Read Ngemba 2 Timotyo 4 Bible Online

2 Timotyo 4 - Ngemba bible

2 Timotyo 4

¹Timotyo, ma nɨŋ a zen a mu mbó gho a ɨshi ɨmɨgɨ Ŋwi bo Kristo Yeso, bo ba bo ghɨnɨ sáʼ a ba bɨ tsinɨ ntən abɔʼnɨ ba bɨ kfokɨnɨ, a ntsǎ a ndzum adzaŋ za wɛrə a yenə a sáʼə tso Ɨfɔ, ma nyíʼtə́ agho nɨ ntəm ɨghə ɨtsum

²ngə́ o soŋ nkən wa, ntɛgɨ atú azo a nchwítɨ́ wɛrə kə ɨbɛn kɔŋ a njwíʼtɨ́ wɛrə kə ngáŋ, a ndɛ́tɨ́ mɨntəm, a ngamtɨ ba bɨ ghɨnɨ a zə tɨbɔŋ, a ngwɔŋtə, adzaŋ za o diʼnə a wɛrə nɨ nchigə tsum ə.

³Mbɨ́ʼ ngə́ nkfu yiŋə za ɨbɛn ghɨnɨ keʼ kɔŋ ndzǔʼ ɨnu tsa bɨ diʼnə tsa tsɨ kuʼnɨnɨ, lá ɨ zɔŋnə be ɨnu tsa bo lɔnə, ɨ tiʼ kɨ ghǒtɨ bɨdiʼ bɨ aŋwaʼnɨ a mbó ɨtumbəm ɨtsa á bɨ ngháʼə ngěn be nɨ mbyi, bɨdiʼ bɨ aŋwaʼnɨ ba bo ghɨnɨ soŋnə a mbó bo ɨnu tsa ɨtoŋnɨ tsa chwíʼtɨ́nə́ a ndzúʼə lá.

⁴Bo ghɨ bəŋ mɨntəm ɨ keʼ njwíʼtɨ́ nkənu, ɨ tiʼ tɛgɨ ɨtú ɨtsa a nye njalaʼ tsɨ kɔ́ʼɔ́nguʼ ə.

⁵Lá o tsi nɨ nchwatɨ ɨnye ɨzo a nye ɨnu ɨtsum; ɨ chigɨ ntəm a mu ndze ngɨ́ʼ, ɨ faʼ afaʼ a ngaŋ ɨsoŋ nkən wu shiʼnɨ, ɨ kɨ faʼ ɨfaʼ ɨgho ɨtsum tso ngaŋ afaʼ Ŋwi ə.

⁶A mbó me, nkfu ɨ kuʼnə á bɨ lɔgɨ aghan tso mɨtsuʼnɨ mɨ atú; nkfu za ma mɨ nyɛʼtɨ atuəshe ziŋ ə.

⁷Ma kɨənə nɨkɨə na nɨ adaʼ azə atsum, ma kɨənə nɨkɨə na nɨtsum ngɛn nkuʼ a ndwitə, ma kɨ ntɛm ntɨŋə ngə́ twə́ŋ a mu abeməntəm za.

⁸Azúm za a zhwíʼtɨ́nə́ aghan tɨtsɔŋnɨ a nɨ ndɔ́ŋ ayanguʼ mbɨ́ʼ ngə́ ma tsinə ntsi mbyi za ɨ chinɨnɨ a ɨshi ɨmɨgɨ Ŋwi, zɛrə za Maʼmbyí, zɨ wa a nɨ Tabyɛn, a ghɨnɨ gha a mbó me a Njwi wa. Wɛrə a mɨ keʼ tsɛʼ a mbó me gha, lá ɨ kɨ gha a mbó ŋwɔn tsum wa a tsenə a wɛrə nɨ akɔŋnɨ ngə́ á wɛrə a ghɨ fú a ɨshe lá.

⁹Ghɨ atsum a mu adaʼ azo a ndzé ngə́ o waŋnɨ ngyen a mbyɛn me ghe.

¹⁰Mbɨ́ʼ ngə́ Demasɨ a nɨŋ akɔŋnɨ azhi a nye ɨdzúm atuəshe zen, ɨ nyɛʼtɨ aghan ngɛn a Tesalonaika ghe. Lá Krɛsɛnsɨ a ghɛn a Galesha, Tɨ́tósɨ a ghɛn a Dalmesha ghe.

¹¹A tsi tsɛʼ Alukasɨ bɨgɨ zɨə. Lɔgɨ a Marɨkusɨ á bɨŋ zɨ yen mbɨ́ʼ ngə́ wɛrə a chi kwatɨ aghan nɨ afaʼ ziŋ ə.

¹²Ma tsagɨ a Taichikusɨ a Ɛfɛso ghe.

¹³O tɨ yiŋə, yen nɨ atsɛʼ azan za ma nyɛ́ʼtɨ́nɨ́ a Truasɨ a mbó Kabusɨ lá; kɨ ndɔgɨ ɨŋwaʼnɨ tsa ngyen nɨ tsɛrə, tɨ́sə́n tɨ́sə́n, tsa bɨ nyɛtɨnɨ nɨ ngobɨ ɨnyam lá.

¹⁴Alɛgɨsanda talam wa a ghɨ́ ɨnu tsɨ tɔmnɨnɨ tsə ghaʼnɨ a nye me ghe; Maʼmbyí a mɨ tsɔʼ afaʼ azhi ɨ zɔŋ ɨnu tsa wɛrə a ghɨnə ghe.

¹⁵O lə̌ atú azo wə ɨnye gho mboŋ, mbɨ́ʼ ngə́ wɛrə a kə́ nkɨ̌ŋ nkən wu shiʼnɨ ɨwɨgɨnə wa bɨ sóŋnə́ tsɛʼ nɨ adaʼ azhi atsum ə.

¹⁶Ŋwɔn tse a sé a mbyɛn me tɛm a nkfu za ma tɛ́mnɨ́ a ngɔʼ abyɛn a nye ntsambyi nkfu za bɨ sáʼnɨ́ ɨsáʼ ɨghan lá; ɨbɛn bɨtsum nyɛ́ʼtɨ́ aghan me me ghe! A Ŋwi a keʼ lɔgɨ a məzen ngɨ ɨsáʼ ɨwu a nye bo ghe.

¹⁷Lá Maʼmbyí a tsí bɨgɨ zɨ, nkɨ nga adaʼ a mbó me, adzaŋ məwen, ma tsí nɨ adaʼ a nchwítɨ́ nkən wu shiʼnɨ wa tsɛʼ ɨtsum á ba a se bə Yuda be bɨtsum zuʼə; ma lan, bɨ ghángə́ bɨ soŋə ngə́ ma vwo ɨsáʼ, bɨ tsi nɨ njwitɨ me, lá wɛrə a fɨ́gɨ́ aghan a mu məziŋ ə.

¹⁸Maʼmbyí a mɨ fɨgɨ aghan a mu ɨnu tsɨ tɔmnɨnɨ ɨtsum, ɨ lɔgɨ aghan ɨ ghɛn nɨ me tsɛʼ ɨ shiʼnɨ ɨ shiʼnɨ ɨ ghɛn kon nɨ me a mu Nɨfɔ nɨ fɔməbvurə ɨni ɛ. A nɨfáŋ tsi a mbó wɛrə nɨnkoŋ ə! A be lá.

¹⁹Ma tsagə atɔ́ŋtɨ a mbó Brɨsɨla abɔʼnɨ Akwila nkwiʼtɨ a ŋwɔn tsum a ndá Onɛsifɔrɔsɨ ə.

²⁰Erastusɨ a ghɔ́ŋ a Korɨnto; ma nyɛ́ʼtɨ́ a Trɔmfimɔsɨ a Milɛtusɨ mbɨ́ʼ ngə́ a kə́ ngǒ ghe.

²¹Ghɨ atsum a mu adaʼ azo a ndzé ngə́ o yen bɔŋ nkfu ɨfɛgɨ wu ntən za ɨ yiŋə. Yubulɔsɨ, Budɛnsɨ, Lainɔsɨ abɔʼnɨ Klodia tsagə atɔ́ŋtɨ a mbó gho ghe. Ɨbɔmbɨma bɨtsum ba bɨ zɔŋnə a Kristo ɨghan kə́ ntságə́ atɔ́ŋtɨ a mbó gho ghe.

²²A Maʼmbyí a tsi bɨŋ zɨə. A abɔŋəntəm a Ŋwi a tsi a mbó bən bɨtsum ə.