Read Ngemba 1 Bita 5 Bible Online

1 Bita 5 - Ngemba bible

1 Bita 5

¹Me wa ma nɨ atú a ndáŋwi me mboŋ, ma bǔʼ mbó a mbó ɨtú ndáŋwi a tɨtərɨ bɨŋ ə. Ma nɨ atɛmə-ndzě a nye ngɨ́ʼ za Kristo a zɛ́nɨ́, ma ghɨ kɨ́ tsi a mu nɨfáŋ na bɨ ghɨnɨ kyɛʼ lá. Ma bǔʼ mbó a mbó bən ngə́

²á nɨ be bɨntsiŋ mɨnyam bɨ akarɨ a mɨnyam za Ŋwi a ghánɨ́ a mbó bən, ɨ kə́ lənə atú nɨ tsɛrə mbáʼ ka bɨ nyəmə ayi awən, tsɛʼ adzaŋ za Ŋwi a lɔnə lá. Nɨ faʼ afaʼ azən, keʼ be tsɛʼ ngə́ nɨ mɨ səŋ ɨwu, á baŋnɨ mbe be ngə́ nɨ lánə́ ndǒ ɨ faʼə tsɛʼ nɨ mɨntəm ɨmən mɨtsum ə.

³A nɨ keʼ zhwəŋtɨ ɨ kɔʼ ɨ shiʼtɨ tsi atú ba bɨ lɛnɨ ngə́ á nɨ ndə̌tú a nye bo, nɨ baŋnɨ mbe be alisɨ a mbó akarɨ a mɨnyam za.

⁴A nkfu za atú a ngaŋ ntsiŋ mɨnyam a ghɨnɨ fú a ɨshe, nɨ ghɨ kwárɨ́ ɨsáʼfɔ zɨ nɨfáŋ za ka ɨ shwetə ayi lá.

⁵Ndəŋndəŋ, bɨŋ nkaŋ ŋwɔn mɨ zagɨ zuʼnɨnə bɨlyi ɨbɨŋ ə. Bən bɨtsum mɨ zagɨ wəgɨ ɨshíʼtə́ nɨ ɨnye a ɨshe tso ngə́ nɨ wəgɨ ɨtsɛʼ, adzaŋ za nɨ faʼnə a mbó ŋwɔn nɨ ŋwɔn; mbɨ́ʼ ngə́ aŋwaʼnɨ a Ŋwi a soŋ ngə́, “Ŋwi a furɨ ndzum ɨzhi ngǎ a mbó ɨbɛn ba bɨ ŋúʼnɨ́ ɨnye ɨtsa, lá ngǎ abɔŋəntəm a mbó ɨbɛn ba bɨ shíʼtɨ́nə́ nɨ ɨnye ɨtsa a ɨshe ə.”

⁶A nɨ ntíʼə shíʼtə́ nɨ ɨnye ɨtsən a ɨshe a shwúrɨ́ abó a Ŋwi za a nɨ zə wi, taŋ á wɛrə a tiʼ nkɔʼsɨ awən atɨ́ a nye nkfu ɨzhi za ɨ kuʼnɨnɨ ə.

⁷A nɨ nyɛʼtɨ ntsiŋə nɨ nɨwiʼ ɨzɨŋ tsum a mbó wɛrə mbɨ́ʼ ngə́ wɛrə a lə̌tú nɨ bɨŋ ə.

⁸A nɨ ŋaʼ ɨtoŋnɨ ɨtsən nkɨ ntsi a nɨkyerɨ ə! Ngaŋ kɨban ɨzən, Dəbɨrɨ, a númə́ nkárə́, ɨ múʼə tso afon ndǒ a ŋwɔn wa wɛrə a mɨ kfurə.

⁹A nɨ tɛm ntɨŋə ngə́ twə́ŋ a mu abeməntəm azən, nkɨ nton a Dəbɨrɨ wa, mbɨ́ʼ ngə́ nɨ zhi ngə́ ɨbɛn ba bɨŋ bo nɨŋnɨ mɨntəm ɨmɨŋ bo a nye Kristo a mu mbyi ziŋ tsum kə́ ndzě ndəŋndəŋ ngɨ́ʼ tso bɨŋ ə.

¹⁰Lá mbáʼ nɨ zɛnɨ ngɨ́ʼ a nye məkum a nkfu, Ŋwi, zɨ wa a diʼnə abɔŋəntəm azhi nkfu tsum, zɨ wa a tsɔʼnɨ awən ngə́ á nɨ kɨ ntsi a mu nɨfáŋ ɨni nə nɨnkoŋ, a mbúm bɨŋ bɨ Kristo, zɨmboŋ a mɨ ghɨ á nɨ kɔʼ ntəm ngə́ tsáŋ, ɨ kɨ ghɨ á nɨ tɛm nkeʼ nchíʼnə́, ɨ tsi nɨ adaʼ, ɨ kɨ ghɨ á mɨngaŋ ɨmɨŋ shwi a ɨshe ə.

¹¹Mɨtən tsi a mbó wɛrə nɨnkoŋ ə! A be lá.

¹²Ma ŋwaʼnɨ a məkum aŋwaʼnɨ wen lá nɨ akwatɨ za a lonɨ a mbó Sɨrɨbano, zɨ wa ma lɔgɨnɨ tso mɨma wa a zɔŋnə Kristo bɨgɨ zɨ tsɛʼ nɨ táʼ ntəm lá. Ma lǒ ngwɔŋtɨ bən, nkə́ sóŋə́ a za ma zhinɨ ngə́ məzen a nɨ abɔŋəntəm a Ŋwi tsɛʼ a nkənu ə. A nɨ tɛm ntɨŋə ngə́ twə́ŋ wə mu ə.

¹³Ndáŋwi za ɨ tsinɨ a Babilɔn, za ɨ tsinɨ a nye mɨndóm mə ghaʼnɨ tso gho, za Ŋwi a kɨnɨ nkɨ ntsɔʼ, ɨ tsagə atɔ́ŋtɨ ə. Marɨkusɨ, zɨ wa nɨ mɔn ɨghan a mu abeməntəm a kə́ ntsagə atɔ́ŋtɨ ə.

¹⁴A nɨ tɔŋtɨ a ŋwɔn nɨ ŋwɔn nɨ nchwɨgə akɔŋnɨ zə ɨbɛn ba bɨ zɔŋnə a Kristo ghe. A mbɔnɨ tsi a mbó bən bɨtsum ba nɨ tsinɨ a mbó Kristo ghe.