Read Ngemba Jemsɨ 1 Bible Online

Jemsɨ 1 - Ngemba bible

Jemsɨ 1

¹Aŋwaʼnɨ zen a lo a mbó me Jemsɨ wa ma benɨ ngaŋ afaʼ Ŋwi bo zɨ Maʼmbyí Yeso Kristo ghe: Ma tsagə atɔ́ŋtɨ a mbó ɨbɛn bɨ Ŋwi bɨtsum ba bɨ dzagɨnɨnɨ a mu mbyi tsum ə.

²Ɨbɔmbɨma ɨban, á nɨ lɔgɨ ɨtumbəm ɨtsən a nye ngaŋ abɔŋətú mbáʼ be akwaʼnɨ abə́ŋ abə́ŋ a bom awɨŋ ə,

³mbɨ́ʼ ngə́ nɨ zhi ngə́ be abeməntəm azən a tsa a mu ɨbə́ŋ njwəŋtə ɨtsum, nɨ mɨ chi tiʼ tsi nɨ achigəntəm ə.

⁴A nɨ zɛn ngə́ achigəntəm a ghěn tsɛʼ nɨ mbyi, nkeʼ nkyɛ́ntə́, ɨ ghɛn fu a ndwitə, taŋ á nɨ kɔʼ ntɛm ngə́ tsáŋ nkɨ ndon, nkeʼ a zə tsɛrə a mbóŋə́ ghe.

⁵Lá be ŋwɔn nɨ bən wu tse a boŋ a zóŋ, á wɛrə a tsaʼtɨ a Ŋwi, zɨ wa a mɨ gha a wɛrə wəmbo; mbɨ́ʼ ngə́ Ŋwi a ghǎ a mbó ŋwɔn tsum tə́ ndéntə́, nkə́ ngǎ a nye ndóm wa ɨ diʼnə ngə́ wɛrə a kɔŋ awɨgɨnə nkə́ ndə̌tú nɨ bɨgɨnə ghe.

⁶Lá be o tɨ tsaʼtɨ a Ŋwi, o zagɨ nɨŋ ntəm ɨgho ɨwu nkoʼ kɨ məŋnɨ tsɛʼ mɨnyiə ghe. Zɨ wa a mə́ŋnɨ́nə́ a tsi lá tsɛʼ tso nkyiɛ yiŋənɛmə a mu sagɨrə wu ngwi wa kɨfɛrɨ a tɔʼnə maʼə nɨ bagɨ nɨ bagɨ ə.

⁷Ɨbɛn tso məba, ba bɨ mə́ŋnɨ́nə́ tsɛʼ nkfu tsum, ba ka bo ndáʼə ntsɔ́ʼə awa a mu mɨntəm ɨma anu za bo lɔnɨ ngɨə, bo mɨ zagɨ ɨ keʼ ngwíʼtə́ ngə́ bo mɨ kwarɨ azúm zə tsɛrə a mbó Maʼmbyí ɛ.

⁹Ɨbɛn ba bɨ zɔŋnə a Kristo ba bədaŋ zɛ́nə́ awa tso ɨbɛn ba bɨ se azúm zə tsɛrə be, mɨ zagɨ tsi nɨ kɨtɛrɨ a nkfu za Ŋwi a kɔʼsɨnɨ awa atɨ́ ə.

¹⁰Ɨbɛn ba bɨ zɔŋnə a Kristo ba bədaŋ zɛ́nə́ awa tso ɨbɛn bə dɨtɨnɨ mɨ kɨ zagɨ tsi nɨ kɨtɛrɨ a nkfu za Ŋwi a shiʼsɨnɨ awa a tɨshe ə. Mbɨ́ʼ ngə́ ɨbɛn bə dɨtɨnɨ məbiŋ ghɨ byékɨ́ tso baŋbaŋ atú atɨ a mu mɨbaʼ ə.

¹¹A nkfu za nɨnyom a saʼnɨ nɨ ndomə ɨzhi za ɨ kɨ́nə́ tso ɨmugɨ, a mɨ tɔn ngyɛn; á baŋbaŋ ɨyi a tsɔʼnɨ ngvo a tɨshe, ɨ tsənkɨ nɨbɔŋ ɨni ɛ. Ndəŋndəŋ, bɨ ghɨ tsənkɨ ngaŋ afuʼ zə wi mbáʼ bo númnə́ ngɨ̌ mɨnu ɨma ma bo ghɨnə nɨ njwi nɨ njwi lá.

¹²Nɨdorɨ tsi a mbó ba bɨ chigɨnɨ ntəm a nkfu za bɨ zhwəŋtɨnɨ awa, mbɨ́ʼ ngə́ be bo tsa abə́ŋ a njwəŋtə məza muŋ bo mɨ kwarɨ mɨkyaŋnɨ ma mɨ lá ntsi mbyi za Ŋwi a kaʼnɨ a mbó ba bɨ kɔŋnɨ ayi ɛ.

¹³Be bɨ kwaʼnɨ ɨbɛn nɨ ɨbə́ŋ ɨkwaʼnɨ mətsa, á bo keʼ zagɨ soŋ ngə́, “Akwaʼnɨ zen a lo a mbó Ŋwi ə.” Mbɨ́ʼ ngə́ ɨnu tsɨ tɔmnɨnɨ chi keʼ a Ŋwi kwaʼnɨ, wɛrə zɨmboŋ a keʼ nkə́ nkwáʼnə́ a ŋwɔn tsɛrə ghe.

¹⁴Lá bɨ kwaʼnɨ ɨbɛn lá a nkfu za ɨnu tsɨ tɔmnɨnɨ tsa bo lɔnə sɨtɨnɨ awa nkɨ mbentɨ awa nkoə.

¹⁵Ɨnu tsɨ tɔmnɨnɨ ɨtsa mətsiŋ tɛ́mə́ nɨ mɔn njwǐ ɨbvu ə; ɨbvu ghɨ́ nkwí ntiʼ ndəmə, ɨ jwi nɨvwo ə.

¹⁶O ɨbɔmbɨma ɨban, á ŋwɔn tse a keʼ awən tamtə!

¹⁷Azúm zə ghanɨ atsum za a bɔŋnɨ abɔʼnɨ azúm atsum za a kɔʼnɨ ntɛm ngə́ tsáŋ a lǒ lá a fɔməbvurə; a lǒ lá a mbó Tarɨ, zɨ wa a káʼnɨ́ mɨnkaʼ ma mɨ tsinɨ a fɔməbvurə lá. Ka wɛrə a ndaʼə nkwébtə́ ayi ɛ, lá mɨnkaʼ ma mɨ baŋnə lá yiŋənə nɨ kwebtɨ ə.

¹⁸A ntsǎ a ndzum adzaŋ za wɛrə a kɨ́nə́ ndǒ, wɛrə a káʼ awɨgɨnə ntsa a ndzum nɨgham nɨ nkənu, taŋ á bɨgɨnə be ntsambyi nɨfuʼ na bɨ ghanɨ a mbó wɛrə tso akáŋ a Ŋwi ə.

¹⁹O ɨbɔmbɨma ɨban, á nɨ waʼtɨ aziŋ ə! A ŋwɔn tsum ɨ mɔ́ʼɔ́ mɔ́ʼɔ́ a shwaŋ ɨtoŋnɨ ɨchi a ndzúʼ atsum, nkeʼ ngyáŋnə́ ngamə, nkeʼ nkə́ ngyáŋnə́ ndwi ntɔŋ ə.

²⁰Ka alwɛntɔ́ŋ a ŋwɔn mɨsɔŋ a ntsu a nyɛ́ʼtə́ ayi á ŋwɔn a ngɨə anu za Ŋwi a lɔnə ghe.

²¹Ma lan, á nɨ nyɛʼ ɨbə́ŋ ɨtɨshwe mbɔm ɨtsum abɔʼnɨ ngɨnɨ mɨnu mɨ abɨgəntəm mɨtsum ə. A nɨ ndzúʼnə́ a Ŋwi nɨ ɨ shiʼtə nɨ ɨnye a ɨshe nkɨ mbem nɨgham nɨ Ŋwi na wɛrə a binɨ a mu mɨntəm ɨmən, nɛrə na nɨ chinɨ loŋ awən lá.

²²A nɨ keʼ ntámtɨ́ ɨtumbəm ɨtsən tsɛʼ a njwíʼtɨ́ nɨgham nɨ Ŋwi ə; á nɨ nkə́ ngɨə anu za nɨ sóŋnə́ ghe.

²³Ŋwɔn tsum wa a zhwíʼtɨ́nə́ nɨgham nɨ Ŋwi lá nkeʼ a nɛrə a ngɨə, a be lá tso ŋwɔn wa a lenɨ atuəmbəm azhi a mu malum, ndzɛn ɨwu adzaŋ za zɨə benə.

²⁴A liŋə atuəmbəm azhi ɨ shiʼnɨ, ndzɔŋtɨ ndo ayi, mbyi nkɨ ndɨgɨnɨ adzaŋ za zɨə benə.

²⁵Lá ɨbɛn ba bɨ yɛʼnɨ ɨ shiʼnɨ a nyɔngɔŋ wa a kɔʼnɨ ntɛm ngə́ tsáŋ lá, wa a kyɛtɨnɨ mɨnkɨ mɨ abuʼ a nye ɨbɛn, nkɨ nchigɨ ntəm nɨ wɛrə, nkeʼ tsɛʼ zhwiʼtɨnɨ a njwíʼtə́ ɨ tiʼ kɨ lɨgɨnɨ, lá ngɨə anu za a sóŋnə́ — Ŋwi a mɨ fɔgɨ awa a nye za bo ghɨnə ghe.

²⁶Ŋwɔn nɨ bən wu tse a wiʼtɨ ngə́ zɨə zhi a Ŋwi le? Be nɨ tú chwatɨnɨ ɨlɛm ɨtsən muŋ ndóm wa nɨ zhinɨ a Ŋwi ɨwən a nɨ anu adaŋədaŋə, nɨ kə ntámtɨ́ ɨtumbəm ɨtsɨŋ ə.

²⁷Za Ŋwingɔŋ Tarɨ a lɔgɨnɨ ngə́ a nɨ ndóm wa o zhinɨ a Ŋwi wa ɨ fɛmnɨ nkɨ mbe ngótɨ́ wɛrə, a nɨ zɛnə: a ndə̌tú a nye bɨtyi abɔʼnɨ bɨkfugɨ bɨ bəngye a mu ngɨ́ʼ ɨza, ɨ kɨ baʼtɨ atuəmbəm azo ngə́ á atuəshe a keʼ agho shwiʼə.