Read Ngemba Judɨ 1 Bible Online

Judɨ 1 - Ngemba bible

Judɨ 1

¹Aŋwaʼnɨ zen a lo a mbó me Judɨ, ngaŋ afaʼ Yeso Kristo, wa a kɨnɨ nkɨ mbe mɨma Jemsɨ ə. A ghěn a mbó ba Ŋwi a tsɔʼnə awa, bo ba bɨ tsínə́ a mu akɔŋnɨ a Ŋwingɔŋ Tarɨ, bɨ kə ndě awa a mbó Yeso Kristo:

²A Ŋwi a ghɨ á mɨlɨŋnɨ, mbɔnɨ abɔʼnɨ akɔŋnɨ tsi a mbó bən a nɨ́lónɨ́ ə.

³O bɨson ɨban, ma chyɛ́ ngɨə atsum za ma chínɨ́ ghɨ a ŋwaʼnə a mbó bən mbɨ́ʼ ɨloŋ wa bɨgɨnə bɨtsum tsinɨ nɨ wɛrə, a nkfu za ma kwáʼtɨ́nɨ́ ngə́ a bɔŋ á ma byi ŋwaʼnɨ a mbó bən ngwɔŋtɨ awən á nɨ ntǒkə́ ngěn nɨ mbyi mbɨ́ʼ abeməntəm za Ŋwi a nɨŋnə táʼ nkfu wa a ghɔŋnɨ nɨnkoŋ a mbó ɨbɛn ɨbyi lá.

⁴Mbɨ́ʼ ngə́ bɨtɨbeməŋwi bə tsɛrə lwɔnə nkon a tɨtərɨ bɨgɨnə ghe. Bo nɨ ɨbɛn ba bɨ twɛ́ntɨ́nɨ́ nkən wa mbɨ́ʼ abɔŋəntəm a Ŋwi ɨwɨgɨnə taŋ ɨ ghɨnɨ ɨnu ntɔrɨ ɨlɛbɨ ɨtsa, nkɨ mbe ɨbɛn ba bɨ tonɨ awa a Yeso Kristo, zɨ wa a nɨ tsɛʼ zɨzɨ wa a nɨ Tafaʼ abɔʼnɨ Maʼmbyí ɨwɨgɨnə lá. A ngúʼə ngúʼə Aŋwaʼnɨ a Ŋwi a kwɛ́nə ngam mbɨ́ʼ nɨsáʼ abɔʼnɨ ɨnɨŋ ngɨ́ʼ zen za bo kwarɨnə lá, ngə́ ɨ ghɨ fuə.

⁵Mbɨ́ʼ ngə́ nɨ baʼtɨ nji ɨnu tsiŋ ɨtsum ɨ zhinɨ lá, ma lǒ ɨ bə kwemtɨ a mbó bən adzaŋ za Maʼmbyí a láʼnɨ́ fɨ́gɨ́ ɨbɛn bɨ Izrai a mu ngɨ́ʼ, Alaʼ Gyibto, lá a nkfu ndzum a bə ntsənkɨ a ba bɨ sé mɨntəm ɨma a nye zɨ nɨŋə.

⁶Waʼtɨnə bɨtsen bɨ ndá bɨ Ŋwi ba bɨ sé ghɔŋ a mu ɨfɨʼ za mɨtən ɨma kɔʼnɨ nkuʼ ɨwu, lá mbaŋnɨ nyɛʼ adiʼ a nchyɛ aza lá: bɨ korɨ awa nɨ mɨnkɨ mɨ atɨŋə mə nɨnkoŋ a mu ndzumnɨ za ɨ tsinɨ a mbyishe, adiʼ wa Ŋwi a lɛnɨ awa ɨwu ntsǐŋ Njwi zɨ ngwi za bɨ ghɨnɨ sáʼ awa ɨ sóŋ ngə́ bo vwo ɨsáʼ lá.

⁷Waʼtɨnə a Sodom bo Gomora abɔʼnɨ ntáʼmbagə tsa tsɨ tsínɨ́ a kárɨ́kɨ́ tsɛrə, tsa ɨbɛn ɨba ghɨ́nɨ́ mɨnu tso bɨtsen bɨ ndá bɨ Ŋwi ba, ntiʼ nkɨ ngɨ ɨnu ntɔrɨ ɨlɛbɨ abɔʼnɨ mbɨŋnə a nye ɨnu ntɔrɨ ɨlɛbɨ tsa ka tsɨ tsi awa a mu mbɔm za bɨ káʼnɨ́ ɨbɛn: bo zě ngɨ́ʼ a mu ɨmugɨ nɨnkoŋ wa mbá a lá akwantɨ za a tsinɨ asaŋəsaŋ a mbó ŋwɔn tsum ə.

⁸Ndəŋndəŋ, ndzɛm nəzhwɨgɨnɨ kə́ ndyě bɨdiʼ bɨ aŋwaʼnɨ bɨ ɨchwenu məben, mbáʼ tsɨ ghɨnə bo ghɨnɨ mɨbvu a nye mbəmnye ɨtsa; bo wágɨ́nɨ́ mɨtən mɨ Ŋwi nkə́ ndzɔ̌m ɨdzúm tsa Ŋwi a káʼnɨ́ tsa tsɨ tsinɨ nɨ nɨfáŋ nkɨ ntsi atɨ́ lá.

⁹Tsɛʼ atú a bɨtsen bɨ ndá bɨ Ŋwi za a nɨ Makɛn lá, a sé a məzen ghɨə. A mu azɔŋ azhi bo Dəbɨrɨ, mbáʼ bo zɨ shwúŋnɨ́nɨ́ mbɨ́ʼ a ŋwɔn wa mɨ lɔgɨ akfú a Mǒse lá, Makɛn a sé zhwəŋtɨ a ndɔgɨ ndzɔm ɨ soŋ ngə́ Dəbɨrɨ a vwo ɨsáʼ nɨ zɛrə, lá wɛrə a sóŋ tsɛʼ ngə́, “A Maʼmbyí a ghamtɨ agho!”

¹⁰Lá ɨbɛn biŋ jintə anu atsum za ka bo zuʼ nkɨ nji awa a zɛrə nɨ ndzɔm; ɨnu mətsen tsa bo zhínə́ tɨgha bo yɛʼ tso ɨnyam mɨbaʼ, tsa tsɨ tsənkɨnə awa lá.

¹¹Wei ngɨ́ʼ zɨ ngwi a nye bo ghe! Bo zɔŋnə ɨbuʼ mɨku Kain[1] ə. Mbɨ́ʼ atú a nkáb bo nyɛʼtɨnɨ ɨtumbəm ɨtsa tsɨ ghɛn a mu ngɨ afənu za Balam a ghɨ́nə́. Bo tənə atú adzaŋ za Kɔra a tə́nɨ́, tso zɨ bɨ tsənkɨnə awa ghe.

¹²Ɨbɛn biŋ be lá tso achwuʼtɨ adiʼ zə nyaʼnɨnɨ a tɨtərɨ bən a nkfu za nɨ bomnkɨnɨ a ndzɨ́ mɨdzɨ[2] mɨ akɔŋnɨ, ndzɨə bɨŋ bo tsɛʼ tɨ mɨnya mɨ adɨrətú ə. Bo lə̌tú tsɛʼ nɨ ɨtumbəm ɨtsa ghe. Bo be lá tso mbaʼ za kɨfɛrɨ a tyíŋnə́ ngěn nɨ zɛrə, ɨ keʼ nɨ mbəŋ a ngyíŋə́ ghe. Bo be lá tso ɨtɨ tsa ka tsɨ nkónə́ awa mɨntam, ɨtɨ a nkfu alom tsa bɨ muʼtɨnə a nye mɨngaŋ ɨma, tsɨ kfokə.

¹³Bo be lá tso nkyiɛ yiŋənɛmə wu tən a mu sagɨrə wu ngwi, nɨ ɨnu adɨrətú ɨtsa tsa tsɨ kɔ́ʼnə́ tso mɨfuʼ ə. Bo be lá tso mɨndzɔŋ ma mɨ ghə́nkɨ́nə́, bo məba, ba Ŋwi a lɛnə adiʼ a mbó bo nɨnkoŋ a mu adiʼ a ndzumnɨ za ɨ fɨ́ŋnə́ ntsa mbó lá.

¹⁴A nɨ Ɛnɔkɨ[3], wa a yénɨ́ a nye mɨwə ma mɨ kúʼnɨ́ mi samba a ndɔgɨnə a nye Adam, wa a sóŋnɨ́ a za a ghɨnɨ fú a nye bo a ngúʼə ngúʼə ngə́: “Zɛnə, Maʼmbyí a mɨ yen nɨ bɨtsen bɨ ndá ɨbyi bə fɛmnɨ a nchwuʼ a nchwuʼ

¹⁵á bo yen nɨ nɨsáʼ a nye ŋwɔn tsum, ɨ nɨŋ ngɨ́ʼ a nye bo bɨtsum mbɨ́ʼ ɨnu bɨtɨbeməŋwi tsa bo ghɨnə ghe. Ŋwi a mɨ kɨ nɨŋ ngɨ́ʼ a nye ngaŋ ngɨ mɨbvu, mbe bɨtɨbeməŋwi mbɨ́ʼ mɨgham mɨ tɨbɔŋ mɨtsum ma bo ghamnə mbɨ́ʼ ayi ɛ!”

¹⁶Ɨbɛn biŋ zhwuʼnə tsɛʼ nkfu tsum nkə́ ngǎ ɨfərɨ ɨbɛn bə mɔʼɔ tsɛʼ nkfu tsum; bo zɔ̌ŋ ɨnu tsɨ tɔmnɨnɨ tsa mbəmnye ɨtsa lɔnə; bo tɛrə mbɨ́ʼ ɨtumbəm ɨtsa nkə́ sǒŋ ɨnu tsɨ shiʼnɨ mbɨ́ʼ ɨbɛn bə mɔʼɔ taŋ ɨ tsi nɨ ndóm ɨwa ghe.

¹⁷Lá bɨson ɨban, á nɨ waʼtɨ anu za ntóm Yeso tsɨ Maʼmbyí Yeso Kristo ɨwɨgɨnə sóŋnɨ́ a mbó bən a mbyi ɛ.

¹⁸Bo sóŋ a mbó bən ngə́, “Njwi ntsɨrɨndzum ghɨ ngyén, muŋ ɨbɛn ghɨ fú a ɨshe ba bɨ ghɨ werɨ awɨŋ ə. Nə ghɨ bé ɨbɛn ba bɨ zɔŋnɨ ɨnu tsɨ tɔmnɨnɨ tsa mbəmnye ɨtsa lɔnə tsa ka Ŋwi a bemtɨ ayi lá.”

¹⁹Nə nɨ ɨdzaŋ ɨbɛn tsa tsɨ ghɨnə ayɛbtɨ a tsinə, ɨbɛn ba bɨ zɔŋnɨ ɨnu tsa mbəmnye ɨtsa sóŋnə́ ngə́ á bo ghɨ, ɨbɛn ba ka bo tsi awa nɨ Azhwi a Ŋwi ə.

²⁰Lá bən nə bɨson ɨban, á nɨ nkwi ɨ kwinɨ a mu abeməntəm azən za a fɛmnɨ ntsa atsum lá. A nɨ ntsáʼtə́ a Ŋwi adzaŋ za Azhwi zə Fɛmnɨ a tsɨŋnɨnə awən,

²¹á ntsi ɨzɨŋ diʼ ngə́ Ŋwi a kɔŋ awən, adzaŋ za nɨ tsenə a Maʼmbyí Yeso Kristo ɨwɨgɨnə ngə́ á gha ntsi ntən nɨnkoŋ a mbó bən a mu akômɨlɨŋnɨ azhi lá.

²²A nɨ ndiʼə akômɨlɨŋnɨ a mbó ba bɨ mə́ŋnɨ́nə́;

²³á nɨ loŋ a bə mɔʼɔ a ntsǎ a ndzum adzaŋ za nɨ mɨ fɨgɨ awa a mu ɨmugɨ wa nɨ adaʼ; a mbó bə mɔʼɔ, á nɨ diʼ akômɨlɨŋnɨ ɨ nyamtɨ nɨ nɨbɔgɨ, lá ɨ nyaŋ ɨtsɛʼ ɨtsa, tsa bɨ shwiʼnɨ nɨ mɨbvu ma mbəmnye lɔnə lá.

²⁴A mbó Ŋwi, zɨ wa a chinɨ kɨnkɨ awən á nɨ keʼ vwo a mu ɨbvu, ɨ kɨ yen nɨ bən tɨ afənu a mu nɨdorɨ a ɨshi nɨfáŋ ɨni —

²⁵a mbó Ŋwi, wa a nunɨ zɨzɨ, ndoŋ ɨwɨgɨnə, ɨ tsa a ndzum Yeso Kristo Maʼmbyí ɨwɨgɨnə, á nɨfáŋ, nɨfɔ, adaʼ abɔʼnɨ mɨtən tsi wəmbo, ɨ lɔgɨnɨ bɔŋ á mbyi biʼnɨ, tɨtsɔŋnɨ, ɨ ghɛn gha nɨnkoŋ ə! A be lá.