Read Ngemba 1 Tesalonaika 2 Bible Online

1 Tesalonaika 2 - Ngemba bible

1 Tesalonaika 2

¹Ɨbɔmbɨma ɨbɨgɨ, bɨŋ mboŋ nɨ zhi ngə́ ngyiŋə ɨzɨgɨ ɨ yen ghantɨ awən sé tsa atú adaŋədaŋə ghe.

²Nɨ zhi adzaŋ za bɨ kwɛ́nə ndiʼ ngɨ́ʼ a mbó bɨgɨ nkɨ ndzɔm awɨgɨ a Filibi bɔŋ á bɨgɨ ntiʼə ngyiŋə a mbó bən a Tesalonaika ghe. Bɨ báʼtɨ́ nkwənkɨ awɨgɨ ɨ kwənkɨnɨ lá, Ŋwi ɨwɨgɨnə a ghɨ́ bɨgɨ kotɨ mbáŋnɨ́ ɨtsɨgɨ a sóŋə́ a mbó bən Nkən wu Shiʼnɨ wa ɨ lonə a mbó zɨ lá.

³Mbuʼ mbó ɨzɨgɨ a mbó bɨŋ se tɛm atú ɨkɔkɨ ɨnu, kə ɨnu ɨbankɨ, kə ngə́ bɨgɨ lɔ́btə́ lá ntamtɨ ŋwɔn tsɛrə ghe.

⁴Lá, bɨgɨ baŋnə ngámə́ tsɛʼ adzaŋ za Ŋwi a lɔnə, mbɨ́ʼ ngə́ a ləŋtɨnə awɨgɨ bɨgɨ kuʼnɨ á bɨ nɨŋ Nkən wu Shiʼnɨ a mu mbó bɨgɨ ə. Ka bɨgɨ ndɔ́btə́ awɨgɨ lá a ngɨə á ɨnye ɨbɛn mbɔ́ŋə́, bɨgɨ lɔ́btə́ be ngɨə á mbɔ́ŋə́ a mbó Ŋwi, zɨ wa a zhwə́ŋtɨ́nɨ́ ɨkwaʼtɨ ɨtsɨgɨ lá.

⁵Nɨ zhi ɨ shiʼnɨ ngə́ bɨgɨ sé yen a mbó bən lá nɨ mɨgham mə shiʼnɨ a ntámtɨ́ bən, kə ɨ lɔgɨ mɨgham ɨ kɨŋtɨ ɨnu amiɛnɨngám nɨ mɛrə — Ŋwi a nɨ atɛmə-ndzě ɨwɨgɨ a nye məziŋ ə!

⁶Bɨgɨ sé ndǒ nkwarɨ mbontə a mbó ŋwɔn tsɛrə, a mbó bən, kə a mbó ɨbɛn bədaŋ,

⁷lá tso ntóm Yeso tsə Kristo, bɨgɨ kɨ chi bitɨ awən nɨ ɨdzúm ə. Lá bɨgɨ kə́ ngɨ̌ ɨnu tsɛʼ abɔbɔ mbáʼ bɨgɨ tsínɨ́ bɨgɨnə tso mbáʼ má a lánə́ atú nɨ ɨbɔ ɨbyi lá.

⁸Mbɨ́ʼ akɔŋnɨ azɨgɨ a nye bən, bɨgɨ sé a njwɛ́rɨ́kə́ a ngɨə á nɨ kɨ nji Nkən wu Shiʼnɨ wa ɨ lonɨ a mbó Ŋwi lá, bɨgɨ sé nkə́ njwɛ́rɨ́kə́ a nkfó mbɨ́ʼ atú azɨŋ ə. Nɨ tsí a mu mɨntəm ɨmɨgɨ be tɨsɨŋə!

⁹Ɨbɔmbɨma ɨbɨgɨ, nɨ wáʼtə́ adzaŋ za bɨgɨ fáʼnɨ́ nkɨ nyúʼnə́! A nkfu za bɨgɨ kɨ́nə́ sǒŋ Nkən wu Shiʼnɨ wa ɨ lonɨ a mbó Ŋwi a mbó bən lá, bɨgɨ fáʼ nɨ ɨtfúʼ nɨ njwi taŋ ɨ keʼ abyɛʼ zə tsɛrə a mbó bən be ə.

¹⁰Nɨ nɨ bətɛmə-ndzě ɨbɨgɨ, ndəŋndəŋ tso Ŋwi, ngə́ mbɔm ɨzɨgɨ a nye bən ba nɨ nɨŋnɨ mɨntəm ɨmən a nye Ŋwi ɨ fɛm, nkuʼnɨ nkɨ ntsi tɨ ɨkɔkɨ ɨnu ə.

¹¹Nɨ zhi ngə́ bɨgɨ tíʼtɨ́ a ŋwɔn nɨ bɨŋ tsum ɨ mɔ́ʼɔ́ mɔ́ʼɔ́ tsɛʼ adzaŋ za tarɨ a tíʼtɨ́nɨ́ ɨbɔ ɨbyi ɛ.

¹²Bɨgɨ wɔ́ŋtɨ́ awən, ndɛtɨ mɨntəm ɨmən nkeʼ kɨ nkyɛntɨ a nyíʼtɨ́ bən ngə́ á nɨ tsi nɨ abə́ŋ a ntsi mbyi za a ghɨnə ɨnye Ŋwi bɔŋənə, zɨ wa a tɔ́ŋnə́ awən ngə́ á nɨ yen nkɨ ntsi a mu Nɨfɔ ɨni abɔʼnɨ nɨfáŋ ɨni lá.

¹³Anu zə mɔʼɔ a tsi ɨwu za a ghɨnə ngə́ á bɨgɨ ngǎ a mɨya a mbó Ŋwi nkfu tsum ə. A nkfu za bɨgɨ yénɨ́ nɨ nkən Ŋwi a mbó bən lá, nɨ zúʼ a wɛrə nkɨ mbem a wɛrə, nkeʼ be be tso nkən wa ɨ lonɨ a mbó ŋwɔn mɨsɔŋ a ntsu lá mbe be tso nkən Ŋwi, mbáʼ tsɛʼ a nkənu ɨ kɨnɨ mbe wɛrə ghe. Mbɨ́ʼ ngə́ Ŋwi a faʼə a mu ɨnye ɨtsən, bən wa nɨ nɨŋnɨ mɨntəm ɨmən a nye wɛrə lá.

¹⁴Ɨbɔmbɨma ɨbɨgɨ, ndəŋndəŋ ɨnu tsa tsɨ fúnɨ́ a nye bən kɨ́ fú a nye ndáŋwi tsa tsɨ nɨ tsə Ŋwi a Yudiya, a nye ɨbɛn ba ɨwu ba bo nɨ bə Kristo Yeso lá. Ɨbɛn bɨŋ dɨ́gɨ́ awən ndəŋndəŋ tso mbáʼ bo zɛ́nɨ́ ngɨ́ʼ a mu mbó bə Yuda,

¹⁵bo ba bɨ zhwítɨ́nɨ́ a Maʼmbyí Yeso abɔʼnɨ ntóm Ŋwi, nkɨ ndɨgɨ awɨgɨ lá. Ka bo ngɨə awa á ɨnye Ŋwi mbɔ́ŋə́ ghe! Bo shə́gə́ a nye ŋwɔn tsum be tɨsɨŋə!

¹⁶Bo kɨ́ njwə́ŋtɨ́ a ntsúʼnɨ́ bɨgɨ a sóŋ anu a Ŋwi a mbó ba a se bə Yuda be, nkən wa ɨ mɨ yen nɨ ɨloŋ a mbó bo ghe. A nye ndóm məwen, bo ghɨnə mɨbvu ɨma ma bo gháʼnə́ ngɨə mɨ lon nkɔʼ ndzábtɨ́ ə. Tɨtsɔŋnɨ alwɛntɔŋ a Ŋwi a chwinɨnə atú bo a ndwitə ghe!

¹⁷Ɨ bə bən a nye bɨgɨ nə ɨbɔmbɨma, a nkfu za bɨgɨnə shwɛ́kɨ́nɨ́ a nye məkum a nkfu — nkeʼ be be a mu ɨkwaʼtɨ ɨtsɨgɨ lá, tsɛʼ a nkənu, mbe be a mbəmnye — nji ndzě bɨŋ kə́ ndzáŋə́ awɨgɨ be tɨ́sə́n, bɨgɨ kə́ ngɨə atsum nɨ mɨntəm ɨmɨgɨ mɨtsum á bɨgɨnə bə ndzɛnɨ mɨshi ɛ!

¹⁸Bɨgɨ kə́ ndǒ ɨ bə bən a mbó bɨŋ ə. Me mboŋ ma kwáʼtɨ́ ɨ bə bən ntsa a táʼ nkfu, lá Satan a sé awɨgɨ nyɛʼtə.

¹⁹Za a tsinɨ ɨwu a nɨ ngə́, a nɨ bən — bən tso bə mɔʼɔ! — mbáʼ nɨ nɨ ntsiŋə ɨzɨgɨ nɨ ntəm tsum, nɨdorɨ ɨnɨgɨ, nkɨ mbe anu za a ghɨnɨ ghɨ á bɨgɨ ŋuʼ ɨnye ɨtsɨgɨ a mu ayanguʼ azɨgɨ a ɨshi Maʼmbyí Yeso ɨwɨgɨ a nkfu za wɛrə ghɨnɨ yiŋə.

²⁰Tsɛʼ a nkənu, nɨ nɨ kɨtɛrɨ ɨwɨgɨ abɔʼnɨ nɨdorɨ ɨnɨgɨ ə!