Read Ngemba 2 Yoane 1 Bible Online

2 Yoane 1 - Ngemba bible

2 Yoane 1

¹Aŋwaʼnɨ zen a lo a mbó Nkum — Ngěn a mbó Nɨmo wa bɨ tsɔʼnɨ nkə́ ngěn a mbó ɨbɔ ɨbyi, bo ba ma kɔŋnɨ tsɛʼ nkə. Ka a be ayi tsɛʼ me me; ɨbɛn bɨtsum ba bɨ zhinɨ nkənu bɨ kɔŋ awən,

²mbɨ́ʼ ngə́ nkənu ɨ ghɔŋ a mu ɨnye bɨgɨ, ɨ kɨ ghɔŋ a mbó bɨgɨ nɨnkoŋ ə.

³A Ŋwingɔŋ Tarɨ abɔʼnɨ Yeso Kristo, Mɔn Tarɨ, gha awɨgɨnə nɨ abɔŋəntəm, akômɨlɨŋnɨ abɔʼnɨ mbɔnɨ ə; á tsɛrə tsi a mbó bɨgɨnə a mu nkənu abɔʼnɨ akɔŋnɨ ə.

⁴Ma dórɨ́ be tɨ́sə́n a ndzé ngə́ ɨbɔ bo bə tse chyɛ̌ a mu nkənu, tsɛʼ adzaŋ za Tarɨ a sóŋnɨ́ ngə́ á bɨgɨnə be lá.

⁵Ma lan, ma soŋ a mbó gho nɨmo, ngə́: á bɨgɨnə kɔŋ a ŋwɔn nɨ ŋwɔn ə. Zɛnə ka ɨ be ayi ntɨgə zɨ fi zɨ tse za mbáʼ ma ŋwaʼnɨnə a mbó gho; a nɨ ntɨgə za bɨgɨnə kwɛ́nə ntsi nɨ zɛrə ndɔgɨnɨ a mbiʼnə ghe.

⁶Akɔŋnɨ zen mbáʼ ma ghamnə mbɨ́ʼ a zɛrə a diʼ lá ngə́ bɨgɨnə mɨ zagɨ tsinə a mu ndzuʼnɨ ntɨgə Ŋwi ə. Ntɨgə za, adzaŋ za bən bɨtsum zuʼnə ndɔgɨnɨ a mbiʼnə, ɨ nɨ ngə́ bən bɨtsum mɨ zagɨ tsi a mu akɔŋnɨ ə.

⁷Bɨntamtɨ bə ghaʼnɨ ghɛnə a mu mbyi tsum, ɨbɛn ba bɨ se bem ngə́ Yeso Kristo a yén tso ŋwɔn mɨsɔŋ a ntsu lá. Abə́ŋ a ŋwɔn məza a nɨ ntamtɨ nkɨ mbe Ŋwɔn Kɨban Kristo ghe.

⁸A nɨ tiʼ lá ndə̌tú azən, taŋ á nɨ ghɨ nkeʼ sám a za nɨ faʼnə mbɨ́ʼ a zɛrə, lá ngɨ nkwarɨ mɨkyaŋnɨ ɨmən a nɨ́lónɨ́ ə.

⁹Ŋwɔn tsum wa mbáʼ a se ghɔŋ a mu za Kristo a díʼnɨ́, lá ntsa fəŋ a zɛrə, ka a tsi ayi nɨ Ŋwi ə. Ŋwɔn tsum wa a ghɔŋnɨ a mu ndiʼə zɨ Kristo, a tsi a mbúm bo Tarɨ nɨ Mɔn ə.

¹⁰Ma lan, be ŋwɔn tse a yen a mbó bən wa a se nɨ ndiʼə məzen yen, njimbɨʼ nɨ kwarɨ ayi a mu njwuʼ ɨtsən; á nɨ keʼ byi nyam ntɔŋtɨ ayi tsɛʼ tɔŋtɨnə.

¹¹Mbɨ́ʼ ngə́ ŋwɔn tsum wa a tɔ́ŋtɨ́nə́ awa, a tiʼ mbəŋ a ŋwɔn aku ɨwa a nye ɨnu tsɨ tɔmnɨnɨ tsa bo ghɨnə ghe.

¹²Ma tsi nɨ zə ghaʼnɨ be tɨ́sə́n a sóŋə́ a mbó bən, lá ma mɨ kaʼ baŋnɨ faʼ be a mu alárɨ́ aŋwaʼnɨ bo nkyi aŋwaʼnɨ; ma baŋnə ntsiŋə nɨ ntəm ɨtsum ɨ yen ghantɨ awən á bɨgɨnə ghamnɨ bɨgɨnə bɨgɨnə, taŋ á bɨgɨnə chi dorɨkɨ a nɨ́lónɨ́ ə.

¹³Ɨbɔ bɨ mɨma ɨwən wu mangye tsagə atɔ́ŋtɨ a mbó bɨŋ ə.