Read Ngemba 2 Bita 3 Bible Online

2 Bita 3 - Ngemba bible

2 Bita 3

¹O bɨson ɨban, ziŋ aŋwaʼnɨ a nɨ za ma ŋwaʼnɨnɨ a mbó bən a nye nkfu za ɨ zɔŋtɨnɨ a nye ɨdiʼ tsi bá ghe. A mu ɨŋwaʼnɨ tsen tsi bá, ma zhwəŋtɨ a ndzɛm ɨkwaʼtɨ tsə lánɨ́ a mu ɨtú ɨtsən ntsa a ndzum nkwemtɨ ɨnu tsen a mbó bɨŋ ə.

²Ma lǒ ngə́ á nɨ waʼtɨ mɨgham ma ntóm Ŋwi tsɨ fɛmnɨ ghámnɨ́ a ngúʼə ngúʼə, abɔʼnɨ ntɨgə za ntóm Yeso ghánɨ́ a mbó bən, za ɨ lónɨ́ a mbó Maʼmbyí nkɨ mbe Ndoŋ lá.

³A mbyi ɨnu ɨtsum, nɨ mɨ zagɨ zuʼ ɨ kɨ zhi ngə́ a mu njwi tsə lwitɨnɨ tsen, ɨbɛn bə tse mɨ fu a ɨshe ba ɨnu tsa mbəmnye ɨtsa lɔnə mɨ tsɨŋnɨnɨ ntsi mbyi ɨtsa ghe. Bo mɨ werɨ awən

⁴ɨ kɨ bitɨ ngə́, “A káʼ ngə́ zɨə lo bə yiŋə, a sɨ lá be le? A mé? Bɨta ɨbɨgɨnə bə kɔ́ʼɔ́nguʼ kfokɨnə ghe, lá ɨnu ɨtsum bvurɨ ntsi tsɛʼ ndəŋndəŋ ndɔgɨnɨ mbáʼ bɨ káʼnɨ́ mbyi ɛ!”

⁵Nɨ azhinɨ, bo wágɨ́nə́ anu zen ngə́ a ngúʼə ngúʼə, Ŋwi a ghá ntɨgə, bɨ kaʼ fɔməbvurə bo atuəshe ə. Bɨ káʼ atuəshe nɨ nkyi, nkɨ ntsa a ndzum nkyi,

⁶bɨ ghɨ́ nkɨ́ ntsa lá tsɛʼ a ndzum nkyi, nkyiɛ lúŋə́ nkwə́ŋnə́ wa mbáʼ bɨ tsə́nkɨ́nɨ́ mbyi zɨ mbyi za ɨwu ə.

⁷Lá fɔməbvurə bo atuəshe ba bɨ tsinɨ tɨtsɔŋnɨ, a len ndəŋndəŋ ntɨgə Ŋwi məza, taŋ á bɨ ghɨ́ ntsənkɨ nɨ ɨmugɨ ə. Bɨ bvurɨ ndɛn a tsɛrə, ntsǐŋ njwi za ɨbɛn ba bɨ se nɨŋ mɨntəm ɨma a nye Ŋwi, bɨ ghɨnɨ sáʼ ɨ kɨ tsənkɨ awa ghe.

⁸O bɨson ɨban, á nɨ keʼ lɨgɨnɨ a táʼ anu ə! Ka líʼ wu tse a tsi ayi a ɨshi ɨmɨgɨ Maʼmbyí a tɨtərɨ táʼ njwi abɔʼnɨ ɨlom táʼ nchwuʼ ə; a mbó wɛrə, tsen tsi bá nɨ ndəŋndəŋ ə.

⁹Ka Maʼmbyí a shwuŋə ayi ɨnye a ngɨ anu za a kaʼnə, tso mbáʼ bə tse kwaʼtɨnə lá. Wɛrə baŋnə nchyɛ̌ nɨ nchigə bɨŋ zɨ, mbɨ́ʼ ngə́ ka a ndǒ ayi ngə́ á bɨ tsənkɨ a ŋwɔn tse, lá mbáŋnə́ ndǒ ngə́ á bɨtsum bəŋ mɨntəm ɨma a nye mɨbvu ɨma ghe.

¹⁰Lá Njwi Maʼmbyí ghɨ yen tso ndzɛrə ghe. A Njwi məwa, fɔməbvurə ghɨ byékɨ́ nɨ nji zɨ ntən, á bɨ tsənkɨ ɨdzúm fɔməbvurə nɨ ɨmugɨ, atuəshe bo ɨdzúm ɨtsum wə mu ghɨ byékə́.

¹¹Mbáʼ bɨ ghɨnɨ tsənkɨ ɨdzúm tsiŋ ɨtsum a nye ndóm wen lá, nɨ tsi nɨ mbe zɨŋə abə́ŋ a ɨbɛn le? Nɨ tsi nɨ fɛmə, ɨ kɨ zhi a Ŋwi,

¹²mbáʼ nɨ tsenɨ Njwi Ŋwi, ɨ kə́ ghɨnɨ ɨ shiʼnɨ ngə́ á ɨ waŋnɨ ngyiŋə. Nə nɨ Njwi za fɔməbvurə ghɨnɨ kɨ́, á bɨ tsənkɨ a zɛrə, á ɨdzúm fɔməbvurə saŋnɨ mbɨ́ʼ ɨmugɨ ɨyi lá.

¹³Lá bɨgɨnə tsiŋə a za Ŋwi a kwɛnə nkaʼ, fɔməbvurə wu fi abɔʼnɨ atuəshe zə fi, ɨdiʼ tsa ɨbɛn bə chinɨnɨ tsínə́ ɨwu ə.

¹⁴Ma lan, nə bɨson ɨban, mbáʼ nɨ tsenɨ Njwi za lá, á nɨ ghɨ atsum a ndə́, ɨ kɨ tsi tɨ ɨfərɨ a ɨshi ɨmɨgɨ Ŋwi, ɨ kɨ tsi a mu mbɔnɨ bɨŋ bɨ wɛrə ghe.

¹⁵A nɨ ze nchigə Maʼmbyí tso abárɨ́ za wɛrə a ghánə́ a mbó bən, á bɨ loŋ awən, tsɛʼ tso mbáʼ mbɔŋ mɨma ɨwɨgɨnə Baolo a ŋwáʼnɨ́nɨ́ a mbó bən, ɨ faʼə nɨ zóŋ wa Ŋwi a ghánɨ́ a mbó zɨ lá.

¹⁶Nə nɨ anu za wɛrə a sóŋnə́ a mu ɨŋwaʼnɨ ɨchi ɨtsum a nkfu za a ŋwaʼnɨnə mbɨ́ʼ anu məziŋ ə. Ɨnu tsɨ tən tsə tsɛrə tsi ɨwu a mu ɨŋwaʼnɨ ɨchi mbáʼ bɨtɨzhi bo bɨtɨchikɨ kwébtɨ́nɨ́ anu za tsɨ benɨ, tsɛʼ adzaŋ za bo ghɨnə nɨ ɨkumtɨ tsɨ mɔʼɔ a mu aŋwaʼnɨ a Ŋwi lá. Ma lan, ngyíŋə́ nɨ ntsənkə a nye ɨtumbəm ɨtsa ghe.

¹⁷Lá bən, nə bɨson ɨban, nɨ kwɛnə nji a məziŋ ə. A nɨ tiʼ ndə̌ ɨtú ɨtsən, taŋ á ɨbɛn ba bɨ se a nyɔngɔŋ a ndě keʼ awən shwuŋ nkon nɨ bən a mu ɨfənu ɨtsa, á nɨ vwo ɨ fu a mu adiʼ azən za a tsinɨ tɨ ngɨ́ʼ ə.

¹⁸Lá á nɨ ngěn nɨ mbyi nkwiə a mu abɔŋəntəm abɔʼnɨ nji Maʼmbyí, Ndoŋ ɨwɨgɨnə Yeso Kristo ghe. A nɨfáŋ tsi wəmbo tɨtsɔŋnɨ, nkɨ ntsi wəmbo nɨnkoŋ ə! A be lá.