Read Ngemba 1 Timotyo 6 Bible Online

1 Timotyo 6 - Ngemba bible

1 Timotyo 6

¹Ɨbuʼ ɨtsum tsa tsɨ nɨ ɨbɛn ba bɨ zɔŋnə a Kristo tsi nɨ ɨ zagɨ lɔgɨ bɨta bɨ ɨbuʼ ɨba tso ɨbɛn ba bɨ kuʼnɨnɨ a nkwárɨ́ nkɔʼsə atɨ́ tsum, taŋ á ŋwɔn tse a chi keʼ gham anu zə tɔmnɨnɨ mbɨ́ʼ ɨkum Ŋwi abɔʼnɨ ɨnu tsa bɨgɨnə diʼnə ghe.

²Ɨbuʼ tsa bɨta bɨ ɨbuʼ ɨba nɨ ɨbɛn ba bɨ zɔŋnə a Kristo, bɨ se tsi nɨ ndiʼ atságɨ́ a mbó bo, mbɨ́ʼ ngə́ bo kɨ mbe lá ɨbɔmbɨma ɨba ghe. Bo baŋnɨ ntsi nɨ ɨ faʼə a mbó bo ɨ ghɛn nɨ mbyi, mbɨ́ʼ ngə́ ɨbɛn ba bɨ dzɨ́nə́ abi afaʼ aza a nɨ ɨbɛn ba bɨ nɨŋnɨ mɨntəm ɨma a nye Ŋwi nkɨ mbe ɨbɛn ba bo kɔŋnə. O tsi nɨ ɨ zagɨ diʼ kɨ soŋ ɨnu tsiŋ ə.

³Ŋwɔn tsum wa a diʼnɨ ɨnu tsɨ daŋ ntsatɨ a tsa ma díʼnɨ́, nkeʼ nkə́ mbémnə́ bo bɨ mɨgham mɨ nkənu mɨ Maʼmbyí Yeso Kristo ɨwɨgɨnə abɔʼnɨ ɨnu tsa anu a Ŋwi azɨgɨnə a diʼnə

⁴a fugɨ nɨ ɨŋuʼ ɨnye nkeʼ anu zə tse zhyɛ. A tsi nɨ ndǒ zɨ tɨbɔŋ a ndɨʼkə, bo bɨ ndzɔŋnə mbɨ́ʼ ɨtú mɨgham ə. Məzen a yiŋənə nɨ aghɨʼnɨ, azɔŋ, ndzɔm, nkaŋə zɨ ntɔmnɨnɨ,

⁵ndɨʼkə nkfu tsum a tɨtərɨ ɨbɛn ba ka ɨtú ɨtsa faʼə ayi, ba ka bɨ bə mbvurɨ ntiʼtɨ awa nkənu ə. Bo wiʼtɨ ngə́ nji Ŋwi nɨ ndómnji nchyɛ nɨ nkáb ə.

⁶Ɨ shiʼnɨ, nji Ŋwi ghɨə ŋwɔn a chyɛ̌ nɨ afuʼ tsɛʼ a nkan, mbáʼ be ŋwɔn wu wu a lɔgɨ a za zɨə tsinɨ nɨ zɛrə ngə́ a kuʼnɨ a mbó zɨə.

⁷Bɨgɨnə yén nɨ ake a mu mbyi le? Kə́ kə́! Bɨgɨnə chi lɔgɨ ake ɨ fu nɨ zɛrə a mu mbyi le? Kə́ kə́!

⁸Ma lan, be bɨgɨnə tsi nɨ mɨdzɨ abɔʼnɨ ɨtsɛʼ, mətsa tsi nɨ nkuʼnə a mbó bɨgɨnə ghe.

⁹Lá ɨbɛn ba bɨ lɔnɨ nchyɛ nɨ afuʼ, bɨ vwǒ a mu akwaʼnɨ, makyɛn ɨdzúm ɨdzɨŋtɨ abɔʼnɨ tsə ngá ngɨ́ʼ tsa bo lɔnə a ko awa, ntiʼ shwuŋ awa bo bɛʼkɨ ntiʼ nkɨ ntsənkɨ awa ghe.

¹⁰Mbɨ́ʼ ngə́ nkɔŋ nkáb nɨ adiʼ za ɨnu tsɨ tɔmnɨnɨ ɨtsum fúnə́ ɨwu ə. Bə tsɛrə lanɨnə mbɛbɨ a nchyɛ́ nɨ zɛrə tɨ́sə́n nkɔʼ nkuʼ ɨfɨʼ za bo furɨnɨ ndzum ɨtsa a nye abeməntəm, ntiʼ ndɛm mɨntəm ɨma nɨ ɨdzə́ŋnɨ a ɨnɔ ɨnɔ ghe.

¹¹Lá gho, ŋwɔn afaʼ Ŋwi, baʼtɨ ɨnu tsiŋ ɨtsum ə. A ntókə́ a nchyɛ́ nɨ nchinə, a njí Ŋwi, a nchyɛ́ nɨ abeməntəm, a nchyɛ́ nɨ akɔŋnɨ, a nchyɛ́ nɨ achigəntəm abɔʼnɨ nchyɛ nɨ mbɔm zɨ mbɔnɨnɨ ə.

¹²Kɨrɨ adaʼ azo atsum a mu amaŋnɨ a nɨkɨə zə abeməntəm, ntiʼ ndzɨ ntsi ntən nɨnkoŋ a mbó atuəmbəm azo; mbɨ́ʼ ngə́ Ŋwi a tsɔ́ʼ agho lá a mu ntsi mbyi məzen a njwi wa o sóŋnɨ́ abeməntəm azo nɨ ntəm ɨgho ɨtsum asaŋəsaŋ a mbyi bətɛmə-ndzě bə ghaʼnɨ lá.

¹³A ɨshi Ŋwi, zɨ wa a ghánɨ́ ntsi ntən a mbó ɨdzúm ɨtsum, nkɨ mbe a ɨshi Kristo Yeso, zɨ wa a sóŋnɨ́ abeməntəm azhi nɨ ntəm ɨyi ɨtsum a ɨshi Bonto Branto, ma ghǎ ntɨgə zen a mbó gho ngə́

¹⁴o ndzúʼnɨ́ ntɨgə tsa nɨ ntəm ɨgho ɨtsum ɨ kɔʼ kuʼ Njwi za Maʼmbyí Yeso Kristo a ghɨnɨ fu a ɨshe ə.

¹⁵A nye nkfu za ɨ kuʼnɨnɨ, Ŋwi a ghɨ ghɨ a wɛrə á fu a ɨshe, Ŋwi, zɨ wa ɨfɔgɨ tsinɨ wə ɨnye, Nsaʼlaʼ wa a nunɨ zɨzɨ, Ɨfɔ bɨfɔ nkɨ mbe Maʼmbyí bɨmaʼmbyí lá.

¹⁶A nɨ tsɛʼ zɨzɨ wa a láʼ keʼ kfo; wɛrə a chyɛ̌ a mu nkaʼ wa ŋwɔn tse a chi keʼ yentɨ nkuʼ wə mbyɛn ə. Ŋwɔn tse a láʼnə mbvurɨ tɨ ze ayi; wu tse a láʼ keʼ ayi kɨ ndze. A nkɔʼsə atɨ́ abɔʼnɨ mɨtən mɨ nɨnkoŋ tsi wəmbo ə! A be lá.

¹⁷Soŋ a mbó ɨbɛn ba bɨ tsinɨ nɨ afuʼ atuəshe zen ngə́ á bɨ nkeʼ ŋǔʼ ɨnye, nkeʼ nɨŋ ntsiŋə nɨ ntəm tsum ɨza be a nye nkáb za ɨ chinɨ mi a nyom tsum, lá ɨ nɨŋ a zɛrə be a nye Ŋwi, zɨ wa a ghánɨ́ ɨdzúm ɨtsum a mbó bɨgɨnə tə́ ndə́ŋtə́ taŋ á bɨgɨnə ndórə́ nɨ tsɛrə lá.

¹⁸Soŋ a mbó bo ngə́ á bo ngɨ̌ ɨbɔŋ, ngɨ̌ ɨnu tsɨ shiʼnɨ tsɛʼ a nkan, ngǎ abó, nkɨ ntsi nɨ ntəm ngyɛbtɨ ɨdzúm ɨtsa bo bɨ ɨbɛn bə mɔʼɔ ghe.

¹⁹A nye ndóm məwen, bo mɨ len afuʼ zə wi a mbó ɨtumbəm ɨtsa, mbáʼ a ghɨnɨ bé atsé ndá za bɨ tumnɨ ɨ shiʼnɨ a nye nkfu za ɨ ghɨnɨ yen lá. A nkfu məwa, bo ghɨ chi tiʼ dzɨ ntsi mbyi za ɨ nɨ ntsi mbyi nkənu lá.

²⁰Timotyo, len ɨ shiʼnɨ anu za bɨ nɨŋnə a mu mbó gho lá. Baʼtɨ mɨgham ma ka mɨ nkɔ́ʼsə́ awa ɨkum Ŋwi atɨ́ abɔʼnɨ ɨlɨʼkɨ ɨdzɨŋtɨ tsa ɨbɛn bə tsɛrə fanə ntɔ́ŋə́ nɨ “Azhyɛ” lá.

²¹Mbɨ́ʼ ngə́ bə tsɛrə soŋnə ngə́ bo tsi nɨ zɛrə, a nye ndóm məwen, ɨ fə ndóm abeməntəm ə. A abɔŋəntəm a Ŋwi a tsi a nye bən bɨtsum ə.