Read Ngemba Ɛbal 8 Bible Online

Ɛbal 8 - Ngemba bible

Ɛbal 8

¹Tɨtsɔŋnɨ, nkɔʼ anu za bɨgɨ sóŋnə́ lá a nɨ ngə́: bɨgɨnə tsi nɨ ntumshe wu ngwi wen wa a shiʼtɨnɨ ntsi a bagɨ abó abərɨ a Ŋwi Akɔ́ʼɔ́ntsɨrə zə maʼə a fɔməbvurə ghe.

²Wɛrə a faʼə tso Ntumshe wu Ngwi a mu Adiʼ za a Fɛmnɨ ntsa Atsum, lá be ngə́, a mu ngótɨ́ ntaŋ wa a vwúnɨ́ Maʼmbyí nkeʼ be ŋwɔn mɨsɔŋ a ntsu be.

³Bɨ tsɔʼə a Ntumshe wu Ngwi tsum lá ngə́ á ngǎ akáŋ a Ŋwi abɔʼnɨ mɨtsuʼnɨ mɨ atú ma a nɨ mɨnyam a mbó Ŋwi; ma lan, Ntumshe wu Ngwi ɨwɨgɨnə mɨ kɨ zagɨ tsi nɨ azúm zə ghanə.

⁴A be be ngə́ wɛrə a tsi lá atuəshe muŋ ka wɛrə a kwaŋ mbe ayi ntumshe tsɛʼ benɨ, mbɨ́ʼ ngə́ bɨntumshe tsi ɨwu ba bɨ ghánɨ́ ɨdzúm tsə ghanɨ ndzɔŋə a Nyɔngɔŋ bə Yuda ghe.

⁵Afaʼ za bo faʼnə, a lanɨ mbe lá afi a za a tsinɨ a fɔməbvurə ghe. A be ndəŋndəŋ a mbó Mǒse ghe. A nkfu za wɛrə a tsínɨ́ nɨ ngvwu ntaŋ wa lá, Ŋwi a tɨ́gɨ́tɨ́ ayi adzaŋ za wɛrə a tsínɨ́ nɨ ngvwu wɛrə ɨ soŋ ngə́, “Zɛn ngə́ o ghɨ ɨnu ɨtsum tsɛʼ adzaŋ za ma fɨ́ʼtɨ́nɨ́ a mbó gho atú mbám za lá.”

⁶Lá tɨtsɔŋnɨ, bɨ ghanə a mbó Yeso afaʼ a ntumshe za a tsinɨ nɨ ɨlɨŋ ntsa afaʼ a bɨntumshe zə lvuŋ za, tsɛʼ tso mbáʼ akan za wɛrə a kyáŋtɨ́nɨ́ a tɨtərɨ Ŋwi abɔʼnɨ ɨbɛn ɨbyi a bɔŋnɨ ngɛntɨ nɨ mbyi, mbɨ́ʼ ngə́ a tɛm atú akaʼ zə ɨdzúm tsa tsɨ bɔŋnɨ ngɛn nɨ mbyi lá.

⁷Mbɨ́ʼ ngə́ akan zə mbyi za a bá bé tú nɨ akɔkɨ anu tsi muŋ bɨ sé a zə ndzum kyaŋtə.

⁸Lá Ŋwi a gha ɨfərɨ ɨbɛn ɨbyi a mu nɨgham nen na wɛrə a soŋnɨ ngə́: “Maʼmbyi a soŋ ngə́ njwi ɨ yiŋə za ma mɨ nɨŋ akan zə fi bɨgɨ bɨ ɨbɛn bɨ Izrai abɔʼnɨ bə Yudaʼ ə.

⁹A mɨ keʼ be tso akan za ma nɨ́ŋnɨ́ bɨgɨ bɨta ɨba bə kɔ́ʼɔ́nguʼ a njwi za ma tsɨ́ŋnɨ́nɨ́ awa ɨ fu nɨ bo Alaʼ Gyibto lá. Mbɨ́ʼ ngə́ bo sé ghɔŋ a mu akan məza nɨ táʼ ntəm, ma sá zuʼ nɨzɛʼ ɨna ghe.

¹⁰Akan za ma mɨ ghɨ bɨgɨ bɨ ɨbɛn bɨ Izrai a nye njwi tsa tsɨ mɨ zɔŋ a zɛnə: ma mɨ ghɨ á bo ngwíʼtɨ́ bɨnyɔngɔŋ ɨban nkfu tsum, ɨ kɨ ghɨ á bo lɛn a bɛrə a mu mɨntəm ɨma ghe. Ma mɨ be Ŋwi ɨwa, á bo tiʼ nkɨ mbe ɨbɛn ɨbə.

¹¹Ŋwɔn nɨ bo wu tse a mɨ keʼ tsi nɨ ndiʼ wu mɔʼɔ kə ɨ soŋ a mbó wu mɔʼɔ ngə́, ‹Zhi a Maʼmbyi ɛ.› Mbɨ́ʼ ngə́ bo bɨtsum tsi nɨ ɨ ghɨ zhi aghan, ɨ lɔgɨnɨ a nye wu mbɔrɨ ɨ ghɛn kuʼ a nye tankaŋ ə.

¹²Mbɨ́ʼ ngə́ ma ghɨ kǒnə a mɨlɨŋnɨ a nye ɨfənu ɨtsa, ɨ lɨgɨnɨ mɨbvu ɨma ghe.”

¹³Be a be ngə́ Ŋwi a kə́ ngamə mbɨ́ʼ akan zə fi, lá be ngə́ zə mbyi a sé nɨ ɨlɨŋ bə nchyɛ. Məzen za a se nɨ ɨlɨŋ bə ntsi lá, a lvuŋnə ntiʼə ntsíŋə́ ngə́ á byékə́.