Read Ngemba Nkyɛʼə 13 Bible Online

Nkyɛʼə 13 - Ngemba bible

Nkyɛʼə 13

¹Ma tíʼ ndzɛ́n ɨnyam mɨbaʼ zɨ tse ɨ fuənə a mu sagɨrə wu ngwi wa ngyíŋə́ ghe. Ɨ tsí nɨ mɨndɔ́ŋ mi nɨghúm abɔʼnɨ ɨtú tsi samba ghe. Atú mɨndɔ́ŋ ma mɨtsum a tsí ɨsáʼfɔ, atú ɨtú tsa ɨtsum a tsí ɨkum wa ɨ zɔmnə a Ŋwi ə.

²Ɨnyam mɨbaʼ za fí angwabaʼ, mɨku ɨmyi be tso mə bɛ, ntsu ɨyi fi ntsu afon ə. Dragɔn a tíʼ ngá adaʼ azhi, abərɨ azhi abɔʼnɨ mɨtən ɨmyi ma mɨ ghaʼnɨ lá a mbó ɨnyam mɨbaʼ za.

³Atú a ɨnyam mɨbaʼ za zə mɔʼɔ a fí tso a tsí nɨ alagɨ za a kɨ chinɨ ghɨ a wɛrə a kfo, lá alagɨ za a mínə ghe. A tíʼ nkɨʼnɨ ɨbɛn bɨtsum atuəshe, bo tiʼə ndzɔ̌ŋ ɨnyam mɨbaʼ za.

⁴Ŋwɔn tsum a ghúʼsɨ́ a dragɔn mbɨ́ʼ ngə́ wɛrə a ghánə mɨtən ɨmyi a mbó ɨnyam mɨbaʼ za. Bo kɨ́ ngúʼsɨ́ ɨnyam mɨbaʼ za ɨ soŋə ngə́, “Ɨwa chi be tso ɨnyam mɨbaʼ le? Ɨwa chi tó a zɛrə le?”

⁵Bɨ nyɛ́ʼtɨ́ ngə́ á ɨnyam mɨbaʼ za gham ɨnu ɨŋuʼ ɨnye tsa tsɨ zɔmnə a Ŋwi, ntiʼ nkɨ nyɛʼtɨ ngə́ á wɛrə a tsi nɨ mɨtən a sáʼə atú bɨsaŋ mɨghúm mi nɨkwa nɨ ntsɔb bá ghe.

⁶Ɨnyam mɨbaʼ za bíʼnɨ́ ntiʼə ndzɔmə a Ŋwi, ɨkum ɨyi, adiʼ za wɛrə a tsínə́ abɔʼnɨ ŋwɔn tsum wa a tsínə́ a fɔməbvurə ghe.

⁷Bɨ nyɛ́ʼtɨ́ ngə́ á wɛrə a tó ɨbɛn bɨ Ŋwi, ɨ kɨ gháʼ awa ghe. Bɨ ghá mɨtən ngə́ á wɛrə a sáʼ atsé zə wi atsum, alaʼ atsum, nɨgham nɨtsum nɨ ngwəgɨ ŋwɔn mɨsɔŋ a ntsu tsum ə.

⁸Ɨbɛn bɨtsum atuəshe mɨ ghuʼsɨ ayi, lá ɨbɛn ba bɨ ŋwáʼnɨ́nɨ́ mɨkum ɨma bɔŋ ɨ káʼ atuəshe a mu aŋwaʼnɨ a ba bɨ tsinɨ atú ntən, aŋwaʼnɨ a Mɔn Mbyindzɨ wa bɨ zhwítɨ́nɨ́ lá, məbiŋ mɨ keʼ ayi ghuʼsə.

⁹“Zɨ wa a tsinɨ nɨ ɨtoŋnɨ á zhwiʼtə!

¹⁰Ŋwɔn tsum wa bɨ tsinɨ nɨ nko, bɨ mɨ zagɨ ko ayi ɛ; ŋwɔn tsum wa bɨ tsinɨ nɨ njwitə nɨ lumban, bɨ mɨ zagɨ zhwitɨ ayi nɨ lumban ə. A tiʼə ndiʼə lá ngə́ á ɨbɛn bɨ Ŋwi bɨtsum tsi nɨ achigəntəm abɔʼnɨ abeməntəm ə.”

¹¹Ma tíʼ nkwiʼ ndzɛ́n ɨnyam mɨbaʼ zɨ mɔʼɔ za ɨ fúnɨ́ a mu tɨshe ə. Ɨ tsí nɨ mɨndɔ́ŋ mi mɨmbá tso mə mɔn mbyindzɨ, nkə́ ngámə́ tso dragɔn ə.

¹²Wɛrə a fáʼ nɨ mɨtən mə ghaʼnɨ mə ntsambyi ɨnyam mɨbaʼ za adiʼ wa ntsambyi ɨnyam mɨbaʼ za tsínɨ́ ɨwu ə. Wɛrə a nyə́m atuəshe abɔʼnɨ ɨbɛn bɨtsum ba bɨ tsínə́ ɨwu ngə́ á bɨ ghuʼsɨ ntsambyi ɨnyam mɨbaʼ za, za alagɨ azhi a mínə lá.

¹³Ɨnyam mɨbaʼ za ɨ zɔ́ŋtɨ́nɨ́ a nye ɨdiʼ tsi bá lá ghɨ́ ɨnu tsɨ yerɨnɨ-yerɨnɨ tsə wi ə; wɛrə a ghɨ́ ɨmugɨ fu a fɔməbvurə ɨ shiʼ ngyen atuəshe, ŋwɔn tsum a zěnə ghe.

¹⁴Wɛrə a támtɨ́ a ŋwɔn tsum wa a tsínə́ atuəshe ntsa a ndzum ɨnu tsɨ yerɨnɨ-yerɨnɨ tsa Ŋwi a nyɛ́ʼtɨ́nɨ́ ngə́ á wɛrə a ghɨ a ɨshi ntsambyi ɨnyam mɨbaʼ za. Ɨnyam mɨbaʼ za sóŋ a mbó bo ngə́ á bo bɔm a mɔn abe a nkɔ́ʼsɨ́ ɨnyam mɨbaʼ za bɨ lɛ́mnɨ́ nɨ lumban lá ɨ bvurɨ ntsi atú ntən lá atɨ́ ə.

¹⁵Bɨ nyɛ́ʼtɨ́ ngə́ á ɨnyam mɨbaʼ za ɨ zɔ́ŋtɨ́nɨ́ a nye ɨdiʼ tsi bá lá ɨ zhwi ntsi ntən a mu mɔn abe ntsambyi ɨnyam mɨbaʼ za, taŋ á mɔn abe wa chi gham ɨ kɨ zhwitɨ a ŋwɔn tsum wa a mɨ keʼ ayi ghuʼsə.

¹⁶Ɨnyam mɨbaʼ za ɨ nyə́m a ŋwɔn tsum ə, bə kɨʼnɨ abɔʼnɨ bə wi, ngaŋ nkáb abɔʼnɨ ngaŋ afúm, ɨbuʼ abɔʼnɨ ɨbɛn nɨ ɨtú ɨtsa ngə́ á bɨ nɨŋ alyigɨ a mu mbó ɨma mə maʼə kə a mɨdzenɨ bo ghe.

¹⁷Ŋwɔn tse a kɨ chi keʼ zón kə ɨ fen tɨgha a tsi nɨ alyigɨ məzen, alyigɨ za a be lá ɨkum ɨnyam mɨbaʼ za kə nkwaʼə za ɨ tɛmnɨ adiʼ ɨkum ɨyi lá.

¹⁸A tiʼə ndiʼə lá ngə́ á ŋwɔn tsum a tsi nɨ zóŋ ə. Ŋwɔn tsum wa a yigɨnɨnɨ a chi zhi anu za nkwaʼə ɨnyam mɨbaʼ za ɨ diʼnə, mbɨ́ʼ ngə́ nkwaʼə za ɨ tɛm lá a nye ɨkum ŋwɔn mɨsɔŋ a ntsu wu tse ghe. Nkwaʼə za lá nkɨ tsi ntugə nɨ mɨghúm mi ntugə nɨ ntsɔb ntugə (666) ghe.