Read Ngemba 1 Tesalonaika 5 Bible Online

1 Tesalonaika 5 - Ngemba bible

1 Tesalonaika 5

¹Ɨbɔmbɨma, ka bɨgɨ tsi awɨgɨ nɨ ɨŋwaʼnə a mbó bən mbɨ́ʼ njwi zɨ wu abɔʼnɨ nkfu za ɨnu tsiŋ ghɨnɨ fúə.

²Mbɨ́ʼ ngə́ bɨŋ mboŋ nɨ zhi tsɛʼ ɨ shiʼnɨ ngə́ Njwi za Maʼmbyí a lo bə yen lá, ɨ ghɨ be tso mbáʼ ndzɛrə a yenə nɨ ɨtfúʼ ə.

³A nkfu za ɨbɛn ghɨnɨ sóŋ ngə́, “Mbɔnɨ ɨ tsi, bɨgɨ keʼ nɨ nɨbɔgɨ kɨ nchyɛ,” muŋ ntsənkɨ ɨnu mɨ vwukɨ warɨ awa ghe! Ɨ mɨ vwukɨ yen tso mangye a chiʼ a mɔn, ɨbɛn chi keʼ a zɛrə lɛʼə.

⁴Lá bən nə ɨbɔmbɨma, ka nɨ tsi awən a ndzumnɨ ə. Ka Njwi məziŋ tsi ayi nɨ ɨ vwukɨ kɨʼnɨ awən tso ndzɛrə ghe.

⁵Bən bɨtsum lá ɨbɛn ba bɨ tsinɨ a mu nkaʼ, ɨbɛn ba bo tsinɨ a mbó nəzhwɨgɨnɨ ə. Ka bɨgɨnə be awɨgɨnə ɨbɔ bɨ ɨtfúʼ kə ɨbɔ bɨ ndzumnɨ ə.

⁶Ma lan, á bɨgɨnə keʼ ndyě tso bə mɔʼɔ ghe; á bɨgɨnə tsi a nɨkyerə nkə́ nchwátɨ́ ɨnye ɨtsɨgɨnə ghe.

⁷Ɨbɛn lyě lá nɨ ɨtfúʼ ə; ɨbɛn nǒ mɨluʼ mbánə́ lá nɨ ɨtfúʼ ə.

⁸Lá bɨgɨnə tsi lá a mbó nəzhwɨgɨnɨ ə, á bɨgɨnə chwátɨ́ ɨnye ɨtsɨgɨnə ghe. Bɨgɨnə tsi nɨ ɨ zagɨ tsi nɨ abeməntəm ɨ kə́ diʼnə akɔŋnɨ tso ngə́ bɨgɨnə wəgɨ ngobɨ ntso nɨgo, ɨ kɨ tsi nɨ ntsiŋə nɨ ntəm tsum a ndzɨ́ ɨloŋ tso akáŋə́tú ə.

⁹Ŋwi a sé awɨgɨnə tsɔʼ lá ngə́ á bɨgɨnə ze ngɨ́ʼ mbɨ́ʼ alwɛntɔŋ azhi, lá ngə́ á bɨgɨnə tsi nɨ ɨloŋ a ntsǎ a ndzum Maʼmbyí Yeso Kristo ɨwɨgɨnə,

¹⁰zɨ wa a kfónɨ́ mbɨ́ʼ atú azɨgɨnə taŋ á bɨgɨnə chi tiʼ tsinə bɨgɨnə bɨ wɛrə a nkfu za wɛrə a yenɨ, kə bɨgɨnə tsi atú ntən kə nkfokə.

¹¹Ma lan, á nɨ ngwɔ́ŋtə́ a ŋwɔn nɨ ŋwɔn nkə́ nkwátə́ a ŋwɔn nɨ ŋwɔn, tsɛʼ tso mbáʼ nɨ ghɨnə tɨtsɔŋnɨ lá.

¹²Ɨbɔmbɨma, bɨgɨ bǔʼ mbó a mbó bən ngə́ á nɨ ndǐʼ mbɔm zɨ shiʼnɨ a mbó ɨbɛn ba bo faʼnə a tɨtərɨ bən, bo ba bo tsɨŋnɨnə nkə́ ntɨ́gɨ́tə́ awən a nye ntsi mbyi ɨzən tso ɨbɛn ba bɨ zɔŋnə a Kristo lá.

¹³A nɨ ntíʼtə́ awa nɨ ndiʼ mbɔm zɨ shiʼnɨ za ɨ ghaʼnɨ ntsa mbó nkə́ ndiʼə akɔŋnɨ a mbó bo mbɨ́ʼ afaʼ za bo faʼnə ghe. A mbɔnɨ tsi a tɨtərɨ bɨŋ ə.

¹⁴Ɨbɔmbɨma, bɨgɨ nyíʼtə́ awən ngə́ á nɨ kwantɨ ngaŋ anarɨ, ngwɔ́ŋtə́ a ba bɨ shwɔ́nɨ́nə́, nkwátə́ a ba bɨ bɔrɨkɨnɨ, mbɔrɨsɨ mɨntəm ɨmən bɨŋ bɨ ŋwɔn tsum ə.

¹⁵A nɨ zɛn ngə́ á ŋwɔn tse a keʼ tfutɨ mbɔʼ anu a tɨbɔŋ nɨ anu a tɨbɔŋ, lá nkfu tsum á nɨ ghɨ á be anu za nɨ lɔnə nɨ mɨntəm ɨmən mɨtsum a ngɨ ɨbɔŋ a nye ŋwɔn nɨ ŋwɔn, nkwiʼtɨ ɨbɛn bɨtsum ə.

¹⁶A nɨ ndórɨ́kə́ tsɛʼ nkfu tsum,

¹⁷ntsáʼtə́ a Ŋwi tsɛʼ nkfu tsum,

¹⁸ngǎ a mɨya a mbó Ŋwi mbɨ́ʼ atsum za a funɨ a nye bɨŋ ə. Nə nɨ anu za Ŋwi a lɔnə a mbó bən a mu ntsi mbyi ɨzən a mbúm bɨŋ bɨ Kristo Yeso ghe.

¹⁹A nɨ keʼ njíʼə a za Azhwi zə Fɛmnɨ a chinɨ ghɨ a tɨtərɨ bən;

²⁰nkeʼ nkə́ ngwágɨ́nɨ́ mɨnkən ma mɨ lonɨ a mbó Ŋwi ə.

²¹A nɨ njwə́ŋtɨ́ ɨnu ɨtsum; ndě a za a bɔŋnɨ

²²nkə́ mbáʼtə́ ɨbə́ŋ ɨnu tsɨ tɔmnɨnɨ ɨtsum ə.

²³A Ŋwi, zɨ wa a ghánɨ́ mbɔnɨ a mbó bɨgɨnə a ghɨ awən á nɨ fɛm a mu azhwi, gharɨ abɔʼnɨ mbəmnye a nye mɨndóm mɨtsum nkɨ ntsi tɨ ɨfərɨ a nkfu za Maʼmbyí Yeso Kristo ɨwɨgɨnə a ghɨnɨ yen lá.

²⁴Zɨ wa a tsɔʼnɨ awən, a mɨ ghɨ á fu, mbɨ́ʼ ngə́ wɛrə a soŋ a mɔ́ʼɔ́ a nu mɔ́ʼɔ́ ghe.

²⁵Ɨbɔmbɨma, á nɨ ntsáʼtə́ a Ŋwi mbɨ́ʼ awɨgɨ ə.

²⁶A nɨ tɔŋtɨ awən bən nɨ bən ɨ shiʼnɨ ɨ shiʼnɨ a nye ndóm wa ɨ diʼnɨ ngə́ nɨ nɨ ɨbɛn bɨ Ŋwi ə.

²⁷Ma nyíʼtə́ awən nɨ mɨtən mɨ Maʼmbyí ngə́ á nɨ tɔŋ aŋwaʼnɨ zen a mbó ɨbɛn bɨtsum ba bɨ nɨŋnɨ mɨntəm ɨma a nye Ŋwi ə.

²⁸A abɔŋəntəm a Maʼmbyí Yeso Kristo ɨwɨgɨnə a tsi bɨŋ bo ghe.