Read Ngemba 2 Bita 1 Bible Online

2 Bita 1 - Ngemba bible

2 Bita 1

¹Aŋwaʼnɨ zen a lo a mbó me Samɔn Bita, me wa ma nɨ ngaŋ afaʼ nkɨ mbe ntom Yeso zɨ Yeso Kristo — Ngěn a mbó ɨbɛn ba bɨ ghanə abeməntəm za a tsinɨ nɨ ɨlɨŋ tso azɨgɨ a mbó bo, ntsa a ndzum adzaŋ za Ŋwi ɨwɨgɨnə abɔʼnɨ Ndoŋ ɨwɨgɨnə Yeso Kristo chinɨnɨ:

²A abɔŋəntəm abɔʼnɨ mbɔnɨ be ɨtsən a nɨ́lónɨ́ ntsa a ndzum adzaŋ za nɨ zhinɨ a Ŋwi bo Yeso Maʼmbyí ɨwɨgɨnə ghe.

³Mɨtən mɨ Ŋwi mə fɔməbvurə ghanə atsum za bɨgɨnə lɔnə a nchyɛ́ tso ɨbɛn ba bɨ zhinɨ a Ŋwi ntsa a ndzum nji zɨ wa a tsɔ́ʼnɨ́ awɨgɨnə ngə́ á bɨgɨnə kɨ ntsi a mu nɨfáŋ ɨni abɔʼnɨ ɨbɔŋ ɨyi lá.

⁴A nye ndóm məwen, wɛrə a ghanə a mbó bɨgɨnə ɨdzúm tsə ghanɨ tsə wi nkɨ mbe tsa tsɨ bɔŋnɨ tsɛʼ nkan tsa wɛrə a káʼnɨ́ awɨgɨnə nɨ tsɛrə lá, taŋ a ntsǎ a ndzum ɨdzúm tsə ghanɨ mətsen, nɨ chi lɛʼ ntɛgɨ ntəm a nye ɨdzúm atuəshe za ɨ tsənkɨnɨ ɨbɛn, ɨ tiʼ kɨ tsi nɨ mbě za a nɨ zɨ Ŋwi lá.

⁵Nə nɨ anu za mbáʼ nɨ tsinɨ nɨ ngɨ atsum za nɨ chinɨ ghɨ a nkwiʼtɨ ɨbɔŋ a nye abeməntəm azən; ɨ kwiʼtɨ azhyɛ a nye ɨbɔŋ ɨwən;

⁶ɨ kwiʼtɨ nchwatɨ ɨnye a nye azhyɛ azən; ɨ kwiʼtɨ achigəntəm a nye nchwatɨ ɨnye ɨzən; ɨ kwiʼtɨ ngɨ ɨnu tsa Ŋwi a lɔnə a nye achigəntəm azən;

⁷ɨ kwiʼtɨ akɔŋnɨ a nye ŋwɔn nɨ ŋwɔn a nye ngɨ ɨnu tsa Ŋwi a lɔnə; ɨ kwiʼtɨ akɔŋnɨ a nye bədaŋ a nye akɔŋnɨ a nye a ŋwɔn nɨ ŋwɔn ə.

⁸Nə nɨ ɨbə́ŋ ɨnu tsa nɨ lɔnə a mu ntsi mbyi ɨtsɨŋ ə. Be nɨ kɨ ntsi nɨ tsɛrə tsɨ ghaʼ tsɛʼ nkan muŋ tsɨ mɨ ghɨ á nɨ ngɨ̌ mɨnu, ɨ kə́ ghɨnə a mɛrə ɨ shiʼnɨ a nye adzaŋ za nɨ zhinɨ a Maʼmbyí Yeso Kristo ɨwɨgɨnə lá.

⁹Lá ɨbɛn ba ka bɨ tsi awa nɨ ɨnu mətsen tsi lá tso ɨbɛn ba bɨ se ɨdiʼ ɨ shiʼnɨ a ndzě, ma lan, ɨ fɨ́gɨ́ nkɨ ndɨgɨnɨ ngə́ bɨ sugɨnə awa a nye mɨbvu ɨma mə mbyi ɛ.

¹⁰Ma lan nə ɨbɔmbɨma ɨban, á nɨ zhwəŋtɨ a nye mɨndóm mɨtsum a ngɨə ngə́ ntsɔʼə za Ŋwi a tsɔ́ʼnɨ́ awən nkɨ ndzarɨ awɨŋ ghɔŋ nɨnkoŋ; be nɨ ghɨ ma lan muŋ nɨ mɨ láʼ keʼ abeməntəm azən nyɛʼə.

¹¹Adzaŋ məwen, Ŋwi a mɨ ghɨ á be adiʼ azən a nɨ́lónɨ́ a nkúŋə́ a mu nɨfɔ nə nɨnkoŋ nɨ Yeso Kristo, zɨ wa nɨ Maʼmbyí ɨwɨgɨnə nkɨ mbe ndoŋ ɨwɨgɨnə lá.

¹²Ma lan, nɨ baʼtɨ nji ɨnu mətsen ɨ zhinɨ nkɨ mbi mɨngaŋ ɨmən a mu nkənu za nɨ kwárɨ́nɨ́ lá, ma mɨ kwemtɨnə awən nɨ tsɛrə nkfu tsum ə.

¹³Ma kwaʼtɨ ngə́ a nɨ tsɛʼ anu za a kuʼnɨnɨ a mbó me a ngɨə a ngwáʼtɨ́ bən nɨ ɨnu mətsen a nye nkfu zen za ma bvurɨnɨ ntsi atú ntən lá.

¹⁴Ma zhi ngə́ a bvurɨ mɨnyiə á ma byen ɨban ɨtsan, adzaŋ za Maʼmbyí Yeso Kristo ɨwɨgɨnə a sóŋnɨ́ a mbó me a lán lá.

¹⁵Ma mɨ ghɨ atsum za ma chinɨ ghɨ a ngá ndóm wa nɨ mɨ waʼtɨnɨ ɨnu tsiŋ ɨtsum nkfu tsum mbáʼ ma kfonə ghe.

¹⁶Bɨgɨ se zɛʼtɨ awɨgɨ lá a nye njalaʼ tsɨ kɔ́ʼɔ́nguʼ a ngɨə á nɨ zhi ngə́ Maʼmbyí Yeso Kristo ɨwɨgɨnə a lo bə tɨ yiŋə, ɨ yiŋənə nɨ adaʼ ə. Nɨ ɨmɨgɨ ɨmɨgɨ, bɨgɨ zé adzaŋ a ŋwɔn wu ngwi za wɛrə nɨ wɛrə ghe.

¹⁷Bɨgɨ tsí ɨwu a nyom wa Ŋwi, zɨ wa a nɨ Tarɨ a kɔ́ʼsɨ́nɨ́ ayi atɨ́ nkɨ nga nɨfáŋ wəmbo, mbáʼ nji za ɨ lónɨ́ a mbó Ŋwi, zɨ wa nɨ Nkaʼ wu Wi wa ɨ fúgɨ́nə́ ngə́ bú, ɨ yénɨ́ wəmbo ɨ sóŋə́ ngə́, “Nə nɨ mbɔŋ Mɔn ɨghan wu Mbáŋnɨ́ a wen wa ɨnye zə bɔŋnə wə ɨnye!”

¹⁸Bɨgɨ mboŋ zúʼ nji məzen adzaŋ za ɨ lónɨ́ a fɔməbvurə ɨ shíʼə ngyíŋə́, a nkfu za bɨgɨ bo tsínɨ́ atú mbám zɨ fɛmnɨ za lá.

¹⁹Ma lan, bɨgɨ len mɨntəm ɨmɨgɨ ngɛn nɨ mbyi a nye nkən wa ntóm Ŋwi chwítɨ́nə́. Nɨ mɨ ghɨ anu zə shiʼnɨ mbáʼ be nɨ tɛgɨ ɨtú ɨtsən a nye nkən wa, mbɨ́ʼ ngə́ ɨ tsi lá tso nkaʼ wa ɨ baŋnə a mu adiʼ za ndzumnɨ ɨ tsinɨ ɨwu ɨ shiʼ kuʼ a ɨshiʼ Njwi, á nkaʼ fɨndzɔŋ fə tənjwi tá a mu mɨntəm ɨmɨŋ ə.

²⁰Za a tsanɨ atsum a nɨ ngə́ á nɨ waʼtɨ ngə́ ŋwɔn tse a chi keʼ tsɛʼ nɨ atú azhi zɨmboŋ fɨʼtɨ nkən ntom Ŋwi a mu aŋwaʼnɨ a Ŋwi ə.

²¹Mbɨ́ʼ ngə́ ka nkən ntom Ŋwi tse tsi ayi ɨwu wa ɨ fúnɨ́ a mu akwaʼtɨ a ŋwɔn mɨsɔŋ a ntsu, lá Azhwi zə Fɛmnɨ a kə́ ntsɨŋnɨ ɨbɛn adzaŋ za bo kɨ́nə́ ngǎm nkən wa ɨ lónɨ́ a mbó Ŋwi ə.