Read Ngemba 1 Timotyo 3 Bible Online

1 Timotyo 3 - Ngemba bible

1 Timotyo 3

¹Zen a nɨ anu za bɨ sóŋnə́ a be nkənu ngə́: be ŋwɔn a mbɛ́bə́ a mbé ntsagɨnɨ a mu ndáŋwi, lá be ngə́ a lǒ afaʼ za a bɔŋnɨ ntsa mbó ə.

²Ntsagɨnɨ a mu ndáŋwi a se tsi nɨ nchyɛ nɨ akɔmkɨ anu zə tse ghe; a tsi nɨ ɨ zagɨ tsi tsɛʼ nɨ táʼ mangye, ɨ keʼ ngɨ̌ mɨnu ɨ tsǎ fəŋnɨ ɨfɨʼ, ɨ chwátɨ́nɨ́ ɨnye ɨzhi, ɨ tsi nɨ mbɔm zɨ shiʼnɨ; ɨ zagɨ kwarɨnɨ bɨghən a ndá zɨ; ɨ zagɨ chi diʼ anu a Ŋwi;

³a se tsi nɨ mbe abarə mɨluʼ kə ŋwɔn wa a bvugɨnɨ ndum, lá ɨ be ŋwɔn abɔnəntəm abɔʼnɨ ŋwɔn mbɔnɨ; a se tsi nɨ nkɔŋ nkáb;

⁴a tsi nɨ ɨ zagɨ chi sáʼ ngwəgɨ ɨzhi ɨ shiʼnɨ, ɨ ghɨ á ɨbɔ ɨbyi ndzúʼnə́ ayi nɨ ndiʼ mbɔm zɨ shiʼnɨ a nye mɨndóm mɨtsum ə.

⁵Mbɨ́ʼ ngə́ be ŋwɔn a tú zhi ɨ sáʼ ngwəgɨ ɨzhi, a chi zhi ndə̌tú a nye ndáŋwi za a nɨ zɨ Ŋwi lá ɨ nə́ le?

⁶A tsi nɨ ɨ zagɨ tən ɨ kɔ́kɨ́ a mu abeməntəm, taŋ á kɨtɛrɨ a keʼ ghɨ á nkɔ́ʼsɨ́ ɨbyɛrɨ ɨchi, ɨ tsi nɨ ndəŋndəŋ ɨnɨŋ ngɨ́ʼ za Dəbɨrɨ a tsinɨ nɨ zɛrə lá.

⁷A tsi nɨ mbe ŋwɔn wa ɨbɛn ba bɨ se a mu ndáŋwi tsi kɔ́ʼsɨ́nə́ ayi atɨ́, taŋ á bɨ chi keʼ adɨrətú wə ɨnye nɨŋ, á vwo a mu makyɛn Dəbɨrɨ ə.

⁸Ɨbɛn ba bɨ kwátɨ́nə́ a ndáŋwi tsi nɨ ɨ zagɨ tsi nɨ mbɔm zɨ shiʼnɨ, ɨ kə́ soŋnɨ nkənu; ka bo tsi awa nɨ ɨ no mɨluʼ tɨ́sə́n kə ɨ be bɨ amiɛnɨngám a nye ɨnu nkáb;

⁹ntsi nɨ ntiʼtɨ nkənu za ɨ tsinɨ a mu abeməntəm za Ŋwi a kyɛʼnɨ a mbó bo nɨ ntəm wa ɨ lánɨ́ ə.

¹⁰Bɨ tsi nɨ ɨ fom zhwəŋtɨ awa ghe. Be bo tsa azhwəŋtɨ məzen, bɨ tiʼ nyɛʼtɨ awa ngə́ á bo faʼə.

¹¹Bəngye[1] tsi nɨ ɨ kɨ zagɨ tsi nɨ mbɔm zɨ shiʼnɨ, ɨ keʼ ɨbɛn ba bɨ sóŋnɨ́ mɨnu a ntsənkɨ ɨkum ŋwɔn wu shiʼnɨ ɨwu be; ɨ keʼ ngɨ̌ mɨnu ɨ tsǎ fəŋnɨ ɨfɨʼ, ɨ kə́ soŋənə tsɛʼ nkənu ɨza a nye ɨnu ɨtsum ə.

¹²Ŋwɔn wa a kwátɨ́nə́ a ndáŋwi a tsi nɨ nchyɛ tsɛʼ nɨ táʼ mangye, ntsi nɨ saʼ ɨbɔ ɨbyi abɔʼnɨ ngwəgɨ ɨzhi ɨ shiʼnɨ ə.

¹³Bɨnkwatɨ ba bɨ faʼnɨ ɨ shiʼnɨ mɨ kwarɨ ɨkum wu shiʼnɨ a mbó ɨtumbəm ɨtsa, ɨ chi gham tɨ nɨbɔgɨ mbɨ́ʼ abeməntəm aza a nye Kristo Yeso ghe.

¹⁴Mbáʼ ma ŋwaʼnɨnə aŋwaʼnɨ zen a mbó gho lá, ma tsiŋə nɨ ntəm ɨghə ɨtsum ɨ yen zɛn agho tsɛʼ a nye məbaŋtɨ ə.

¹⁵Lá be bɨ chwuŋsɨ aghan, muŋ aŋwaʼnɨ zen a mɨ ghɨ o zhi adzaŋ za bɨgɨnə tsinɨ nɨ ngɨ ɨnu a mu ndáŋwi, mbáʼ ɨ lá ndáŋwi zɨ Ŋwi, zɨ wa a tsinɨ ntən, mbe ntɛʼ abɔʼnɨ atwɛmtɨ a nkənu lá.

¹⁶Ŋwɔn tse a chi keʼ ton ngə́ ndóm wa bɨgɨnə zhinɨ a Ŋwi, a nɨ anu a nkubə zə wi ə: Wɛrə a fú a ɨshe a nye mbě ŋwɔn mɨsɔŋ a ntsu, Azhwi a diʼ ngə́ wɛrə a kuʼnɨ, ɨtsendá Ŋwi zɛ́n a wɛrə ghe. Bɨ ghám mbɨ́ʼ ayi a mbó ba a se bə Yuda be, atuəshe atsum a nɨŋ mɨntəm ɨma wə ɨnye, Ŋwi a tsɔ́ʼ a wɛrə nkɔʼ ngɛn nɨ zɨ a fɔməbvurə ghe.