Read Ngemba Ɛbal 7 Bible Online

Ɛbal 7 - Ngemba bible

Ɛbal 7

¹Mɛkisɛdɛkɨ məwen a bé lá Ɨfɔ Salɛm, nkɨ mbe ntumshe wu Ŋwi Akɔ́ʼɔ́ntsɨrə ghe. A nkfu za Abraʼm a kɨ́nə́ nkwě a ntó ntso wa wɛrə a gháʼnɨ́ bɨfɔ ba lá, Mɛkisɛdɛkɨ a bóm ayi a ndómnji ɨ fɔgɨ ayi ɛ.

²Abraʼm a tíʼ ngyɛbtɨ ɨdzúm tsa wɛrə a kɨ́nə́ nkwě nɨ tsɛrə a ntso wa a nye ɨdiʼ tsi nɨghúm, nga a táʼ adiʼ a mbó Mɛkisɛdɛkɨ ə. Ntsambyi anu za ɨkum wen ngə́ Mɛkisɛdɛkɨ ɨ diʼnɨ a nɨ ngə́, “Ɨfɔ ɨnu tsɨ Chinɨnɨ ə.” Nkɨ ndzɔŋtɨ mbe ngə́ wɛrə a bé Ɨfɔ Salɛm, ɨkum ɨyi diʼ lá ngə́, “Ɨfɔ Mbɔnɨ ə.”

³Ka anu zə tse a tsi ayi adiʼ zə tsɛrə mbáʼ bɨ ŋwaʼnɨnɨ mbɨ́ʼ a ta bɨ Mɛkisɛdɛkɨ kə nɨmɨ ɨyi kə ta ɨyi wu bə kɔ́ʼɔ́nguʼ wu tsɛrə ghe; ka bɨ ŋwaʼnɨ ayi anu zə tsɛrə mbɨ́ʼ njwi za bɨ jwínɨ́ ayi kə njwi za wɛrə a kfónə́. Wɛrə a tsi lá tsɛʼ tso Mɔn Ŋwi ə; wɛrə a ghɔŋ a nye ntumshe nɨnkoŋ ə.

⁴Tiʼ lá ndzɛnə adzaŋ za wɛrə a bénɨ́ ŋwɔn wu ngwi ə. Abraʼm, ta ɨwɨgɨnə wu kɔ́ʼɔ́nguʼ wa bɨ zhinɨnɨ ayi tsɛʼ a nkan lá, a yɛ́btɨ́ ɨdzúm tsa wɛrə a kɨ́nə́ nkwě nɨ tsɛrə a ntso wa a nye ɨdiʼ tsi nɨghúm, nga a táʼ adiʼ wəmbo ə.

⁵Nyɔngɔŋ a diʼ ngə́ ɨbɛn bɨ ɨlə̌ ndá Levi, lá be ngə́, bɨntumshe tsi nɨ nkwarɨ táʼ adiʼ a mu ɨdiʼ tsi nɨghúm a nye ɨdzúm bə Izrai, mbe ɨbɛn ɨba, le buŋ bo kɨ mbe lá ɨbɛn bɨ ɨlə̌ ndá Abraʼm ə.

⁶Mɛkisɛdɛkɨ a sé ŋwɔn ɨlə̌ ndá Levi be, lá wɛrə a kwárɨ́ a táʼ adiʼ a tɨtərɨ ɨdzúm tsa Abraʼm a yɛ́btɨ́nɨ́ ɨdiʼ tsi nɨghúm lá, ntiʼ fɔgɨ ayi, zɨ wa Ŋwi a káʼnɨ́ ayi lá.

⁷Ka aməŋnɨ zə tse a tsi ayi ɨwu ə, ŋwɔn wa a fɔ́gɨ́nə́ a nɨ ŋwɔn wu ngwi ntsa a ŋwɔn wa bɨ fɔgɨnɨ ayi ɛ.

⁸A nye zə bɨntumshe, bo kwárə́ a táʼ adiʼ a tɨtərɨ ɨdzúm tsa bɨ yɛbtɨnɨ ɨdiʼ tsi nɨghúm, mbe ɨbɛn ba bɨ kfókɨ́nə́ ghe; lá a nye zə Mɛkisɛdɛkɨ, wɛrə a kwárɨ́ a táʼ adiʼ a tɨtərɨ ɨdzúm tsa bɨ yɛ́btɨ́nɨ́ ɨdiʼ tsi nɨghúm, mbe ŋwɔn wa a sé kfo, adzaŋ za aŋwaʼnɨ a Ŋwi a soŋnə.

⁹Ŋwɔn chi kwɛ soŋ ngə́ Levi zɨmboŋ (zɨ wa ɨbɛn bɨ ɨlə̌ ɨbyi kwárɨ́nə́ a táʼ adiʼ a tɨtərɨ ɨdzúm tsa bɨ yɛbtɨnɨ ɨdiʼ tsi nɨghúm lá) a kɨ́ ngá a táʼ adiʼ a tɨtərɨ ɨdzúm tsa bɨ yɛbtɨnɨ ɨdiʼ tsi nɨghúm ntsa a ndzum Abraʼm wa a ghánɨ́ a táʼ adiʼ a tɨtərɨ ɨdzúm tsa bɨ yɛ́btɨ́nɨ́ ɨdiʼ tsi nɨghúm lá.

¹⁰Bɨ bvúrɨ́ tɨ jwi a Levi, lá wɛrə a tsí, adzaŋ za bo kɨ́nə́ sóŋə́, a mu ɨnye ta ɨyi wu kɔ́ʼɔ́nguʼ Abraʼm a nkfu za Mɛkisɛdɛkɨ a bómnɨ́ ayi ɛ.

¹¹Ŋwi a ghá bɨnyɔngɔŋ ɨbyi a mbó bə Izrai a nkfu za ɨlə̌ ndá Levi bénɨ́ bɨntumshe ə. Ɨ bə ghɛn ɨwu, a bé bé ngə́ afaʼ bɨntumshe ba bɨ bénɨ́ ɨbɛn bɨ ɨlə̌ Levi a kɔ́ʼ ntɛm ngə́ tsáŋ muŋ bɨ sé tsi nɨ ɨ bə tsagɨ abə́ŋ a ntumshe zədaŋ za a bénɨ́ tso Mɛkisɛdɛkɨ, zɨ wa a sé be ŋwɔn ɨlə̌ ndá Alon ə.

¹²Mbɨ́ʼ ngə́ be bɨ kwarɨ ɨfaʼ bɨntumshe a mbó táʼ ngwəgɨ nga a mbó zɨ mɔʼɔ muŋ bɨ mɨ kɨ kwebtɨ a nyɔngɔŋ ə.

¹³Maʼmbyí ɨwɨgɨnə, zɨ wa bɨ ghamnɨ ɨnu tsen mbɨ́ʼ ayi lá, a bé ŋwɔn atsé zə wi zədaŋ ə. Ŋwɔn tse a mu atsé zə wi məzen a láʼnə nkeʼ faʼ tso ntumshe ə.

¹⁴Bɨgɨnə zhi ɨ shiʼnɨ ngə́ bɨ jwí a Maʼmbyí lá a mu atsé zə wi a Yudaʼ ə. Mǒse a láʼ nkeʼ ghumtɨ anu zə tse mbɨ́ʼ atsé zə wi məzen mbáʼ a kɨ́nə́ ngamə mbɨ́ʼ bɨntumshe ə.

¹⁵Anu məzen a lanɨ ntiʼ ndiʼ ɨ shiʼnɨ ɨ shiʼnɨ mbáʼ ntumshe wədaŋ a funə a ɨshe wa a benɨ tso Mɛkisɛdɛkɨ ə.

¹⁶Bɨ sé ghɨ ayi a nye ntumshe ndzɔ̌ŋ bɨnyɔngɔŋ ba ŋwɔn mɨsɔŋ a ntsu a lɛnə, bɨ ghɨ́ a wɛrə a nye ntumshe ntsa be a ndzum adaʼ a ntsi ntən zə tse za ka a ndwitə ayi ɛ.

¹⁷Mbɨ́ʼ ngə́ aŋwaʼnɨ a Ŋwi a soŋ ngə́, “O ghɨ be ntumshe nɨnkoŋ tso Mɛkisɛdɛkɨ ə.”

¹⁸A bagɨ tse, bɨ tiʼ ntintɨ ntɨgə zɨ ndvuŋ za ndɛn a ngɔbə mbɨ́ʼ ngə́ ɨ bɔrɨkɨ nkɨ ntiʼ azúm adaŋədaŋə ghe.

¹⁹(Nyɔngɔŋ Mǒse a kɨ chi keʼ ghɨ anu zə tsɛrə á kɔʼ ntɛm ngə́ tsáŋ ə); lá tɨtsɔŋnɨ, bɨ ghɨnə bɨgɨnə tsi nɨ ntsiŋə nɨ ntəm tsum za ɨ bɔŋtɨnɨ, za bɨgɨnə mɨ tsa ɨwu ɨ yen fatɨ a Ŋwi ə.

²⁰Ɨ bə kwiʼtɨ, akaʼ zə tən zə Ŋwi a tsi wəbɔʼ ə. Akaʼ zə tən məzen a sé ɨwu tsi a nkfu za bɨ ghɨ́nɨ́ a bə mɔʼɔ a nye bɨntumshe ə.

²¹Lá Yeso a bé ntumshe ntsa a ndzum akaʼ zə tən a nkfu za Ŋwi a sóŋnɨ́ wəmbo ngə́: “Maʼmbyí a ghɨnə akaʼ zə tɨŋə, a mɨ keʼ ntəm ɨyi kwebtɨ ə: ‹O ghɨ be ntumshe nɨnkoŋ ə.›”

²²Akaʼ zə tən məzen a tiʼ nkɨ ngɨ a Yeso a nye mɨntɨ mə bɛʼnɨ ngə́ akan za a ghɛnɨ nɨ mbyi a ghɨ tsí ɨwu ə.

²³Anu zə mɔʼɔ a nye akaʼ zə tən zen a bə nkwiʼ nkɨ ntsi ɨwu ə: bɨntumshe bə mɔʼɔ ba tsí ɨwu bə ghaʼnɨ lá mbɨ́ʼ ngə́ bo kə́ nkfókə́, bədaŋ lɔgɨnə adiʼ aza ghe.

²⁴Lá Yeso a tsi ntən nɨnkoŋ, ma lan, bɨ chi keʼ gha afaʼ azhi tso ntumshe a mbó ŋwɔn adaŋ ə.

²⁵Ma lan, wɛrə a tsi nɨ mɨtən a ndoŋ ɨbɛn ba bɨ yenə a mbó Ŋwi ntsa a ndzum zɨ, tɨtsɔŋnɨ abɔʼnɨ nkfu tsum, mbɨ́ʼ ngə́ a tsi ntən nɨnkoŋ lá a mbúʼtɨ́ mbó a mbó Ŋwi a nkfu bo ghe.

²⁶Yeso a tiʼ mbe ntumshe wu ngwi wa a ghánə́ atsum za bɨgɨnə lɔnə a mbó bɨgɨnə ghe. Wɛrə a fɛmə; nkeʼ nɨ ɨfənu tse tsi kə ɨbvu ə; bɨ tsɔʼ ayi ntɛgɨ a tsi atú zɨ nkeʼ a tɨtərɨ ngaŋ ngɨ mɨbvu tsi, bɨ chwem ayi atú abərɨ zə wi a fɔməbvurə ghe.

²⁷Ka wɛrə a be ayi tso bɨntumshe bə wi bə mɔʼɔ, ba bɨ tsinɨ nɨ ɨ fom gha mɨtsuʼnɨ mɨ atú njwi tsum taŋ ɨ sugɨ mɨbvu ɨma zaʼnɨ bɔŋ ɨ tiʼ sugɨ mə ɨbɛn ɨba ghe. Wɛrə a ghɨ́ a məzen táʼ nkfu nɨnkoŋ a nkfu za wɛrə a ghánɨ́ atuəmbəm azhi lá.

²⁸Tsɛʼ a nkənu, Nyɔngɔŋ Mǒse a tsɔʼə ɨbɛn tso bɨntumshe bə wi tɨgha bɨ kɔʼ ntɛm ngə́ tsáŋ ə. Lá akaʼ zə tən zə Ŋwi za a yénɨ́ a ndzum Nyɔngɔŋ, a tsɔʼ a Mɔn Mbáŋnɨ́, wa bɨ ghɨnə ayi a kɔʼ ntɛm ngə́ tsáŋ nɨnkoŋ ə.