Read Ngemba 2 Tesalonaika 1 Bible Online

2 Tesalonaika 1 - Ngemba bible

2 Tesalonaika 1

¹Aŋwaʼnɨ zen a ŋwaʼnɨ me Baolo, nkwiʼtɨ a Sailasɨ nɨ Timotyo ghe. A ghěn a mbó ndáŋwi za ɨ tsinɨ a Tesalonaika, bo ba bo tsinɨ a mbó Ŋwingɔŋ Ta ɨwɨgɨnə bo Maʼmbyí Yeso Kristo lá.

²A Ŋwi, zɨ wa nɨ Ta ɨwɨgɨnə bo Maʼmbyí Yeso Kristo gha abɔŋəntəm abɔʼnɨ mbɔnɨ a mbó bɨŋ ə.

³Ɨbɔmbɨma ɨbɨgɨ, bɨgɨ mɨ zagɨ ghanə a mɨya a mbó Ŋwi nkfu tsum mbɨ́ʼ awɨŋ ə. A kuʼnɨ a mbó bɨgɨ a ngɨə mə lan, mbɨ́ʼ ngə́ abeməntəm azən a kwiə tsɛʼ a nkan, akɔŋnɨ za ŋwɔn nɨ bɨŋ tsum a tsinɨ nɨ zɛrə a nye bə mɔʼɔ a kə́ ngháʼ ɨ ghaʼnɨ ə.

⁴Nə nɨ anu za bɨgɨ mboŋ tɛrɨnə mbɨ́ʼ awən a mu ndáŋwi tsa tsɨ nɨ tsə Ŋwi lá. Bɨgɨ tɛrə mbɨ́ʼ ndóm wa nɨ ghɛnə nɨ mbyi nchyɛ̌ nɨ achigəntəm nkə́ mbvúrə́ ngěn nɨ mbyi ɨ nɨ̌ŋ ntəm a nye Ŋwi a mu ndɨgə tsum abɔʼnɨ ndzě ngɨ́ʼ tsa nɨ tsanə wə mu ə.

⁵Məzen atsum a diʼə lá ngə́ nɨsáʼ nɨ Ŋwi tɛmnɨ, ndzɔŋə a məzen, nɨ ghɨ kón a mu Nɨfɔ ɨni na mbáʼ nɨ zɛ́nɨ́ ngɨ́ʼ mbɨ́ʼ a nɛrə lá.

⁶Ŋwi a ghɨ ghɨ a za a kuʼnɨnɨ: wɛrə a ghɨ yen nɨ ngɨ́ʼ a nye ɨbɛn ba bɨ ghɨnə nɨ zɛnɨ ngɨ́ʼ,

⁷ɨ kɨ gha ashwetə ntəm a mbó bən ba nɨ zɛ́nɨ́ ngɨ́ʼ ɨ kɨ be abɔʼnɨ bɨgɨ ə. A ghɨ ghɨ a məzen a nyom wa Maʼmbyí Yeso a lonɨ a fɔməbvurə ngyen bo bɨ bɨtsen bɨ ndá bɨ Ŋwi ɨbyi ba bɨ tsinɨ nɨ adaʼ,

⁸nɨ ɨmugɨ wa ɨ kwárɨ́nə́, a nɨ́ŋ ngɨ́ʼ a nye ɨbɛn ba bɨ tonɨ a Ŋwi nkeʼ nkə́ ndzúʼnɨ́ Nkən wu Shiʼnɨ wa mbɨ́ʼ a Maʼmbyí ɨwɨgɨnə, Yeso lá.

⁹Bo ghɨ ze ngɨ́ʼ ɨ tiʼ kon a mu ɨnɨŋ ngɨ́ʼ mbáʼ ɨ lá ntsənkə nɨnkoŋ, á bɨ lɔgɨ awa ndotɨ nɨ bo a ɨshi ɨmɨgɨ Maʼmbyí abɔʼnɨ adaʼ azhi zə nɨfáŋ,

¹⁰a nkfu za a yenɨ a Njwi wa a nkwárɨ́ nɨfáŋ a mbó ɨbɛn ɨbyi bɨtsum abɔʼnɨ nkɔʼsə atɨ́ a mbó ɨbɛn bɨtsum ba bɨ nɨŋnɨ mɨntəm ɨma a nye Ŋwi ə. Nɨ ghɨ kɨ tsi a ngɔ́n bɨŋ bo, mbɨ́ʼ ngə́ nɨ kɨ nɨŋnə mɨntəm ɨmən a nye nkən wa bɨgɨ sóŋnɨ́ a mbó bən lá.

¹¹Nə nɨ anu za bɨgɨ tsaʼtɨnə a Ŋwi mbɨ́ʼ awən nkfu tsum lá. Bɨgɨ lɔ́ntə́ a mbó Ŋwi ɨwɨgɨnə ngə́ á wɛrə a ghɨ á ntsi mbyi ɨzɨŋ kɔʼ nkuʼ ndvuŋ wa a tsɔʼnɨ awən ngə́ á nɨ tsi nɨ wɛrə ghe. A Ŋwi a ghɨ, ntsa a ndzum mɨtən ɨmyi, ngə́ á ɨnu tsɨ shiʼnɨ ɨtsum tsa nɨ lɔnɨ ngɨə á tsɨ fu, ɨ kɨ ghɨ ngə́ á ɨfaʼ ɨwən a mu abeməntəm kɔʼ nduŋə.

¹²A nye ndóm məwen, Maʼmbyí ɨwɨgɨnə, Yeso mɨ kwarɨ nɨfáŋ, ndo a mbó bən, á nɨ kɨ nkwarɨ a nɛrə wəmbo, ntsa a ndzum abɔŋəntəm a Ŋwi ɨwɨgɨnə bo abɔŋəntəm a Maʼmbyí Yeso Kristo ghe.