Read Ngemba Nkyɛʼə 10 Bible Online

Nkyɛʼə 10 - Ngemba bible

Nkyɛʼə 10

¹Ma tíʼ ndzɛ́n a təkɔʼ bɨ ntsendá Ŋwi zɨ mɔʼɔ za ɨ fúnɨ́ a fɔməbvurə ɨ shiʼə ngyíŋə́ ghe. Mbaʼ kúbɨ́nɨ́ ayi tsɛʼ tsum, tánɨ́mɨshigɨ a karɨsɨ atú azhi; ɨshi ɨyi be tso nɨnyom, mɨku ɨmyi be tso ntɛ́ʼ ɨmugɨ ə.

²Wɛrə a tsí nɨ mɨnyi mɨ aŋwaʼnɨ zə karɨnɨ zə ŋaʼnɨnɨ a mu abó azhi ɛ. Wɛrə a tɛ́gɨ́ aku azhi zə maʼə atú sagɨrə wu ngwi, ntɛgɨ aku azhi zə ntə́ŋ atú ɨshe.

³Wɛrə a ghám nji ɨzhi kɔʼ atɨ́ tso ngə́ afon a múʼə́ ghe. A mɛtɨnə a ngamə, mbəŋ tsə bɨʼkɨnɨ tsa tsi samba chwɨgɨ nɨ ɨmúʼə ghe.

⁴Tsɛʼ mbáʼ mbəŋ tsə bɨʼkɨnɨ tsa tsi samba múʼnɨ́, ma kə́ ndǒ ɨ ŋwaʼnə ghe. Lá ma zúʼ nji zɨ tse za ɨ lónɨ́ a fɔməbvurə ɨ soŋ ngə́, “Lɛn a nkubə anu za mbəŋ tsə bɨʼkɨnɨ tsa tsi samba soŋnə; njimbɨʼ o ŋwaʼnɨ a zɛrə ghe!”

⁵Ntsendá Ŋwi za ɨ tɛ́gɨ́nɨ́ a táʼ aku ɨyi atú sagɨrə wu ngwi nɨ táʼ wu mɔʼɔ atú ɨshe lá tíʼ ntsɔ́ʼ abó azhi zə maʼə atɨ́ a ndóm fɔməbvurə

⁶ntiʼ nkan nɨ ɨkum Ŋwi, zɨ wa a tsinɨ atú ntən nɨnkoŋ nɨnkoŋ, zɨ wa a káʼnɨ́ fɔməbvurə, atuəshe abɔʼnɨ sagɨrə wu ngwi, abɔʼnɨ ɨdzúm ɨtsum tsa tsɨ tsinɨ a mu tsɛrə lá. Ntsendá Ŋwi za sóŋ ngə́, “Bɨ mɨ keʼ nkfu bə ntsəŋə!

⁷Lá a nkfu za Ntsendá Ŋwi za ɨ zɔ́ŋtɨ́nɨ́ a nye ɨdiʼ tsi samba ɨ tɔŋnɨ ɨzhi ntaŋ, Ŋwi a mɨ ghɨ á akaʼ azhi za a lɛ́nɨ́ a nkubə lɔgɨ adiʼ, tsɛʼ adzaŋ za a chwítɨ́nɨ́ a mbó ngaŋ afaʼ ɨchi, mbe ntóm Ŋwi lá.”

⁸Ma tíʼ nkwiʼ ndzuʼ nji za ma kwɛ́nɨ́ ndzúʼ ɨ lo a fɔməbvurə ngamə a mbó me lá ɨ bə nkwiʼ ngam a mbó me, ɨ soŋ ngə́, “Ghɛn ndɔgɨ aŋwaʼnɨ zə karɨnɨ za bɨ ŋaʼnɨ, za a tsinɨ a mu abó Ntsendá Ŋwi za ɨ tɛ́gɨ́nɨ́ a táʼ aku ɨyi atú sagɨrə wu ngwi nɨ táʼ wu mɔʼɔ atú ɨshe lá.”

⁹Ma ghɛ́n a mbó Ntsendá Ŋwi za ɨ soŋ wəmbo ngə́ á ɨ gha a mɨnyi mɨ aŋwaʼnɨ zə karɨnɨ za a mbó me ghe. Ɨ sóŋ a mbó me ngə́, “Ko a zɛrə nkfurə; a mɨ lwi a nkfu za a shiʼnɨ nkon a mɨto gho, lá a mu ntsu gho a mɨ ləm tso ɨnwu ə.”

¹⁰Ma kwárɨ́ a mɨnyi mɨ aŋwaʼnɨ zə karɨnɨ za a mu abó azhi, nkfurɨ a zɛrə, a ləm tso ɨnwu a mu ntsu me ghe. Lá ma myinə a zɛrə, a bəŋ ntiʼ ndwi ɨ lwinɨ a mɨto me ghe.

¹¹Bɨ tíʼ sóŋ a mbó me ngə́, “O mɨ zagɨ soŋ nkən Ŋwi mbɨ́ʼ a za a ghɨnɨ fú bɔŋ á nkfu ɨ kuʼ a mbo ɨtsé tsɨ wi, ngwəgɨ ŋwɔn mɨsɔŋ a ntsu, mɨgham abɔʼnɨ bɨfɔ ghe.”