Read Ngemba 1 Yoane 5 Bible Online

1 Yoane 5 - Ngemba bible

1 Yoane 5

¹Ŋwɔn tsum wa a nɨŋnɨ ntəm ɨyi ɨwu ngə́ Yeso a nɨ Wa bɨ Zɔ́ʼnɨ́ wa, a nɨ mɔn Ŋwi ə; ŋwɔn tsum wa a kɔŋnɨ a tarɨ a kɨ nkɔŋ a mɔn ə.

²Nə nɨ adzaŋ za bɨgɨnə zhinɨ ngə́ bɨgɨnə kɔŋ ɨbɔ bɨ Ŋwi ə: bɨgɨnə zhi ngə́ a nɨ ntsǎ a ndzum nkɔŋ Ŋwi ɨ kə́ zúʼnɨ́nɨ́ ntɨgə ɨchi ɛ.

³Mbɨ́ʼ ngə́ akɔŋnɨ azɨgɨnə a nye Ŋwi a diʼ lá ngə́ á bɨgɨnə ndzúʼnɨ́ ntɨgə ɨchi ɛ. Ka ntɨgə ɨchi kɨ ntən awa be tɨ́sə́n a mbó bɨgɨnə ghe.

⁴Ka tsɨ tən awa be tɨ́sə́n mbɨ́ʼ ngə́ mɔn Ŋwi tsum a chi tokɨ ɨ gháʼ ɨnu atuəshe ə. Bɨgɨnə kə́ nchyɛ̌ nɨ ayanguʼ atú atuəshe ntsǎ lá ndzum abeməntəm azɨgɨnə ghe.

⁵Ɨwa chi tokɨ ɨ gháʼ ɨnu atuəshe le? A nɨ tsɛʼ ŋwɔn wa a nɨŋnɨ ntəm ɨyi ɨwu ngə́ Yeso a nɨ Mɔn Ŋwi ə.

⁶Yeso Kristo a nɨ zɨ wa a yénɨ́ nɨ nkyi wu nkwárɨ́ nkyi ɨyi abɔʼnɨ alɛm za bɨ chwírɨ́nɨ́ a nkfu nɨvwo ɨni ɛ. Bɨ sé tsɛʼ nkyi atú zɨ nɨŋ, bɨ kɨ́ nchwirɨ alɛm a nkfu za wɛrə a kfónə́. Azhwi zɨmboŋ a nɨ atɛmə-ndzě ngə́ məzen a nɨ nkənu, mbɨ́ʼ ngə́ Azhwi a lá nkənu ə.

⁷Mɨndóm be lá mi mɨntárə́ mbáʼ bɨgɨnə zhínɨ́ nkənu mbɨ́ʼ a Yeso ghe.

⁸Bɨgɨnə zhi nkənu mbɨ́ʼ ayi mbɨ́ʼ ngə́ Azhwi a soŋ a mbó bɨgɨnə adzaŋ məwa, mbɨ́ʼ ngə́ bɨ nɨ́ŋ nkyi wu atú nɨ nkyi, nkɨ mbe mbɨ́ʼ ngə́ bɨ chwírɨ́ alɛm a nkfu za wɛrə a kfónə́. Mɨndóm mɛnə mi mɨntárə́ sóŋə́ a mbó bɨgɨnə ngə́ Yeso nɨ Mɔn Ŋwi ə.

⁹Bɨgɨnə nɨŋ mɨntəm ɨmɨgɨnə a nye atɛmə-ndzě zə ŋwɔn mɨsɔŋ a ntsu; lá za a nɨ atɛmə-ndzě zə Ŋwi a tən ngɛn nɨ mbyi, Ŋwi a kɨnə nkɨ nga atɛmə-ndzě məzen mbɨ́ʼ a Mɔn ɨyi ɛ.

¹⁰Ma lan, ŋwɔn tsum wa a nɨŋnɨ ntəm ɨyi a nye Mɔn Ŋwi a tsi nɨ atɛmə-ndzě məzen a mu ɨyi ntəm; lá ŋwɔn tsum wa a se ntəm ɨyi a nye Ŋwi nɨŋ, a ghɨ ayi a nye ŋwɔn ɨchwenu, mbɨ́ʼ ngə́ ka a nɨŋ ayi ntəm ɨyi a nye anu za Ŋwi a sóŋnɨ́ mbɨ́ʼ a Mɔn ɨyi ɛ.

¹¹Za Ŋwi a sóŋnə́ a mbó bɨgɨnə a nɨ ngə́ wɛrə a ghanə ntsi ntən nɨnkoŋ a mbó bɨgɨnə, ntsa a ndzum Mɔn ɨyi ɛ.

¹²Ŋwɔn tsum wa a tsinɨ bo Mɔn wa, a tsi nɨ ntsi ntən nɨnkoŋ məziŋ ə; ŋwɔn tsum wa a se bo Mɔn Ŋwi tsi, ka a tsi ayi nɨ ntsi ntən nɨnkoŋ ə.

¹³Ma ŋwaʼnə a zen a mbó bən taŋ á nɨ chi zhi ngə́ nɨ tsi nɨ ntsi ntən nɨnkoŋ — bən ba nɨ nɨŋnɨ mɨntəm ɨmən a nye Mɔn Ŋwi lá.

¹⁴Bɨgɨnə tsi nɨ nkotɨ mbáŋnɨ́ a ɨshi ɨmɨgɨ Ŋwi, mbɨ́ʼ ngə́ bɨgɨnə zhi ɨ shiʼnɨ ngə́ wɛrə a zúʼə awɨgɨnə mbáʼ be bɨgɨnə lɔntɨ azúm zə tsɛrə a mbó zɨ ndzɔŋə adzaŋ za wɛrə a lɔnə lá.

¹⁵Nkfu tsum za bɨgɨnə lɔntɨnɨ wəmbo, wɛrə a zǔʼ nji ɨzɨgɨnə ghe; mbáʼ bɨgɨnə zhinɨ ngə́ məzen a nɨ nkənu lá, bɨgɨnə kɨ nji ngə́ wɛrə a ghǎ azúm atsum za bɨgɨnə lɔntɨnɨ a mbó zɨə.

¹⁶Be o zɛn a mɨma ɨgho a ghɨ ɨbvu mbáʼ ɨ mɨ keʼ tsagɨnɨ ayi a mbó nɨvwo, o tsi nɨ ntsaʼtɨ Ŋwi, zɨ wa a mɨ gha ntsi ntən a mbó wɛrə ghe. Məzen a faʼə a mbó ɨbɛn ba mɨbvu ɨma se ntságɨ́nə́ awa a mbó nɨvwo ə. Lá ɨbvu tsi ɨwu wa ɨ tsagɨnɨnə a mbó nɨvwo, ma kaʼ nkə́ sóŋə́ lá ngə́ á nɨ tsaʼtɨ a Ŋwi mbɨ́ʼ a məma.

¹⁷Afənu atsum a nɨ ɨbvu ə, lá ɨbvu tsi ɨwu wa ɨ se ntságɨ́nə́ a mbó nɨvwo ə.

¹⁸Bɨgɨnə zhi ngə́ ka mɔn Ŋwi wu tse a tsi ayi ɨwu wa a ghɛnə nɨ mbyi ngɨ̌ ɨbvu, mbɨ́ʼ ngə́ Mɔn Ŋwi a lə̌tú nɨ bo, Wu Ntɔmnɨnɨ wa a chi keʼ anu a nye bo ghɨə.

¹⁹Wu Ntɔmnɨnɨ a báʼtə́ sáʼə atuəshe atsum ɨ sáʼnɨ́ lá, bɨgɨnə zhi ngə́ bɨgɨnə tsi a mbó Ŋwi ə.

²⁰Bɨgɨnə zhi ngə́ Mɔn Ŋwi a yenə, nkɨ nga ndzuʼə kɨ zhi a mbó bɨgɨnə, taŋ á bɨgɨnə zhi a Ŋwi, zɨ wa nkənu lonə wəmbo lá. Bɨgɨnə chyɛ̌ lá a mbúm bɨgɨnə bɨ Ŋwi, zɨ wa nkənu lonə wəmbo lá — a mbúm bɨgɨnə bɨ Mɔn ɨyi Yeso Kristo ghe. Nə nɨ Ŋwi, zɨ wa nkənu lonə wəmbo, nə kɨ mbe ntsi ntən nɨnkoŋ za.

²¹Ɨbɔ ɨban, á nɨ fɨgɨ mɨntəm ɨmən a nye ɨbɔ bɨ abě!