Read Ngemba Nkyɛʼə 18 Bible Online

Nkyɛʼə 18 - Ngemba bible

Nkyɛʼə 18

¹Məzen a tsanə, ma zɛn ntsendá Ŋwi zɨ mɔʼɔ ɨ fu a fɔməbvurə ɨ shiʼə ngyiŋə ghe. Wɛrə a tsí nɨ mɨtən mə wi, nkaʼ wu fú wu nɨbɔŋ wa ɨ kɨ́nə́ fúə wə ɨnye ghɨ́ atuəshe a tiʼə fúgə́ ghe.

²Wɛrə a tɔ́nkɨ́ nɨ nji zɨ ntən ngə́: “A wa bɨ tsənkɨnə ghe! Bɨ tsənkɨ a Babilɔn wu Ngwi ə! Bɨdzɨŋ abɔʼnɨ ɨzhwi tɨbɔŋ chyɛ̌ wə mu tɨtsɔŋnɨ; ɨbə́ŋ bɨsɨ́ŋ bə nyaʼnɨnɨ ba bɨ kɨnɨ nkɨ mban chyɛ̌ wə mu ə.

³Mbɨ́ʼ ngə́ ɨlaʼ ɨtsum nonə mɨluʼ ɨmyi ɛ — mɨluʼ mə tən ma mɨ ghɨnə bo ghɨnɨ ɨnu ntɔrɨ ɨlɛbɨ bo bo ghe. Bɨfɔ bɨ atuəshe tɔ́rɨ́ ɨlɛbɨ ɨtsa bo zɨ, bɨntaŋ mɨtan bɨ atuəshe tiʼ nkɨ ntsi nɨ nkáb mbɨ́ʼ ngə́ wɛrə a lǒ nchyɛ̌ nɨ ɨdzúm tə́ nzhwúrə́ ghe.”

⁴Ma tíʼ ndzúʼ nji zɨ mɔʼɔ za ɨ lónɨ́ a fɔməbvurə ɨ soŋənə ngə́: “Ɨbɛn ɨban, á nɨ fu ngyiŋə! Nɨ mɨ zagɨ keʼ tsi nɨ anu a ngɨə nɨ ɨbvu ɨyi ɛ; taŋ á nɨ keʼ tsi nɨ anu a ngɨə nɨ ɨnɨŋ ngɨ́ʼ ɨzhi ɛ!

⁵Mbɨ́ʼ ngə́ bɨ kwɛʼ mɨbvu ɨmyi mɨ kɔʼ ngɛn mɔmtɨ fɔməbvurə, Ka Ŋwi a lɨgɨnɨnə ayi ɨnu tsɨ tɔmnɨnɨ tsa wɛrə a ghɨnə ghe.

⁶A nɨ ghɨ wə ɨnye ndəŋndəŋ ɨnu tsɨ tɔmnɨnɨ tsa wɛrə a ghɨnə a nye bɨŋ ə; á nɨ tfútɨ́ mbɔʼ nkfu tsi bá a nye ɨnu tsa wɛrə a ghɨnə ghe. A nɨ nɨŋ a mu ndɔ́ŋ ɨzhi mɨluʼ ma mɨ tənɨ nkfu tsi bá ntsa mɨluʼ ma wɛrə a kyáŋtɨ́nɨ́ a mbó bɨŋ ə.

⁷A nɨ gha ndəŋndəŋ ngɨ́ʼ abɔʼnɨ asɔbɨnɨ a mbó wɛrə á tsɨ kɔʼ nkuʼ ɨfɨʼ za wɛrə a ghánɨ́ nɨfáŋ abɔʼnɨ mbɔtəte a mbó atuəmbəm azhi lá. Mbɨ́ʼ ngə́ wɛrə a sóŋə́ a mbó atuəmbəm azhi ngə́: ‹Me mangye wa a sáʼnɨ́ ɨbɛn, ma shiʼtɨ ntsi ɨghə! Ka ma be aghan nkfugɨ mangye, ma láʼ ka asɔbɨnɨ zhyɛ!›

⁸Mbɨ́ʼ a məzen, atú táʼ njwi, bɨ mɨ chwirɨ ngɨ́ʼ wə ɨnye tso mɨghɔ, asɔbɨnɨ abɔʼnɨ mɨchwinɨ ə. Bɨ mɨ tɔn ayi nɨ ɨmugɨ mbɨ́ʼ ngə́ Maʼmbyí Ŋwi wa a tsɔ́ʼnə́ a mu ntəm zɨ a mbúʼ ɨfam wətú a tsi nɨ mɨtən ə.”

⁹Bɨfɔ bɨ atuəshe ba bɨ ghɨ́nɨ́ ɨnu ntɔrɨ ɨlɛbɨ bo bo abɔʼnɨ nchyɛ̌ nɨ ɨdzúm tə́ nzhwúrə́ lá mɨ zɛʼ ɨ kɨ bugɨ mbɨ́ʼ ntáʼmbagə zɨ ngwi məzen a nkfu za bo zɛnɨ fɨndyiʼ fuənə a nye ndwa ɨmugɨ za ɨ tɔnə a zɛrə ghe.

¹⁰Bo mɨ tɛm nəghagɨ nəghagɨ mbɨ́ʼ ngə́ ka bo ndǒ awa a nchyɛ́ nɨ anu nɨ ndzě ngɨ́ʼ ɨzhi ɛ. Bo mɨ soŋ ngə́, “Zɛʼnə! Nɨ zɛʼ mbɨ́ʼ ntáʼmbagə wu wiəwi Babilɔn! Gho ntáʼmbagə wu wiəwi Babilɔn, tsɛʼ a nye táʼ nyom Ŋwi a nɨŋnə ngɨ́ʼ a nye gho ghe!”

¹¹Bɨntaŋ mɨtan bɨ atuəshe mɨ kɨ zɛʼ kɨ bugɨ mbɨ́ʼ ayi, mbɨ́ʼ ngə́ ka ŋwɔn tse mbɨ́ŋə́ nkwiʼə ndzúŋə́ ayi ɨdzúm mɨtan ɨtsa ghe;

¹²ka ŋwɔn tse mbɨ́ŋə́ ndzúŋə́ ayi a ŋwaʼŋwaʼ ɨwa, tsə́ŋtsə́ŋ ɨwa, ngɔʼ tsə ŋwenɨnɨ ɨtsa, mbaŋətuʼ ɨtsa; ɨtsɛʼ ɨtɨŋndvuŋ tso linɛn bo sɨlɨk tsa bɨ lamnɨ nɨ ɨkan bɔbəl abɔʼnɨ ɨkan wu baŋnɨ; ɨbə́ŋ ɨtɨ ɨtɨŋndvuŋ ɨtsum abɔʼnɨ ɨbə́ŋ ɨdzúm ɨtsum tsa bɨ nyɛtɨnɨ nɨ nɨsɔŋ nɨ ɨsɛn, tsɨ mɔʼɔ nɨ ɨtɨ ɨtɨŋndvuŋ, broŋsɨ, atɨŋə abɔʼnɨ ngɔʼ atɨŋndvuŋ za bɨ tɔ́ŋnə́ ngə́ mabəl;

¹³ɨdzúm tso sinamɔnɨ, bɨnyuʼtə, alyɛn, mɨr, frankɨnsɛnsɨ; mɨluʼ abɔʼnɨ mɨvwurɨ mɨ olif, abán zə ghɔʼnɨ abɔʼnɨ mɨsaŋ, bɨnkɔʼndzum abɔʼnɨ mbyindzɨ, ɨnyamənkárə́ abɔʼnɨ ɨbáŋ tsa ɨnyamənkárə́ shwuŋnə, ɨbuʼ abɔʼnɨ ɨbɛn bə mɔʼɔ ba bɨ konɨ taŋ ɨ fen awa tso ɨbuʼ ə.

¹⁴Bɨntaŋ mɨtan ba sóŋə́ wəmbo ngə́, “Ɨdzúm tsɨ shiʼnɨ ɨtsum tsa o kɨ́nə́ ndǒ nchyɛ nɨ tsɛrə byekɨnə, afuʼ azo atsum abɔʼnɨ nɨbɔŋ ɨno ghɛnə ayi, o láʼ koʼ a tsɛrə bə ndze!”

¹⁵Bɨntaŋ mɨtan ba bɨ bénɨ́ ngaŋ nkáb a mu ntaŋ mɨtan a mu ntáʼmbagə wu wi wa, mɨ tɛm nəghagɨ, mbɨ́ʼ ngə́ ka bo ndǒ awa a nchyɛ́ nɨ anu nɨ ndzě ngɨ́ʼ ɨzhi ɛ. Bo mɨ zɛʼ ɨ kɨ bugɨ,

¹⁶ɨ soŋ ngə́, “Zɛʼnə! Nɨ zɛʼ mbɨ́ʼ ntáʼmbagə wu wiəwi ə! Wɛrə a kə́ ngwəgɨ ɨtsɛʼ linɛn tsa tsɨ tsínɨ́ nɨ ɨkan bɔbəl nɨ wu baŋnɨ nkə́ nkúbɨ́nɨ́ ɨnye ɨzhi nɨ ɨdzúm mɨsom ŋwaʼŋwaʼ, ngɔʼ tsə ŋwenɨnɨ abɔʼnɨ mbaŋətuʼ tsa tsɨ nɨ ngɔʼ atɨŋndvuŋ ə.

¹⁷Tsɛʼ a nye táʼ nyom wɛrə a byɛgɨnə afuʼ azhi atsum ə!” Bɨtamandóm ɨbáŋ nkyi bɨtsum, ɨbɛn bɨ nɨyen bɨtsum a mu ɨbáŋ nkyi, bɨntyiŋ ɨbáŋ nkyi bɨtsum abɔʼnɨ ɨbɛn bɨtsum ba bɨ táŋnə́ a mɨtan a mu sagɨrə wu ngwi, tɛ́m nəghagɨ,

¹⁸ntó a kɨzɔb adzaŋ za bo zɛ́nɨ́ fɨndyiʼ fuənə a nye ndwa ɨmugɨ za ɨ tɔ́nɨ́ a wɛrə ɨ sóŋə́ ngə́: “Ntáʼmbagə wu wi tse lonə mbvurɨ tɨ be tso ntáʼmbagə wu wiəwi wiŋ ə!”

¹⁹Bo fúʼ ɨtú ɨtsa nɨ abvuŋnɨ a ndiʼ adzə́ŋnɨ aza, ndzɛʼə nkə́ mbúgə́ ɨ sóŋə́ ngə́, “Zɛʼnə! Nɨ zɛʼ mbɨ́ʼ ntáʼmbagə wu wiəwi wiŋ ə! Wɛrə nɨ ntáʼmbagə wu wi wa ɨbɛn bɨtsum ba bɨ tsinɨ nɨ ɨbáŋ nkyi tsa tsɨ yenə a mu sagɨrə wu ngwi bénɨ́ ngaŋ nkáb mbɨ́ʼ ntaŋ mɨtan bo bo ghe! Tsɛʼ a nye táʼ nyom wɛrə a byɛgɨnə azúm atsum ə.”

²⁰A ba bɨ tsinɨ a fɔməbvurə dorɨkɨ mbɨ́ʼ adzaŋ za bɨ tsənkɨnɨ a wɛrə ghe! A ɨbɛn bɨ Ŋwi, ntóm Yeso abɔʼnɨ ntóm Ŋwi dorɨkə! Mbɨ́ʼ ngə́ Ŋwi a chɛrɨnɨ ɨsáʼ ngə́ wɛrə a vwo ɨsáʼ lá mbɨ́ʼ anu za wɛrə a ghɨ́nɨ́ a nye bɨŋ ə.

²¹Təkɔʼ bɨ ntsendá Ŋwi zɨ tse tíʼ mbyé ngɔʼ abán zɨ faŋnɨ ɨ maʼ a zɛrə a mu sagɨrə wu ngwi ɨ soŋ ngə́, “Nə nɨ adzaŋ za bɨ ghɨnɨ tsənkɨ ntáʼmbagə wu wiəwi Babilɔn nɨ abə́ŋ adaʼ ziŋ ə, á bɨ láʼ nkeʼ a wɛrə bə ndze.

²²Bɨ láʼ keʼ bə ndzuʼ ɨkom wa bɨ buʼnɨ nɨ mɨloŋ mɨ aŋantɨ nkwiʼtɨ wu nji ɨbɛn, wu nɨbaŋə nkwiʼtɨ wu ntaŋ a mu ntáʼmbagə wu wi məwiŋ ə! Bɨ láʼ keʼ bə ndzɛn a ŋwɔn afaʼ a nye abó afaʼ zə tsɛrə ɨwu; bɨ láʼ keʼ bə ndzuʼ ngɔʼə abán ə!

²³Bɨ láʼ keʼ bə ndze nkaʼ wa bɨ chwuʼnɨ ɨwu; bɨ láʼ keʼ bə ndzuʼ nji bɨmɨngən abɔʼnɨ bɨlóm bɨ mɨngən ɨwu ə. Bɨntaŋ mɨtan ɨbɨŋ tə́n ntsa bɨtsum a mu mbyi, nɨ támtɨ́ ɨbɛn bɨ atuəshe bɨtsum nɨ afu a ɨfusɨ azɨŋ ə!”

²⁴Bɨ nɨ́ŋ ngɨ́ʼ a nye Babilɔn lá mbɨ́ʼ ngə́ bɨ zhwítɨ́ ntóm Ŋwi abɔʼnɨ ɨbɛn bɨ Ŋwi a mu ntáʼmbagə wu wi wa; abɔʼnɨ ɨbɛn bɨtsum ba bɨ zhwitɨnə atuəshe.