Read Ngemba Tɨ́tósɨ 2 Bible Online

Tɨ́tósɨ 2 - Ngemba bible

Tɨ́tósɨ 2

¹O tsi nɨ ɨ zagɨ diʼ ɨnu tsa tsɨ bemnɨnɨ bo bɨ mbɔm ndiʼ anu a Ŋwi zɨ shiʼnɨ ə.

²Tɨgɨtɨ bɨləmə bə mbáŋnɨ́ ngə́ á bo keʼ ngɨ̌ mɨnu ntsǎ ɨfə̌ŋ ɨfɨʼ, nkwáʼtɨ́ ɨnu ɨ shiʼnɨ, ɨ kə́ chwátɨ́nɨ́ ɨnye ɨtsa; ntəntɨ a mu abeməntəm, akɔŋnɨ, abɔʼnɨ achigəntəm ə.

³Ndəŋndəŋ, tɨgɨtɨ bɨtankaŋ bɨ bəngye ngə́ á bo ngɨ̌ ɨnu adzaŋ za bəngye ba bɨ tsínə́ a mu ntsi mbyi zɨ fɛmnɨ ghɨnə ghe. Ka bo zagɨ ntsi awa nɨ mbe ɨbɛn ba bɨ sóŋnɨ́ mɨnu a ntsənkɨ ɨkum ŋwɔn wu shiʼnɨ kə ɨ be ɨbuʼ a mbó mɨluʼ ə. Bo tsi nɨ ɨ zagɨ diʼnɨ ɨnu tsɨ shiʼnɨ,

⁴taŋ ɨ mərɨsɨnɨ bəngye bə bɔrɨ a mu nɨzɔ́ʼ á bɨ kɔŋ bɨlóm ɨba abɔʼnɨ ɨbɔ ɨba,

⁵ɨ chwatɨnɨ ɨnye ɨtsa ɨ kɨ lán, ɨ be bəngye bə nɨzɔ́ʼ bə shiʼnɨ, ɨ tsi nɨ ntəm ngɨ ɨbɔŋ, ɨ kə́ zuʼnɨnə bɨlóm ɨba, taŋ á ŋwɔn tse a ghɨ nkeʼ gham ɨnu tsɨ tɔmnɨnɨ mbɨ́ʼ nɨgham nɨ Ŋwi ə.

⁶Ndəŋndəŋ, wɔŋtɨ mbáŋnɨ́ tsa tsɨ bvurɨnɨ ndzɔ́ʼ ngə́ á bo nchwátɨ́ ɨnye ɨtsa ghe.

⁷A nye ɨnu ɨtsum, gho mboŋ, o tsi nɨ mbe alisɨ a mbɔm zɨ shiʼnɨ ə. A sǒŋ nkənu ɨzo nkɨ nɨŋ atú a nye anu a Ŋwi za o diʼnə ghe.

⁸O tɨ diʼə, a ngǎm mɨgham mə shiʼnɨ ma bɨ chinɨ keʼ a mɛrə kəbtɨ, taŋ á ngaŋ kɨban ɨtso tsi nɨ adɨrətú mbáʼ ka bo tsi awa nɨ anu a tɨbɔŋ a sóŋə́ mbɨ́ʼ awɨgɨnə ghe.

⁹A ɨbuʼ ndzúʼnɨ́ bɨtabuʼ ɨba, ɨ kə ghɨnə á ɨnye ɨtsa mbɔ́ŋə́ a nye ɨnu ɨtsum ə. A bo keʼ mɨgham a ntsu bo mbígɨ́tə́

¹⁰kə ɨ ŋwǎ ɨdzúm ɨtsa ghe. Bo tsi nɨ ɨ baŋnɨ diʼ be ngə́ bo bɔŋ nkə́ faʼə tsɛʼ nɨ táʼ ntəm taŋ a nye ɨnu ɨtsum tsa bo ghɨnə, bo mɨ yen nɨ ɨkum wu shiʼnɨ a nye ɨnu tsa bɨ diʼnə mbɨ́ʼ a Ŋwi Ndoŋ ɨwɨgɨnə lá.

¹¹Mbɨ́ʼ a məzen, Ŋwi a kyɛʼnə abɔŋəntəm taŋ á bɨ loŋ a ŋwɔn mɨsɔŋ a ntsu tsum ə.

¹²Abɔŋəntəm məza a mərɨsə awɨgɨnə a ntúŋ nchyɛ tɨ zhi a Ŋwi abɔʼnɨ ntuŋ nchyɛ nɨ ntəm wa ɨ kɨ́nə́ mbɨ́ʼ ɨdzúm atuəshe, ɨ kə́ chyɛnə nɨ nchwatɨ ɨnye, ntɛmnə abɔʼnɨ nchyɛ a mu mbɔgɨtɨ Ŋwi atuəshe wen,

¹³mbáʼ bɨgɨnə tsenɨ Njwi zɨ fɔgɨnɨ za, za bɨgɨnə tsenə nɨ mɨntəm ɨmɨgɨnə mɨtsum, Njwi za mbáʼ nɨfáŋ nɨ Ŋwi ɨwɨgɨnə wu ngwi abɔʼnɨ Ndoŋ ɨwɨgɨnə Yeso Kristo ghɨnɨ fú a ɨshe ə.

¹⁴Wɛrə a ghá atuəmbəm azhi mbɨ́ʼ awɨgɨnə, a fɨ́gɨ́ bɨgɨnə a mbó abɨgəntəm atsum, ɨ kɨ ghɨ awɨgɨnə á bɨgɨnə be ɨbɛn ba bɨ lánɨ́ ba bɨ tsinɨ tsɛʼ a mbó zɨzɨ, nkə́ mbɛ́bə́ a ngɨ ɨbɔŋ ə.

¹⁵Diʼ ɨnu tsen, nkə́ fáʼə nɨ mɨtən ɨmo mɨtsum adzaŋ za o wɔŋtɨnə nkə́ ngámtə́ ɨbɛn ba bɨ zhwíʼtɨ́nə́ a mbó gho ghe. A ŋwɔn tse a keʼ agho wagɨnə.