Read Ngemba Ɛbal 10 Bible Online

Ɛbal 10 - Ngemba bible

Ɛbal 10

¹Nyɔngɔŋ wa Mǒse a ghánɨ́ a mbó bə Yuda a nɨ be nɨnɨŋənɨŋə ngótɨ́ ɨdzúm tsɨ shiʼnɨ tsa tsɨ ghɨnɨ yiŋə, ka a be ayi ngótɨ́ ɨdzúm tsɨ shiʼnɨ mətsa. Bɨntumshe ghǎ ndəŋndəŋ mɨtsuʼnɨ mɨ atú nɨnkoŋ nɨ ɨlom nɨ ɨlom ə. A chi tiʼ tsa lá ɨ nə́ ngə́ Nyɔngɔŋ, a ntsǎ a ndzum mɨtsuʼnɨ mɨ atú məmen a ghɨ ɨbɛn ba bɨ yenə a mbó Ŋwi bɨ kɔʼ ntɛm ngə́ tsáŋ le?

²A be be lá mə lá muŋ bo bvurɨ tɨ kyɛntɨ a ngá mɨtsuʼnɨ mɨ atú məmen le? A be be ngə́ ɨbɛn ba bɨ ghúʼsɨ́nə́ a Ŋwi a nye ndóm məwen bɨ súgɨnə awa nɨnkoŋ muŋ mɨntəm ɨma sě mbvúrə́ sáʼə awa mbɨ́ʼ ɨbvu ə.

³Lá a ntsǎ a ndzum mɨtsuʼnɨ mɨ atú məmen, bɨ kwémtɨ́ ɨbɛn mbɨ́ʼ mɨbvu ɨma nɨ ɨlom nɨ ɨlom ə.

⁴Mbɨ́ʼ ngə́ a tsanɨ ngə́ á alɛm a bɨnkɔ́ʼɔ́ndzum abɔʼnɨ zə mbyi a chi sugɨ mɨbvu mɨ ɨbɛn ə.

⁵Adzaŋ məwen, Kristo a yén a mu mbyi lá ɨ soŋ ngə́, “Ka o ndǒ agho mɨtsuʼnɨ mɨ atú abɔʼnɨ ɨkáŋ Ŋwi, lá O kyaŋtɨ mbəmnye a mbó me ghe;

⁶ka ɨnye ɨzo mbɔŋə ayi a nye mɨnyam ma bɨ tɔnɨ tɨ sobtɨ ɨlám ɨlám atú a mɨkuʼ kə a nye mɨtsuʼnɨ mɨ atú ma bɨ ghanɨ a sugɨ mɨbvu ə.

⁷Ma tíʼ sóŋ ngə́, ‹O Ŋwi, ma wen a ngɨ anu za o lɔnə, adzaŋ za bɨ ŋwaʼnɨnɨ mbɨ́ʼ aghan a mu aŋwaʼnɨ a Ŋwi lá.›”

⁸A ntsambyi wɛrə a sóŋ ngə́, “Ka o ndǒ agho, ɨnye ɨzo keʼ nkə́ mbɔ́ŋə́ a nye mɨtsuʼnɨ mɨ atú abɔʼnɨ ɨkáŋ Ŋwi kə a nye mɨnyam ma bɨ tɔnɨ atú atú a mɨkuʼ abɔʼnɨ mɨtsuʼnɨ mɨ atú mɨ sugɨ mɨbvu ə.” (bɨ kə́ ngǎ mɨtsuʼnɨ mɨ atú məmen abɔʼnɨ ɨkáŋ Ŋwi ndzɔŋə lá a Nyɔngɔŋ Mǒse ghe.)

⁹A tíʼ mbə nkwiʼtɨ ngə́, “Ma wen a ngɨ anu za o lɔnə ghe.” Ma lan, Ŋwi a byɛgɨ mɨtsuʼnɨ mɨ atú mə lvuŋ ma, ntiʼ nɨŋ mɨtsuʼnɨ mɨ atú mɨ Kristo a nye adiʼ aza ghe.

¹⁰Mbɨ́ʼ ngə́ Yeso Kristo a ghɨ́ a za Ŋwi a kɨ́nə́ ndǒ, bɨ sugɨ awɨgɨnə bɨgɨnə fɛm a nye mɨbvu ɨmɨgɨnə ntsa a ndzum mbəmnye ɨzhi za wɛrə a ghánɨ́ táʼ nkfu nɨnkoŋ tso akáŋ a Ŋwi lá.

¹¹Ntumshe tsum a faʼə ɨfaʼ ɨyi nɨ njwi nɨ njwi, nkwátə́ ngǎ ndəŋndəŋ mɨtsuʼnɨ mɨ atú ma mɨ chinɨ láʼ keʼ mɨbvu sugə.

¹²Lá mbáʼ Yeso a ghánɨ́ atuəmbəm azhi a nye mɨtsuʼnɨ mɨ atú mɨ nɨnkoŋ mə mɨbvu táʼ nkfu lá, wɛrə a tíʼ shíʼtɨ́ ntsí a bagɨ abó Ŋwi zə maʼə,

¹³ɨ tiʼ tsiŋənɨ nkfu za Ŋwi a ghɨnɨ zumtɨ ngaŋ kɨban ɨchi ɨ ghɨ á bo tsi a shwúrɨ́ mɨtən ɨmyi tso ngə́ bo nɨ ɨtɛkɨ mɨku ɨchi ɛ.

¹⁴Mbɨ́ʼ ngə́, nɨ táʼ mɨtsuʼnɨ mɨ atú a ghɨ ɨbɛn ba Ŋwi a ghɨnɨ bo fɛm bo kɔʼ ntɛm ngə́ tsáŋ nɨnkoŋ ə.

¹⁵Azhwi zə Fɛmnɨ a kɨ mbe atɛmə-ndzě wa a sóŋnə́ ngə́:

¹⁶“Maʼmbyi a soŋ ngə́ ‹Akan za ma mɨ ghɨ bɨgɨ bo a nye njwi tsa tsɨ ghɨnɨ yen lá a zɛnə: ma mɨ ghɨ á bo ngwíʼtɨ́ bɨnyɔngɔŋ ɨban nkfu tsum, ɨ kɨ ghɨ á bo lɛn a bɛrə a mu mɨntəm ɨma ghe.›”

¹⁷Ntiʼ mbə nkwiʼtɨ ngə́, “Ma mɨ kaʼ bə ngwaʼtɨ mɨbvu ɨma abɔʼnɨ ɨnu tsɨ tɔmnɨnɨ ɨtsa ghe.”

¹⁸Ma lan, be bɨ lɨgɨnɨ mɨbvu ɨma məmen, muŋ bɨ se mbɨ́ŋə́ ndǒ akáŋ a Ŋwi zə sugɨ mɨbvu ə.

¹⁹Ma lan nə ɨbɔmbɨma ɨban, ntsa a ndzum nɨvwo nɨ Yeso, ka azúm zə tsɛrə a chi tsuʼnɨ ayi awɨgɨnə a nkúŋə́ a mu Adiʼ zə Fɛmnɨ Ntsa Atsum za.

²⁰Yeso a ŋáʼ ndómnji wu fi a mbó bɨgɨnə, ndómnji wa ɨ ghánɨ́ ntsi ntən ɨ tosɨ tsa a nye abagɨ atsɛʼ zə nkwasə — lá be ngə́, ntsa a ndzum mbəmnye ɨzhi zɨmboŋ ə.

²¹Bɨgɨnə tsi nɨ ntumshe wu ngwi wa a faʼnə a mu ndá za a nɨ zɨ Ŋwi ə.

²²A bɨgɨnə ghɛn ɨ fatɨ a Ŋwi nɨ ntəm wu nkənu, abɔʼnɨ abeməntəm za bɨgɨnə zhinɨ ngə́ a ghɨ fú a nye anu, nɨ mɨntəm ma bɨ sugɨnɨ a mbó ngvo ɨsáʼ tsum abɔʼnɨ mbəmnye tsa tsɨ fɛ́mnə́ tsɛʼ tso ngə́ bɨ sugɨ nɨ nkyi wu fɛmnɨ ə.

²³A bɨgɨnə chwa tə nchiʼnə ntsiŋə nɨ ntəm tsum za bɨgɨnə sóŋnə́ ngə́ bɨgɨnə tsi nɨ zɛrə, mbɨ́ʼ ngə́ Ŋwi, zɨ wa a káʼnɨ́ awɨgɨnə a soŋ a mɔ́ʼɔ́ lá a nu mɔ́ʼɔ́ ghe.

²⁴A bɨgɨnə ndǒ mɨndómɨnji mɨtsum a ngɨə á ŋwɔn tsum a nsáŋnə́ a ndiʼ akɔŋnɨ ɨ kə́ ghɨənɨ ɨnu tsɨ shiʼnɨ ə.

²⁵A bɨgɨnə mbómnkɨ́ nkfu tsum, nkeʼ be tso ɨbɛn ba bɨ banɨ mbomnkə məzen lá. Bɨgɨnə mbáŋnə́ ngwɔŋtə a ŋwɔn nɨ ŋwɔn, tɨ́sə́n tɨ́sə́n mbáʼ nɨ zɛnɨ ngə́ Njwi nkyɛgɨnɨ abyɛn Maʼmbyí ɨ fatɨ lá.

²⁶Mbɨ́ʼ ngə́ be bɨgɨnə mbvúrə́ ngěn nɨ mbyi a ngɨ mɨbvu nɨ azhinɨ, mbáʼ bɨ kwɛnə ngɨ bɨgɨnə zhi nkənu, á nɨ zhi ngə́ ka mɨtsuʼnɨ mɨ atú mədaŋ a sugɨ ɨbvu mɨ ŋwɔn bə mbvurɨ ayi ɛ.

²⁷Atsum za a baŋnɨ mbvurɨ a nɨ njwiʼtə a mu nɨbɔgɨ adzaŋ za Njwi Nɨsáʼ ɨ yenə abɔʼnɨ ɨmugɨ wu tən wa ɨ ghɨnɨ tsənkɨ ngaŋ kɨban Ŋwi lá.

²⁸Ŋwɔn tsum wa a se zuʼnɨ a nyɔngɔŋ Mǒse, bɨ zhwítə́ ayi tɨ akômɨlɨŋnɨ mbáʼ be bətɛmə-ndzě bɨbá kə bɨtárə́ adiʼ a nkyɛgɨnɨ abyɛn azhi bɨ bemtɨ ngə́ a vwo ɨsáʼ ngə́ ka wɛrə a ndzɔŋə ayi a Nyɔngɔŋ Mǒse ghe.

²⁹Ɨnɨŋ ngɨ́ʼ ghɨ lánɨ́ tiʼ be lá ɨ nə́ a mbó ɨbɛn ba bɨ wagɨnɨnɨ a Mɔn Ŋwi, ba bɨ tsagɨnɨ alɛm akan a Ŋwi za a sugɨnɨ awa a mbó mɨbvu ɨma abɔʼnɨ ba bɨ ghamnɨ ɨnu tɨbɔŋ mbɨ́ʼ Azhwi za a ghánɨ́ abɔŋəntəm le?

³⁰Mbɨ́ʼ ngə́ bɨgɨnə zhi a zɨ wa a sóŋnɨ́ ngə́, “Ntfutɨ mbɔʼ ɨ tsi be a mbó me ghe, ma mɨ tfútə́.” Ŋwi a kwiʼ soŋ ngə́, “Maʼmbyí a ghɨ sáʼ ɨbɛn ɨbyi ɛ.”

³¹A nɨ anu á ŋwɔn a bɔgɨ be tɨ́sə́n a ngvo a mu mbó Ŋwi, zɨ wa a tsinɨ ntɨŋə.

³²Lá nɨ waʼtɨ adzaŋ za a tsínɨ́ nɨ bən a mbyi ɛ. A nye njwi mətsa, mbáʼ nɨ fómnɨ́ nɨŋ mɨntəm ɨmən a nye Nkən wu Shiʼnɨ lá, nɨ zé ngɨ́ʼ a mbó ɨnu tsə ghaʼnɨ, lá ngɨ́ʼ məzen ɨ sé awən gháʼə.

³³A bé nkfu tsɨ tse bɨ ghagɨ awən asaŋəsaŋ, nɨ zenɨ ngɨ́ʼ, nkfu tsɨ tse nɨ be ngaŋ aku ɨbɛn ba bɨ kɨ́nə́ nyuʼə awa a nye ndóm məwiŋ ə.

³⁴Mbɨ́ʼ ngə́ nɨ kə́ nkǒ a mɨlɨŋnɨ ngaŋ atsáŋ, nɨ chígɨ́ ntəm nɨ nɨdorɨ bɨ zenɨ ɨdzúm ɨtsən mbɨ́ʼ ngə́ nɨ zhí ngə́ nɨ tsí nɨ azúm za a tsánɨ́ a mətsiŋ ɨdzúm za a láʼ ghɔŋ nɨnkoŋ ə.

³⁵Ma lan, á nɨ keʼ nyɛʼtɨ nkotɨ mbáŋnɨ́ mbɨ́ʼ ngə́ ɨ yiŋə nɨ mɨkyaŋnɨ mə wi ə.

³⁶Nɨ tsi nɨ nchyɛ nɨ achigəntəm taŋ ɨ chi ghɨ anu za Ŋwi a lɔnə, ɨ tiʼ kwarɨ a za wɛrə a káʼnɨ́ awən ɨwu ə.

³⁷Adzaŋ za aŋwaʼnɨ a Ŋwi soŋnɨ ngə́, “Tsɛʼ a nye məkum a nkfu, zɨ wa a mɨ yen a ghɨ yen ɨ keʼ nkfu tsəŋə;

³⁸lá ɨbɛn ɨban ba ɨnu tsa chinɨnɨ bo ghɨ nɨ́ŋ mɨntəm ɨma ɨwu, ɨ tiʼ tsi atú ntən, lá be bə tsɛrə furɨ ndzum za a nye me, ntəm ɨghə mɨ bɨ́gɨ́ a nye bo ghe.”

³⁹Lá ka bɨgɨnə tsi awɨgɨnə abɔʼnɨ ɨbɛn ba bɨ furɨnɨ ndzum ɨtsa a nye wɛrə, ma lan, bɨ tiʼə nkə́ ntsə́nkə́ awa lá. Bɨgɨnə baŋnɨ ntsi be abɔʼnɨ ba bɨ tsinɨ nɨ abeməntəm ntiʼ ntsi nɨ ɨloŋ ə.