Read Ngemba Nkyɛʼə 1 Bible Online

Nkyɛʼə 1 - Ngemba bible

Nkyɛʼə 1

¹Aŋwaʼnɨ zen a lá aŋwaʼnɨ za bɨ ŋwaʼnɨnɨ ɨnu tsa Yeso Kristo a Kyɛ́ʼnɨ́ wə mu ə. Ŋwi a ghá nkyɛʼə məzen wəmbo lá taŋ ɨ kyɛʼ a mbó ɨbɛn ba bɨ zɔŋnə ayi ɨnu tsa tsɨ mɨ zagɨ fu mbáʼ abaŋ a se bə satə. Kristo a fɨ́ʼtɨ́ ɨnu mətsen a mbó ngaŋ afaʼ ɨzhi Yoane ntsa lá a ndzum ntsagɨ ntsendá ɨzhi a mbó zɨ,

²Yoane a tiʼ mbe atɛmə-ndzě a nye atsum za zɨə zɛnə ghe. Nə nɨ aŋwaʼnɨ za wɛrə a ŋwaʼnɨnɨ mbɨ́ʼ nkən wa ɨ lonɨ a mbó Ŋwi abɔʼnɨ nkənu za wɛrə a zɛ́nɨ́ mbɨ́ʼ a Yeso Kristo ghe.

³Ɨfɔgə tsi a mbó ŋwɔn wa a tɔŋnɨ nkən wen wa ɨ lonɨ a mbó Ŋwi lá. Ɨfɔgə kɨ ntsi a mbó ŋwɔn wa a zúʼnə́ nkə́ ndzúʼnə́ anu za bɨ ŋwaʼnɨnɨ a mu aŋwaʼnɨ ziŋ ə! Mbɨ́ʼ ngə́ nkfu zɨ wu tiʼ abó mbáʼ ɨnu tsiŋ ɨtsum mɨ fuə.

⁴Ndo a mbó Yoane ngěn a mbó ndáŋwi tsa tsi samba tsa tsɨ tsinɨ a mu mbuʼ Esha lá. A abɔŋəntəm abɔʼnɨ mbɔnɨ tsi a mbó bən ndo a mbó Ŋwi, zɨ wa a benɨ, wa a bénɨ́, wa a lo láʼ yen, nkɨ ndo a mbó ɨzhwi tsa tsi samba tsa tsɨ tsinɨ a ɨshi abərɨ azhi,

⁵nkɨ ndo a mbó Yeso Kristo, atɛmə-ndzě wa a faʼnə tsɛʼ nɨ táʼ ntəm, zɨ wa a nɨ ntsambyi ŋwɔn á bɨ zhwemnɨ a mbó nɨvwo, zɨ wa a kɨ́nə́ nkə́ saʼə bɨfɔ bɨ atuəshe zen lá. Wɛrə a kɔŋ awɨgɨnə ghe, wɛrə a kɨnə nkɨ nkwarɨ awɨgɨnə a mbó mɨbvu ɨmɨgɨnə a ntsǎ a ndzum alɛm azhi za wɛrə a chwírɨ́nɨ́ a nkfu bɨgɨnə,

⁶ngɨ awɨgɨnə bɨgɨnə tiʼ nɨfɔ na ɨbɛn ɨbyi nɨ bɨntumshe, ngə́ á bɨ faʼə a mbó Ŋwi ɨyi wa a kɨnɨ nkɨ mbe Tarɨ lá. A nɨfáŋ bo mɨtən tsi a mbó Yeso Kristo nɨnkoŋ nɨnkoŋ ə! A be lá.

⁷Ze azo, wɛrə a yiŋə atú mbaʼ ə! Ŋwɔn tsum a mɨ zɛn ayi, ɨ kwiʼtɨ ɨbɛn ba bɨ sɔ́btɨ́nɨ́ ayi lá. Ɨbɛn bɨtsum atuəshe mɨ zɛʼ ayi ɛ. Nə nɨ adzaŋ za a ghɨnɨ be! A be lá.

⁸Maʼmbyí Ŋwi Tamɨtən Mɨtsum, zɨ wa a benɨ, wa a bénɨ́, wa a lo láʼ yen, a soŋ ngə́, “Ma nɨ ntsambyi nkɨ mbe ntsɨrɨndzum ə.”

⁹A nɨ me Yoane, mɨma ɨwɨŋ ə. Me tso táʼ ŋwɔn wa a zɔŋnə a Yeso, ma nɨ ŋwɔn aku ɨwən a nye adzaŋ za ma chigɨnɨ ntəm a mu ngɨ́ʼ za ɨ yenə a mbó ɨbɛn ba bɨ tsinɨ a mu nɨfɔ ɨni ɛ. Bɨ tságɨ́ aghan a Batɨmɔsɨ, adiʼ za nkyi karɨsɨnɨ mbɨ́ʼ ngə́ ma sóŋ anu a Ŋwi abɔʼnɨ ɨnu tsa bɨgɨ zɛ́nɨ́ mbɨ́ʼ a Yeso ghe.

¹⁰A Njwi Alaʼ Ŋwi, Azhwi zə Fɛmnɨ a zúmtɨ́ aghan, ma zúʼ nji zɨ ntən zɨ tse za ɨ ghámnɨ́ a ndzum me tso ntaŋ ə.

¹¹Nji za ɨ sóŋ ngə́, “Ŋwaʼnɨ ɨnu tsa o zɛ́nə́, ntsagɨ aŋwaʼnɨ zə wu a mbó ndáŋwi tsa tsɨ tsinɨ a mu ntáʼmbagə tsɨ wi tsi samba mbáʼ mɨkum ɨma nɨ; Ɛfɛso, Smaina, Bɛgamum, Tiatira, Sadisɨ, Filadɛlfia abɔʼnɨ Laodisia ghe.”

¹²Ma bə́ŋtɨ́ aghan a ndzé ŋwɔn wa a kɨ́nə́ ngamə a mbó me, ntiʼ ndzɛn ɨtɛkɨ nkaʼ tsi samba tsa bɨ nyɛ́tɨ́nɨ́ nɨ ŋwaʼŋwaʼ,

¹³a tɨtərɨ ɨtɛkɨ tsa, azúm zə tse a tɛ́m ɨwu tso ŋwɔn mɨsɔŋ a ntsu, ngwəgɨ a tɔgɨ a shiʼ mɔmtɨ mɨku ɨmyi, ɨkɔbɨ ŋwaʼŋwaʼ ɨ wafɨ nɨgo ɨni ɛ.

¹⁴Ɨnyɔŋ atú ɨchi kə́ fúgə́ ngə́ bú, ɨmɨgɨ ɨmyi kwarɨnə tso ɨmugɨ;

¹⁵mɨku ɨmyi kə́ ŋwankə nkə́ ndzínkə́ tso broŋsɨ wa bɨ sugɨnɨ a mu alam, nji ɨzhi dzuʼnə tso adiʼ a nkyi zə vwonə.

¹⁶A tíʼtɨ́ mɨdzɔŋ mi samba a mu abó azhi zə maʼə, lumban ndzum ɨtsum wu ntsɛgɨnɨ a fú wə ɨmu ntsu ə. Ɨshi ɨyi kə́ ŋwankə tso ntsu nɨnyom a ntənɨ nyom ə.

¹⁷Mbáʼ ma zɛ́nɨ́ ayi lá, ngvo a mɨku zɨ tso akfú a ŋwɔn ə. A nyɔ́ŋ abó azhi zə maʼə a ɨnye me ɨ soŋ ngə́, “Koʼ bɔgə! Ma nɨ ntsambyi ŋwɔn nkɨ mbe ntsɨrɨndzum ŋwɔn ə.

¹⁸A nɨ me wa ma ghánɨ́ ntsi ntɨŋ ə! Ma kɨ kfó lá tɨtsɔŋnɨ ma tsi ntən nɨnkoŋ nɨnkoŋ ə. Ma tsi nɨ mɨtən atú nɨvwo abɔʼnɨ mbyi ɨkfú ɨbɛn ə.

¹⁹Tiʼ ŋwaʼnɨ ɨnu tsa o zɛ́nə́ ghe; ɨnu tsa tsɨ fúnə́ tɨtsɔŋnɨ abɔʼnɨ tsa tsɨ ghɨnɨ fuə.

²⁰Anu a nkubə za mɨndzɔŋ men mi samba ma o zɛ́nə́ a mu abó azan zə maʼə abɔʼnɨ ɨtɛkɨ nkaʼ tsen tsi samba tsa bɨ nyɛtɨnɨ nɨ ŋwaʼŋwaʼ a diʼnɨ, a nɨ ngə́: mɨndzɔŋ men mi samba be lá ɨtsendá ndáŋwi tsa tsi samba, ɨtɛkɨ nkaʼ tsen tsi samba be ndáŋwi tsa tsi samba ghe.”