Read Ngemba 1 Tesalonaika 1 Bible Online

1 Tesalonaika 1 - Ngemba bible

1 Tesalonaika 1

¹Aŋwaʼnɨ zen a lo a mbó me Baolo ghe. Ma ŋwaʼnə a zɛrə lá ntsi bɨgɨ Sailasɨ abɔʼnɨ Timotyo ghe. A ghěn a mbó bɨŋ ndáŋwi za ɨ tsinɨ a Tesalonaika, bən ba nɨ tsinɨ a mbó Ŋwingɔŋ Tarɨ nkɨ ntsi a mbó Maʼmbyí Yeso Kristo lá: A abɔŋəntəm a Ŋwi abɔʼnɨ mbɔnɨ tsi a mbó bɨŋ ə.

²Bɨgɨ ghǎ a mɨya a mbó Ŋwi mbɨ́ʼ awən nkfu tsum nkə́ nkwémtə́ awən nkfu tsum a mu atsaʼtɨ a Ŋwi azɨgɨ ə.

³Bɨgɨ wáʼtə́ a ɨshi Ŋwi ɨwɨgɨnə, zɨ wa nɨ Tarɨ, adzaŋ za abeməntəm azən a ghɨnə nɨ faʼnə, adzaŋ za akɔŋnɨ azən a ghɨ́nɨ́ nɨ faʼnə nɨ adaʼ azɨŋ atsum, abɔʼnɨ adzaŋ za ntsiŋə nɨ ntəm tsum ɨzɨŋ ɨ tɛmnɨ ntɨŋə ngə́ twə́ŋ a nye Maʼmbyí ɨwɨgɨnə Yeso Kristo ghe.

⁴Ɨbɔmbɨma ɨbɨgɨ, bɨgɨ zhi ngə́ Ŋwi a kɔŋ awɨŋ ə, a kɨnə nkɨ ntsɔʼ awən ngə́ á nɨ be ɨbɛn ɨbyi ɛ.

⁵Mbɨ́ʼ ngə́ bɨgɨ yén nɨ Nkən wu Shiʼnɨ a mbó bən, nkeʼ tsɛʼ a mu nɨgham nɨ ntsu be, lá nkɨ mbe abɔʼnɨ mɨtən nkwiʼtɨ Azhwi zə Fɛmnɨ tə́ mə́ŋnə́ anu zə tsɛrə za a nɨ nkənu ə. Nɨ zhi adzaŋ za bɨgɨ kɨ́nə́ nchyɛ̌ a nkfu za bɨgɨ tsínɨ́ bɨgɨnə; a bé lá mbɨ́ʼ atú azɨŋ ə.

⁶Nɨ kə́ nyiʼsə awɨgɨ abɔʼnɨ Maʼmbyí ɛ; nɨ báʼtɨ́ ndzé ngɨ́ʼ ɨ zɛnɨ tɨ́sə́n lá, nɨ kwárɨ́ nkən wa nɨ nɨdorɨ na nɨ lonə a mbó Azhwi zə Fɛmnɨ ə.

⁷Ma lan, nɨ tíʼ mbé alisɨ a mbó ɨbɛn bɨtsum ba bɨ nɨ́ŋnɨ́ mɨntəm ɨma a nye Kristo a Masedonia bo Akaiya ghe.

⁸Mbɨ́ʼ ngə́ a sé bé lá tsɛʼ nkən mbɨ́ʼ a Maʼmbyí wa ɨ fúnɨ́ a mbó bən ndzagɨnɨ a mu Masedonia bo Akaiya, nkən mbɨ́ʼ abeməntəm azən a nye Kristo kɨnə nkɨ ndzagɨnɨ ɨdiʼ ɨtsum ə. Ka anu zə tsɛrə a tsi ayi ɨwu za bɨgɨ tsinɨ ɨ bə soŋə.

⁹Ɨbɛn bɨtsum ghamə mbɨ́ʼ adzaŋ za nɨ kwárɨ́nɨ́ awɨgɨ mbáʼ bɨgɨ yénɨ́ ngántɨ́ awən, abɔʼnɨ adzaŋ za nɨ bə́ŋnɨ́ mɨntəm ɨmən a nye ɨbɔ bɨ abe, ntiʼ ngɛn a mbó Ŋwi, a faʼə a mbó zɨ, zɨ wa a nɨ wu nkənu nkɨ ntsi ntən lá.

¹⁰Bo kɨ́ soŋ ngə́ nɨ tsiŋə ngə́ á Mɔn ɨyi a lo a fɔməbvurə ngyen, Mɔn ɨyi Yeso, zɨ wa wɛrə a zhwémnɨ́nɨ́ a mbó nɨvwo lá. A nɨ Mɔn ɨyi məwen wa a kwárɨ́nə́ awɨgɨnə a mbó mɨlwi Ŋwi wa a yenə ghe.