Read Ngemba 1 Bita 3 Bible Online

1 Bita 3 - Ngemba bible

1 Bita 3

¹Ndəŋndəŋ, bɨŋ bəngye mɨ zagɨ zuʼnɨnə bɨlóm ɨbən, taŋ be a be ngə́ ŋwɔn nɨ bo wu tse a se nɨŋ ntəm ɨyi a nye nɨgham nɨ Ŋwi, muŋ mbɔm ɨzɨŋ mɨ ghɨ á bo bəŋ mɨntəm ɨma ɨ nɨŋ a mɛrə a nye Kristo ghe. Nɨ mɨ keʼ bə ntsi nɨ ngam nɨgham nə tsɛrə,

²mbɨ́ʼ ngə́ bo mɨ ze adzaŋ za mbɔm ɨzɨŋ ɨ lánɨ́ nkɨ ntsi nɨ nkɔʼsə atɨ́ ə.

³A nɨ keʼ ndɔ́gɨ́ ɨdzúm ɨ nyɛ́tɨ́ ɨtumbəm ɨtsən ɨwu ɨ bɔŋ abyɛn abyɛn, tso adzaŋ za nɨ báʼnɨ́ ɨtú ɨtsən, kə ɨdzúm ntɔŋ abɔʼnɨ ɨfen tsa nɨ wə́gɨ́nə́, kə ɨtsɛʼ tsa nɨ wə́gɨ́nə́ ghe.

⁴A nɨbɔŋ ɨno baŋnɨ ntsi be a nye ngótɨ́ ŋwɔn wa o nɨ wɛrə a mu ntəm ɨgho, nɨbɔŋ na nɨ sě miə, nə azhwi za a bɔnɨnɨ nkeʼ ɨfubɨ a nkə́ ndǒ, mbáʼ nɨ lá nɨbɔŋ na nɨ tsinɨ nɨ ɨlɨŋ ntsa atsum a ɨshi ɨmɨgɨ Ŋwi lá.

⁵Mbɨ́ʼ ngə́ bəngye bə kɔ́ʼɔ́nguʼ ba bɨ fɛ́mnɨ́ nkɨ nɨŋ ntsiŋə nɨ ntəm tsum ɨza a nye Ŋwi kə́ ngɨ̌ nɨbɔŋ a nye bo lá adzaŋ za bo kɨ́nə́ ndzúʼnɨ́ bɨlóm ɨba ghe.

⁶Sara a bé lá adzaŋ məwa; wɛrə a kə́ ndzúʼnə́ Abraʼm nkə́ ntɔ́ŋə́ ayi ngə́ tafaʼ ɨyi ɛ. Tɨtsɔŋnɨ nɨ lá ɨbɔ ɨbyi bə bəngye mbáʼ be nɨ ngɨ̌ ɨnu tsɨ kuʼnɨnɨ, nkeʼ anu zə tsɛrə a mbɔ́gə́ ghe.

⁷Ndəŋndəŋ, bɨŋ bɨlóm mɨ zagɨ tsinə bɨŋ bɨ bəngye ɨbən nɨ nji ɨ shiʼnɨ ngə́ bo bɔrɨkɨ ntsa awɨŋ ə. A nɨ ndǐʼ mbɔm zɨ shiʼnɨ a mbó bo, mbɨ́ʼ ngə́ bɨŋ bo bɨtsum ghɨ kwárɨ́ azúm zə ghanɨ zə Ŋwi mbáʼ a lá ntsi ntən lá. A nɨ ngɨə mə lan taŋ á azúm zə tsɛrə a keʼ nkɨ́ŋə́ atsaʼtɨ a Ŋwi azɨŋ ə.

⁸A ndwɨgɨnə: bən bɨtsum mɨ zagɨ tsi nɨ táʼ mbɔm ɨ kə́ konə a mɨlɨŋnɨ a nye ŋwɔn nɨ ŋwɔn; á nɨ kɔŋnɨ ɨtumbəm ɨtsən ŋwɔn nɨ ŋwɔn, ntsi nɨ ntəm ngɨ ɨbɔŋ a nye ŋwɔn nɨ ŋwɔn, nkə́ shíʼtə́ nɨ ɨtumbəm ɨtsən a ɨshe a ɨshi ŋwɔn nɨ ŋwɔn ə.

⁹A nɨ keʼ ntfútɨ́ mbɔʼ anu zə tɔmnɨnɨ nɨ anu zə tɔmnɨnɨ, kə ndɔʼə nɨ ndɔʼə ghe. A nɨ mbáŋnə́ ntfútə́ nɨ ɨfɔgə, mbɨ́ʼ ngə́ ɨfɔgə nɨ azúm za Ŋwi a káʼnɨ́ awən nɨ zɛrə a nkfu wa wɛrə a tsɔ́ʼnɨ́ awən lá.

¹⁰Tso mbáʼ aŋwaʼnɨ a Ŋwi a soŋnɨ ngə́: “Ŋwɔn tsum wa a lɔnɨ ndzɨ ntsi mbyi zɨ shiʼnɨ nkə́ ndǒ ndzě njwi tsə shiʼnɨ, a mɨ zagɨ kyɛntɨ a sóŋ ɨnu tsɨ tɔmnɨnɨ ɨ kɨ kyɛntɨ a nchwé ɨnu ə.

¹¹Bo mɨ zagɨ tsɔʼ mɨntəm ɨma a nye ɨnu tsɨ tɔmnɨnɨ, ɨ tiʼə ghɨnɨ ɨnu tsɨ kuʼnɨnɨ; bo mɨ zagɨ tokɨnə a nchyɛ́ nɨ mbɔnɨ bo bɨ ɨbɛn bɨtsum nɨ mɨntəm ɨma mɨtsum ə.

¹²Mbɨ́ʼ ngə́ Maʼmbyí a lə̌tú nɨ ɨbɛn ba bɨ chinɨnɨ nkə́ ndzúʼə atsaʼtɨ a Ŋwi aza; lá ɨ furɨ ndzum ɨzhi ngǎ a mbó ɨbɛn ba bɨ ghɨnɨ ɨnu tsɨ tɔmnɨnɨ ə.”

¹³Ɨwa mɨ ghɨ á nɨ zuʼ ndzaŋə mbáʼ be nɨ mbɛ́bə́ a ngɨ anu zə kuʼnɨnɨ le?

¹⁴Lá be a kwɛ mbe ngə́ nɨ mɨ ze ngɨ́ʼ mbɨ́ʼ ngɨ anu zə kuʼnɨnɨ, nɨ tsi nɨ nɨdorɨ be tɨsɨŋə! A nɨ keʼ a ŋwɔn tsɛrə a mbɔ́gə́, nkeʼ ɨnye ɨtsən nkə́ mbúʼə ghe.

¹⁵Lá á nɨ nkɔ́ʼsə́ a Kristo atɨ́ a mu mɨntəm ɨmən tso Maʼmbyí ntsi mbyi ɨtsɨŋ ə. A nɨ kyaŋtɨ ɨnye ɨtsən a nchwɨ́gɨ́ ŋwɔn tsum nkfu tsum mbáʼ be a soŋ ngə́ á nɨ fɨʼtɨ ntsiŋə nɨ ntəm tsum za ɨ tsinɨ a mu ɨnye ɨtsɨŋ ə,

¹⁶lá á nɨ ngɨə mə lan nɨ mbɔnɨ abɔʼnɨ ndiʼ mbɔm zɨ shiʼnɨ ə. A mɨntəm ɨmɨŋ keʼ awən a sáʼə, taŋ bɨ zɔm awən, ɨbɛn ba bɨ ghamnɨ ɨnu tsə tɔmnɨnɨ mbɨ́ʼ mbɔm ɨzən zɨ shiʼnɨ tso ɨbɛn ba bɨ zɔŋnə a Kristo mɨ tsi nɨ adɨrətú mbɨ́ʼ ɨnu tsa bo sóŋnə́ ghe.

¹⁷Mbɨ́ʼ ngə́ a bɔŋ ngɛn nɨ mbyi a ndzé ngɨ́ʼ mbɨ́ʼ ngɨ anu zə kuʼnɨnɨ, mbáʼ be məzen a be anu za Ŋwi a lɔnə, ntsa a ndzé ngɨ́ʼ mbɨ́ʼ ngɨ anu zə tɔmnɨnɨ ə.

¹⁸A bɔŋ ngɛn nɨ mbyi a ndzé ngɨ́ʼ mbɨ́ʼ ngɨ anu zə kuʼnɨnɨ mbɨ́ʼ ngə́ Kristo a kfó mbɨ́ʼ mɨbvu táʼ nkfu wa a ghɔŋnɨ nɨnkoŋ ə. Ŋwɔn wu shiʼnɨ wa a kfónɨ́ mbɨ́ʼ atú a ngaŋ ngɨ mɨbvu, taŋ ɨ tsagɨnɨ awɨgɨnə a mbó Ŋwi ə. Bɨ zhwítɨ́ mbəmnye ɨzhi, lá bɨ ghɨ́ wɛrə a tsi ntən a mu azhwi ə.

¹⁹A mu ntsi mbyi zɨ azhwi ɨzhi za, wɛrə a ghɛ́n sóŋ anu a Ŋwi a mbó ɨzhwi tsa bɨ nɨ́ŋnɨ́ atsáŋ ə.

²⁰Mətsiŋ bé lá ɨzhwi ɨbɛn ba bo sé zuʼnɨ a Ŋwi a nkfu za wɛrə a kɨ́nə́ ntsiŋə tsɛʼ nɨ achigəntəm a nye njwi tsa Nua a kɨ́nə́ ntǒ abáŋ a nkyi azhi za lá. Mbum ɨbɛn ba bɨ tsínɨ́ a mu abáŋ a nkyi za — bɨtsum bé bi nɨfə̧ — nkyi wa ɨ lóŋ awa,

²¹mbáʼ a bénɨ́ lá alɨgɨ za a kɨ́nə́ ndǐʼ nkwarɨ nkyi za ɨ loŋnə awən tɨtsɔŋnɨ ə. Ka ɨ be ayi lá ɨsɨŋ za bɨ sugɨnə a nye mbəmnye, lá ɨ be lá akaʼ za bɨ ghɨnɨ a mbó Ŋwi ndo a mu ntəm wu shiʼnɨ ə. Ɨ loŋə awən ntsǎ lá a ndzum nzhwemnə za Yeso Kristo a zhwémnɨ́nɨ́ a mbó nɨvwo

²²zɨ wa a kɔʼnə ngɛn a fɔməbvurə, ntiʼ ntsi a bagɨ abó Ŋwi zə maʼə, ɨ sáʼə bɨtsen bɨ ndá bɨ Ŋwi bɨtsum abɔʼnɨ bɨsáʼ bɨ ɨlaʼ bə fɔməbvurə nɨ ɨdzɔŋ ɨlaʼ tsə fɔməbvurə lá.