Read Ngemba Ɛbal 3 Bible Online

Ɛbal 3 - Ngemba bible

Ɛbal 3

¹Ma lan nə ɨbɔmbɨma ɨban a ndzum Kristo, bən ba Ŋwi a kɨnɨ nkɨ ntsɔʼ awən lá, á nɨ tɛgɨ ɨmɨgɨ ɨmən ɨ shiʼnɨ a Yeso məwiŋ ə. A nɨ zɨ wa Ŋwi a tságɨ́nɨ́ ngə́ á be ntumshe wu ngwi wu anu za bɨgɨnə nɨŋnɨ mɨntəm ɨmɨgɨnə ɨwu lá.

²Ŋwi a tsɔ́ʼ ayi ngɨ wɛrə a faʼnə a mbó zɨ nɨ táʼ ntəm, tso mbáʼ Mǒse a kɨ́nə́ faʼə a mbó ɨbɛn bɨ Ŋwi bɨtsum nɨ táʼ ntəm lá.

³Bɨ kɔ́ʼsə́ atɨ́ a ŋwɔn wa a vwunɨ ndá ntsa ndá za a vwunə. Ndəŋndəŋ Yeso a kuʼnɨ a nkɔ́ʼsə́ atɨ́ ntsa a Mǒse ghe.

⁴Ndá tsum a zágə́ nkórə́ ŋwɔn tse ghe — lá Ŋwi a kɨ mbe lá ŋwɔn wa a vwúnɨ́ azúm atsum ə.

⁵Mǒse a kə́ faʼə a mbó ɨbɛn bɨ Ŋwi bɨtsum nɨ táʼ ntəm tso ŋwɔn afaʼ ə. Wɛrə a ghám mbɨ́ʼ ɨnu tsa Ŋwi a ghɨnɨ sóŋ a nkfu ndzum ə.

⁶Lá Kristo a faʼə nɨ táʼ ntəm a mbó ɨbɛn bɨ Ŋwi bɨtsum tso mɔn mbáŋnɨ́ ə. Bɨgɨnə nɨ ɨbɛn bɨ Ŋwi mbáʼ be bɨgɨnə ngěn nɨ mbyi nɨ nkotɨ mbáŋnɨ́ abɔʼnɨ nchyɛ̌ tɨ nɨbɔgɨ a nye ntsiŋə nɨ ntəm tsum za bɨgɨnə tsinɨ nɨ zɛrə lá.

⁷Ma lan, Azhwi zə Fɛmnɨ a soŋ ngə́: “Sɨŋə, be nɨ zuʼ nji Ŋwi,

⁸á nɨ keʼ mɨntəm ɨmən fən, tso mbáʼ bɨta ɨbən bə kɔ́ʼɔ́nguʼ fə́nɨ́ mɨntəm ɨma a nkfu za bo tə́nɨ́ atú a mbó me, abɔʼnɨ nkfu njwəŋtə za a mu mɨkɨghonɨ lá.

⁹Ŋwi a soŋ ngə́: ɨwu, bo zhwə́ŋtɨ́ aghan nkɨ ndzɛ́n ɨnu tsɨ yerɨnɨ-yerɨnɨ tsa ma kɨ́nə́ ngɨə a nye bo atú ɨlom mɨghúm mi nɨkwa ghe.

¹⁰Ma lan, ntɔŋ ɨghə lwí a nye nɨwə nɨ ɨbɛn məba, ma tiʼ soŋ ngə́, ‹Bo tɨŋə atú nkə́ ntuŋə awa a ndzúʼnɨ́ ntɨgə ɨtsə.›

¹¹A mu alwɛntɔŋ məza, ma kán ngə́: ‹Bo láʼ keʼ kon a mu abɨŋ a ɨshe za ma tsinɨ ɨ ghɨ gha azhwitɨ ɨwu a mbó bo lá!›”

¹²Ɨbɔmbɨma ɨban, á nɨ lə̌ ɨtú ɨtsən mbɨ́ʼ táʼ ŋwɔn a tɨtərɨ bən a ghɨ ntsí nɨ abɨgəntəm, nkeʼ nɨŋ ntəm ɨyi a nye Ŋwi, ɨ ghɨ ayi á furɨ ndzum ɨzhi nga a mbó Ŋwi, zɨ wa a tsinɨ ntɨŋ ə.

¹³Lá, a ngɨə ngə́ á ɨbvu keʼ tamtɨ a táʼ ŋwɔn nɨ bən á ntiʼə ntɨŋə atú a mbó Ŋwi, nɨ tsi nɨ ngwɔŋtɨ ŋwɔn nɨ ŋwɔn njwi tsum ɨ kɔʼ kuʼ a nye nkfu za bɨgɨnə zuʼnɨ bɨ soŋ atú a nɨgham zen ngə́ “Sɨŋə” ghe.

¹⁴Bɨgɨnə mɨ be táʼ azúm bɨgɨnə bɨ Kristo mbáʼ be bɨgɨnə chwa ɨ shiʼnɨ ɨnɨŋ ntəm za bɨgɨnə tsínɨ́ nɨ zɛrə a mbiʼnə, ɨ kɔʼ kuʼ a ndwitə ghe.

¹⁵Nə nɨ anu za aŋwaʼnɨ a Ŋwi a soŋnɨ ngə́: “Sɨŋə, be nɨ zuʼ nji Ŋwi, á nɨ keʼ fɨŋ mɨntəm ɨmən, tso mbáʼ bɨta ɨbən bə kɔ́ʼɔ́nguʼ ghɨ́nɨ́ a nkfu za bo tónɨ́ awa a ndzɔŋ Ŋwi lá.”

¹⁶A bé bɨwa ba bɨ zúʼnɨ́ nji Ŋwi ntón awa a ndzɔŋ zɨ lá le? A sé bo bɨtsum ba Mǒse a tsɨ́ŋnɨ́nɨ́ awa ɨ fu nɨ bo Alaʼ Gyibto lá be le?

¹⁷Ŋwi a lwí ntɔŋ lá a nye bɨwa atú ɨlom mɨghúm mi nɨkwa le? A sé bé ɨbɛn ba bɨ ghɨ́nɨ́ mɨbvu, ngvokɨ nkfokɨ a mu mɨkɨghonɨ lá le?

¹⁸Ŋwi a kán lá mbɨ́ʼ a bɨwa ngə́ bɨ láʼ keʼ kón a mu abɨŋ a ɨshe za wɛrə a kyáŋtɨ́nɨ́ a mbó bo ɨ zhwitɨ ɨwu le? A sé bé bo ba bɨ tónɨ́ awa a ndzɔŋ zɨ lá le?

¹⁹Ma lan, bɨgɨnə zɛn ngə́ bo sé kón a mu abɨŋ a ɨshe za mbɨ́ʼ ngə́ bo sé mɨntəm ɨma a nye Ŋwi nɨŋə.