Read Ngemba Firɨmɔn 1 Bible Online

Firɨmɔn 1 - Ngemba bible

Firɨmɔn 1

¹Aŋwaʼnɨ zen a lo a mbó me, Baolo wa ma benɨ ngaŋ atsáŋ mbɨ́ʼ atú a Kristo Yeso ghe. Ma ŋwaʼnə a zɛrə lá ntsi bɨgɨ Timotyo mɨma ɨwɨgɨnə ghe. A ghěn a mbó gho Firɨmɔn, mbɔŋ ɨson ɨwɨgɨnə wa bɨgɨ bo faʼnə abó mɔ́ʼɔ́,

²nkə́ ngěn a mbó ngǒtə ɨbɛn za ɨ zɔŋnə a Kristo za ɨ bomnkɨnə a ndá gho, abɔʼnɨ mɨma ɨwɨgɨnə wu mangye Afya ndzɔŋ nkwiʼtɨ Akibo wa bɨgɨ bo nɨ bɨgwe ghe:

³A Ŋwi, zɨ wa a benɨ Ta ɨwɨgɨnə abɔʼnɨ Maʼmbyí Yeso Kristo gha abɔŋəntəm nɨ mbɔnɨ a mbó bɨŋ ə.

⁴Mɨma, Firɨmɔn, nkfu tsum za ma tsaʼtɨnə a Ŋwi, ma kwémtə́ agho a mbó Ŋwi ɨghan nkə́ ngǎ a mɨya a mbó Ŋwi ɨghə.

⁵Mbɨ́ʼ ngə́ ma zúʼə mbɨ́ʼ akɔŋnɨ azo a nye ɨbɛn bɨ Ŋwi bɨtsum, nkə́ ndzúʼə mbɨ́ʼ abeməntəm azo a nye Maʼmbyí Yeso ghe.

⁶Ma tsaʼtə a Ŋwi ngə́ ndzɨnɨ ɨzɨgɨnə tso ɨbɛn ba bɨ nɨŋnɨ mɨntəm ɨma a nye Kristo mɨ ghɨ á bɨgɨnə zuʼ nkɨ nji ɨfɔgə ɨtsum ngɛn nɨ mbyi, ɨfɔgə wa bɨgɨnə tsinɨ nɨ wɛrə a mu ntsi mbyi ɨzɨgɨnə a mbúm bɨgɨnə bɨ Kristo lá.

⁷Mɨma ɨghan, akɔŋnɨ azo a ghɨ ma tsi nɨ nɨdorɨ nə wi abɔʼnɨ ngwɔŋtə zɨ ngwi ə! O ghɨ mɨntəm mɨ ɨbɛn bɨ Ŋwi bɨtsum saŋnɨnə ghe.

⁸Mbɨ́ʼ akɔŋnɨ azo məzen, ntəm ɨghə chi faŋ tsɛʼ nkan tso mɨma ɨgho a ndzum Kristo a sóŋə́ nɨ mɨtən ngə́ o ghɨ a za bɨ tsinɨ nɨ ngɨə ghe.

⁹Lá mbɨ́ʼ ngə́ ma kɔŋ agho, ma baŋnɨ mbitɨ agho ɨ bitɨnə. Ma baʼtɨ mbe Baolo ɨ benɨ, me wa ma nɨ tamandóm Kristo Yeso, nkɨ mbe ngaŋ atsáŋ mbɨ́ʼ atú azhi tɨtsɔŋnɨ lá, ma ghɨ a məziŋ ə.

¹⁰Ma lan, ma bitɨ anu zə tsɛrə a mbó gho a nkfu Onɛsimɔsɨ, wa a nɨ mɔn ɨghan a ndzum Kristo; mbɨ́ʼ ngə́ mbáʼ ma tsinɨ atsáŋ lá, ma tiʼ mbəŋ mbe ta ɨyi a mu azhwi ə.

¹¹A bé a nkfu tse lá, a keʼ azúm zə tsɛrə a mbó gho be, lá tɨtsɔŋnɨ a tsi nɨ afaʼ a mbó bɔgə bɨtsum ə.

¹²Ma bɨŋə ntsagə ayi, zɨ wa ma kɔŋnɨ tsɛʼ nɨ ntəm ɨghə ɨtsum lá a mbó gho tɨtsɔŋnɨ ə.

¹³Ma lo be kɔŋ ndě zɨ ɨghan mbáʼ ma tsinɨ atsáŋ mbɨ́ʼ atú a nkən wu shiʼnɨ lá, taŋ á chi kwatɨnə aghan a nkfu gho ghe.

¹⁴Lá ka ma ndǒ aghan ɨ nyəm gho ngə́ o kwatɨ aghə; ma baŋnə ndǒ ngə́ o kwatɨ aghan a nkɔŋ gho ghe. Ma lan, ma mɨ kaʼ ghɨ anu zə tsɛrə tɨgha o bemtə.

¹⁵A chi be ngə́ Onɛsimɔsɨ a lótɨ́ ayi a mbyɛn gho a nye məkum a nkfu lá taŋ o ghɨ́ mbə ntsi nɨ zɨ, á tiʼ nɨnkoŋ ə.

¹⁶Tɨtsɔŋnɨ ka a bvurɨ mbe ayi lá tsɛʼ abuʼ, a lanɨ ntsa abuʼ be tɨ́sə́n: a nɨ mbɔŋ mɨma a ndzum Kristo ghe. Wɛrə nɨ təkɔʼ bɨ anu a mbó me ghe! Wɛrə mɨ kɨ be təkɔʼ bɨ anu a mbó gho ɨ bə tsa adzaŋ za a benɨ a mbó me, tso abuʼ abɔʼnɨ mɨma a ndzum Maʼmbyí ɛ!

¹⁷Ma lan, be o kwaʼtɨ ngə́ ma nɨ ŋwɔn aku ɨgho, kwarɨ ayi wədiʼ tsɛʼ adzaŋ za o lonɨ be kwarɨ aghə.

¹⁸Be a be ngə́ a fə anu zə tsɛrə a nye gho kə nchwa a gho nɨ azúm zə tsɛrə, nɨŋ a zɛrə a ɨshi ɨkum me ghe.

¹⁹Adiʼ wen, ma mɨ ŋwaʼnɨ a məzen nɨ abó azan me mboŋ ə: Me, Baolo, ma mɨ byigɨnɨ agho ə. Ka ma tsi aghan nɨ ɨ bə kwemtɨ a mbó gho ngə́, tsɛʼ a nkənu, ntsi mbyi ɨzo tso ŋwɔn wa a zɔŋnə a Kristo ɨ tsi lá mbɨ́ʼ aghə.

²⁰Ma lan nə mɨma ɨghan, ma buʼ mbó, ghɨ a mɨbɔŋ wen a mbó me mbɨ́ʼ atú a Maʼmbyí ɛ; tso mɨma a ndzum Kristo, ghɨ á ntəm ɨghə saŋnə!

²¹Ma zhi tsɛʼ ɨ shiʼnɨ ngə́ mbáʼ ma ŋwaʼnɨnə a zen lá, o mɨ ghɨ a za ma bitɨnə — tsɛʼ a nkənu, ma zhi ngə́ o mɨ ghɨ ɨ tsa lá.

²²Kɨ nkyaŋtɨ a kwasɨ ndá a mbó me, mbɨ́ʼ ngə́ ma tsiŋə nɨ ntəm ɨghə ɨtsum ngə́ Ŋwi a mɨ chwɨgɨ atsaʼtɨ azən bɨtsum ɨ bə byigɨ aghan a mbó bɨŋ ə.

²³Ebafrasɨ wa a tsinɨ atsáŋ bɨgɨ zɨ mbɨ́ʼ atú a Kristo Yeso a tsagə atsaʼtɨ azhi a mbó gho ghe,

²⁴ɨbɛn ben ba bɨgɨ bo faʼnə abó mɔ́ʼɔ́: Marɨkusɨ, Aristakusɨ, Demasɨ abɔʼnɨ Alukasɨ kə́ ntságə́ atsaʼtɨ a mbó gho ghe.

²⁵A abɔŋəntəm a Maʼmbyí Yeso Kristo a tsi a mbó bən bɨtsum ə.