Read Ngemba 2 Timotyo 1 Bible Online

2 Timotyo 1 - Ngemba bible

2 Timotyo 1

¹Aŋwaʼnɨ zen a lo a mbó me, Baolo wa ma benɨ ntom Yeso zɨ Kristo Yeso ndzɔŋə adzaŋ za Ŋwi a kɨ́nə́ ndǒ ghe. Bɨ tsagɨ aghan a nchwítɨ́ nkən mbɨ́ʼ ntsi mbyi za bɨ káʼnɨ́, za bɨgɨnə tsínə́ nɨ zɛrə a mbúm bɨgɨnə bɨ Kristo Yeso lá.

²A ghěn a mbó gho Timotyo, mɔn ɨghan wa ma kɔŋnɨ: A Ŋwi, zɨ wa nɨ Tarɨ abɔʼnɨ Kristo Yeso Maʼmbyí ɨwɨgɨnə gha agho nɨ abɔŋəntəm, akômɨlɨŋnɨ abɔʼnɨ mbɔnɨ ə.

³Ma ghǎ a mɨya a mbó Ŋwi, zɨ wa ma faʼnə wəmbo nɨ ntəm wa ɨ lánɨ́, adzaŋ za bɨta ɨban bə kɔ́ʼɔ́nguʼ kɨ́nə́ ngɨə lá. Ma ghǎ a mɨya a mbó wɛrə nkfu tsum za ma kwémtɨ́nə́ agho a mu atsaʼtɨ a Ŋwi azan nɨ ɨtfúʼ nɨ njwi ɛ.

⁴Ma wáʼtɨ́ nkyi nɨzɛʼ ɨgho a nkfu wa ma kɨ́nə́ nyɛʼtə agho, nkə́ ndǒ ndzě gho tsɛʼ nɨ ntəm ɨghə ɨtsum, taŋ á nɨdorɨ lwɨgɨ ntəm ɨghə.

⁵Ma wáʼtə́ abeməntəm zə nkənu za o tsinɨ nɨ zɛrə, abə́ŋ abeməntəm za nɨmi ɨgho wu ndəmə Luasɨ bo nɨmi ɨgho Yunisɨ, a bo kɨ́nɨ́ nkɨ́ ntsí nɨ zɛrə lá. Ma zhi ɨ shiʼnɨ ngə́ o kɨ ntsi nɨ zɛrə ghe.

⁶Mbɨ́ʼ a məzen, ma kwémtə́ a mbó gho ngə́ o ghɨ á azúm zə ghanɨ za Ŋwi a ghánɨ́ a mbó gho a nkfu za ma nyɔ́ŋnɨ́ mbó ɨman atú gho lá, á nkɨə tso ɨmugɨ ə.

⁷Mbɨ́ʼ ngə́ Azhwi za Ŋwi a ghanɨ a mbó bɨgɨnə se ngɨə ngə́ á bɨgɨnə tsi tɨ nkotɨ mbáŋnɨ́; Azhwi azhi a baŋnə ndwɨ́gə́ awɨgɨnə nɨ mɨtən, akɔŋnɨ abɔʼnɨ nchwatɨ ɨnye ə.

⁸O tiʼ lá ntsi tɨ adɨrətú a sóŋ nkən wu shiʼnɨ mbɨ́ʼ a Maʼmbyí ɨwɨgɨnə; kə nkoʼ kɨ ntsi nɨ adɨrətú mbɨ́ʼ aghan, me wa ma nɨ ngaŋ atsáŋ mbɨ́ʼ atú a Kristo lá. Baŋnɨ ndɔgɨ azo adiʼ a ndzé ngɨ́ʼ mbɨ́ʼ Nkən wu Shiʼnɨ, ndzɔŋə adaʼ za Ŋwi a ghánə́ a mbó gho a ngɨə mə lan lá.

⁹Wɛrə a lóŋ awɨgɨnə nkɨ ntsɔʼ awɨgɨnə ngə́ á bɨgɨnə be ɨbɛn ɨbyi, nkeʼ be be mbɨ́ʼ anu za bɨgɨnə ghɨnə, lá mbe be mbɨ́ʼ adzaŋ za wɛrə a lɔnə abɔʼnɨ abɔŋəntəm azhi ɛ. Wɛrə a ghá abɔŋəntəm məzen a mbó bɨgɨnə ntsa a ndzum Kristo Yeso bɔŋ á mbyi mbíʼnə́,

¹⁰lá tɨtsɔŋnɨ bɨ kyɛʼnə a zɛrə a mbó bɨgɨnə, ntsa a ndzum adzaŋ za ndoŋ ɨwɨgɨnə Kristo Yeso a yénɨ́ lá. Wɛrə a lwɨgɨnɨnə mɨtən mɨ nɨvwo, a ntsǎ a ndzum nkən wu shiʼnɨ, wɛrə a kyɛʼnə ntsi ntən nɨnkoŋ a mbó bɨgɨnə ghe.

¹¹Ŋwi a tsɔʼnə aghan tso ntom Yeso abɔʼnɨ ndiʼ aŋwaʼnɨ a nchwítɨ́ Nkən wu Shiʼnɨ məwa,

¹²nə nɨ anu za mbáʼ ma zɛ́nɨ́ ngɨ́ʼ mbɨ́ʼ ɨnu mətsen lá. Lá ka ma ndɨrə aghə atú, mbɨ́ʼ ngə́ ma zhi a zɨ wa ma nɨŋnɨ ntəm ɨghan wə ɨnye, nkɨ nji ɨ shiʼnɨ ngə́ wɛrə a chi len a za wɛrə a ghánɨ́ a mbó me ɨ kɔʼ kuʼ a nye Njwi Nɨsáʼ za.

¹³Chwa mɨgham mɨ nkənu ɨman ma ma díʼnɨ́ agho nɨ mɛrə á mɨ ntɨŋə tso alisɨ za o mɨ tiʼə zɔŋnə ghe. Ghɔŋ a mu abeməntəm abɔʼnɨ akɔŋnɨ, tsɛrə tsa tsɨ nɨ ɨtsɨgɨnə a mbúm bɨgɨnə bɨ Kristo Yeso lá.

¹⁴A ntsǎ a ndzum mɨtən mɨ Azhwi zə Fɛmnɨ, mɛrə ma mɨ tsínə́ a mu ɨnye ɨtsɨgɨnə, len ɨnu tsɨ shiʼnɨ tsa bɨ nɨŋnə a mu mbó gho lá.

¹⁵O zhi ngə́ ɨbɛn bɨtsum ba bɨ zɔŋnə a Kristo ɨ mɔ́ʼɔ́ mɔ́ʼɔ́ a Mbuʼ Esha, nkwiʼtɨ a Faigɛlusɨ bo Ɛmɔginisɨ, bɨ kɨəkɨnə aghə.

¹⁶A Maʼmbyí a diʼ akômɨlɨŋnɨ a mbó ngwəgɨ Onɛsifɔrɨsɨ, mbɨ́ʼ ngə́ a kə́ ngɨə ntəm ɨghə saŋnɨnə nkfu tsə ghaʼnɨ ə. Wɛrə a sé dɨrɨ atú ngə́ ma tsí atsáŋ ə.

¹⁷Lá, tsɛʼ mbáʼ a bínɨ́ nkón a Roma, a bíʼnɨ́ ndǒ me ɨ kɔʼ kuʼ nkfu za a zɛ́nɨ́ aghə.

¹⁸A Maʼmbyí a ló ndiʼ akômɨlɨŋnɨ azhi wəmbo a Njwi Nɨsáʼ za! O zhi ɨ shiʼnɨ ndvuŋ afaʼ wa wɛrə a fáʼnɨ́ a mbó me a Ɛfɛso ghe.