Read Ngemba 1 Bita 2 Bible Online

1 Bita 2 - Ngemba bible

1 Bita 2

¹Ma lan, á nɨ kyɛntɨ ɨnu tsɨ tɔmnɨnɨ ɨtsum; nkeʼ mbɨŋə nchwě ɨnu kə mbɨŋə ngɨ̌ ɨtsi kə nkwiʼə nchyɛ̌ nɨ aghɨʼnɨ kə ngǎm mɨgham mɨ ntsənkɨ ɨkum ŋwɔn wu shiʼnɨ ə.

²A nɨ be tso ɨbɔ bə bɔrɨ, ndzǎŋ nji nɨbə́n nɨ azhwi na nɨ lánɨ́ nkfu tsum, taŋ a ntsǎ a ndzum adzaŋ za nɨ nyɔ́ŋnə́ a nɛrə nɨ mɨ kwi á bɨ loŋ awɨŋ ə.

³Tso mbáʼ aŋwaʼnɨ a Ŋwi a soŋnɨ ngə́, “Nɨ tsɔʼnə aku nji a mbó ɨtumbəm ɨtsən, tɨtsɔŋnɨ nɨ zhi ngə́ Maʼmbyí a ghɨ̌ ɨnu tsɨ shiʼnɨ ə.”

⁴A nɨ yen a mbó Maʼmbyí, zɨ wa nɨ ngɔʼ za ɨ ghánɨ́ ntsi ntən za ɨbɛn nyɛʼnɨ ngə́ ɨ nɨ azúm adaŋədaŋə, lá Ŋwi a tsɔʼ a zɛrə tso azúm za a tsinɨ nɨ ɨlɨŋ ə.

⁵Yenə tso ngɔʼ tsa tsɨ ghánɨ́ ntsi ntən, ɨ nyɛʼtɨ ɨtumbəm ɨtsən á bɨ lɔgɨ a tsɛrə ngvwu nɨshwim nɨ azhwi na ɨwu, mbe adiʼ za nɨ mɨ faʼnə ɨwu tso bɨntumshe bə fɛmnɨ a ngá mɨtsuʼnɨ mɨ atú mɨ azhwi ma bɨ bemnɨ a mbó Ŋwi ntsa a ndzum Yeso Kristo ghe.

⁶Mbɨ́ʼ ngə́ aŋwaʼnɨ a Ŋwi a soŋ ngə́: “Ma zárɨ́ ngɔʼ za ɨ tsinɨ nɨ ɨlɨŋ, za ma tɛgɨnɨ tso ngɔʼ nɨbú nɨ ndá Zayɔn; ŋwɔn tsum wa a nɨŋnɨ ntəm ɨyi wə ɨnye, bɨ mɨ keʼ adɨrətú wə ɨnye nɨŋə.”

⁷Ɨlɨŋ ngɔʼ məziŋ ghaʼ be tɨ́sə́n a mbó bən ba nɨ nɨŋnɨ mɨntəm ɨmən a nye Kristo; lá a mbó ba bɨ se nɨŋ mɨntəm ɨma a nye Kristo, ɨ be lá tso: “Ngɔʼ za ngaŋ ngvwu ndá nyɛ́ʼnɨ́ ngə́ ɨ nɨ azúm adaŋədaŋə, ɨ tíʼ mbəŋ mbe ngɔʼ nɨbú nɨ ndá ə.”

⁸Adiʼ zə mɔʼɔ a mu aŋwaʼnɨ a Ŋwi a kɨ soŋ ngə́: “Nə nɨ ngɔʼ za ɨ mɨ ghɨ á ɨbɛn kɔmnkɨ ngvo a tɨshe, aláŋsə́ ngɔʼ za a mɨ ghɨ á bo vwo a tɨshe ə.” Bo kɔ́mnkɨ́ ngvo a tɨshe lá mbɨ́ʼ ngə́ bo sé nɨŋ mɨntəm ɨma a nye nɨgham na; a bé anu za Ŋwi a kɨ́nə́ ndǒ ngə́ á fu a nye bo ghe.

⁹Lá nɨ nɨ ngwəgɨ ŋwɔn mɨsɔŋ za bɨ tsɔ́ʼnɨ́, bɨntumshe bə ɨfɔ, alaʼ zə fɛmnɨ, ɨbɛn bɨ Ŋwi ba bɨ tsɔʼnɨ a nchwítɨ́ nkən mbɨ́ʼ ngɨnɨ mɨnu mə shiʼnɨ be tɨ́sə́n mə Ŋwi, zɨ wa a lɔ́gɨ́nɨ́ awən a mu ndzumnɨ ɨ fu ngyen nɨ bən a mu nkaʼ ɨyi wa ɨ nɨ wu shiʼnɨ be tɨ́sə́n lá.

¹⁰A bé a nkfu tse lá nɨ keʼ ɨbɛn bɨ Ŋwi be, lá tɨtsɔŋnɨ nɨ nɨ ɨbɛn ɨbyi ɛ; a bé a nkfu tse lá nɨ keʼ a mɨlɨŋnɨ Ŋwi zhyɛ, lá tɨtsɔŋnɨ nɨ kwarɨnə a mɨlɨŋnɨ ɨyi ɛ.

¹¹Bɨson ɨban, ma bǔʼ mbó a mbó bən tso ɨbɛn ba bo nɨ bɨngyen-yenɨ bɨ atuəshe abɔʼnɨ ɨbɛn ba bɨ tumnɨ nɨ fɨnyaʼ ntsagɨ atuəshe ə! A nɨ tsɔʼ mɨntəm ɨmən a nye ɨnu tsa mbəmnye lɔnə, ɨnu tsa tsɨ tónɨ́ ntso bo bɨ gharɨ ɨwən nkfu tsum lá.

¹²Mbɔm ɨzən a tɨtərɨ ba a se bə Yuda be tsi nɨ mbɔŋə be tɨ́sə́n a nye ndóm wa a nkfu za bɨ kaŋnɨ awən ngə́ nɨ nɨ ngaŋ ngɨ ɨnu tsɨ tɔmnɨnɨ, bɨ mɨ ze ngɨnɨ mɨnu ɨmən mə shiʼnɨ, ma lan, ɨ bontɨ a Ŋwi a Njwi wa wɛrə a lo bə yen lá.

¹³Mbɨ́ʼ atú a Maʼmbyí, á nɨ ndzúʼnɨ́ bɨsáʼ bɨ atuəshe bɨtsum: kə a be be Kaisa, zɨ wa ɨmyi mɨtən tsinɨ atú atəntsánɨ́,

¹⁴kə mbe be bɨgobɨna, bo ba Kaisa a tsɔʼnɨ a nɨ́ŋ ngɨ́ʼ a nye ngaŋ ngɨ ɨnu tsɨ tɔmnɨnɨ, ɨ kɨ bontɨ a ba bɨ ghɨnɨ ɨnu tsɨ kuʼnɨnɨ lá.

¹⁵Ŋwi a lǒ ngə́ á nɨ chwubtɨ mɨntsu mɨ ɨdzɨŋtɨ ɨbɛn ba bɨ ghamnɨ ɨnu tsa bo se zhi, a ntsǎ a ndzum ɨnu tsɨ shiʼnɨ tsa nɨ ghɨnə ghe.

¹⁶A nɨ nchyɛ̌ tso ɨbɛn nɨ atú azɨŋ ə; lá á nɨ keʼ tsa a ndzum nchyɛ nɨ atú azən məzen ngɨ anu zə tɔmnɨnɨ zə tse; á nɨ nchyɛ̌ be tso ngaŋ afaʼ Ŋwi ə.

¹⁷A nɨ nkɔ́ʼsə́ a ŋwɔn tsum atɨ́, nkɔŋ a ŋwɔn tsum wa bɨŋ bo nɨŋnɨ mɨntəm ɨmɨŋ bo a nye Kristo, mbɔ́gɨ́tə́ a Ŋwi, nkə́ ndǐʼ mbɔm zɨ shiʼnɨ a mbó Kaisa ghe.

¹⁸Bɨŋ ngaŋ afaʼ tsi nɨ ɨ zagɨ zúʼnɨ́nɨ́ bɨta bɨ afaʼ ɨbən, ɨ kə́ diʼnɨ mbɔm zɨ shiʼnɨ a mbó bo a nye mɨndóm mɨtsum, nkeʼ be tsɛʼ a mbó ba bɨ tsinɨ nɨ ntəm ngɨ ɨbɔŋ nkɨ mbɔnɨ, lá nkɨ mbe a mbó ba bɨ shə́gɨ́nə́ a nye bɨŋ ə.

¹⁹Ŋwi a mɨ fɔgɨ awən mbɨ́ʼ a məzen, mbáʼ be nɨ ndzě ngɨ́ʼ za nɨ se tsi nɨ ndze, mbɨ́ʼ ngə́ nɨ zhi anu za wɛrə a lɔnə ghe.

²⁰Nɨ sə́ŋə́ ake, mbáʼ be bɨ ləŋ awən nɨ ngwan mbɨ́ʼ anu za a kuʼnɨnɨ ngə́ á bɨ ləŋ awən, nɨ kwarɨ nɨ achigəntəm le? Lá be nɨ nchigɨ ntəm a ndzé ngɨ́ʼ mbɨ́ʼ anu za nɨ ghɨnɨ a kuʼnɨ, muŋ Ŋwi a mɨ fɔgɨ awən mbɨ́ʼ a zɛrə ghe.

²¹Ŋwi a tsɔ́ʼ awən lá mbɨ́ʼ a məziŋ ə. Mbɨ́ʼ ngə́ Kristo zɨmboŋ a zé ngɨ́ʼ lá mbɨ́ʼ awən, ntiʼ nkɨ nyɛʼtɨ alisɨ a mbó bən, taŋ á nɨ ndzɔ̌ŋ ɨbuʼ mɨku ɨchi ɛ.

²²Wɛrə a sé ɨbvu tse ghɨə, ŋwɔn tse a láʼ keʼ kɨ ndzuʼ nɨgham nɨ ntám nə tse fu a ntsu zɨə.

²³A nkfu za bɨ zɔ́mnɨ́ ayi, wɛrə a sé chwɨgɨ nɨ ndzɔm ə; a nkfu za wɛrə a kɨ́nə́ ndzě ngɨ́ʼ lá, wɛrə a sé kyesɨ ɨbɛn ngə́ bo mɨ kɨ ze ngɨ́ʼ ə. Lá wɛrə a lén ntsiŋə nɨ ntəm ɨzhi tsum a nye Ŋwi, zɨ wa nɨ Tabyɛn wa a sáʼnə́ tɨ nkobɨ lá.

²⁴Kristo zɨmboŋ a byɛ́ʼ mɨbvu ɨmɨgɨnə a mu ɨnye zɨ ngɛn nɨ mɛrə atɨ abaŋnɨ-baŋnɨ, taŋ á bɨgɨnə chi be tso ɨbɛn ba bɨ kfokɨnɨ mbáʼ be bɨ ngámə́ lá mbɨ́ʼ ɨbvu, ɨ kə́ tsinə taŋ ɨ ghɨnɨ ɨnu tsa tsɨ chinɨnɨ ə. Bɨ tsuʼnə awən ntsa lá a ndzum ɨlagɨ ɨchi ɛ.

²⁵Nɨ bé lá tso mbyindzɨ tsa tsɨ fánɨ́ ndómnji ɨwa, lá bɨ bənə ndɔgɨ awən ngyen nɨ bən ngə́ á nɨ ndzɔ́ŋə́ a Ntsiŋ mɨnyam, nkɨ mbe ŋwɔn wa a kɨnkɨnɨ bɨgharɨ ɨbən lá.