Read Ngemba 1 Yoane 2 Bible Online

1 Yoane 2 - Ngemba bible

1 Yoane 2

¹Ɨbɔ ɨban, ma ŋwaʼnə a zen a mbó bən lá taŋ á nɨ keʼ ɨbvu tse ghɨ; lá be ŋwɔn tse a ghɨ ɨbvu, bɨgɨnə tsi nɨ ŋwɔn wu tsɛrə wa a búʼtɨ́nɨ́ mbó a mbó Tarɨ a nkfu bɨgɨnə, mbáʼ a lá Yeso Kristo, zɨ wa a chinɨnɨ lá.

²Kristo nɨ mɨtsuʼnɨ mɨ atú ma Ŋwi a kyémnɨ́ mbɨ́ atú azɨgɨnə taŋ ɨ lɨgɨnɨ mɨbvu ɨmɨgɨnə, nkeʼ tsɛʼ ɨmɨgɨnə be, lá nkɨ mbe mɨbvu mɨ ŋwɔn tsum ə.

³Be bɨgɨnə ndzúʼnɨ́ ntɨgə Ŋwi, muŋ bɨgɨnə zhi ɨ shiʼnɨ ngə́ bɨgɨnə zhi ayi ɛ.

⁴Ɨbɛn ba bɨ soŋnɨ ngə́ bo zhi ayi lá nkeʼ ntɨgə ɨchi a ndzúʼnə́, bo nɨ ngaŋ ɨchwenu, nkənu keʼ a mu ɨnye ɨtsa kɨ chyɛ.

⁵Lá, be ŋwɔn tse a ndzúʼnɨ́ nɨgham ɨni, lá be ngə́ akɔŋnɨ za ŋwɔn məwa a tsinɨ nɨ zɛrə a nye Ŋwi a mu ɨnye zɨ a kɔʼ ntɛm ngə́ tsáŋ ə. Bɨgɨnə mɨ zhi ɨ shiʼnɨ ngə́ bɨgɨnə tsi a mbúm bɨgɨnə bɨ Ŋwi lá ɨ nanə ghe:

⁶ɨbɛn ba bɨ soŋnɨ ngə́ bo ghɔŋ a mbúm bo bɨ Ŋwi, tsi nɨ ntsi ntsi mbyi ɨza tsɛʼ adzaŋ za Kristo a tsínɨ́ ɨzhi lá.

⁷O bɨson ɨban, ntɨgə zen za ma ŋwaʼnɨnə a mbó bən lá ka ɨ be ayi zɨ fi ə; ɨ nɨ ntɨgə zɨ ndvuŋ za, za nɨ kwɛnə ntsi nɨ zɛrə ndɔgɨnɨ a mbiʼnə ghe. Ntɨgə ziŋ nɨ nkən wa nɨ kwɛnə ndzuʼə.

⁸Lá, ntɨgə za ma ŋwaʼnɨnə tɨtsɔŋnɨ a mbó bən, ɨ nɨ zɨ fi, mbɨ́ʼ ngə́ nkənu ɨzhi bɨ zě a nye ntsi mbyi Kristo, nkɨ mbe a nye ntsi mbyi ɨzɨŋ ə. Mbɨ́ʼ ngə́ ndzumnɨ tsǎ ngěn ayi, ngótɨ́ nkaʼ kwɛnə ntiʼə ntǎ ghe.

⁹Ŋwɔn tsum wa a soŋnɨ ngə́ zɨə tsi a mu nkaʼ, lá mbə̂ a mɨma ɨyi, a bvurɨ ntsi a mu ndzumnɨ ə.

¹⁰Ŋwɔn tsum wa a kɔŋnɨ a mɨma ɨyi a chyɛ̌ a mu nkaʼ, ma lan, anu zə tse a keʼ a mu ɨnye zɨ tsi za a chinɨ ghɨ á ŋwɔn adaŋ a ghɨ ɨbvu ə.

¹¹Lá Ŋwɔn tsum wa a banɨ a mɨma ɨyi, a tsi a mu ndzumnɨ; a yiŋə a mu zɛrə, nkeʼ zhi adiʼ za a ghɛnə, mbɨ́ʼ ngə́ ndzumnɨ za ɨ ghɨnə a fɨgɨ ə.

¹²Ma ŋwaʼnə a mbó bən, nə ɨbɔ ɨban, mbɨ́ʼ ngə́ bɨ lɨgɨnɨnə mɨbvu ɨmən mbɨ́ʼ atú a Kristo ghe.

¹³Ma ŋwaʼnə a mbó bən, nə bɨtarɨ, mbɨ́ʼ ngə́ nɨ zhi a wɛrə wa a kwɛ́nə ntsi ɨ lɔgɨnɨ a mbiʼnə ghe. Ma ŋwaʼnə a mbó bən, nə nkaŋ ŋwɔn, mbɨ́ʼ ngə́ nɨ ghaʼnə a Wu Ntɔmnɨnɨ wa.

¹⁴Ma ŋwaʼnə a mbó bən, nə ɨbɔ ɨban mbɨ́ʼ ngə́ nɨ zhi a Tarɨ ə. Ma ŋwaʼnə a mbó bən, nə bɨtarɨ, mbɨ́ʼ ngə́ nɨ zhi a wɛrə wa a kwɛ́nə ntsi ɨ lɔgɨnɨ a mbiʼnə ghe. Ma ŋwaʼnə a mbó bən, nə nkaŋ ŋwɔn, mbɨ́ʼ ngə́ nɨ tən; nɨgham nɨ Ŋwi tsinə a mu ɨnye bən, nɨ kɨnə nkɨ ngháʼ a Wu Ntɔmnɨnɨ wa.

¹⁵A nɨ keʼ kɔŋ atuəshe kə azúm zə tse za a nɨ zə atuəshe. Be nɨ kɔŋ atuəshe, lá be ngə́ nɨ se a Tarɨ kɔŋə.

¹⁶Azúm atsum za a nɨ zə atuəshe — za mbəmnye zɨ mɨbvu lɔnə, za ɨbɛn zɛ́nə́ nkə́ ndǒ nchyɛ nɨ zɛrə, abɔʼnɨ azúm atsum atuəshe wen za a ghɨnə ɨbɛn ŋúʼnɨ́ ɨnye be tɨ́sə́n mbɨ́ʼ a zɛrə — ka zen zə tsɛrə a ndǒ ayi lá a mbó Tarɨ; ɨtsum lǒ atuəshe ə.

¹⁷Atuəshe abɔʼnɨ azúm atsum za a tsinɨ ɨwu za ɨbɛn lɔnə a tsǎ ngěn ghe; lá ɨbɛn ba bɨ ghɨnɨ anu za Ŋwi a lɔnə chyɛ̌ nɨnkoŋ ə.

¹⁸Ɨbɔ ɨban, ndwitə ɨ tiʼ abó ə! Bɨ sóŋ a mbó bən ngə́ ngaŋ kɨban Kristo ghɨ yen; tɨtsɔŋnɨ ngaŋ kɨban Kristo tsə ghaʼnɨ binə fu a ɨshe, ma lan, bɨgɨnə tiʼ nji ngə́ ndwitə ɨ tiʼ abó ə.

¹⁹Ɨbɛn biŋ sé tsi a mu adzɨnɨ azɨgɨnə ghe, nə nɨ anu za bo nyɛ́ʼtɨ́nɨ́ awɨgɨnə; bo bé lanɨ be lá bagɨ adzɨnɨ azɨgɨnə, muŋ bo ghɔ́ŋ bɨgɨnə bo ghe. Lá bo nyɛ́ʼtɨ́ awɨgɨnə lá taŋ á lán ngə́ kə́ tsɛʼ táʼ ŋwɔn nɨ bo a sé lanɨ ntsi bɨgɨnə bo ghe.

²⁰Lá Wu Fɛmnɨ wa a zɔʼnə awən nɨ mɨvwurɨ; ma lan, bən bɨtsum zhi nkənu ə.

²¹Ma tiʼə ŋwaʼnə a mbó bən lá, a keʼ be be mbɨ́ʼ ngə́ nɨ se nkənu zhyɛ; a baŋnɨ mbe be ngə́ nɨ zhi a zɛrə, nkɨ nji ngə́ ka ɨchwenu tse ndáʼə ndǒ ayi a mbó nkənu ə.

²²A tiʼ mbe ɨwa mbe ngaŋ ɨchwenu le? A nɨ zɨ wa a soŋnɨ ngə́ Yeso a se Wa bɨ Zɔ́ŋnɨ́ wa be ə. Adzaŋ a ŋwɔn məzen lá ngaŋ Kɨban Kristo — a túŋə́ ayi a Tarɨ bo Mɔn ə.

²³Ŋwɔn tsum wa a tónə́ ayi a Mɔn, a kə́ ntúŋə́ ayi a Tarɨ; ŋwɔn tsum wa a bémnə́ a Mɔn Ŋwi, a kɨnə nkɨ mbem a Tarɨ ə.

²⁴A nɨ zɛn ngə́ nɨ len nkən wa nɨ zúʼnɨ́ nchwuʼnɨ a mbiʼnə a mu mɨntəm ɨmɨŋ ə. Be nɨ len nkən məwa muŋ nɨ mɨ tiʼə tsinə a mbúm bɨŋ bɨ Mɔn abɔʼnɨ Tarɨ nkfu tsum ə.

²⁵Nə tiʼ mbe za Kristo zɨmboŋ a káʼnɨ́ a ngá a mbó bɨgɨnə, mbe ntsi ntən nɨnkoŋ ə.

²⁶Ma ŋwaʼnə a zen a mbó bən lá mbɨ́ʼ ɨbɛn ba bɨ zhwə́ŋtɨ́nə́ a ntámtɨ́ bɨŋ ə.

²⁷Lá a mbó bən, Kristo a chwɨrɨnə azhwi azhi atú bɨŋ ə. Nkfu za Azhwi azhi a ghɔŋnɨ a mu ɨnye bən, ka nɨ ndǒ awɨŋ a ŋwɔn tse ngə́ á diʼ awɨŋ ə. Mbɨ́ʼ ngə́ Azhwi azhi a diʼə awən mbɨ́ʼ ɨnu ɨtsum, anu atsum za a diʼnə a be nkənu, nkeʼ ɨchwenu be. A nɨ tiʼə ndzúʼnə́ anu za Azhwi a diʼnə awən nɨ zɛrə, ntiʼ nkɨ ngɔŋ a mbúm bɨŋ bɨ Kristo ghe.

²⁸Eŋə, ɨbɔ ɨban, nɨ ghɔŋ a mbúm bɨŋ bɨ wɛrə, taŋ a fu a ɨshe, bɨgɨnə chi lon nɨ nkotɨ mbáŋnɨ́, ɨ keʼ ndǒ ndyɛmtə a mu adɨrətú wəmbo a Njwi wa a yenə.

²⁹Nɨ zhi ngə́ Kristo a chinə; nɨ tsi nɨ ɨ tiʼ zhi ngə́ ŋwɔn tsum wa a ghɨnɨ a za a kuʼnɨnɨ a nɨ mɔn Ŋwi ə.