Read Ngemba 1 Bita 4 Bible Online

1 Bita 4 - Ngemba bible

1 Bita 4

¹Ma lan, mbáʼ Kristo a zɛ́nɨ́ ngɨ́ʼ a nye mbəmnye ɨzhi lá, nɨ mɨ kɨ kyaŋtɨ ɨnye ɨtsən nɨ ndəŋndəŋ akwaʼtɨ za wɛrə a tsínɨ́ nɨ zɛrə; mbɨ́ʼ ngə́ ŋwɔn tsum kə a be ɨwa kə mbe ɨwa, wa a zɛ́nɨ́ ngɨ́ʼ a nye mbəmnye, a se bə mbvurɨ ntsi nɨ anu zə tsɛrə a ngɨə bo ɨbvu ə.

²Ma lan, ɨ lɔgɨnɨ tɨtsɔŋnɨ ɨ ghenə nɨ mbyi, nɨ mɨ zagɨ tsinɨ abvuʼ a ntsi mbyi azən atuəshe wen a nye ndóm wa Ŋwi a lɔnə, nkeʼ be be a nye wa mbəmnye lɔnə ghe.

³A be ngə́ nkfu za ɨ tsanə ɨ kuʼnɨ a ngɨ ɨnu tsa ba a se bə Yuda be kɔŋnɨ a ngɨə lá. Ntsi mbyi ɨtsɨŋ tsí lá a ngɨ ɨtɨshwe ɨnu, ntɛgɨ ntɔŋ a nye ɨdzúm tsa mbəmnye lɔnə, mbanɨ mɨluʼ, afágɨ́nɨ, nchyɛ a nye bɨmandzɔŋ bɨ no mɨluʼ ɨ banɨ, abɔʼnɨ nguʼsɨ ɨbɔ bɨ abe, anu zə tse za ŋwɔn a se tsi nɨ ɨ láʼ ghɨə.

⁴Tɨtsɔŋnɨ, a kɨʼnɨ a ba a se bə Yuda be ngə́ ka nɨ mbvúrə́ ngěn awən á bɨŋ bo ngɨə tɨ ɨfɨʼ ɨnu tsa mbəmnye lɔnə, nkeʼ nkə́ nchwátɨ́ ɨnye, ma lan, bo tiʼə ndzɔmə awɨŋ ə.

⁵Lá ɨtfúʼ njwi tsi ɨwu wa bo ghɨ sóŋ á bɔŋ a mbó Ŋwi, zɨ wa a kyaŋtɨnɨ ɨnye ɨzhi a sáʼ ba bɨ tsinɨ atú ntən abɔʼnɨ bɨkfú lá.

⁶Nə nɨ anu za a ghɨ́nɨ́ bɨ kɨ soŋ Nkən wu Shiʼnɨ wa a mbó bɨkfú, a mbó ba bɨ sáʼnɨ́ awa mbáʼ bɨ bvúrɨ́nɨ́ ntsi a mu mbəmnye ɨtsa; bɨ sóŋ a wɛrə a mbó bo lá taŋ bo ghɨ́ ntíʼə nchyɛ̌ a mu azhwi, bo chi tiʼə tsinə adzaŋ za Ŋwi a tsínə́ ghe.

⁷Ndwitɨ ɨnu ɨtsum tiʼ tsɛʼ abó ə. Nɨ mɨ zagɨ chwatɨnɨ ɨnye ɨtsən, ɨ kɨ ŋaʼ ɨtoŋnɨ ɨtsən taŋ ɨ chi tsaʼtɨ a Ŋwi ə.

⁸Za a tsanɨ atsum a nɨ ngə́ á nɨ kɔŋ a ŋwɔn nɨ ŋwɔn nɨ táʼ ntəm, mbɨ́ʼ ngə́ akɔŋnɨ a kúbɨ́nɨ́ mɨbvu mə ghaʼnɨ ə.

⁹A nɨ nkwárə́ a ŋwɔn nɨ ŋwɔn nɨ mɨndá ɨmən tə́ nzhwúʼnə́ ghe.

¹⁰Adzaŋ za ŋwɔn tsum ɨ mɔ́ʼɔ́ mɔ́ʼɔ́ a kwarɨnɨ azúm zə ghanɨ a mbó Ŋwi lá, á nɨ faʼə nɨ zɛrə a mbó ŋwɔn nɨ ŋwɔn, tso ngaŋ afaʼ tsə shiʼnɨ tsə abɔŋəntəm a Ŋwi za a tsinɨ a mbúŋə́ mbón lá:

¹¹ŋwɔn tsum wa a tsinɨ nɨ anu zə soŋnɨ, a mɨ zagɨ soŋ a zɛrə lá tso nkən wa ɨ lonɨ a mbó Ŋwi; ŋwɔn tsum wa a faʼnə, a tsi nɨ faʼə nɨ adaʼ za Ŋwi a ghanɨ wəmbo, taŋ a nye ɨnu ɨtsum, bɨ chi bontɨ a Ŋwi ɨ tsa a ndzum Yeso Kristo, zɨ wa nɨfáŋ tsinɨ wəmbo abɔʼnɨ mɨtən nɨnkoŋ lá. A be lá.

¹²O bɨson ɨban, á keʼ awən kɨʼnɨ adzaŋ za nɨ zɛ́nɨ́ ngɨ́ʼ a mbó adzaŋ a njwəŋtə zə ndzáŋə́ zen za nɨ zúʼnə́, tsɛʼ tso ngə́ anu zə tse za a tsanɨ mbó a fúə a nye bɨŋ ə.

¹³A nɨ báŋnə́ ndórə́ be ngə́ nɨ kə́ ndzě ngɨ́ʼ za Kristo a zɛ́nɨ́, taŋ á nɨ chi lon nɨ nɨdorɨ a nkfu za Ŋwi a kyɛʼnɨ nɨfáŋ ɨni ɛ.

¹⁴Nɨdorɨ tsi a mbó bən mbáʼ be bɨ ndzɔ́mə́ awən mbɨ́ʼ ngə́ nɨ nɨ ɨbɛn ba bɨ zɔŋnə a Kristo ghe; məzen a diʼ lá ngə́ Azhwi a nɨfáŋ za, mbe Azhwi a Ŋwi a tsi a nye bɨŋ ə.

¹⁵Be ŋwɔn nɨ bən wu tse a ndzě ngɨ́ʼ, á keʼ zagɨ mbe be mbɨ́ʼ ngə́ a nɨ ɨsɔbɨ mɨto kə ndzɛrə kə ngaŋ ngɨ mɨbvu kə ŋwɔn wa a nɨŋnɨ ntsu ɨyi a nye ɨnu ɨbɛn bədaŋ ə.

¹⁶Lá, be nɨ ndzě ngɨ́ʼ mbɨ́ʼ ngə́ nɨ nɨ ɨbɛn ba bɨ zɔŋnə a Kristo, á nɨ keʼ nɨ adɨrətú tsi, lá nga a mɨya a mbó Ŋwi ngə́ nɨ běm ɨkum Kristo ghe.

¹⁷Nkfu ɨ kuʼnə á nɨsáʼ biʼnə. Ɨbɛn bɨ Ŋwi, a nɨ bo ba bɨ mɨ tsa mbyi ɨ sáʼ awa ghe. Be bɨ biʼnɨ nɨ bɨgɨnə, a ghɨ tíʼ lwɨgɨnɨ be ɨ nə́ nɨ ba bɨ se nɨŋ mɨntəm ɨma a nye Nkən wu Shiʼnɨ wa ɨ lonɨ a mbó Ŋwi lá le?

¹⁸Tso mbáʼ aŋwaʼnɨ a Ŋwi a soŋnɨ ngə́: “A tsanɨ á bɨ loŋ ɨbɛn bə chinɨnɨ ə; a ghɨ tíʼ fú anu ake a nye ngaŋ ngɨ mɨbvu bo bɨ ba bɨ se a Ŋwi zhi lá le?”

¹⁹Ma lan, ɨbɛn ba bɨ zɛ́nɨ́ ngɨ́ʼ mbɨ́ʼ ngə́ a nɨ anu za Ŋwi a lɔnə a mbó bo, á bo, a ntsǎ a ndzum ngɨnɨ mɨnu ɨma mə shiʼnɨ nɨŋ ɨtumbəm ɨtsa tsɛʼ ɨtsum a mu mbó Zɨ Wa a Káʼnɨ́ awa, zɨ wa a lɛnə akaʼ azhi tsɛʼ nkfu tsum lá.