Read Ngemba Jemsɨ 2 Bible Online

Jemsɨ 2 - Ngemba bible

Jemsɨ 2

¹Ɨbɔmbɨma ɨban, tso ɨbɛn ba bɨ nɨŋnɨ mɨntəm ɨma a nye Maʼmbyí Yeso Kristo ɨwɨgɨnə, Maʼmbyí wu nɨfáŋ, nɨ mɨ zagɨ ɨ keʼ ngɨ̌ ɨnu a nye ɨbɛn atú atú ndzɔ̌ŋ adzaŋ za nkyerɨ za ɨ benə.

²A bɨgɨnə lɔgɨ ngə́ ŋwɔn nkáb wa a wəgɨnɨ a karɨ wa bɨ nyɛtɨnɨ nɨ ŋwaʼŋwaʼ abɔʼnɨ ɨtsɛʼ tsə shiʼnɨ a yen nkon a mu ngǒtə ɨzən, ŋwɔn afúm wa a wəgɨnɨ ɨtsɛʼ tsɨ sarɨkɨnɨ a kɨ ndzɔŋ ngyen nkon ɨwu ə.

³Be nɨ diʼ mbɔm zɨ shiʼnɨ za ɨ ghɛnɨ nɨ mbyi a mbó ŋwɔn wa a wəgɨnɨ ɨtsɛʼ tsɨ shiʼnɨ tsa, ɨ soŋ wəmbo ngə́, “Shiʼtɨ ntsi atú alaŋ zə shiʼnɨ zen za a bɔŋnɨ ntsa ɨtsum lá, ɨghə,” lá ɨ soŋ a mbó ŋwɔn afúm wa ngə́, “Tɛm adiʼ wa, kə ngə́ shiʼtɨ ntsi a tɨshe a ɨshi mɨku me,”

⁴ma lan, nɨ vwo anu ngə́ nkyerɨ ɨ tsi a tɨtərɨ bən, nɨ kə́ sáʼə ɨbɛn ndzɔ́ŋə́ be ɨkwaʼtɨ tsə tɔmnɨnɨ ɨtsɨŋ ə.

⁵O ɨbɔmbɨma ɨban, zuʼnə! Ŋwi a tsɔ́ʼ ngaŋ afúm tsɨ atuəshe zen ngə́ á bo be ngaŋ afuʼ zə wi a mu abeməntəm aza, ɨ kɨ tsi nɨ nɨfɔ na wɛrə a káʼnɨ́ a mbó ɨbɛn ba bɨ kɔŋnɨ ayi ɛ.

⁶Lá nɨ wágɨ́nɨ́ ɨfúm ə! A lá bɨwa ba bɨ zhíʼnə́ awən a tɨshe nkə́ ntɔ́ŋtə́ abyɛn a nye bən le? A se ngaŋ afuʼ zə wi be le?

⁷A nɨ bo ba bɨ sóŋnɨ́ ɨnu tsɨ tɔmnɨnɨ mbɨ́ʼ ɨkum wu shiʼnɨ wa bɨ ghanə a mbó bən lá.

⁸Be nɨ ndzúʼnə́ a nyɔngɔŋ Nɨfɔ na muŋ nɨ ghɨə lá anu zə shiʼnɨ tso mbáʼ a tsinɨ a mu aŋwaʼnɨ nɨ Ŋwi ngə́, “Kɔŋ a ŋwɔn nɨbarə ɨgho tso atuəmbəm azo” lá.

⁹Lá be nɨ ngɨ̌ ɨnu a nye ɨbɛn ndzɔ̌ŋ nkyerɨ ɨza muŋ nɨ vwo ɨsáʼ ngə́ nɨ ghɨ ɨbvu, nyɔngɔŋ a kɨ soŋ ngə́ nɨ vwo ɨsáʼ tso ngaŋ fasɨ nyɔngɔŋ ə.

¹⁰Ŋwɔn tsum wa a fasɨnɨ a táʼ ntɨgə, a vwo ɨsáʼ tso ŋwɔn wa a fasɨnɨ a tsɛrə ɨtsum ə.

¹¹Mbɨ́ʼ ngə́ ndəŋndəŋ ŋwɔn wa a sóŋnɨ́ ngə́, “Koʼ chwurə,” a kɨ́ sóŋ ngə́, “Koʼ a ŋwɔn zhwitə.” Be a kwɛ mbe be ngə́ o so chwurɨ, o nɨ ŋwɔn wa a fasɨnɨ a nyɔngɔŋ mbáʼ be o zhwitɨ a ŋwɔn ə.

¹²A nɨ ngámə́ nkə́ ngɨ̌ mɨnu tso ɨbɛn ba bɨ ghɨ sáʼ awa nɨ nyɔngɔŋ wa a kyɛtɨnɨ mɨnkɨ mɨ abuʼ a nye bɨgɨnə ghe.

¹³Mbɨ́ʼ ngə́ a nkfu za Ŋwi a sáʼnə́, wɛrə a ghɨ keʼ ko a mɨlɨŋnɨ ŋwɔn wa a sé ko a mɨlɨŋnɨ; lá tsɛʼ nɨsáʼ nɨ Ŋwi tsi nɨ akômɨlɨŋnɨ ə.

¹⁴Ɨbɔmbɨma ɨban, ɨbɔŋ tse tsi ɨwu a mbó ɨbɛn a sóŋə́ ngə́ bo tsi nɨ abeməntəm mbáʼ be ɨfaʼ ɨwa chi keʼ diʼ a zɛrə le? Be abeməntəm məza a loŋ awa le?

¹⁵A bɨgɨnə lɔgɨ ngə́ mɨma wu tse a tsi ɨwu wa a se nɨ ɨtsɛʼ tsə wəgɨnɨ tsi, nkeʼ nɨ azúm zə dzɨnɨ atú njwi kɨ nchyɛ.

¹⁶Ɨbɔŋ tse tsi ɨwu a sóŋə́ a mbó wɛrə ngə́, “A Ŋwi a fɔgɨ agho ə! A ɨnye ɨzo lom, o kɨ ndzɨ ɨ shiʼnɨ ə!” — mbáʼ be o tú gha ɨdzúm tsen tsa ntsi mbyi lɔnə lá a mbó zɨ lá le?

¹⁷Nə nɨ adzaŋ za abeməntəm a benə: be a tsi zɛrə zɛrə, nkeʼ ɨfaʼ kwiʼtɨ muŋ a kfoə.

¹⁸Lá ŋwɔn tse a mɨ soŋ ngə́, “Táʼ ŋwɔn a tsi nɨ abeməntəm, wu mɔʼɔ a tsi nɨ ɨfaʼ ə.” Achwɨgə azan a nɨ ngə́, “Diʼ a mbó me adzaŋ za ŋwɔn tse a chinɨ tsi nɨ abeməntəm tɨ ɨfaʼ ə. Ma mɨ diʼ abeməntəm azan a mbó gho ɨ tsa a ndzum ɨfaʼ ɨtsə.”

¹⁹O nɨŋ ntəm ɨgho ɨwu ngə́ a tsi tsɛʼ táʼ Ŋwi le? A bɔŋ ə. Tsɛʼ bɨdzɨŋ kɨ nɨŋ mɨntəm ɨwu — nkə́ mbɨ́ŋnə́ nɨ nɨbɔgɨ ə.

²⁰Adzɨŋtɨ! O lǒ ngə́ á bɨ diʼ a mbó gho ngə́ abeməntəm tɨ ɨfaʼ nɨ ɨnu adaŋədaŋə le?

²¹Bɨ tsá lá ɨ nə́ ngɨ ta ɨwɨgɨnə wu kɔ́ʼɔ́nguʼ Abraʼm a chinɨ a ɨshi ɨmɨgɨ Ŋwi le? Bɨ tsá lá a ndzum ɨfaʼ ɨchi mbáʼ wɛrə a ghánɨ́ a mɔn ɨyi Isak atú a mɨkuʼ ə.

²²O so ndzě le? Abeməntəm azhi abɔʼnɨ ɨfaʼ ɨchi fáʼ a mbúm; bɨ ghɨ́ abeməntəm azhi a kɔʼ ntɛm ngə́ tsáŋ ntsa lá a ndzum ɨfaʼ ɨchi ɛ.

²³A tíʼ nkɔ́ʼ mbomnkɨ bo aŋwaʼnɨ a Ŋwi mbáʼ a sóŋnɨ́ ngə́, “Abraʼm a nɨ́ŋ ntəm ɨyi a nye Ŋwi, mbɨ́ʼ abeməntəm azhi Ŋwi a bém ngə́ wɛrə a chínə́.” Ma lan, bɨ tíʼə ntɔŋə Abraʼm ngə́ ɨson Ŋwi ə.

²⁴O tiʼ lá ndzɛn ngə́ ŋwɔn a chínə́ a ɨshi ɨmɨgɨ Ŋwi ntsǎ lá a ndzum ɨfaʼ, nkeʼ be a ndzum abeməntəm zɛrə zɛrə be.

²⁵A bé ndəŋndəŋ anu a mbó akwarə za bɨ kɨ́nə́ ntɔ́ŋə́ ngə́ Raʼbɨ lá. Bɨ ghɨ́ wɛrə a chinɨ a ɨshi ɨmɨgɨ Ŋwi ntsa a ndzum ɨfaʼ ɨchi, adzaŋ za wɛrə a kwárɨ́nɨ́ bɨchwerɨ bɨ bə Izrai ba nkwatɨ awa bo kɨə ntsa nɨ ndómnji wədaŋ lá.

²⁶Ma lan, adzaŋ za mbəmnye tɨ azhwi ɨ kfonɨ lá, ndəŋndəŋ abeməntəm tɨ ɨfaʼ kɨ nkfoə.