Read Ngemba Ɛbal 1 Bible Online

Ɛbal 1 - Ngemba bible

Ɛbal 1

¹A bé a mbyi lá, Ŋwi a ghamnə nkfu tsɨ ghaʼnɨ a nye mɨndóm mə ghaʼnɨ a mbó bɨta ɨbɨgɨnə bə kɔ́ʼɔ́nguʼ ntsǎ lá a ndzum ntóm Ŋwi ə.

²Lá a nye njwi tsen tsa tsɨ lwɨgɨnɨnɨ lá, Ŋwi a ghamnə a mbó bɨgɨnə ntsǎ a ndzum Mɔn ɨyi ɛ. Ŋwi a káʼ mbyi-mbyi tsum ntsa lá wə ndzum, zɨ wa Ŋwi a tsɔʼnɨ ngə́ á ghɨ ntsí nɨ ɨdzúm ɨtsum a ndwitə lá.

³Mɔn wa a lá malum wa bɨ lɔgɨnə ndzě nɨfáŋ nɨ Ŋwi ɨwu, mbe ngótɨ́ afi a Ŋwi ə. Mɨtən mɨ nɨgham ɨni byɛʼ mbyi-mbyi tsum ə. A nkfu za wɛrə a ghɨ́nə a ŋwɔn mɨsɔŋ a ntsu a fɛm a mbó mɨbvu ɨmyi lá, wɛrə a tíʼ nkɔ́ʼ ngɛ́n a fɔməbvurə, ɨ shiʼtɨ ntsi a bagɨ abó Ŋwi zə maʼə, zɨ wa a benɨ Mɨtən mɨ Akɔ́ʼɔ́ntsɨrə lá.

⁴Mɔn Ŋwi a tsi atú bɨtsen bɨ ndá bɨ Ŋwi tso mbáʼ ɨkum wa Ŋwi a ghánɨ́ wəmbo ɨ tsanɨ wu bɨtsen bɨ ndá ɨbyi lá.

⁵Mbɨ́ʼ ngə́ Ŋwi a láʼnə nkeʼ soŋ a mbó ntsendá Ŋwi ɨzhi zɨ tse ngə́: “O nɨ Mɔn ɨghə; sɨŋə ma tiʼ Ta ɨgho ghe.” Kə Ŋwi a láʼnə nkeʼ soŋ mbɨ́ʼ ntsendá Ŋwi ɨzhi zɨ tse ngə́, “Ma ghɨ bé Ta ɨyi, á wɛrə kɨ mbe Mɔn ɨghə.”

⁶Lá a nkfu za Ŋwi a tsínɨ́ nɨ ntsagɨ ntsambyi Mɔn ɨyi atuəshe lá; wɛrə a sóŋ ngə́: “Bɨtsen bɨ ndá ba a nɨ bə Ŋwi bɨtsum tsi nɨ ɨ zagɨ ghuʼsɨ a wɛrə ghe.”

⁷Lá Ŋwi a ghám mbɨ́ʼ bɨtsen bɨ ndá bɨ Ŋwi ngə́, “Ŋwi a ghɨ bɨtsen bɨ ndá bɨ Ŋwi tso kɨfɛrɨ, nkɨ ngɨ a bo wa bo nɨ ngaŋ afaʼ ɨchi tso ndwa ɨmugɨ ə.”

⁸Lá, mbɨ́ʼ a Mɔn Mbáŋnɨ́, Ŋwi a sóŋ ngə́: “O Ŋwi, Nɨfɔ ɨno mɨ ghɔŋ nɨnkoŋ ə! O sáʼə ɨbɛn ɨbo tɨ nkyerɨ ə.

⁹O kɔŋ anu zə chinɨnɨ, mban a za a se chinə. Nə nɨ anu za a ghɨnɨ Ŋwi, zɨ Ŋwi ɨgho, a tsɔʼnə agho nkɨ nga nkɔʼsə atɨ́ za ɨ tsinɨ nɨ nɨdorɨ na nɨ ghɛnɨ nɨ mbyi ntsa nə ngaŋ aku ɨtso.”

¹⁰Ŋwi a kwíʼ sóŋ ngə́: “Gho, Maʼmbyí, a mbiʼnə o káʼ atuəshe, ndɔgɨ mbó ɨmo nkaʼ fɔməbvurə ɨwu ə.

¹¹Ɨdzúm tsiŋ ɨtsum ghɨ lwitɨ, lá o ghɔŋə; tsɨ ghɨ kfurɨkɨ tso ɨtsɛʼ ə.

¹²O ghɨ kárɨ́ a tsɛrə tso mbáʼ bɨ kárɨ́nə́ a tɔgɨ, o ghɨ kwébtɨnə a tsɛrə tso mbáʼ bɨ kwébtɨ́nɨ́ ɨtsɛʼ ə. Lá gho, o nɨ ndəŋndəŋ nkfu tsum, ntsi ntən ɨzo ɨ láʼ keʼ lwitə.”

¹³Ŋwi a láʼ nkeʼ sóŋ a mbó ntsendá Ŋwi zɨ tse ngə́: “Shiʼtɨ ntsi ɨghan, a bagɨ abó me zə maʼə ɨ kuʼ nkfu za ma ghɨ ghɨ o nyəŋtɨ ngaŋ kɨban ɨtso nɨ mɨku ɨmo.”

¹⁴Bɨtsen bɨ ndá bɨ Ŋwi tiʼ mbe lá ɨke le? Bo nɨ ɨzhwi tsa tsɨ faʼnə a mbó Ŋwi, a kə ntiʼə ntsagə awa bo kwatɨnɨ ɨbɛn ba bɨ ghɨnɨ kwárɨ́ ɨloŋ ə.