Read Ngemba 1 Tesalonaika 3 Bible Online

1 Tesalonaika 3 - Ngemba bible

1 Tesalonaika 3

¹A ndwɨgɨnə, bɨgɨ kɨ chi keʼ bə ngɛn nɨ mbyi a nchigɨ ntəm ɨ tsi tɨ zɛn awɨŋ ə. Ma lan, bɨgɨ tsɔ́ʼ a mu mɨntəm ɨmɨgɨ a nghɔ́ŋ bɨgɨ Atɛnsɨ

²lá ntsagɨ a Timotyo, mɨma ɨwɨgɨ wa a faʼnə bɨgɨ bo a mbó Ŋwi a sóŋ Nkən wu Shiʼnɨ mbɨ́ʼ a Kristo ghe. Bɨgɨ tságɨ́ ayi ngə́ á wɛrə yen shintɨ mɨntəm ɨmən, nkɨ nkwatɨ a ngɨə á abeməntəm azən a kwi,

³taŋ á ŋwɔn nɨ bən á keʼ bə mbən nɨ ndzum mbɨ́ʼ ndɨgə tsiŋ ə. Bɨŋ mboŋ nɨ zhi ngə́ ɨbə́ŋ ndɨgə mətsiŋ nɨ bagɨ ɨnu tsa Ŋwi a lɔnə a mbó bɨgɨnə ghe.

⁴Mbɨ́ʼ ngə́, mbáʼ bɨgɨ bvúrɨ́nɨ́ ntsi bɨgɨnə lá, bɨgɨ sóŋ a mbó bən bɔŋ a nkfu nkuʼə ngə́ bɨ ghɨ dɨ́gɨ́ awɨgɨ ə; adzaŋ za nɨ kɨnɨ nkɨ nji ɨ shiʼnɨ lá, a nɨ ndəŋndəŋ anu za a fúnə́.

⁵Nə nɨ anu za ma tsínɨ́ nɨ ntsagɨ Timotyo lá. Ma kɨ chi kaʼ bə ngɛn nɨ mbyi a nchigɨ ntəm, ma lan, ma tságɨ́ ayi ngə́ á tsɔʼ aku mbɨ́ʼ abeməntəm azɨŋ ə. Tsɛʼ a nkənu, a kɨ chi keʼ be ngə́ Dəbɨrɨ a kwáʼnɨ́nə awən, ɨfaʼ ɨwɨŋ ɨtsum tsa atú adaŋədaŋə ghe!

⁶Tɨtsɔŋnɨ Timotyo a bənə mbən, nkɨ ngyen nɨ nkən nɨdorɨ wa ɨ sóŋnə́ anu mbɨ́ʼ abeməntəm azən abɔʼnɨ akɔŋnɨ azɨŋ ə. A soŋ a mbó bɨgɨ ngə́ nɨ wíʼtə́ tsɛʼ ɨ shiʼnɨ mbɨ́ʼ awɨgɨ nkfu tsum nkə́ ndánə́ ndǒ ndze bɨgɨ tso mbáʼ bɨgɨ kɨ́nə́ nkə́ ndánə́ ndǒ ndze bɨŋ ə.

⁷Ma lan, a mu ngɨ́ʼ ɨzɨgɨ tsum abɔʼnɨ ndɨgɨ ɨzɨgɨ tsum, bɨ wɔŋtɨnə awɨgɨ mbɨ́ʼ awɨŋ ə, a ɨbɔmbɨma. A bé abeməntəm azən mbáʼ a wɔ́ŋtɨ́nɨ́ awɨgɨ,

⁸mbɨ́ʼ ngə́ tɨtsɔŋnɨ, bɨgɨ lánə́ ntsǐ ɨ shiʼnɨ mbɨ́ʼ awən mbáʼ nɨ tɛmnɨ ntɨŋə a mu ntsi mbyi ɨzən a mbúm bɨŋ bɨ Maʼmbyí lá.

⁹Tɨtsɔŋnɨ bɨgɨ chi gha a mɨya a mbó Ŋwi ɨwɨgɨ mbɨ́ʼ awɨŋ ə. Bɨgɨ ghǎ a mɨya wəmbo mbɨ́ʼ nɨdorɨ na bɨgɨ tsinɨ nɨ nɛrə wə ɨshi, mbɨ́ʼ awɨŋ ə.

¹⁰Nɨ njwi nɨ ɨtfúʼ, bɨgɨ lɔ́ntə́ wəmbo nɨ mɨntəm ɨmɨgɨ mɨtsum ngə́ á wɛrə a nyɛʼtɨ awɨgɨ á bɨgɨnə bə ndzɛnɨ mɨshi, taŋ á bɨgɨ chi gha awən nɨ za abeməntəm azən a bvurɨnə ndǒ ghe.

¹¹A Ŋwi ɨwɨgɨnə, nkɨ mbe Tarɨ zɨmboŋ bo Maʼmbyí Yeso ɨwɨgɨnə kyaŋtɨ ndóm a mbó bɨgɨ ɨ yen a mbó bɨŋ ə!

¹²A Maʼmbyí a ghɨ á akɔŋnɨ azən a nye ŋwɔn nɨ ŋwɔn, nkɨ mbe a mbó ŋwɔn tsum a nkwǐ ɨ kwinɨ ntiʼ ngháʼ tso akɔŋnɨ azɨgɨ a nye bɨŋ ə.

¹³A nye ndóm məwen, wɛrə a mɨ tiʼ shintɨ mɨntəm ɨmən, a nkfu wa Maʼmbyí ɨwɨgɨnə Yeso a yenɨ bo bɨ ɨbɛn bɨtsum ba bo nɨ ɨbyi, á nɨ tiʼ nkɨ nkɔʼ ntɛm ngə́ tsáŋ nkɨ fɛm a ɨshi ɨmɨgɨ Ŋwi ɨwɨgɨnə, zɨ wa nɨ Tarɨ lá.