŋ, bɨngyen-yenɨ, ɨbɛn ba bɨ finɨ ɨnyam mɨbaʼ, ɨbuʼ abɔʼnɨ ɨbɛn ba ka bo be awa ɨbuʼ, lá ka wu tse ŋwɔn a tsi ayi ɨwu wa a dɨtɨnɨ ntsatɨ a Kristo, Kristo a tsi a mu ɨnye ŋwɔn tsum ə.

¹²Nɨ nɨ ɨbɛn bɨ Ŋwi ə; wɛrə a kɔ́ŋ awən, ntsɔʼ awən a nye ɨbɛn ɨbyi ɛ. Ma lan, nɨ tsi nɨ ɨ zagɨ ɨ diʼnə a mɨlɨŋnɨ, ngɨ ɨbɔŋ, ɨ shiʼtə nɨ ɨnye a ɨshe, ngɨ ɨnu nɨ mbɔnɨ abɔʼnɨ nchigə ghe.

¹³A nɨ nchígɨ́ ntəm a nye ŋwɔn nɨ ŋwɔn nkə́ ndɨ́gɨ́nɨ́ mɨbvu mɨ ŋwɔn nɨ ŋwɔn nkfu tsum za ŋwɔn nɨ bən wu tse a tsinɨ nɨ anu a nye ŋwɔn wu mɔʼɔ ghe. Nɨ mɨ zagɨ lɨgɨnɨnɨ mɨbvu mɨ ŋwɔn nɨ ŋwɔn tsɛʼ adzaŋ za Maʼmbyí a lɨgɨnɨnə mɨbvu ɨmən lá.

¹⁴A akɔŋnɨ a tsi atú ɨnu tsen ɨtsum, zɛrə za a ghótɨ́nɨ́ ɨnu tsiŋ ɨtsum tsɨ tsinə a mbúm nkɔ́ʼə ntɛ́mə́ ngə́ tsáŋ lá.

¹⁵Mbɔnɨ za Kristo a ghánə́ ɨ tsi lá a ntsɨŋnɨ bən a nye ɨnu tsa nɨ tsɔ́ʼnə́ a mu mɨntəm ɨmən; mbɨ́ʼ ngə́ Ŋwi a chintɨ awən lá mbɨ́ʼ mbɔnɨ məzen a mu táʼ mbəmnye wa. A nɨ tsi nɨ mɨntəm mɨ nga mɨya ghe.

¹⁶A nkən mbɨ́ʼ a Kristo ɨ tsi a mu mɨntəm ɨmən tsɛʼ ɨ shiʼnɨ ɨ shiʼnɨ ə. A nɨ ndíʼə nkə́ ntɨ́gɨ́tə́ a ŋwɔn nɨ ŋwɔn nɨ abə́ŋ a zóŋ atsum ə. A nɨ ndzɔ́bə́ ɨzɔbɨ nkyi tsa tsɨ tsinɨ a mu aŋwaʼnɨ a Ŋwi abɔʼnɨ ɨzɔbɨ nkyi azhwi nɨ ɨzɔbɨ nkyi tsɨ fɛmnɨ; á nɨ ndzɔ̌b mɨnkyi a mbó Ŋwi nɨ nga mɨya a mu mɨntəm ɨmɨŋ ə.

¹⁷Anu atsum za nɨ ghɨnə kə ɨ sóŋə́, nɨ tsi nɨ ngɨ zɛrə lá nɨ ɨkum Maʼmbyí Yeso, adzaŋ za nɨ ghánə́ a mɨya a mbó Ŋwi, zɨ wa nɨ Tarɨ ntsǎ a ndzum wɛrə lá.

¹⁸Bəngye, á nɨ ndzúʼnɨ́ bɨlóm ɨbən, mbɨ́ʼ ngə́ nə nɨ anu za nɨ tsinɨ nɨ ngɨə tso ɨbɛn ba bɨ zɔŋnə a Kristo ghe.

¹⁹Bɨlóm, á nɨ kɔŋ bəngye ɨbən, nkeʼ a nye bo a shə́gə́ ghe.

²⁰Ɨbɔ, á nɨ ndzúʼnə́ bɨta ɨbən bo bɨ bɨmá ɨbən nkfu tsum, mbɨ́ʼ ngə́ a nɨ anu za nɨ tsinɨ nɨ ngɨə tso ɨbɛn ba bɨ zɔŋnə a Kristo, mbɨ́ʼ ngə́ məzen a ghɨə ɨnye Ŋwi bɔŋənə ghe.

²¹Bɨtarɨ, á nɨ keʼ ntɔ́bə́ mɨntəm mɨ ɨbɔ ɨbən, muŋ a mɨ keʼ awa a ngwɔ́ŋtə́ ghe.

²²Ɨbuʼ, á nɨ ndzúʼnɨ́ bɨtabuʼ ɨbən bə atuəshe a nye ɨnu ɨtsum ə. A nɨ keʼ mə lan a ngɨə tsɛʼ a nkfu za bo tɛmnɨ ɨwu mbɨ́ʼ ngə́ o lǒ ngə́ á bo bemtɨ agho; lá a faʼə nɨ táʼ ntəm mbɨ́ʼ ngə́ o bɔ́gɨ́tə́ a Maʼmbyí ɛ.

²³Kə a be be anu ake za o faʼnə, faʼ a zɛrə nɨ ntəm ɨgho ɨtsum tso ngə́ o faʼə lá a mbó Maʼmbyí nkeʼ be a mbó ŋwɔn mɨsɔŋ a ntsu be.

²⁴Zhinə ngə́ Maʼmbyí a ghɨ gha akyaŋə a mbó bən za wɛrə a káʼnɨ́ a mbó ɨbɛn ɨbyi lá. Mbɨ́ʼ ngə́ a nɨ Kristo, zɨ wa nɨ ngótɨ́ tafaʼ wa nɨ faʼnə wəmbo ə.

²⁵Mbɨ́ʼ ngə́ bɨ ghɨ tfútɨ́ mbɔʼ a mbó ngaŋ ngɨ ɨnu tsa ka tsɨ kuʼnɨ ayi, Ŋwi a kə́ sáʼə a ŋwɔn tsum lá nɨ ndəŋndəŋ ɨfɨʼ ə.