Read Ngemba 2 Timotyo 3 Bible Online

2 Timotyo 3 - Ngemba bible

2 Timotyo 3

¹Ma lǒ ngə́ o zhi ngə́ ɨbvu ghɨ gháʼ a nye njwi ntsɨrɨndzum ə.

²Ɨbɛn ghɨ bé ɨbɛn ba bɨ kɔŋnɨ tsɛʼ ɨtumbəm ɨtsa, ɨ be ɨbɛn ba bɨ kɔŋnɨ nkáb, ngaŋ kɨtɛrɨ, abɔʼnɨ ngaŋ atságɨ́; bo ghɨ fɨgɨnɨ ndzɔm a ntsu bo, ɨ tɨŋənə atú a mbó bɨta ɨba, ɨ be bɨtɨgha a mɨya, abɔʼnɨ ɨbɛn ba ka bo ndzúʼnə́ awa anu a Ŋwi;

³bo ghɨ keʼ nɨ ntəm ngɨ ɨbɔŋ tsi, ɨ keʼ a mɨlɨŋnɨ a nkǒ, ɨ be ɨbɛn ba bɨ ghamnɨ ɨnu tɨbɔŋ a ntsənkɨ ɨkum ŋwɔn wu shiʼnɨ, ɨ be ngaŋ ngvuŋ ɨdiʼ, ɨ kɨ tsɛgɨnə tso ɨnyam mɨtsɛgɨ; bo ghɨ be ɨbɛn ba bɨ banɨ ɨnu tsɨ shiʼnɨ;

⁴bo ghɨ be ngaŋ ntáŋ mɨnaŋ, ɨ be ɨjwaʼ ɨbɛn, ɨ kɔʼ lon nɨ kɨtɛrɨ; ɨ be ɨbɛn ba bɨ kɔŋnɨ ɨnu tsa mbəmnye lɔnə ɨ tsa a nkɔŋ Ŋwi ə.

⁵Bo ghɨ tíʼtɨ́ tsɛʼ ɨnu tsa tsɨ diʼnə anu a Ŋwi azɨgɨnə abyɛn abyɛn, lá ɨ ton awa ngótɨ́ mɨtən mɨ anu a Ŋwi ə. Baʼtɨ ɨdzaŋ ɨbɛn tso mətsiŋ ə.

⁶Bo bə tse lwɔ̌ nkúŋə́ nɨ mɨndá mɨ ɨbɛn ngɨ̌ ɨtsi ngə́ bo nɨ za bo se zɛrə be, nkɔ́ʼə ɨ shíʼtə́ nchyɛ́ atú, ntiʼə ntsɨ́ŋnɨ́ bəngye ba bɨ bɔrɨkɨnɨ a ntsɔʼ anu a mu mɨntəm ɨma, bəngye ba mɨbvu ma bo ghɨnɨ zhíʼnə́ awa a tɨshe, ɨnu tsa mbəmnye ɨtsa lɔnə kə́ fárɨ́sə́ awa,

⁷bəngye ba bɨ zhwə́ŋtɨ́nə́ tsɛʼ nkfu tsum a ngyɛ́ʼ lá ɨ láʼ keʼ nkənu zhi lá.

⁸[1] Tso mbáʼ Janisɨ bo Jambrɨsɨ kɨ́nə́ nkwənkə bo bɨ Mǒse nɨ mɨfu ɨma lá, ndəŋndəŋ ɨbɛn benə kə́ nkwə́nkə́ bo bɨ nkənu ə. Nə nɨ ɨbɛn ba ɨtú ɨtsa sě faʼə ɨ shiʼnɨ, mbe ɨbɛn ba bɨ vwonɨ a nye ɨnu abeməntəm ə.

⁹Lá bo mɨ keʼ lo ɨghan mbe ɨghɨ, mbɨ́ʼ ngə́ ŋwɔn tsum ɨ mɔ́ʼɔ́ mɔ́ʼɔ́ mɨ ze adzaŋ za bo dzɨŋtɨnə. A nyam mbe lá tsɛʼ anu za a fúnɨ́ a nye Janisɨ bo Jambrɨsɨ ə.

¹⁰Lá Timotyo, o zhi ɨnu ɨtsum tsa ma diʼnə, mbɔm ɨzan abɔʼnɨ anu za ma kɨ́nə́ ndǒ a mu ntsi mbyi; o zhi atsum mbɨ́ʼ abeməntəm za ma tsinɨ nɨ zɛrə, nchigə za ma diʼnə a mbó ɨbɛn, akɔŋnɨ azan a nye ɨbɛn abɔʼnɨ achigəntəm za ma diʼnə a mbó ɨbɛn ə.

¹¹O zhi adzaŋ za bɨ dɨ́gɨ́nɨ́ aghan abɔʼnɨ ngɨ́ʼ za ma zɛ́nə́. O zhi atsum za a fúnɨ́ a nye me Antyokɨ, Aikonium, abɔʼnɨ Listra ghe. O zhi ndɨgə zɨ tɨbɔŋ za bɨ dɨ́gɨ́nɨ́ aghan nɨ zɛrə, ma kɨ nchigɨ ntəm tsɛʼ chigɨnə! Lá Maʼmbyí a fɨ́gɨ́ aghan a mu tsɛrə ɨtsum ə.

¹²Ŋwɔn tsum wa a lɔnɨ ntsi ntsi mbyi za ɨ ghúʼsɨ́nə́ a Ŋwi a mbúm bo Kristo Yeso, bɨ mɨ dɨgɨ ayi;

¹³le buŋ ɨbɛn bə tɔmnɨnɨ abɔʼnɨ ba bɨ ghɨnɨ ɨtsi ngə́ bo nɨ ɨbɛn ba bo se bɛrə be lá, anu aza mɨ bɨ́gɨ́nɨ́ ɨ bɨ́gɨ́nɨ́ ɨ ghɛnə nɨ mbyi, á bo ntámtɨ́ ɨbɛn bədaŋ, á bɨ kə́ ntámtə́ awa ghe.

¹⁴Lá a mbó gho nə Timotyo, a ngěn nɨ mbyi tsɛʼ a mu nkənu za bɨ díʼnɨ́ agho nɨ zɛrə, o kɨ nɨŋ ntəm ɨgho a nye zɛrə tsɛʼ ɨ shiʼnɨ lá. O zhi ɨbɛn ba bɨ bénɨ́ bɨdiʼ bɨ aŋwaʼnɨ ɨbo,

¹⁵nkɨ nji ngə́ nchwuʼnɨ mbáʼ o bénɨ́ wu mbɔrɨ, o zhinə ɨnu tsa bɨ ŋwaʼnɨnɨ a mu Aŋwaʼnɨ a Ŋwi zə Fɛmnɨ, zɛrə za a chinɨ gha a zóŋ wa a tsagɨnɨnə agho a mu ɨloŋ a ntsǎ a ndzum abeməntəm azo a nye Kristo Yeso lá.

¹⁶Ɨnu ɨtsum tsa bɨ ŋwaʼnɨnɨ a mu Aŋwaʼnɨ a Ŋwi, a soŋ Ŋwi ngə́ á bɨ ŋwaʼnɨ a tsɛrə, bɨ lɔgɨnə a tsɛrə ndǐʼ nkənu, a ngamtɨ akɔkɨ anu, a nchísɨ́ afənu, ɨ kɨ gha atɨgɨtɨ taŋ á ɨbɛn chi tsi nɨ ntsi mbyi za ɨ chinɨnɨ,

¹⁷taŋ á ngaŋ afaʼ Ŋwi chi tiʼ tsi nɨ atsum za wɛrə a tsinɨ nɨ nchyɛ nɨ zɛrə a ngɨ ɨbə́ŋ ngɨnɨ mɨnu mə shiʼnɨ mɨtsum ə.