Read Ngemba 1 Yoane 4 Bible Online

1 Yoane 4 - Ngemba bible

1 Yoane 4

¹O bɨson ɨban, á nɨ keʼ nɨŋ mɨntəm ɨmən a nye ɨbɛn bɨtsum ba bɨ kaŋnə ngə́ bo tsi nɨ Azhwi za, lá á nɨ zhwəŋtɨ awa a ndzé ngə́ a lə azhwi za bo tsinɨ nɨ zɛrə a lo a mbó Ŋwi kə ngáŋ ə. Mbɨ́ʼ ngə́ ntóm Ŋwi ɨchwenu ghɛnə nɨ ɨdiʼ ɨtsum ə.

²Nə nɨ adzaŋ za nɨ ghɨnɨ zhi ngə́ a lə mbe Azhwi a Ŋwi kə ngáŋ ə: ŋwɔn tsum wa a soŋnɨ nɨ ntsu ɨyi ngə́ Yeso Kristo a yén tso ŋwɔn mɨsɔŋ a ntsu, a tsi nɨ Azhwi za a lonɨ a mbó Ŋwi ə.

³Lá ŋwɔn tsum wa a tonɨ a məzen mbɨ́ʼ a Yeso, ka a tsi ayi nɨ Azhwi za a lonɨ a mbó Ŋwi; azhwi za a tsinɨ nɨ zɛrə a lo a mbó Ŋwɔn Kɨban Kristo; nɨ zúʼ ngə́ a ghɨ yiŋə, tɨtsɔŋnɨ a binə ntsi ɨghan a mu mbyi ɛ.

⁴Lá bən nə ɨbɔ ɨban, nɨ tsi a mbó Ŋwi, nɨ kɨnə nkɨ ngháʼ ntóm Ŋwi ɨchwenu, mbɨ́ʼ ngə́ Azhwi za a tsinɨ a mu ɨnye bən a tən ntsa azhwi za a tsinɨ a mbó ɨbɛn ba bɨ tsinɨ a mbó atuəshe.

⁵Ntóm Ŋwi ɨchwenu tsa ghamə mɨnu mɨ atuəshe, atuəshe a tiʼə njwíʼtə́ a mbó bo mbɨ́ʼ ngə́ bɛrə tsi a mbó atuəshe.

⁶Lá bɨgɨnə tsi be a mbó Ŋwi ə. Ŋwɔn tsum wa a zhinɨ a Ŋwi a zuʼə a ntsu bɨgɨnə; Ŋwɔn tsum wa a se a mbó Ŋwi tsi, ka a njwíʼtə́ ayi a ntsu bɨgɨnə ghe. Ma lan, nə tiʼ mbe adzaŋ za bɨgɨnə chinɨ zhi a líʼ wa a tsinɨ a tɨtərɨ Azhwi a nkənu bo azhwi afənu ə.

⁷O bɨson ɨban, á bɨgɨnə ngěn nɨ mbyi nkɔŋnə a ŋwɔn nɨ ŋwɔn, mbɨ́ʼ ngə́ akɔŋnɨ a lǒ lá a mbó Ŋwi ə. Ŋwɔn tsum wa a kɔŋnə a ŋwɔn wu mɔʼɔ, a nɨ mɔn Ŋwi, nkɨ nji a Ŋwi ə.

⁸Ŋwɔn tsum wa a se a ŋwɔn wa bo zɨ zɔŋnə a Kristo a nkɔ́ŋə́ a se a Ŋwi zhi, mbɨ́ʼ ngə́ Ŋwi a lá akɔŋnɨ ə.

⁹Ŋwi a díʼ akɔŋnɨ azhi a mbó bɨgɨnə lá a nye adzaŋ za wɛrə a tságɨ́nɨ́ a Mɔn ɨyi wa a núnɨ́ zɨzɨ a mu mbyi, taŋ á bɨgɨnə chi tsi nɨ ntsi ntən ntsa a ndzum wɛrə ghe.

¹⁰Azúm za bɨ tɔ́ŋnə́ ngə́ akɔŋnɨ lá a zɛnə: ka a be ayi be ngə́ bɨgɨnə kɔŋ a Ŋwi ə, lá a nɨ be ngə́ wɛrə a kɔ́ŋ awɨgɨnə, ntiʼ ntsagɨ a Mɔn ɨyi ngə́ á wɛrə a be mɨtsuʼnɨ mɨ atú ma zɨə kyémnɨ́ mbɨ́ atú azɨgɨnə taŋ ɨ lɨgɨnɨ mɨbvu ɨmɨgɨnə ghe.

¹¹O bɨson ɨban, be a be ngə́ nə nɨ adzaŋ za Ŋwi a kɔ́ŋnɨ́ awɨgɨnə, muŋ á bɨgɨnə nkɔ́ŋnə́ ŋwɔn nɨ ŋwɔn ə.

¹²Ŋwɔn tse a láʼnə mbvurɨ tɨ zɛn a Ŋwi ə, lá be bɨgɨnə kɔŋnɨ a ŋwɔn nɨ ŋwɔn muŋ Ŋwi a chyɛ̌ a mbúm bɨgɨnə bo, nkə́ ngɨə akɔŋnɨ azhi a kɔʼnə ntɛ́mə́ ngə́ tsáŋ a mu ɨnye ɨtsɨgɨnə ghe.

¹³Bɨgɨnə zhi ɨ shiʼnɨ ngə́ bɨgɨnə chyɛ̌ a mbúm bɨgɨnə bɨ Ŋwi, a kə nchyɛ̌ a mbúm bɨgɨnə bo lá mbɨ́ʼ ngə́ wɛrə a ghanə Azhwi azhi a mbó bɨgɨnə ghe.

¹⁴Bɨgɨnə zɛnə nkɨ soŋ a mbó bə mɔʼɔ ngə́ Tarɨ a tságɨ́ a Mɔn ɨyi lá ngə́ á wɛrə a yen mbe Ndoŋ mbyi ziŋ ə.

¹⁵Be ŋwɔn tse a soŋ ntəm ɨyi ngə́ Yeso a nɨ Mɔn Ŋwi muŋ a chyɛ̌ a mbúm bo Ŋwi, Ŋwi a kə nchyɛ̌ a mbúm bo zɨə.

¹⁶Ma lan, bɨgɨnə zhi nkɨ nɨŋ mɨntəm ɨmɨgɨnə a nye akɔŋnɨ za Ŋwi a tsinɨ nɨ zɛrə a nye bɨgɨnə ghe. Ŋwi a nɨ akɔŋnɨ ə, ɨbɛn ba bɨ tsínə́ a mu akɔŋnɨ, bo chyɛ̌ a mbúm bo bɨ Ŋwi, Ŋwi a kə nchyɛ̌ a mbúm bo bo ghe.

¹⁷Bɨ ghɨ akɔŋnɨ a kɔʼ ntɛm ngə́ tsáŋ a mu ɨnye ɨtsɨgɨnə lá, taŋ á bɨgɨnə chi tsi nɨ nkotɨ mbáŋnɨ́ a Njwi Nɨsáʼ; bɨgɨnə ghɨ tsi nɨ zɛrə mbɨ́ʼ ngə́ adzaŋ za bɨgɨnə chwuʼnɨnɨ a nye Ŋwi nɨ ndəŋndəŋ adzaŋ za Kristo a chwúʼnɨ́nɨ́ a wɛrə ghe.

¹⁸Ka nɨbɔgɨ nə tsɛrə tsi ayi a mu akɔŋnɨ ə; akɔŋnɨ za a kɔʼnɨ ntɛm ngə́ tsáŋ a kə́ntə́ nɨbɔgɨ nɨtsum ə. Ma lan, ka bɨ ghɨ ayi akɔŋnɨ á kɔʼ ntɛm ngə́ tsáŋ a mu ɨnye ŋwɔn tsum wa a bɔ́gɨ́nə́, mbɨ́ʼ ngə́ nɨbɔgɨ tsi nɨ anu a ngɨə bo ɨnɨŋ ngɨ́ʼ ə.

¹⁹Bɨgɨnə kɔŋə mbɨ́ʼ ngə́ Ŋwi a fóm nkɔŋ awɨgɨnə ghe.

²⁰Be ŋwɔn tse a soŋ ngə́ zɨə kɔŋ a Ŋwi lá mban a mɨma ɨyi, lá be ngə́ a nɨ ŋwɔn ɨchwenu ə. Mbɨ́ʼ ngə́ a chi keʼ a Ŋwi kɔŋ wa a bvurɨnɨ tɨ zɛn, mbáʼ be a tú a mɨma ɨyi kɔŋ wa a zɛ́nə́ ghe.

²¹Ntɨgə za Kristo a ghanə a mbó bɨgɨnə ɨ zɛnə ngə́: ŋwɔn tsum wa a kɔŋnɨ a Ŋwi a tsi nɨ ɨ kɨ kɔŋ a mɨma ɨyi ɛ.